ပြည်သူများအပေါ်အနိုင်ကျင့်နေသည့် ရွှေဘိုမြို့က အုပ်ချုပ်ရေးမှူး ပစ်ခတ်ခံရပြီးသေဆုံး
စစ်ကိုင်းတိုင်း ၊ ရွှေဘိုမြို့ အမှတ်(၈)ရပ်ကွက်တွင်စစ်ကောင်စီမှ ခန့်အပ်ထားပြီး ပြည်သူများအပေါ်အနိုင်ကျင့်နေသည့် အုပ်ချုပ်ရေးမှူးကို သေနတ်ဖြင့် ပစ်ခတ်ရှင်းလင်းခဲ့ကြောင်း မဟူရာ ရွှေဘိုသား တပ်ဖွဲ့ထံမှ သိရသည်။
အုပ်ချုပ်ရေးမှူး ဘိုမြင့် ကို တစ်ပတ်ခန့်အချိန်ယူ စောင့်ကြည့်ခဲ့ပြီးနောက် မေလ ၂၃ရက် ယနေ့ နံနက် ၈နာရီ ၁၅မိနစ်တွင် ဈေးဝယ်လာသည့်အချိန်၌ ရှင်းလင်းခဲ့ ခြင်းဖြစ်ကြောင်းဆိုသည်။
“ကျနော်တို့ အချိန်ယူစောင့်ကြည့်ခဲ့ပြီးမှ ဒီနေ့မနက်ဈေးဝယ်လာတဲ့အချိန်မှာ ဈေးအနောက်ဘက်လမ်းအကွေ့မှာ အနီးကပ်ပစ်ခတ်ရှင်းလင်းခဲ့တာပါ” ဟု မဟူရာ ရွှေဘိုသား တာဝန်ရှိသူတစ်ဦး ကပြောသည်။
အဆိုပါအုပ်ချုပ်ရေးမှူးသည် မြို့ပြ UG များ၏ တည်နေရာကို သတင်းပေးခြင်း ၊ ဧည့်စာရင်းတိုင်သူများကို ငွေကြေးအဆမတန်တောင်းခံခြင်း ၊ ပြည်သူများအပေါ်တွင် အနိုင်ကျင့် မိုက်ရိုင်း စော်ကားသည့်လုပ်ရပ်များ ပြုလုပ်ခဲ့သည့်အတွက် ရှင်းလင်း ခဲ့ရခြင်းဖြစ်ကြောင်း ဆိုသည်။
၎င်းအား လုပ်ကြံရန်ပြင်ဆင်ချိန်တွင် ဘိုမြင့်မှ သေနတ်ဖြင့် ပြန်လည် ပစ်ခတ်ရန် ကြိုးစားသဖြင့် အချိန်မီ လက်ဦးမှုယူပြီး ပစ်ခတ်ခဲ့ရကြောင်းသိရသည်။
အုပ်ချုပ်ရေးမှူးအား ပစ်ခတ်ပြီးနောက် ငါးမိနစ်ခန့်အကြာတွင် စစ်ကောင်စီတပ်သားများ နာရေးကားဖြင့်ရောက်လာကာ သေနတ်ဖြင့် ရမ်း သန်းပစ်ဖောက်ပြီး အလောင်းကို သယ်သူသွားကြောင်း မဟူရာ ရွှေဘိုသားအဖွဲ့တာဝန်ရှိသူက ဆက်လက်ပြောဆိုသည်။
အဆိုပါလုပ်ကြံမှုကို မဟူရာရွှေဘိုသားအဖွဲ့နှင့်အတူ ဗိုလ်မိကျောင်း ၊ Snake Eyes ၊ ဒေါင်းစစ်သည် ၊ ဒေါင်းမာန် (Shwe Bo ) နှင့် တိုက်နယ် (၂) တပ်ပေါင်းစုမှ လုပ်ဆောင်ခဲ့ခြင်းဖြစ်ပြီး ကာကွယ်ရေးပူးပေါင်းတပ်ဖွဲ့ဝင်များ အထိအခိုက်မရှိ ဘေးကင်း လုံခြုံသောနေရာသို့ ပြန်လည်ရောက်ရှိခဲ့ပြီဖြစ်ကြောင်း သိရှိရသည်။
မေလ ၁၈ရက် မွန်းလွဲ ၁နာရီ ၄၀မိနစ်အချိန်ခန့်တွင်လည်း ရွှေဘိုမြို့ နန်းတော်ရာ အတွင်းတွင် သောက်စားမူးယစ်နေသည့် စစ်ကောင်စီတပ် သားများထဲသို့ မဟူရာရွှေဘိုသား နှင့် မဟာမိတ်များပူးပေါင်း၍ လက်ပစ်ဗုံး နှစ်လုံး ပစ်ခဲ့ရာ စစ်ကောင်စီတပ်သား ခုနစ်ဦး သေဆုံးခဲ့ကြောင်း သိရှိရသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 