စစ်ကောင်စီကမ်းလှမ်းမှုကို ယုံကြည်ပြီး ခံဝန်ထိုးရန် ရဲစခန်းသို့သွားသည့် အငြိမ်းစားကျောင်းဆရာကြီး ၁ ဦး စစ်ကြောရေးတွင် သတ်ဖြတ်အလောင်းဖျောက်ခံရ
နေရပ်သို့ ပြန်လာကြရန် စစ်ကောင်စီက နိုင်ငံပိုင်မီဒီယာမှတဆင့် ကြေညာချက်ကို ယုံကြည်ပြီး ခံဝန်ထိုးရန် ရဲစခန်းသို့ သွားရောက်ခဲ့သည့် တောင်သာမြို့နယ်မှ အငြိမ်းစားကျောင်းဆရာကြီးတစ်ဦးကို ရဲတပ်ဖွဲ့ကဖမ်းဆီးပြီး စစ်ကြောရေးတွင် သတ်ဖြတ်ကာ အလောင်းဖျောက်လိုက်ကြောင်း တောင်သာမြို့ခံများက ပြောသည်။
မန္တလေးတိုင်းဒေသကြီး၊တောင်သာမြို့နယ်၊ ရုံးပင်ကျေးရွာမှ အသက် ၇၀ အရွယ်ခန့် အငြိမ်းစားကျောင်းဆရာဦးသောင်းရီသည် စစ်ကောင်စီစစ်ကြောရေးတွင် သတ်ဖြတ်ခံလိုက်ရခြင်းဟု သိရှိရသည်။
” စစ်ကောင်စီက နိုင်ငံပိုင်မီဒီယာကနေ ဖိတ်ခေါ်လို့ ဆရာကြီးက အသက်လည်းကြီးပြီမို့ အေးဆေးနေချင်လို့ ရဲစခန်းမှာ ခံဝန်သွားထိုးတာ။ ရဲ က ဖမ်းပြီး စစ်ကောင်စီဆီအပ်တယ်။ စစ်တပ်နဲ့ရဲက စစ်ကြောရေးမှာ သတ်ပစ်လိုက်တယ်”ဟု တောင်သာမြို့ခံတစ်ဦးက မဇ္ဈိမကိုပြောသည်။
အငြိမ်းစားကျောင်းဆရာ ဦးသောင်းရီသည် နွေဦးတော်လှန်ရေးအစတွင် တက်ကြွစွာပါဝင်ခဲ့သူတစ်ဦးဖြစ်ပြီး ၎င်း၏ နေအိမ်အား ၂၀၂၂ ခုနှစ်တွင် စစ်ကောင်စီက လာရောက်ရှာဖွေခဲ့ကြောင်း၊ လူက တိမ်းရှောင်နိုင်ခဲ့သော်လည်း ဦးသောင်းရီပိုင်ဆိုင်သည့် ကားတစ်စီးအား စစ်ကောင်စီက သိမ်းဆည်းသွားပြီး ထိုအချိန်မှစ၍ နေအိမ်တွင် နေမရဲတော့ဘဲ ထွက်ပြေးနေခဲ့ရသည်ဟုသိရသည်။
ပြီးခဲ့သည့် မေလ ၆ ရက်နေ့တွင် ဦးသောင်းရီသည် စစ်ကောင်စီတပ်၏ အလင်းဝင်ရန် နိုင်ငံပိုင်မီဒီယာများမှတဆင့် ကမ်းလှမ်းချက်ကြောင့် ခံဝန်ထိုးရန် ဇနီးဖြစ်သူနှင့်အတူ တောင်သာမြို့မရဲစခန်းသို့ သွားခဲ့ရာ ဇနီးဖြစ်သူကို ပြန်လွှတ်ပေးခဲ့သော်လည်း ဦးသောင်းရီအားဖမ်းပြီး စစ် ကြောရေးသို့ ပို့ဆောင်လိုက်ကြောင်း ရုံးပင်ကျေးရွာဒေသခံတစ်ဦးကပြောသည်။
” ရဲစခန်းကို သွားပြီး ခံဝန်ထိုးတဲ့နေကစ အဖမ်းခံရပြီးဆရာကြီးကို ပြန်မလွှတ်တော့တာ။ သေတာတောင် မသိရဘဲ သွားမေးမှ သိရတာ” ဟု ၎င်းက ပြောသည်။
မေလ ၁၈ ရက်နေ့တွင် ဦးသောင်းရီ သေဆုံးသည့်သတင်းထွက်လာ၍ သွားရောက်မေးမြန်းခဲ့သော်လည်း ယင်းနေ့တွင် မသိရဘဲ သေဆုံးသွားကြောင်းနှင့် သင်္ဂြိုလ်လိုက်ကြောင်းကို မေလ ၂၃ ရက်နေ့မှသာ မိသားစုထံ အကြောင်းကြားလာသည်ဟု သတင်းရရှိသည်။
” ၂၃ ရက်နေ့မှာပဲ မိသားစုကို အကြောင်းကြားလာတယ်။ သူတို့ကတော့ ရိုးရိုးရှင်းရှင်းလေးပဲ၊ ကျည်ထွက်တယ်ပေါ့ဗျာ။ မိသားစုက အလောင်းပြန် တောင်းတော့ သူတို့ဘက်က အလောင်းမရဘူး။ သင်္ဂြိုလ်လိုက်ပြီလို့ပြောတယ်။ မေလ ၂၄ ရက်နေ့မှာ မိသားစုက အလောင်းပြန်မရဘဲနဲ့ စ တိသဘောမျိုးနဲ့ သက်ပျောက်ဆွမ်းနဲ့ သင်္ဂြိုလ်တဲ့အပိုင်း လုပ်လိုက်ရတာပေါ့” ဟု တောင်သာမြို့ရှိ သတင်းရင်းမြစ်တစ်ဦးက မဇ္ဈိမကို ပြော သည်။
အထက်ပါဖြစ်ရပ်နှင့် ပတ်သက်၍ မေးမြန်းရန်တောင်သာမြို့မရဲစခန်းကို အကြိမ်ကြိမ်ဆက်သွယ်ခဲ့သော်လည်း မရခဲ့ပေ။
စစ်ကောင်စီတပ်ဖွဲ့ဝင်များသည် ဦးသောင်းရီအား ဖမ်းဆီးခဲ့သည့် အချိန်မှစ၍ မိသားစုနှင့် အဆက်အသွယ်ပေးမလုပ်ခဲ့ဘဲ မိသားစုဝင်များသည် ဦးသောင်းရီကို မေလ ၆ ရက်က အသက်ရှင်လျက် နောက်ဆုံးတွေ့ခဲ့ရခြင်းဟု သိရသည်။
အသက် ၇၀ ဝန်းကျင်ရှိပြီဖြစ်သော အငြိမ်းစားကျောင်းဆရာကြီး ဦးသောင်းရီသည် ၎င်း၏ အသက်အရွယ်အရ လက်ကျန်အချိန်များအား အေး ဆေးစွာဖြတ်သန်းလို၍ တော်လှန်ရေးတွင် ပါဝင်နေသူများအား အလင်းဝင်ရန် စစ်ကောင်စီ၏ ကမ်းလှမ်းချက်များကို ယုံကြည်ကာ တောင်သာမြို့မရဲစခန်းသို့ သွားရောက်ခဲ့ရာမှ ယခုကဲ့သို့ အသက်သေဆုံးခဲ့ရကြောင်း တောင်သာမြို့ခံတစ်ဦးကပြောသည်။
စစ်အာဏာရှင်တော်လှန်ရေးလုပ်ဆောင်၍ အမှုဖွင့်ခံထားရသူများ၊ ၀ရမ်းထုတ်ခံရသူများ နေရပ်ပြန်လာရန်နှင့် ပြစ်မှုအပေါ် မူတည်၍ ဖြေလျော့ပေးမည်ဖြစ်ပြီး PDFများလည်း လက်နက်ခဲယမ်းများ သယ်ယူ၍ အလင်းဝင်လာပါက ဆုကြေး ပေးမည်ဟုလည်း စစ်ကောင်စီက နိုင်ငံပိုင်မီဒီယာမှတဆင့် မကြာခဏ ထုတ်ပြန်ကြေညာနေသည်။ အဆိုပါကြေညာချက်ကို မယုံကြည်ကြရန် တော်လှန်ရေးအင်အားစုများကသ တိပေးနေသည်။
” မတရား အာဏာသိမ်းထားတဲ့အဖွဲ့က မတရားလုပ်ငန်းတွေကိုပဲ ကျူးလွန်နေတာပဲ ဖြစ်တဲ့အတွက် ဒီလိုဖိတ်ခေါ်ချက်တွေက အကျုံးမဝင်ဘူး။ ယုတ္တိမရှိဘူး။ ယုံစရာအကြောင်းမရှိဘူးပေါ့လေ။ ဒီထုတ်ပြန်ချက်တွေက ကျွန်တော်တို့မြို့နယ်အတွက်တော့ သာဓကဖြစ်သွားတာပေါ့လေ ” ဟု တောင်သာမြို့ခံတစ်ဦးကပြောသည်။ mizzima
SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS 