Author Archives: ချစ်သဲညှာ

မြိတ်တွင် ပျူစောထီး စစ်သင်တန်းတက်ရောက်ရန်သွားသည့်ကား မိုင်းဆွဲတိုက်ခိုက်ခံရသဖြင့် ၁ ဦး သေဆုံးပြီး ၅ ဦး ထက်မနည်း ထိခိုက်ဒဏ်ရာရ

တနင်္သာရီတိုင်း မြိတ်မြို့နယ် မြိတ်လေဆိပ်အနီး ကံဖျားမြေနီလမ်းထိပ်တွင် ယနေ့ ဩဂုတ် လ ၁၆ ရက်နေ့ နံနက်ပိုင်းက စစ်သင်တန်းတက်ရန်သွားရောက်နေသည့် စစ်ကောင်စီလက်အောက်ခံ ပြည်သူ့စစ်အဖွဲ့မှကား မိုင်းဆွဲတိုက်ခိုက်ခံရမှုကြောင့် တစ်ဦးသေဆုံးကာ ငါးဦးထက်မနည်း အပြင်းအထန် ဒဏ်ရာရရှိသွားကြောင်း မြိတ်ပြည်သူ့ကာကွယ်ရေးအဖွဲ့(ပကဖ)မှ သိရသည်။

အဆိုပါ စစ်ကောင်စီလက်အောက်ခံ ပြည်သူ့စစ်အဖွဲ့ပါကားကို ဩဂုတ်လ ၁၆ ရက်နေ့ နံနက် ၆ နာရီ ခန့်တွင် မိုင်းဆွဲတိုက်ခိုက်ခံခဲ့ရခြင်းဖြစ် ကြောင်း သိရသည်။

မြိတ်ပြည်သူ့ကာကွယ်ရေးအဖွဲ့(ပကဖ)မှ တာဝန်ရှိသူတစ်ဦးက “ကျွန်တော်တို့ နန်းထိုက်အောင်စစ်ဆင် ရေးအနေနဲ့ ပြုလုပ်ခဲ့တာဖြစ်တယ်။ စစ်တပ်ကသင်တန်းပို့ချပြီး လက်နက်ကိုင်သောင်းကြမ်းနေလို့ အခုလို မိုင်းဆွဲ တိုက်ခိုက်ခဲ့တာဖြစ်တယ်” ဟု ပြောသည်။

ထို့ပြင် မြိတ်မြို့သို့ စစ်ကောင်စီအဖွဲ့မှ အကြီးအကဲတစ်ဦးရောက်ရှိနေကြောင်းသိရပြီး မြို့ပေါ်တွင် လုံခြုံ ရေးတင်းကြပ်ထားကာ မြိတ်ကမ်းနားလမ်းတွင်လည်း စစ်ကောင်စီတပ်သား အများပြား လုံခြုံရေးချထား ကြောင်း မြို့ခံများထံမှ သိရသည်။

လက်ရှိတွင် မိုင်းဆွဲတိုက်ခိုက်ခံရမှုကြောင့် ထိခိုက်ဒဏ်ရာရရှိခဲ့သည့် ပြည့်သူ့စစ်အဖွဲ့ဝင်များကို မြိတ် စစ်ဆေးရုံသို့ ပို့ဆောင်ကာ ဆေးကုသမှုခံနေရကြောင်း သိရသည်။ mizzima

AA နှင့်တိုက်ပွဲတွင် သေဆုံးသော စစ်သား ၃၇ ဦးတွင် ခလရ ၂၇၀ တပ်ရင်းမှူး ဒုဗိုလ်မှူး ကြီး မိုးဇော်၊ ခမရ ၅၃၇ ဗိုလ်မှူးသက်နိုင်ဦး၊ ခလရ ၂၀ မှ ဗိုလ်မှူး တို့ ပါဝင်

ရခိုင်ပြည်နယ်နှင့်ပလက်ဝေ ဒေသတို့တွင် ဩဂုတ် ၁၃ ရက်နေ့ ဖြစ်ပွာ‌ေးသာ AA နှင့်တိုက်ပွဲတွင် သေဆုံးသော စစ်သား ၃၇ ဦးတွင် ခလရ ၂၇၀ တပ်ရင်းမှူး ဒုဗိုလ်မှူး ကြီး မိုးဇော်၊ ခမရ ၅၃၇ ဗိုလ်မှူးသက်နိုင်ဦး၊ ခလရ ၂၀ မှ ဗိုလ်မှူး တို့ ပါဝင် ကြောင်း သိရှိရသည်။

မောင်တောမြို့နယ်၊ ကျောက်ပန်းဒူကျေးရွာအနီး တိုက်ပွဲတွင် ဒကစ (စစ်တွေလက်အောက်ခံ) ခလရ ၂၇၀ တပ်ရင်းမှူးဖြစ်သူ ဒုဗိုလ်မှူးကြီး မိုးဇော်၊ ရသေ့ တောင်မြို့နယ် ဒုံးပိုက်ကျေးရွာ အနီးတိုက်ပွဲတွင် ရ သေ့တောင် အခြေစိုက် ခမရ (၅၃၇) ယာယီတပ်ရင်းမှူး ဗိုလ်မှူး သက်နိုင်ဦး၊ ရက္ခိုင်-ဘင်္ဂလားနယ်စပ် မိုင်တိုင် ၄၀ ဖက် တိုက်ပွဲတွင် ဒကစ (စစ်တွေလက်အောက်ခံ) ခလရ ၂၀ ဗိုလ်မှူးတစ်ဦး တို့ သေဆုံးခဲ့ကြသည်။

ဩဂုတ် ၁၃ ရက်နေ့ အကြမ်းဖက်စစ်တပ်နှင့် ရက္ခိုင့်တပ်တော်တို့ အကြား ရက္ခိုင်ဒေသတွင်း ၃ နေရာနှင့် ပလက်ဝဒေသတွင်း ၁ နေရာ စုစု ပေါင်း ၄ နေရာတွင် တိုက်ပွဲတွေ ပြင်းထန်စွာ ဖြစ်ပွားခဲ့ပြီး စစ်ကောင်စီဘက်မှ ၃၇ ဦးသေဆုံးခဲ့ကြောင်း ၊ လက်နက်အများအပြား သိမ်းဆည်းရမိကြောင်း သိရှိရသည်။

AA အနေဖြင့်လည်း စစ်ကောင်စီတပ်၏ စစ်ဆင်ရေး၊ ထိုးစစ်များကို မိတ်ဖက်အဖွဲ့အစည်းများ၊ ညီနောင်မဟာမိတ်အဖွဲ့ အစည်းများ၊ ရခိုင် ပြည် သူလူထုတစ်ရပ်လုံးနှင့် ဟန်ချက်ညီညီပူးပေါင်းကာ ပြန်လည်ခုခံ တိုက်ခိုက်သွားမည်ဖြစ်ကြောင်း တရားဝင် ကြေညာထားသည်။ khit thit

ဒေါ်အောင်ဆန်းစုကြည်အား ‘မတရား’ ပြစ် ဒဏ်စီရင်ခြင်းကို အီးယူ ရှုတ်ချ 

တရားရုံးမှနေ၍ ဒေါ်အောင်ဆန်းစုကြည်အား အကျင့်ပျက်ခြစားမှုဖြင့် ထောင်ဒဏ် ခြောက်နှစ် ‘မတရားသဖြင်’ ချမှတ်လိုက်ခြင်းကို အီးယူ နိုင်ငံခြားမူဝါဒအကြီးအကဲ ဂျိုးဆက် ဘော်ရဲလ်က တနင်္လာနေ့တွင် ရှုတ်ချပြီး ချက်ချင်းပြန်လွှတ်ရန် တောင်းဆိုသည်။ 

ယခု နောက်ဆုံး စီရင်ချက်ကြောင့် ဖြုတ်ချခံ အရပ်သားခေါင်းဆောင် ဒေါ်အောင်ဆန်းစုကြည်အနေဖြင့် စုစုပေါင်း ထောင်ဒဏ် ၁၇ နှစ် ချမှတ်ခံထားရခြင်း ဖြစ်သည်။ 

“ဒေါ်အောင်ဆန်းစုကြည်ကို နောက်ထပ် ထောင်ဒဏ် ခြောက်နှစ် မတရားသဖြင့် ချမှတ်တာကို ကျွန်တော် ရှုတ်ချပါတယ်”ဟု ဘော်ရဲလ်က တွစ်တာတွင် ရေးသားပြီး မြန်မာစစ်အာဏာသိမ်းအုပ်စုအနေဖြင့် ၎င်းအား ချွင်းချက်မရှိ ချက်ချင်း ပြန်လွှတ်ရန် တိုက်တွန်းသည်။ 

ထိုပြင် အာရှမြန်မာနိုင်ငံ၏ စစ်အာဏာသိမ်းအုပ်စုအနေဖြင့် “နိုင်ငံရေးအကျဉ်းသား အားလုံးကို ပြန်လွှတ်ရန်နှင့် ပြည်သူများ၏ ဆန္ဒကို လေး စားရန်”လည်း ၎င်းက တိုက်တွန်းသည်။ 

ဒေါ်အောင်ဆန်းစုကြည်အား အကျင့်ပျက်ခြစားမှု၊ သွေးထိုးလှုံ့ဆော်မှု၊ COVID-19 စည်းမျဉ်း ချိုးဖောက်မှုနှင့် ဆက်သွယ်ရေးဥပဒေ ချိုးဖောက်မှုတို့ဖြင့် ယခင်က ထောင်ဒဏ် ၁၁ နှစ် ချမှတ်ထားပြီးလည်း ဖြစ်သည်။ 

ပြီးခဲ့သည့်နှစ် ဖေဖော်ဝါရီလက အသက် ၇၇ နှစ်ရှိ ဒေါ်အောင်ဆန်းစုကြည်၏ အစိုးရကို စစ်ဗိုလ်ချုပ်များက ဖြုတ်ချကာ ၎င်းအား ဖမ်းဆီးလိုက်ခြင်းကြောင့် မြန်မာနိုင်ငံ၏ ပွင့်သစ်စ ဒီမိုကရေစီ အဆုံးသတ်သွားခဲ့သည်။ 

ဒေါ်အောင်ဆန်းစုကြည်အား လျှို့ဝှက်ဥပဒေ ချိုးဖောက်မှု၊ အကျင့်ပျက်ခြစားမှုနှင့် ရွေးကောက်ပွဲ မသမာမှုများ အပါအဝင် စွဲချက်များစွာဖြင့် တရားစွဲဆိုထားရာ အားလုံးသော အမှုများအတွက် စီရင်ခံပါက ၎င်းအနေဖြင့် ထောင်ဒဏ် ဆယ်စုနှစ်များစွာ ချမှတ်ခံရနိုင်သည်။ 

၂၀၂၁ စစ်အာဏာသိမ်းမှုကြောင့် မြန်မာနိုင်ငံအတွင်း ကျယ်ပြန့်သော ဆန္ဒပြမှုများနှင့် မတည်ငြိမ်မှုများ ဖြစ်ပွားပေါ်ပေါက်ပြီး တော်လှန်ရေး အင်အားစုများ ပေါ်ပေါက်ကာ တိုက်ပွဲများ ပြန်လည်ဖြစ်ပွားလာခဲ့သည်။  mizzima

မြိုင်တွင် စစ်ကောင်စီတပ်ဖွဲ့များကို မိုင်း ၂၃ လုံးဖြင့် မိုင်းခွဲတိုက်ခိုက်မှု စစ်သား ၆ ဦးသေ ဆုံး

မကွေးတိုင်း၊ မြိုင်မြို့နယ်အတွင်း၌ အကြမ်းဖက်စစ်ကောင်စီယာဉ်တန်းနှင့် ကင်းပုန်း များကို မြိုင်မြို့နယ် ပြည်သူ့ကာကွယ်ရေးတပ်ဖွဲ့က မိုင်း ၂၃ လုံးဖြင့် ယမန်နေ့နှင့် ယနေ့ ၂ ရက် ဆက်တိုက် ဖောက်ခွဲတိုက်ခိုက်ရာ စစ်သား ၆ ဦးသေဆုံးပြီး ၃ ဦး ဒဏ်ရာရကြောင်း သတင်းရရှိသည်။

မြိုင်မြို့နယ်၊ တဲကြီးနှင့် နယ်သတ်ရွာကြားတွင် ထပ်မံ ကင်းပုန်းလာဝပ်သော စစ်ကောင်စီတပ်ဖွဲ့ကို ယနေ့ ဩဂုတ်လ ၁၆ ရက် နံနက် ၇ နာရီ ၁၅ မိနစ်တွင် မိုင်း ၉ လုံးဖြင့် ထပ်မံဖောက်ခွဲရာ စစ်သား ၃ ဦးသေဆုံးပြီး ၂ ဦး ဒဏ်ရာရကြောင်း မြိုင်မြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ထားသည်။

ထို့ပြင် ယမန်နေ့ ဩဂုတ်လ ၁၅ ရက် နေ့လယ် ၁ နာရီ ၁၇ မိနစ်တွင် တဲကြီးရွာနှင့် နယ်သတ်ရွာကြားတွင် ကမ္မမှ ကျောက်ခွက်-ဖလံကိုင်း ဘက်သို့ ရိက္ခာပို့သော စစ်ကား ၂ စီးကို မိုင်း ၁၄ လုံးဖြင့် ဖောက်ခွဲတိုက်ခိုက်ရာ ထိခိုက်မှုရှိကြောင်း၊ အဆိုပါ အနီးဝန်းကျင်တွင်ပင် ကင်းပုန်းဝပ်နေသော စစ်ကောင်စီတပ်ဖွဲ့ကို ထပ်မံ မိုင်းခွဲရာ ၃ ဦးသေဆုံးပြီး ၁ ဦး ဒဏ်ရာရကြောင်း မြိုင်မြို့နယ် ပြည်သူ့ကာကွယ်ရေးတပ်ဖွဲ့က သတင်းထုတ် ပြန်သည်။ khit thit

မြန်မာပြည်တွင်းဆန်စျေးများ ထပ်မံမြင့်တက်လာ

မြန်မာပြည်တွင်းမှာ ဒေါ်လာဈေးတက်တဲ့ ဂယက်ကြောင့် ဆန်ဈေးနှုန်း အမြင့်ဆုံး ရောက်ရှိနေချိန်  အခုထက် စျေးမြင့်တက်လာမှာ၊ ဆန်ပြတ်လပ်မှာကို စိုးရိမ်ပြီး မလိုအပ်ဘဲ ကြိုတင်ဝယ်ယူ စုဆောင်းမှုတွေကြောင့် ပြည်တွင်းဆန်စျေးတွေ ထပ်မံ မြင့်တက်လာပါတယ်။

ရန်ကုန်မြို့က ဆန်လက်လီရောင်းချသူတဦးက “စျေးကတော့ တပတ်တစျေးပဲ၊ တောက်လျှောက် တပြည်ကို ကျပ် ၁၀၀၊ ၂၀၀ တက်နေတာ။ ဆန် order ကလည်း ဒီရက်ပိုင်းတွေမှာ အတော်တက်လာတယ်။ တချို့အိမ်တွေဆို သုံးအိတ်လောက်ထိ ဝယ်တယ်” လို့ ပြောပါတယ်။

မလိုအပ်ဘဲ ဆန်ကြိုတင်ဝယ်ယူစုဆောင်းမှုတွေက ဈေးကွက်ကို မတည်မငြိမ်ဖြစ်စေပြီး စျေးနှုန်းကို ထပ်မံမြင့်တက်လာစေတယ်လို့ စျေးကွက်စောင့်ကြည့်သူတွေက သုံးသပ်ကြပါတယ်။

စျေးကွက်စောင့်ကြည့်သူတဦးက “ရွှေဘိုအတင်းစွတ်ဝယ်တော့ ရွှေဘိုတက်တဲ့နောက် ဧရာဝတီ ပေါ်ဆန်းတွေလည်း လိုက်တက်၊ စားသုံးသူတွေက လုဝယ်၊ ဒိုင်တွေက လုသိမ်း၊ ဈေးတွေက စွတ်တက်၊ ပစ္စည်းကမထွက်၊ လုံးလည်ချာလည်လိုက်နေတာပဲ။ ဒိုင်တွေက တက်မှာသိတော့ ကြိုဝယ်ပြီး လှောင်တာပေါ့။ အဲ့ဒီမှာတင် ပစ္စည်းကပြတ်၊ အိမ်စားတွေ အများကြီးဝယ်ပြီး သိမ်းထားရင်တော့ ပိုတက်ပြီး ပစ်ရတာပဲဖြစ်မယ်။ အတင်းစွတ်ဝယ်တော့ ဒိုင်တွေက အကြိုက်တွေ့ပြီး ဈေးတွေ အော်ပျံကုန်ရော။ ဆန်မပြတ်ဘူး။ အတင်းစွတ်ဝယ်ရင် တက်ရမယ့် ဈေးထက် ပိုတက်လိမ့်မယ်” လို့  ပြောပါတယ်။

ရန်ကုန်မြို့၊ ဝါးတန်းဆန်ကုန်စည်ဒိုင်ရဲ့ စျေးနှုန်းစာရင်းအရ သြဂုတ် ၁၅ ရက်မှာ ရွှေဘိုပေါ်ဆန်း တအိတ်ကို အနိမ့်ဆုံး ၇၈,၀၀၀ ကျပ်ကနေ အ မြင့် ဆုံး ၉၀,၀၀၀ ကျပ်ထိ စျေးပေါက်ပြီး မြောင်းမြပေါ်ဆန်း တအိတ်ကို ၆၅,၀၀၀ ကျပ်၊ ဖျာပုံပေါ်ဆန်း တအိတ်ကို ငွေကျပ် ၆၀,၀၀၀ ကနေ ၆၂,၀၀၀ အကြား၊ ရက် ၉၀ ဆန်တအိတ်ကို ကျပ် ၄၅,၀၀၀ ကနေ ၄၈,၀၀၀ ကြား အသီးသီးရှိပါတယ်။

အမျိုးအစားအလိုက် ဆန်တအိတ်ကို ငွေကျပ် ၁,၀၀၀ ကနေ ၇,၀၀၀ အထိ ရက်ပိုင်းအတွင်း ထပ်မံမြင့်တက်လာခဲ့ပြီး ရွှေဘိုပေါ်ဆန်း အမျိုးအစား ဆန်ဈေးနှုန်းတွေက တအိတ်ကို ငွေကျပ် ၃,၀၀၀ ကနေ ၅,၀၀၀ အကြားအထိ စျေးထပ်မံ မြင့်တက်လာပါတယ်။

တလအတွင်း ပေါ်ဆန်းဆန်တအိတ်ကို ပျမ်းမျှ ကျပ် ၁၀,၀၀၀ ဝန်းကျင် ထပ်မံမြင့်တက်ခဲ့ပြီး ရွှေဘိုပေါ်ဆန်းကတော့ တအိတ်ကို ကျပ်၂၀,၀၀၀ ကျော် ထပ်မံမြင့်တက်လာပါတယ်။

ရန်ကုန်မြို့နေ ပြည်သူတဦးက “ဆန်က တက်ပြီးရင်း တက်ရင်းပဲ။ အစစအရာရာ ကုန်စျေးနှုန်းတက်နေချိန်မှာ ဆန်စျေးထပ်တက်တော့ ဝင်ငွေနည်းတဲ့သူတွေ ပိုခက်ခဲစေတယ်” လို့ ပြောပါတယ်။

အခုလို ဆန်စျေးတွေ မြင့်တက်လာရတာက စျေးကွက်ရဲ့ ဝယ်လိုအားအပြင် ဒေါ်လာဈေး ဂယက်ကြောင့် ထုတ်လုပ်မှု ကုန်ကျစရိတ်နဲ့ သွင်းအားစုဈေးနှုန်း မြင့်တက်လာမှု၊ အထွက်နှုန်းလျော့ကျမှု စတဲ့အချက်တွေနဲ့လည်း သက်ဆိုင်နေတယ်လို့ သုံးသပ်ထားကြပါတယ်။

ဆန်စပါးအသင်း တာဝန်ရှိသူကတော့ ဆန်ဈေးနှုန်း မြင့်တက်နေပေမဲ့ ပြည်တွင်းမှာ ဆန်လုံလောက်မှု ရှိတဲ့အတွက် စိုးရိမ်စရာမလိုဘူးလို့ ပြည် တွင်းမီဒီယာတခုကို ပြောကြားထားပါတယ်။ DVB

ခင်ဦး၊ ဝန်းကြီးကျေးရွာမှ ရွှေတောသို့ အလုပ်သွားလုပ်မည့် လူငယ် ၇ ဦးကို စစ်တပ်က ဖမ်း ဆီး သတ်ဖြတ်ပြီး ရုပ်အလောင်းများကို လမ်းဘေးတွင် စွန့်ပစ်

စစ်ကိုင်းတိုင်း ရွှေဘိုခရိုင် ခင်ဦးမြို့နယ် ဝန်းကြီးကျေးရွာမှ လူငယ် ၇ ဦးကို အကြမ်းဖက် စစ်တပ်က ဖမ်းဆီး သတ်ဖြတ်ပြီး ရုပ်အလောင်းများကို လမ်းဘေးတွင် စွန့်ပစ်ခဲ့ကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။

အကြမ်းဖက် စစ်တပ် ဖမ်းဆီး သတ်ဖြတ်ခဲ့သော ဝန်းကြီးရွာသား လူငယ် ၇ ဦးမှာ ကျော်သူဟိန်း အသက် ၁၉ နှစ်၊ ကိုဇော်ဟိန်း အသက် ၁၅ နှစ်၊ ကို မင်းကို အသက် ၂၀ နှစ်၊ ကိုမင်းညီ အသက် ၁၄ နှစ်၊ ကိုဖြိုးငွေစိုး အသက် ၁၉ နှစ်၊ ကိုနိုင်းနိုင်း အသက် ၂၂ နှစ်နှင့် ကိုသူရထွန်း အသက် ၂၁ နှစ်တို့ ဖြစ်ကြောင်း သိရသည်။

လူငယ် ၇ ဦးသည် သြဂုတ်လ ၁၄ နေ့ နံနက်ပိုင်းတွင် ဝန်းကြီးရွာမှ ရွှေဘိုကားကွင်းသို့ သွားရောက်ခဲ့ကာ မြစ်အရှေ့ဘက် ရွှေတောသို့ အလုပ် လုပ်ကိုင်ရန် သွားရောက်စဥ် ရွှေဘို ကျောက်မြောင်းလမ်း အမှတ်၂ ကျောင်း ရှေ့ရှိ အကြမ်းဖက် စစ်တပ် စစ်ဆေးရေး ဂိတ်တွင် ဖမ်းဆီးခံရခြင်းဖြစ်ကြောင်း သိရသည်။

ထိုသို့ ဖမ်းဆီးခံရပြီးနောက် လူငယ် ၇ ဦး အကြမ်းဖက် စစ်တပ်က အမှတ် ၈ စစ်တပ် လေ့ကျင့်ရေး ကျောင်းသို့ ခေါ်ဆောင်သွားပြီး နှိပ်စက် သတ်ဖြတ်ကာ ရုပ်အလောင်းများကို ရသာကျေးရွာ အနောက်ဘက် ဇရပ်အနီးတွင် လာရောက် စွန့်ပစ်သွားပြီး ဒေသခံ ပြည်သူများက ရုပ်အ လောင်းများကို သြဂုတ်လ ၁၅ ရက်နေ့တွင် တွေ့ရှိခဲ့ခြင်း ဖြစ်ကြောင်း သိရသည်။

” လူငယ် ၇ ဦးကို ဖမ်းဆီးပြီးတဲ့နောက် စစ်ခွေးတွေက လေ့ကျင့်ရေး ၈ ကိုခေါ်ဆောင်သွားပြီး မတရား နှိပ်စက် စစ်ဆေး သတ်ဖြတ်တယ်။ သတ်ဖြတ်ပြီးတော့ ရုပ်အလောင်းတွေကို ရွှေဘိုလေ့ကျင့်ရေး ၈ မြောက်ဘက်မှာရှိတဲ့ ခင်ဦးမြို့နယ် ရသာကျေးရွာ အနောက်ဘက်အထွက် ဗျူဟာလမ်းဘေး ဇရပ်အနီးမှာ ရုပ်အလောင်းတွေကို စွန့်ပစ်သွားတယ်။ ဒေသခံ ပြည်သူတွေက ရုပ်အလောင်းတွေကို သြဂုတ်လ ၁၅ ရက်နေ့ နံနက်ပိုင်းမှာ တွေ့ရှိခဲ့ပြီးတော့ ကျေးရွာကို ပြန်လည် သယ်ဆောင်ပြီး သင်္ဂြိုလ်လိုက်ပြီ” ဟု ဒေသခံ ပြည်သူ တစ်ဦးကပြောဆိုသည်။ khit thit

တနှစ်အတွင်း နွေဦးထီက CDM ၁ သောင်းကျော်ကို ထောက်ပံ့နိုင်ခဲ့၊ မကြာမီ NUGPay စနစ်ဖြင့် ပြန်ဖွင့်မည်

အောင်လံလွှင့်ချီ နွေဦးထီဟာ မနေ့က ဩဂုတ် ၁၅ ရက်မှာ ၁ နှစ်ပြည့်ခဲ့ပြီဖြစ်ပြီး ဒီကာလအတွင်းမှာ CDM သူရဲကောင်း ၁ သောင်းကျော်ကို ထောက်ပံ့နိုင်ခဲ့ပြီးဖြစ်တယ်လို့ ထုတ်ပြန်ပါတယ်။

ပိုပြီးကောင်းမွန်လုံခြုံတဲ့ ဝန်ဆောင်မှုစနစ်ကို ပေးနိုင်ဖို့ နွေဦးထီကို ခေတ္တရပ်နားထားခဲ့တာဖြစ်ပြီး ၁ နှစ်ခရီးအတွင်းမှာ ကြုံတွေ့ခဲ့ရတဲ့ အခက် အခဲစိန်ခေါ်မှုတွေကို ကျော်လွှားနိုင်ဖို့၊ တော်လှန်ရေး အင်အားစုတွေအတွက် အလုံခြုံစိတ်အချရဆုံးဖြစ်တဲ့ NUGpay နဲ့အတူ ပုံစံအသစ်နဲ့ ပြန် လည်ရောင်းချသွားမှာလို့ ဆိုပါတယ်။

နိုင်ငံတကာက နွေဦးထီကိုယ်စားလှယ်တွေ ရောင်းချပေးနေတဲ့ နွေဦးထီ bulk purchase အစီအစဉ်ကိုတော့ မူလပုံစံအတိုင်းဆက်လက် ရောင်း ချပေးနေမှာဖြစ်ကာ အောင်လံလွှင့်ချီနွေဦးထီကို စဉ်ဆက် မပြတ်အားပေးနေကြတဲ့ မိဘပြည်သူတဦးတစ်ယောက်ချင်းစီတိုင်းကို ကျေးဇူးအထူးတင်ရှိကြောင်းလည်း ဖော်ပြထားပါတယ်။

မြန်မာနိုင်ငံရဲ့ ပထမဆုံး Blockchain အခြေပြု  ဒစ်ဂျစ်တယ်ငွေကြေးတမျိုးဖြစ်တဲ့  “ဒစ်ဂျစ်တယ် မြန်မာကျပ်” (DMMK)ကို အမျိုးသားညီ ညွတ်ရေးအစိုးရ(NUG) က ပြည်သူတွေထံ တရားဝင်မိတ်ဆက်ပြီး ထုတ်ပြန်ခဲ့ပြီဖြစ်ကာ NUG အစိုးရ စီမံကိန်း၊ ဘဏ္ဍာရေးနှင့်ရင်းနှီး မြှုပ်နှံမှု ဝန်ကြီးဌာနမှ တာဝန်ယူဆောင်ရွက်တဲ့ ဒစ်ဂျစ်တယ် မြန်မာကျပ် (DMMK) ဟာ တရားဝင် ငွေကြေးတခုဖြင့် ကျောထောက်နောက်ခံပြုထားတဲ့ blockchain နည်းပညာသုံး ဒစ်ဂျစ်တယ် ငွေကြေးတခု ဖြစ်တယ်လို့ ဆိုပါတယ်။

လတ်တလောမှာတော့ NUGPay ဝန်ဆောင်မှုကို ပြည်တွင်း မြန်မာနိုင်ငံမှာသာမက ပြည်ပရောက်မြန်မာတွေ အများစုရှိတဲ့ ထိုင်း၊ စင်္ကာပူ၊ တောင်ကိုရီးယား၊ သြစတြေးလျ၊ UK ၊ အမေရိကန်ပြည်ထောင်စုနဲ့ ဥရောပနိုင်ငံတွေမှာ စတင် အသုံးပြုနိုင်မှာဖြစ်ပြီး ဆက်လက်တိုးချဲ့သွားဖို့လည်း ရှိ တယ်လို့ NUG အစိုးရက ပြောထားပါတယ်။

အောင်လံလွှင့်ချီနွေဦးထီကိုတော့ အမျိုးသားညီညွတ်ရေးအစိုးရ (NUG)၊ စီမံကိန်း၊ ဘဏ္ဍာရေးနဲ့ ရင်းနှီးမြှုပ်နှံရေးဝန်ကြီးဌာနက ပြီးခဲ့တဲ့ ၂၀၂၁ ခုနှစ်၊ ဩဂုတ် ၁၅ ရက်နေ့မှာ စတင် ရောင်းချခဲ့တာဖြစ်ပြီး ထီရောင်းချရမှုရဲ့ ၇၀ ရာခိုင်နှုန်းကို နိုင်ငံ့၀န်ထမ်း CDM တွေအတွက် သုံးစွဲသွားမှာဖြစ်ပြီး ၃၀ ရာခိုင်နှုန်းကို ဆုမဲအဖြစ် ပြန်လည်ပေးအပ်သွားဖို့ ကြေညာထားပါတယ်။

လတ်တလောအချိန်ထိ ဖွင့်လှစ်ခဲ့ပြီးဖြစ်တဲ့ နွေဦးထီကံထူးရှင်တွေထဲက အများစုကတော့ သူတို့ရရှိတဲ့ ထီဆုကြေးငွေတွေကို စစ်အာဏာရှင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ ပြည်ထောင်စု ပေါ်ပေါက်ရေးအတွက် ပြန်လည်လှူဒါန်းပေးခဲ့တာတွေလည်း ရှိခဲ့ပြီး အာဏာသိမ်း စစ်ကောင်စီကတော့ နွေဦးထီနဲ့ ပတ်သက်ပြီး ဖွင့်လှစ်ရောင်းချသူတွေနဲ့ အားပေးအားမြှောက်ပြုလုပ်သူတွေကို တရားစွဲ၊ ဖမ်းဆီးထောင် ချသွားမယ်လို့ ခြိမ်းခြောက် ကြေညာထားပါတယ်။

ဒါ့အပြင် မြန်မာပြည်သူတွေ သပိတ်မှောက်ပြီး မထိုးဘဲနေတဲ့ အောင်ဘာလေထီကိုလည်း အွန်လိုင်းကနေရောင်းချဖို့ အာဏာသိမ်းစစ်ကောင်စီက စီစဉ်နေပေမယ့် ခုချိန်ထိ အကောင်အထည်ဖော်နိုင်ခြင်း မရှိသေးပါဘူး။ DVB

ဟားခါး – ထန်တလန်အကြား တိုက်ပွဲတွင် စစ်ကောင်စီတပ်မှ အရာရှိအပါအဝင် ၁၅ယောက်သေဆုံး

ချင်းပြည်နယ် ဟားခါးမြို့နှင့် ထန်တလန်မြို့အကြား သီးမြစ်ချောင်း အောက်ပိုင်းတွင် တိုက်ပွဲများဆက်လက်ဖြစ်ပွားနေပြီး ယမန်နေ့တိုက်ပွဲတွင် စစ်ကောင်စီတပ်မှ အရာရှိ တစ်ဦးအပါအဝင် ၁၅ဦးသေဆုံးသွားကြောင်း ချင်းအမျိုးသားတပ်မတော်( CNA )ထံမှ သိရှိရသည်။

“သူတို့ နေရာယူထားတဲ့ဆီကို သွားတိုက်ခဲ့တာပါ၊ သူတို့ဘက်က အကျအဆုံးများပြီး လက်နက်နဲ့ ကျည်ဆံတစ်ချို့ သိမ်းဆည်းရမိပါတယ်၊ ကျနော်တို့ဘက်ကလည်း ဒဏ်ရာရသူအနည်းငယ်ရှိပါတယ်” ဟု ချင်းအမျိုးသားတပ်မတော် (CNA) ပြောရေးဆိုခွင့်ရှိသူ ဆလိုင်းထက်နီ က မဇ္စျိမ ကို ပြောသည်။

ဩဂုတ်လ ၁၅ရက် နံနက် ၁၁နာရီခန့်တွင် သီးမြစ်ချောင်း အောက်ဖက်ရှိ စစ်ကြောင်းရှိရာသို့ သွားရောက်တိုက််ခိုက်ခဲ့ခြင်းဖြစ်ပြီး စစ်ကောင်စီတပ်မှ သေဆုံးမှုများအပြင် စက်သေနတ်တစ်လက် ၊ MA သေနတ်တစ်လက် ၊ မော်တာဗုံးသီး နှစ်လုံးနှင့် ကျည်ဆံအချို့ သိမ်းဆည်းရမိကြောင်း ဆိုသည်။

ယင်းတိုက်ပွဲကို CNA အပါအဝင် CDF – Zophei , CDF – Hakha , CDF – Thantlang , CDF – Lautu နှင့် CJDC မှ ရဲဘော်များ ပူးပေါင်းတိုက်ခဲ့ခြင်းဖြစ်ကြောင်းသိရသည်။

ယင်းနေ့တွင်လည်း ဟားခါးမြို့သို့ စစ်ကောင်စီတပ်မှ ရဟတ်ယာဉ်ဖြင့် လက်နက်ခဲယမ်း သုံးကြိမ် လာရောက်ပို့ဆောင်ခဲ့ကြောင်းသိရသည်။

ဩဂုတ်လ ၁၄ရက် ည ၁၀နာရီခန့်တွင်လည်း တိုက်ပွဲဖြစ်ပွား နေသည့် နေရာအား ဂျက်တိုက်လေယာဉ် ဝဲကြည့်သွားသေးကြောင်း ဆိုသည်။

စစ်ကောင်စီတပ်များသည် ဟားခါး – ထန်တလန်အကြားရှိ သီးမြစ်ချောင်း တံတားအား ပြင်ဆင်ရန်ကြိုးစားနေပြီး ယင်းတံတားပြင်ဆင်နိုင်ပါက ထန်တလန်မြို့သို့ စစ်ကူနှင့် ထောက်ပို့လုပ်ငန်းများ အလျင်အပြန်လုပ်ဆောင်နိုင်မည့်အပြင် ထန်တလန်မြို့ နှင့် အနီးတစ်ဝိုက်ထိန်းချုပ်နိုင်ပြီး ချင်းကာကွယ်ရေးတပ်ဖွဲ့များ၏ လှုပ်ရှားမှုအား ချေမှုန်းနိုင်ရန် ပြင်ဆင်နေခြင်းဖြစ်ကြောင်း သိရသည်။

ယခုတိုက်ပွဲဖြစ်ပွားနေသည့် နေရာသည် ပျက်စီးနေသော သီးမြစ်တံတား ၏ အောက်ပိုင်းတွင် ဖြစ်ပွားနေခြင်းဖြစ်ပြီး စစ်ကောင်စီတပ်များ သည် ၎င်းအောက်ဖက်မှ တစ်ဆင့် ဇိုဖေး နယ်သို့ဝင်ရောက်ကာ ထန်တလန်မြို့နယ်သို့ စိုးမိုးရန်ကြိုးစားနေခြင်း ဖြစ်ကြောင်း ဆလိုင်းထက်နီ က သုံးသပ်ပြောဆိုသည်။

သို့သော် ရာသီဥတုဆိုးရွားမှုနှင့် ချင်းကာကွယ်ရေးတပ်ဖွဲ့များမှ အပြင်းအထန် တိုက်ခိုက်နေမှုကြောင့် ရှေ့ဆက်မတိုးနိုင်ဘဲရှိနေပြီး ကျည် ၊ ရိက္ခာ ထပ်မံ ဖြည့်တင်းကာ ရှေ့သို့တက်ရန် ပြင်ဆင်လျက်ရှိကြောင်း သိရသည်။ mizzima

စစ်အာဏာသိမ်းပြီးချိန်မှစ ကရင်နီပြည်တွင် တိုက်ပွဲအကြိမ် ၄၂၀ ဖြစ်ပွား၊ စစ်ကောင်စီဘက်က ၁၃၀၀ နီးပါးသေဆုံး

ပြီးခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက်ကစတင်ကာ စစ်အာဏာသိမ်းပြီးချိန်ကတည်းက အခုနှစ် ဩဂုတ် ၁၅ ရက်အထိ ကရင်နီပြည်နယ်မှာ တိုက်ပွဲအကြိမ်ရေ ၄၂၀ ဖြစ်ပွားခဲ့ပြီး အဆိုပါတိုက်ပွဲတွေအတွင်း အကြမ်းဖက်စစ်ကောင်စီဘက်က အယောက် ၁၃၀၀ နီးပါး သေဆုံးခဲ့တယ်လို့ သိရပါတယ်။

တိုးတက်သော ကရင်နီပြည်သူ့အင်အားစု Progressive Karenni People Force – PKPF က စာရင်းပြုစုထုတ်ပြန်ထားတာဖြစ်ပြီး အခုနှစ် ၂၀၂၂ ခုနှစ်အတွင်းမှာတော့ တိုက်ပွဲအကြိမ်ရေ ၂၈၈ ကြိမ်ဖြစ်ပွားခဲ့တာလို့ ဆိုပါတယ်။

တိုက်ပွဲတွေအတွင်း စစ်ကောင်စီယာဉ်တန်းပျက်စီးမှုအရေအတွက်မှာတော့ ၂၀၂၁ ခုနှစ်အတွင်းမှာတော့ ၁၉ စီးပျက်စီးခဲ့ပြီး အခုနှစ်ထဲမှာ ၃၅ စီးပျက်စီးခဲ့တာပါ။

ဒါ့အပြင် တိုက်ပွဲတွေမှာ ကျဆုံးခဲ့တဲ့ ပြည်သူ့ကာကွယ်ရေးတပ်ဖွဲ့ဝင်အရေအတွက် ၁၅၀ နီးပါးရှိနေခဲ့ပြီး အဲဒီထဲက ၁၀၈ ယောက်ကတော့ အခုနှစ်ထဲမှာ ကျဆုံးခဲ့ကြတာ ဖြစ်ပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ ဒေသခံပြည်သူ့ကာကွယ်ရေးတပ်ဖွဲ့တွေ၊ တိုင်းရင်းသားလက်နက်ကိုင်တပ်ဖွဲ့တွေနဲ့ အကြမ်းဖက် စစ်ကောင်စီတပ်တွေကြား တိုက်ပွဲတွေလည်း ပြင်းထန်နေပါတယ်။

အမျိုးသားညီညွတ်ရေးအစိုးရ (NUG) က ထုတ်ပြန်ချက်မှာတော့ မြန်မာနိုင်ငံတဝန်း ပြည်သူ့ခုခံတော်လှန်စစ် အရှိန်မြှင့်နေပြီး ဇူလိုင် ၇ ရက်ကနေ ဩဂုတ် ၆ ရက်အထိ  တလတာကာလအတွင်း အကြမ်းဖက် စစ်ကောင်စီဘက်က ၂,၁၅၁ ယောက် သေဆုံးခဲ့တယ်လို့ ဆိုပါတယ်။

နိုင်ငံတဝန်း တိုက်ပွဲဖြစ်ပွားမှုအနေနဲ့ ကရင်ပြည်နယ်မှာ ၂၁၉ ကြိမ်၊ စစ်ကိုင်းတိုင်းမှာ ၂၀၂ ကြိမ်နဲ့ အများဆုံးဖြစ်ပွားခဲ့ပြီး ရန်ကုန်တိုင်းကတော့ ဗုံးပေါက်ကွဲမှု ၇၄ ကြိမ်နဲ့ အများဆုံးဖြစ်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

မြန်မာနိုင်ငံတဝန်းမှာတော့ ပဋိပက္ခနဲ့ တိုက်ပွဲတွေကြောင့် အမျိုးသမီးနဲ့ ကလေးငယ်တွေ အပါအဝင် နေရပ်စွန့်ခွာ ထွက်ပြေးတိမ်းရှောင်ရသူ ဦးရေဟာ ၁ ဒသမ ၂ သန်းကျော် ရှိလာခဲ့ပြီဖြစ်ကာ ပြီးခဲ့တဲ့ ဇူလိုင်လအတွင်းမှာတော့ ပြည်တွင်းနေရပ်စွန့်ခွာသူဦးရေ အများဆုံး စံချိန်တင်ခဲ့တယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ထားပါတယ်။

အဲဒီထဲမှာတော့ ပြီးခဲ့တဲ့ ၂၀၂၁ ခုနှစ် အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့ မလုံခြုံမှုတွေကြောင့် ပြည်တွင်းနေရပ်စွန့်ခွာသူ ၈၆၆, ၀၀၀ ယောက်နဲ့ အဲဒီမတိုင်မီ ပဋိပက္ခတွေကြောင့် ပြည်တွင်းနေရပ် စွန့်ခွာသူ ၃၄၆,၀၀၀ ယောက်ပါဝင်တယ်လို့ ဆိုပါတယ်။ DVB

စစ်ကောင်စီတွင် ဒေါ်လာမရှိတော့၍ စီးပွား ရေးသမားများထံမှ ဒေါ်လာ ခြိမ်း ခြောက်တောင်း၊ မပေးလျှင် အရေးယူမည်ဟု မင်းအောင်လှိုင် အမိန့်ထုတ် ညွှန်ကြား

မင်းအောင်လှိုင်၏ အမိန့်အရ ပြည်တွင်းရှိ ပို့ကုန်လုပ်ငန်းရှင်များအနေဖြင့် စစ်ကောင်စီကို ဒေါ်လာများ ပေးကြရန်နှင့် အလုပ်ပြန်လုပ်ကြရန်၊ ပူးပေါင်းဆောင် ရွက်မှုမရှိလျှင် ဖမ်းဆီးအရေးယူမည်ဖြစ်ကြောင်း စစ်ကောင်စီခန့် စီးပွား ရေးနှင့်ကူးသန်းရောင်းဝယ်ရေး ဒုတိယဝန်ကြီး ညွန့်အောင်က လုပ်ငန်းရှင်များကို တရား ဝင် ခေါ်ယူ ပြောဆို ခြိမ်းခြောက်သည်။

ဩဂုတ်လ ၁၅ ရက်နေ့ ရန်ကုန်မြို့ရှိ UMFCCI အဆောက်အအုံတွင် စီးပွား/ကူး သန်းဒုဝန်ကြီး ညွန့်အောင်က စီးပွားရေး လုပ်ငန်းရှင်အားလုံးကို ခေါ်ယူခြိမ်း ခြောက် ခြင်း ဖြစ်ပြီး အဆိုပါ ခေါ်ယူ သတိပေးပြောဆိုပွဲတွင် ဗဟိုဘဏ်နှင့် စစ်ကောင်စီမှ ဗိုလ်ချုပ်များပါတက်ရောက်ခဲ့ကြသည်။

လက်ရှိစစ်ကောင်စီတွင် ပို့ကုန်ရငွေ ဒေါ်လာ အဝင်မရှိကြောင်း၊ လုပ်ငန်းရှင်များ အသင်းအဖွဲ့များအနေဖြင့် ပို့ကုန်ရငွေ ဒေါ်လာကို ပြည်တွင်းသို့ ယူလာရန် လိုအပ်ကြောင်း၊ လက်ရှိတွင်ဒေါ်လာ အဝင်မရှိ၍ လုပ်ငန်းများ အလွန် ခက်ခဲနေ ကြောင်း၊ ပို့ကုန် ရငွေ ဒေါ်လာ ရရှိရေး အလွန်အရေးကြီးနေပြီး အကြိမ် ကြိမ် သတိပေးထားပြီးဖြစ်၍ စစ်ကောင်စီနှင့်မပူးပေါင်းလျှင် အရေးယူ မည်ဖြစ်ကြောင်း ၎င်းက ခြိမ်းခြောက်သည်။

“ကျနော်တို့အနေနဲ့ လမ်းညွှန်ချက်အရ ပို့ကုန်ရငွေက မဝင်လို့မရပါဘူး။ ပြန်ဝင်ရမှာဖြစ်ပါတယ်။ နိုင်ငံတော်ပိုင်းအနေနဲ့ လုပ်ပေးသင့် လုပ်ပေးထိုက်တာတွေ အကုန်လုံး လုပ်ပေးပြီးဖြစ်ပါတယ်။ လုပ်ပေးထိုက် လုပ်ပေးသင့်တာတွေ လုပ်ပေးတဲ့အပြင်မှာကို ကျနော်တို့ ခုနက ပြောသလိုအတ္တ ကိုယ်ကျိုးစီးပွားကို ရှေ့တန်းတင်မယ်ဆိုရင် ပြဿနာတွေက နောက်ပိုင်းတော်တော်ရှင်းရခက်ပါတယ်။ အဲဒီတော့ ပို့ကုန်ရငွေ မဝင်ဘဲနဲ့ ကျနော်တို့အနေနဲ့ အလုပ်တွေ ဆက်လုပ်ဖို့က အခက်အခဲရှိပါတယ်။ ပို့ကုန်ရငွေ ရနေမယ်။ ပုံမှန်လည်း တင်ပို့မယ်၊ ပုံမှန်လည်း တင်သွင်းနေမယ်။ ဒီလို One Circle လည်သွားဖို့လည်း ကျနော်တို့အနေနဲ့ အားလုံး ပူးပေါင်းဆောင်ရွက်ရမှာဖြစ်ပါတယ်။ ဒါကြောင့်မို့လို့ အစည်း အဝေးတွေ အကြိမ်ကြိမ်ခေါ်တယ်။ သတင်းစာထဲမှာ အကြိမ်ကြိမ်ကြေညာတယ်။ ပြီးရင် Warning တွေ ပို့ကုန်သွင်းကုန် တွေ ပိတ်တယ်။ ပို့ကုန်ရငွေနဲ့ပတ်သက်ပြီးတော့ ပို့ကုန်ရငွေ ဝင်ဖို့ ကျန်နေတဲ့ ကုမ္ပဏီတွေ၊ သက် ဆိုင်ရာ အသင်းအဖွဲ့တွေအနေနဲ့ အမြန် ဆော်ဩပေးပါ။ တချို့ဟာတွေက ကာလသတ် မှတ်ချက်ကျော်နေပါပြီ။ မလာဘူးဆိုရင်တော့ ကျနော်တို့အနေနဲ့ စိတ်မကောင်းစွာနဲ့ပဲ အရေယူးဆောင်ရွက်သွားမှာဖြစ်ပါတယ်” ဟု စီးပွားရေးနှင့်ကူးသန်းရောင်းဝယ်ရေး ဒုဝန်ကြီး ညွန့်အောင်က ဆိုသည်။

စစ်ကောင်စီအနေဖြင့် စက်သုံးဆီ လုပ်ငန်းရှင်များကို ဒေါ်လာ ရာခိုင်နှုန်းဖြင့်သာ ရောင်းပေးနိုင်၍ ပြင်ပစျေးကွက်မှ ဒေါ်လာ သန်း ၅၀ စက်သုံးဆီလုပ်ငန်းရှင်များ ကိုယ့်အစီအစဉ်ဖြင့် ကိုယ် ဝယ်ယူရသည်ကို ဝန်ခံပါကြောင်း ၎င်းက ဆိုသည်။

“စက်သုံးဆီ မှာလည်း ဘာဖြစ်သွားလဲဆိုတော့ ကျနော်တို့က ရာခိုင်နှုန်းနဲ့ ရောင်း ပေးလိုက်ချိန်မှာ သူ့ဟာသူ Importer က ရှာရမယ့် ဒေါ်လာ သန်း ၅၀ လောက်ဖြစ်သွားတယ်။ အဲဒီအဟကို မူတည်ပြီးတော့ မှ ကျနော်တို့ အဝေးသမားနဲ့ ပေါင်းပြီး (ဒေါ်လာစျေး) ဆွဲတင်သွားတယ်လို့ ကျနော်တို့ သတင်းရထားပါတယ်” ဟု ဒုဝန်ကြီးက ဆိုသည်။

အမေရိကန်တစ်ဒေါ်လာ ၃၀၀၀ ကျော် တက်သွားခြင်းမှာလည်း မဖြစ်သင့်ဟု ပြော ဆိုပြီး အရေးယူမည်ဟုလည်း ၎င်းက ခြိမ်းခြောက်သည်။

စစ်တပ်ကို ဒေါ်လာမပေးလျှင် ဖမ်းဆီးမည်ဟု ဒုဝန်ကြီး ညွန့်အောင်၏ ခြိမ်းခြောက်မှု အပြည့်အစုံ

===========================================

“ဒီအစည်းအဝေးမှာ အားလုံးတက်တက်ကြွကြွနဲ့ စိတ်ပါဝင်စားစွာ ဆွေးနွေးပေးကြတဲ့အတွက် အထူးပဲ ကျေးဇူးတင်ရှိပါတယ်။ကျနော်တို့အနေနဲ့ လမ်းညွှန်ချက်အရ ပို့ကုန်ရငွေက မဝင်လို့မရပါဘူး။ ပြန်ဝင်ရမှာဖြစ်ပါတယ်။ နိုင်ငံတော်ပိုင်းအနေနဲ့ လုပ်ပေးသင့် လုပ်ပေးထိုက်တာတွေ အကုန်လုံး လုပ်ပေးပြီးဖြစ်ပါတယ်။

လုပ်ပေးထိုက် လုပ်ပေးသင့်တာတွေ လုပ်ပေးတဲ့အပြင်မှာကို ကျနော်တို့ ခုနက ပြောသလိုအတ္တ ကိုယ်ကျိုးစီးပွားကို ရှေ့တန်းတင်မယ်ဆိုရင် ပြဿနာတွေက နောက်ပိုင်းတော်တော်ရှင်းရခက်ပါတယ်။ ဒါကြောင့် ရှေ့ပိုင်းမှာ သက် ဆိုင်ရာ ဗဟိုဘဏ် ဒုတိယဥက္ကဋ္ဌကြီးရော ဗိုလ်ချုပ်ရန်နောင်စိုးတို့ရော ဆွေးနွေးသွားပါတယ်။ ဒါတွေက ကျနော်တို့ အပြင်မှာ ပေါ်လစီအရ တစ်ယောက်တစ်ပေါက် ၀ိုင်းပြောနေကြတာ။ ဟိုလိုလုပ်ပါလား။ ဒီလိုလုပ်ပါလားပေါ့။

ဒါပေမယ့် နိုင်ငံတော်ပိုင်းအနေနဲ့ အားလုံးချင့်ချိန်ပြီးတော့ စဉ်းစားပြီး ဆောင်ရွက်ရတာဖြစ်ပါတယ်။ အဲဒီတော့ ပို့ကုန်ရငွေ မဝင်ဘဲနဲ့ ကျနော်တို့အနေနဲ့ အလုပ်တွေ ဆက်လုပ်ဖို့က အခက်အခဲရှိပါတယ်။ ပို့ကုန်ရငွေ ရနေမယ်။ ပုံမှန်လည်း တင်ပို့မယ်၊ ပုံမှန်လည်း တင်သွင်းနေမယ်။ ဒီလို One Circle လည်သွားဖို့လည်း ကျနော်တို့အနေနဲ့ အားလုံး ပူးပေါင်းဆောင်ရွက်ရမှာဖြစ်ပါတယ်။ ဒီကြားထဲမှာ စုန်းပြူးရှိနေမှာဖြစ်ပါတယ်။ စုန်းပြူးတွေနဲ့ပတ်သက်ပြီးတော့ တိတိကျကျနဲ့ လက်ရှိ ပူးပေါင်းပါဝင်ဆောင်ရွက်နေတဲ့ လုပ်ငန်းရှင်တွေရော အသင်းအဖွဲ့တွေရော။

အဓိက အသင်းအဖွဲ့ရဲ့ အားက တော်တော်လေး အရေးကြီးပါတယ်။ အသင်းအဖွဲ့တွေရဲ့ တာဝန်ရှိတဲ့ပုဂ္ဂိုလ်တွေ ကိုယ်တိုင်က Operation မှာ ဝင်ကပြီးတော့ ကျနော်တို့ရဲ့ အဟပေါ့ ပေါ်လစီ အားနည်းချက်တွေ ပေါ်လစီ အဟတွေပေါ်မှာ မူတည်ပြီး ဒီလိုမျိုးဆောင်ရွက်မယ်ဆိုရင် မသင့် တော်ပါဘူး။ ခံယူချက် အတွေးအခေါ်ကမှစပြီး ပြောင်းလဲပြီးတော့ ကျနော်တို့နဲ့ ပူးပေါင်းပေးပါ။ ပူး‌ပေါင်းပြီးတော့မှ ပို့ကုန်ရငွေတွေ မဖြစ်မနေ ဝင်ရောက်ပေးဖို့ အထူးမေတ္တာ ရပ်ခံလိုပါတယ်။ အဲဒီတော့ ဒီဟာတော့ By law အရဆိုရင်တော့ ကျနော်တို့ရှေ့မှာ ဆွေးနွေးသွားသလိုပဲ ဥပဒေအရ အရေးယူလို့ရတယ်။

အချင်းချင်းတွေ ပို့ကုန်ဝင်ငွေ တိုးမြှင့်ရေးအတွက် တိုင်းပြည် ဝင်ငွေရဖို့ကော အခွန် ပြည့်ပြည့်၀၀ ရရှိရေးအတွက် တစ်လှေတည်းစီးပြီး တစ်ခရီးတည်းသွားနေတဲ့အဖွဲ့တွေဖြစ်တဲ့အတွက် လုပ်လည်းမလုပ်လိုပါဘူး။ လုပ်ဖို့လည်း မသင့်တော်ဘူးလို့ ကျနော်မြင်ပါတယ်။ ဒါကြောင့်မို့လို့ အစည်းအဝေးတွေ အကြိမ်ကြိမ်ခေါ်တယ်။

သတင်းစာထဲမှာ အကြိမ်ကြိမ်ကြေညာတယ်။ ပြီးရင် Warning တွေ ပလကတွေ ပိတ်တယ်။ သို့သော်လည်း ခုနက ပြောသလို နာမည်ခံ ပြီးလုပ်သွားတဲ့အဖွဲ့ကတော့ ချက်ချင်း ပို့ကုန်ရငွေ ရအောင် မစွမ်းဆောင်နိုင်ဘဲနဲ့ သူက နဂိုမူလကတည်းက ကုမ္ပဏီကို လွယ်လွယ်ကူကူ ဆောင် ရွက်ပြီးတော့ နာမည်ခံပြီးတော့ ဆောင်ရွက်ပေးခဲ့တာ ဖြစ်တဲ့အတွက် ကြောင့် နာမည်ခံက ရပြီးသွားပြီ။ ဒီအတွက်ကြောင့် ပို့ကုန်ရငွေ ဝင်ခြင်း မဝင်ခြင်း စိတ်မဝင်စားဘူး။ အဲဒီလိုလူမျိုးကျတော့လည်း စိတ်မကောင်းစွာနဲ့ အရေးယူဆောင်ရွက်သွားရမှာဖြစ်ကြောင်း ပြောလိုပါတယ်။

နောက်တစ်ချက်ကတော့ ခုနက ၀ိုင်းဝန်းဆွေးနွေးတဲ့အထဲမှာ ငွေစာရင်း ကိစ္စနဲပတ်သက်ပြီးတော့ ငွေစျေးကတော့ ဗဟိုဘဏ် ဒုတိယဥက္ကဋ္ဌ ပြောတဲ့ Speculate လုပ်တာကြီးက ပေါ်လွင်ပါတယ်။ အဲဒီတော့ ကျန်တဲ့ရက်လုပ်ရင်တောင် မပြောလိုပါဘူး။ မနေ့က စနေ၊ တနင်္ဂနွေမှာကို ဒေါ်လာကို ၃၀၀၀ ကျော်ကြီး ဆွဲတင်သွားတာကတော့ လူကြားလို့လည်း မကောင်းပါဘူး။

ဒါတွေက ဖော်ထုတ်ပြီးတော့ ပြင်းပြင်းထန်ထန် အရေးယူရမှာပါ။ အဲဒီတော့ ဘယ်လောက်အရောင်းအဝယ် ဖြစ်လို့ ဖြစ်မှန်းလဲမသိ။ အချင်း ချင်း လေနဲ့ပေါ့နော်။ ပြီးတော့ အွန်လိုင်းမှာ တင်လိုက်တယ်။ ဒီနေ့ ဘယ်လောက်ဖြစ်ပါပြီပေါ့။ အမှန်တော့ တစ်ဒေါ်လာ အရောင်းအဝယ်ဖြစ်တာလား၊ ဒေါ်လာ ၁၀၀ အရောင်းအဝယ်ဖြစ်တာလား။ ဒေါ်လာ တစ်သောင်း အရောင်းအဝယ်ဖြစ်တာလား ဘာမှ မရှိပါဘူး အချင်းချင်းကိုပဲ။

သို့သော်လည်း ကျနော်တို့ရဲ့ Sector ကြီးတစ်ခုလုံးက Speculate လုပ်လိုက်တဲ့ ပါးစပ်က ထွက်တဲ့ လေပတ်ကားကို လိုက်နာ ဆောင်ရွက်သွားတာကိုတော့ ကျနော်တို့ အံ့ဩဖွယ်ရာတွေ့ရပါတယ်။ အဲဒါကြောင့် မဖြစ်သင့် မဖြစ်တာ ဖြစ်တဲ့ လေပတ်ကားကိုတော့ ဖော်ထုတ်ပြီးတော့ အ ရေးယူဆောင်ရွက်သွားမှာဖြစ်ပါတယ်။

ဘဏ်တွေကိုလည်း စောင့်ကြည့်ပြီးတော့ သွားမှာဖြစ်ပါတယ်။ ဘာဖြစ်လို့လဲဆိုတော့ ယခင် ရှေ့မှာ ကျနော်တို့ သာဓက တွေမှာ တချို့အရောင်း အဝယ်တွေမှာ ဘဏ်တွေကိုယ်တိုင်ပါနေတာလည်း တွေ့ရှိရပါတယ်။ ကျနော်တို့ဆီကို သတင်းတွေပေးတာရှိပါတယ်။ ဘဏ်တွေက ဘဏ်ကာ ပိုင်ရှင်တွေအနေနဲ့ မသိပေမယ့် ဘဏ်မန်နေဂျာတွေနဲ့ သူရဲ့ အကောင့်ထဲမှာရှိတဲ့ Exporter အကောင့်နဲ့ Importer ရဲ့ လိုအပ်ချက်တွေကို ညှိနှိုင်းပြီးတော့ အပြင်မှာ Appointment Banking လုပ်ပြီး ဆောင်ရွက်သွားတာလေးတွေ တင်ပြတာလည်းရှိပါတယ်။

ဒါမျိုးတွေဆိုရင် တော့ မတက်သင့်ဘဲ တက်သွားတာတွေရှိပါတယ်။ ပြီးခဲ့တဲ့ စက်သုံးဆီ မှာလည်း ဘာဖြစ်သွားလဲဆိုတော့ ကျနော်တို့က ရာ ခိုင်နှုန်းနဲ့ ရောင်းပေးလိုက်ချိန်မှာ သူ့ဟာသူ Importer က ရှာရမယ့် ဒေါ်လာ သန်း ၅၀ လောက်ဖြစ်သွားတယ်။ အဲဒီအဟကို မူတည်ပြီးတော့ မှ ကျနော်တို့ အဝေးသမားနဲ့ ပေါင်းပြီး ဆွဲတင်သွားတယ်လို့ ကျနော်တို့ သတင်းရထားပါတယ်။ ဒီအတွက်ကြောင့် ဘဏ်တွေရော အိတ်စပို့တာရော အင်ပို့တာလည်း ဘယ်သူ့ဆီက ဝယ်လဲဆိုတာ စစ်လိုက်ရင် ပေါ်ပါတယ်။ ဘယ်သူရောင်းတယ်ဆိုတာလည်းပေါ်ပါတယ်။ ဘယ်သူမရောင်း ဘူးဆိုတာလည်း ပေါ်ပါတယ်။ ရောင်းစယ်တာကတော့ စစ်ရင် ပေါ်ပါတယ်။

အခုဟာက စီးပွားရေး လောကကြီးကို ကမောက်က ဖြစ်အောင် လုပ်တာ။ ထုတ်လိုက်တဲ့ ပေါ်လစီကို ပြောင်းပြန်ဖြစ်အောင်လုပ်တဲ့ ညှိနှိုင်းပြီးတော့ လုပ်တာဖြစ်လို့ ဒါကို လက်မခံပါဘူး။ ဒီဟာနဲ့ပတ်သက်ပြီးတော့ ဆက်လက်ပြီးတော့ ရွှေနဲ့ငွေစျေး ကြီးကြပ်မှုကော်မတီ စောင့်ကြပ်ရေး ကော်မတီရှိပါတယ်။ ဒီအပေါ်မှာ ဆွေးနွေးပြီးတော့ ဘယ်လိုအရေးယူမလဲဆိုတာကို ဆက်လက် ဖော်ထုတ်သွားပါ့မယ်။

ပို့ကုန်ရငွေနဲ့ပတ်သက်ပြီးတော့ ပို့ကုန်ရငွေ ဝင်ဖို့ ကျန်နေတဲ့ ကုမ္ပဏီတွေ၊ သက်ဆိုင်ရာ အသင်းအဖွဲ့တွေအနေနဲ့ ကျနော် အမြန် ဆော်ဩပေးပါ။ တချို့ဟာတွေက ကာလသတ်မှတ်ချက်ကျော်နေပါပြီ။ မလာဘူးဆိုရင်တော့ ကျနော်တို့အနေနဲ့ စိတ်မကောင်းစွာနဲ့ပဲ အရေးယူဆောင်ရွက်သွားမှာဖြစ်ပါတယ်။” khit thit

« Older Entries