SAVE OUR COUNTRY | SAVE MYANMAR | RESPECT OUR VOTES | HONOR ELECTION RESULTS

စစ်ကိုင်းတိုင်း၊ ဆားလင်းကြီးမြို့ပေါ်ရှိ အမှတ် ၁ ချည်ထည် စက်ရုံ၌ တပ်စွဲထားသော စစ်သားများကို ပစ်ခတ် တိုက်ခိုက်ရာ ၃ ဦးသေဆုံးကြောင်း သေမင်း တမန် ပြောက်ကျားတပ်ဖွဲ့ (Salingyi) မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

မတ်လ ၂၂ ရက်နေ့ နံနက်ပိုင်းတွင် ဆားလင်းကြီးမြို့ပေါ်ရှိ အမှတ် ၁ ချည်/ထည် စက်ရုံ အတွင်း၌ တပ်စွဲထားသော စစ်သားနှင့် ပျူစောထီးများသည် လမ်းသွား လမ်းလာ ပြည်သူများအား စစ်ဆေးခြင်း၊ ငွေတောင်းခြင်းများကြောင့် ဒေသကာကွယ်ရေး တပ်ဖွဲ့များက ဝင်ရောက် တိုက်ခိုက်ခဲ့ကြောင်း သိရသည်။

စစ်တပ် တပ်စွဲထားသော နေရာများကို ဒေသကာကွယ်ရေး တပ်ဖွဲ့များက လက်နက်ငယ်များ၊ လက်လုပ် ၄၀ မမ များ၊ လက်နက်ကြီးများဖြင့် အပြန်အလှန် ပစ်ခတ် တိုက်ခိုက်ခဲ့ပြီး စစ်သား ၃ ဦးသေဆုံးခဲ့ကြောင်း သိရသည်။

အဆိုပါ တိုက်ခိုက်မှုကို သေမင်းတမန် ပြောက်ကျားတပ်ဖွဲ့ (Salingyi)၊ Salingyi Revolution Army (SRA)၊ ဆားလင်းကြီးမြို့နယ်ပလဖ၊ ရွှေညီကို ပြောက်ကျားအဖွဲ့ (ဆားလင်းကြီး)၊ Chindwin Defense force (CDF)၊ တောင်ပံနီ အထူးပြောက်ကျားတပ်ဖွဲ့ တို့မှ ပူးပေါင်း လုပ်ဆောင်ခဲ့ကြောင်း သေမင်း တမန် ပြောက်ကျားတပ်ဖွဲ့ (Salingyi) မှ တာဝန်ရှိသူ တစ်ဦးက ပြောဆိုသည်။ khit thit

ဝဒေသ မိုင်းပေါက်မြို့ ယှီကျင်း (ငွေလိမ်နေသည့် ကုမ္ပဏီ)တွင် တိုက်ပိတ် နှိပ်စက်ခံရသည့် အသက်မပြည့်သေးသူ အမျိုးသမီးငယ်တစ်ဦးနှင့် လူငယ် ကိုးဦးတို့၏ မိသားစုဝင်တွေအနေဖြင့် တစ်ဦးလျှင် သိန်း ၄၀ မှသိန်း ၉၀ကြား ပေးမှသာ ပြန်လွှတ်ပေးမည်ဟု ကုမ္ပဏီဘက်က ပြော သည်။

မိသားစုဝင်တစ်ဦးက “သူတို့ တိုက်ပိတ်ခံထားရတာ ရက် ၂၀ရှိပြီ။ ကျဥ်စက်တွေနဲ့ နှိပ်စက်ခံရတယ်လို့ ပြောကြတယ်။ သူတို့နဲ့ ဖုန်းပြောခွင့်ရတဲ့အချိန်လည်း ဘေးမှာ သူတို့ကို စောင့်နေတဲ့ အစောင့်တွေရှိတယ်။ မေးတာတွေကို တိတိကျကျ မ​ေပြာရဲ​ကြဘူး။ ပိုက်ဆံပဲ ပို့ပေးခိုင်းနေတာ” ဟု ပြောသည်။

အဆိုပါ လူငယ်များသည် ပြီးခဲ့သည့် ဇန်နဝါရီ ၁၃ ရက်က ပွဲစား လုလုဆိုသူနှင့် ဝဒေသ မိုင်းပေါက်မြို့တွင် ကျားဖြန့်ခေါ် ငွေကြေး လိမ်လည်ရယူနေသည့် လုပ်ငန်းကို သွားရောက် လုပ်ကိုင်ခဲ့ခြင်းဖြစ်သည်။

“သူတို့လျော်ကြေး တောင်းတာပေါ့နော်။ ပွဲစားယူသွားတဲ့ ငွေတွေကိုလည်း ပြန်ပေးခိုင်းတယ်။ ငွေမလိမ်နိုင်ဘူး ငွေမဝင်ဘူးဆိုပြီး အချိန်ပိုတွေ လုပ်ခိုင်းတယ်။ သူတို့ဆက်မလုပ်နိုင်တော့ တိုက်ပိတ်ပြီး နှိပ်စက်တယ်။ ကျဥ်စက်နဲ့တို့ပြီး နှိပ်စက်ကြတာ” ဟု နောက်ထပ် မိသားစုဝင်တစ်ဦးကလည်း ပြောပြသည်။

၎င်းတို့တောင်းသည့် ငွေကြေးပမာဏထဲမှအချို့ကို မိသားစုဝင်ဘက်က ပေးဆောင်ခဲ့ပေမယ့် အဆိုပါ တိုက်ပိတ် နှိပ်စက်ခံထားရသည့် လူငယ်များ ပြန်လွှတ်လာရန် မသေချာမှာကို စိုးရိမ်​နေရသည်ဟု ​ဆိုသည်။

“ကျမတို့က သိန်းနှစ်ဆယ် ပေးထားပြီ။ သိန်းလေးဆယ် တောင်းတာ။ ကျန်တဲ့ နှစ်ဆယ်ကိုတော့ မပေးရဲသေးဘူး။ ပြန်လွှတ်မလား မလွတ်ဘူးလား မသေချာသေးဘူး။ သူတို့လည်း ဘာမှမပြောလာဘူး။ ပိုက်ဆံပဲ တောင်းလာတယ်” ဟု ၎င်းက ဆက်ပြောသည်။

အဆိုပါလူငယ်များ ပြန်လွှတ်မြောက်လာရန် လားရှိုးမြို့ရှိ ဝပြည် ပြင်ပဆက်ဆံရေးရုံးသို့ တိုင်ကြားထားသော်လည်း လက်ရှိအချိန်ထိ တစုတရာ တုံ့ပြန်ခြင်း မရှိသေးဟု မိသားစုဝင်များက ဆိုသည်။

“ဝ ဆက်ဆံရေးရုံးကို တိုင်ထားတယ်။ အကြိမ်ကြိမ် ဖုန်းဆက် အကူအညီတောင်းတယ်။ ဘာမှမထူးခြားခဲ့ဘူး။ အော်ငေါက်ပြီး ပြန်ဆက်ဆံတယ်” ဟု အထက်ပါ မိသားစုဝင်တစ်ဦးက ပြောသည်။

စစ်အာဏာသိမ်းကာလ အလုပ်အကိုင် ရှားပါးမှုကြောင့် လူငယ်အများစုသည် တရုတ်-မြန်မာနယ်စပ် ဝဒေသအပြင် ကိုးကန့်နှင့် မိုင်းလားသို့ အလုပ် သွားလုပ်ရင်း လူကုန်ကူးခံရခြင်း၊ လုပ်အားခ ခေါင်းပုံဖြတ်ခံရခြင်းနှင့် ပြည့်တန်ဆာအဖြစ် ခိုင်းစေတာတွေ ကြုံနေရသည်။mizzima

ရှမ်းပြည်မြောက်ပိုင်း ကွမ်းလုံတံတားသစ်ကို ယခုနှစ်ထဲ အပြီးတည်ဆောက်သွားမည်ဖြစ်ပြီး တရုတ်-မြန်မာနယ်စပ် ကုန်သွယ်ရေး တိုးမြင့်လာနိုင်ဖွယ်ရှိကြောင်း မြန်မာနိုင်ငံဆိုင်ရာတရုတ်သံရုံးက ထုတ်ပြန်ထားသည်။

ကွမ်းလုံတံတားသစ်သည် တရုတ်-မြန်မာကုန်သွယ်ရေး၏ ပင်မလမ်းကြောင်းတစ်ခုဖြစ်သည့် သိန္နီ-ကွမ်းလုံ-ချင်းရွှေဟော် လမ်းမကြီးပေါ်မှ အချက်အချာကျသည့် မြစ်ဖြတ်တံတားကြီးဖြစ်ပြီး ပြီးခဲ့သည့် ၂၀၂၁ ဒီဇင်ဘာလက တရုတ်အကူအညီဖြင့် စတင်တည်ဆောက်ခဲ့ခြင်းဖြစ် သည်။

ချင်းရွှေဟော်-မိန်းတိန် နယ်စပ်ဂိတ်မှ နှစ်နိုင်ငံနယ်စပ်ကုန်သွယ်ရေး အဆင်ပြေချောမွေ့မှု၊ အသားစားနွားများ တရုတ်နိုင်ငံသို့ တင်ပို့ခြင်း၊ ပိုး ကောင်မွေးမြူခြင်းနှင့် တရုတ်ယွမ်ဖြင့် စာရင်းရှင်းမှု စသည့်အကြောင်းအရာနှင့် ပတ်သက်လို့ မတ်လ ၇ ရက်မှ ၉ ရက်အထိ မြန်မာနိုင်ငံဆိုင် ရာ တရုတ်သံရုံး စီးပွားရေးသံမှူး Mr. Tan Shufu က သွားရောက်ဆွေးနွေးခဲ့သည်ဟု ဖော်ပြထားသည်။

လားရှိုး-ချင်းရွှေဟော်သို့ ပြေးဆွဲနေသည့် ကားသမားတစ်ဦးက “တံတားပြီးရင်တော့ တရုတ်ဘက် လမ်းတွေ ပွင့်တော့မယ်။ ကုန်တင်ကားကြီးတွေ များများဖြတ်တော့မယ်လို့တော့ ကြားတယ်။ အခုက ကြိုးတံတားနဲ့ တန်ချိန်အများကြီးမှ မနိုင်တာ။ မီးသွေးတွေ ကြံတွေ တရုတ်ဖက် ပို့နေကြတာလည်း ရှိနေတာဘဲ” ဟု ပြောသည်။

လက်ရှိမှာ ကွမ်းလုံတံတားအစားထိုး ကြိုးတံတား ပြုလုပ်ထားပြီး အလေးချိန်အရ တန်ချိန်အတွက် ခံနိုင်မှု နည်းပါးသောကြောင့် ကုန်တင်ကားကြီး ဖြတ်သန်းသွားလာမှု မပြုလုပ်နိုင်ဟု ကွတ်ခိုင်-လောက်ကိုင်သို့ ပြေးဆွဲနေသည့် ကားသမားတစ်ဦးက ယခုလို ပြောသည်။

“မီးသွေးကားတွေဆိုရင် ကြိုးတံတားမှာ ဖြတ်သွားလို့မရဘူး။ ကားသေးလေးတွေနဲ့ ဒီဘက်က မီးသွေးတွေပြန်ယူပြီး ဟိုဘက်ကို အကြိမ်ကြိမ်ပြန်ပို့ရတယ်။ တခါတလေဆို ၃၀ မိနစ်လောက်ကြာတယ် တခြားကားတွေက စောင့်နေရတာ”

ကွမ်းလုံတံတားသစ် ပြီးစီးသွားပါက ကုန်သွယ်မှု လမ်းအသွားအလာ အဆင်ပြေမှုနှင့် စီးပွားရေး အဆင်ပြေလာနိုင်ရန် ကားသမားနှင့် ဒေသခံများက မျှော်လင့်နေကြသည်။

နယ်စပ်ကုန်သွယ်ရေး တိုးမြှင့်လာနိုင်ဖွယ်ရှိသည်နှင့် ပတ်သက်၍ မြန်မာနိုင်ငံဆိုင်ရာတရုတ်သံရုံးသို့ ဖုန်းဖြင့် ဆက်သွယ်သော်လည်း မရရှိခဲ့ပေ။ mizzima

အမည်ပျက်စာရင်းသွင်းလိုက်သည့် ကုမ္ပဏီ ၁၃၀ ကျော်ကို စစ်ဆေးနေသည်ဟုဆိုကာ ၂၀၂၂ ဒီဇင်ဘာလတွင် ကရင်ပြည်နယ် မြဝတီရုံး၌ နိုင်ငံကူးလက်မှတ် (ပတ်စ်ပို့) လျှောက်ထားခဲ့သူ ၉,၀၀၀ ခန့်၏ စာအုပ်များကို စစ်ကောင်စီက ထုတ်မပေးကြောင်း စုံစမ်းသိရှိရသည်။

ထိုကာလက စီးပွားရေးမြို့တော် ရန်ကုန်နှင့် အခြားမြို့နယ်အချို့တွင် QR ကုတ်စနစ်သုံး၍ ရက်ချိန်းယူရန် ခက်ခဲခဲ့ရာ အမြန်လိုအပ်နေသူတို့က မြဝတီရုံးတွင် သွားရောက်လျှောက်ထားခဲ့ကြခြင်းဖြစ်သည်။

ထိုင်းနိုင်ငံသို့ တရားဝင်သဘောတူစာချုပ် MOU စနစ်ဖြင့် မြန်မာဘက်မှ အလုပ်သမား စေလွှတ်နေသည့် အေဂျင်စီများ၊ ပွဲစားများက ပြည်ထဲရေးဝန်ကြီးဌာနအောက်ရှိ ပတ်စပို့ရုံးမှ ဝန်ထမ်းများနှင့် ပေါင်းကာ အလုပ်သမားများထံမှ အခကြေးငွေရယူ၍ ဝန်ဆောင်မှုပေးခဲ့ကြသည်။

ထိုရုံးက ထုတ်ပေးရန် ခွင့်ပြုထားသည့် သတ်မှတ်အရေအတွက်ထက် ကျော်လွန်ထုတ်ပေးခဲ့သည်ဟု စုံစမ်းသိရှိရသည်။ အသေးစိတ်ကိုမူ မသိရပေ။ ထို့နောက်တွင် စစ်ကောင်စီက အေဂျင်စီ ၁၃၃ ခုကို အမည်ပျက်စာရင်းသွင်းခဲ့သလို ၂၀၂၂ ဒီဇင်ဘာ ၂၁ မှစ၍ မြဝတီပတ်စပို့ရုံးတွင် စာအုပ်ထုတ်ပေးမှုကို ရပ်ဆိုင်းလိုက်သည်။

လက်ရှိတွင် ရန်ကုန်မြို့၌ အွန်လိုင်းမှတစ်ဆင့် ငွေပေးချေ၊ ရက်ချိန်းယူ၊ မြဝတီအပါအဝင် အခြားမြို့များတွင် လူကိုယ်တိုင်တန်းစီစနစ်ဖြင့် ပတ်စပို့လျှောက်ထားရန် စစ်ကောင်စီက ခွင့်ပြုထားသော်လည်း မြဝတီတွင် လွန်ခဲ့သော သုံးလဝန်းကျင်က လျှောက်ထားခဲ့သည့် လူ ၉၀၀၀ ဝန်းကျင်၏ အခြေအနေမှာ မရေမရာဖြစ်နေခြင်းဖြစ်သည်။

နိုင်ငံကူးလက်မှတ်ထုတ်ပေးခြင်းနှင့် ပတ်သက်သည့် စီမံခန့်ခွဲမှုအခြေအနေ မည်သို့ရှိသည်ကို မသိရကြောင်း မြဝတီရုံးတွင် ပတ်စပို့လျှောက် ထားခဲ့သူ အမျိုးသမီးတစ်ဦးက ပြောသည်။ 

“ဒီစာအုပ်တွေကို ပေးမသုံးတော့ဘူး၊ ထုတ်မပေးတော့ဘူးဆိုရင်လည်း ကျွန်မတို့ကိုပြော။ ကျွန်မတို့က အသစ်လျှောက်မှာ။ အခုက အဲ့ဒီလိုလည်း မပြောဘူး။ သူတို့သတ်မှတ်ထားတာက စာအုပ်တွေကို ရက် ၉၀ အတွင်း ထုတ်ရမယ်လို့ ပြောတယ်။ ဒါပေမဲ့ အခု ရက် ၉၀ ပြည့်တော့မယ်။ ၈၉ ရက် ရှိပြီ” ဟု သူက ပြောသည်။ 

“ကုမ္ပဏီတွေဆိုတာလည်း သူတို့ခွင့်ပြုထားလို့ လုပ်ကြတာပဲ။ ကုမ္ပဏီတွေကို စိစစ်တယ်ဆိုရင်လည်း စိစစ်လေ။ ဘာလို့ ကြားထဲက ပြည်သူက ခံနေရတာလဲ”

အမည်ပျက် ကြေညာခံရသည့် လုပ်ငန်းများက အမည်ပြောင်း၍ လုပ်ငန်းဆက်လုပ်နေပြီဖြစ်သော်လည်း ပြည်ပသို့ အလုပ်သွားလုပ်လိုသည့် ၎င်းတို့၏ အနာဂတ်မှာ ဝေဝါးနေရကြောင်း ၎င်းက ဆက်ပြောသည်။ 

ဖေဖော်ဝါရီလဆန်းက ပြည်ထဲရေးဝန်ကြီးဌာန ဒုဝန်ကြီးတစ်ဦးဖြစ်သူ ဗိုလ်ချုပ်စိုးတင့်နိုင်နေရာတွင် ဗိုလ်ချုပ်တိုးရီကို ပြောင်းလဲလိုက်ပြီးနောက်တွင် နိုင်ငံကူးလက်မှတ်ထုတ်ပေးသည့် လုပ်ငန်းစဉ်နှင့် မူဝါဒများ အပြောင်းအလဲဖြစ်လာသည်။ 

၂၀၂၂ ဒီဇင်ဘာတွင် တန်းစီစောင့်ဆိုင်းစနစ် QR Code ထုတ်ပေးခြင်းကို ရပ်ဆိုင်းသလို ပတ်စ်ပို့ရုံးများကိုလည်း ယခုနှစ် ဇန်နဝါရီ ၂ မှ ဖေဖော်ဝါရီ ၂၃ ရက်အထိ စစ်ကောင်စီက ပိတ်ထားခဲ့ဖူးသည်။

ပတ်စပို့ အမြန်လိုအပ်နေသဖြင့် ငွေကျပ်သိန်းချီ ကုန်ကျခဲ့သော်လည်း စာအုပ်မထုတ်ပေးပေးသလို အသစ်ပြန်လျှောက်ခွင့်လည်း မရှိသဖြင့် အခက်ကြုံနေကြောင်း မြဝတီရုံးတွင် ကြန့်ကြာမှု ကြုံနေရသည့် အမျိုးသားတစ်ဦးကလည်း ပြောသည်။

“ဘာလုပ်ရမှန်း မသိတာဗျာ။ cancel (ပယ်ဖျက်) ဆိုလည်း ပြောပေါ့ဗျာ၊ အသစ်လုပ်တာပေါ့။ အခုက ဟိုမကျဒီမကျနဲ့ ယူထားတဲ့ငွေတိုးတွေက ရှိသေးတယ်။ တစ်လတစ်လ (အတိုးက) တက်နေတယ်။ စာအုပ်လုပ်ဖို့တောင် ခြံပေါင် အိမ်ပေါင်တွေနဲ့လုပ်ရတာဗျ” ဟု သူက ဆိုသည်။

အာဏာသိမ်းပြီးနောက် ကရင်ပြည်နယ်အတွင်း ဖြစ်ပွားနေသည့် တိုက်ပွဲများကြောင့် လမ်းပန်းဆက်သွယ်ရေး ခက်ခဲနေချိန်တွင် မြဝတီသို့ သွား၍ ပတ်စပို့လျှောက်ထားမှုတစ်ခုတည်းအတွက် ကုန်ကျစရိတ် ကျပ် ၁၀ သိန်းကျော် ရှိခဲ့ကြောင်း ၎င်းက ဆိုသည်။

နိုင်ငံခြားတွင် သွားရောက်အလုပ်လုပ်ကိုင်ရန် ဆေးစစ်ခြင်း၊ အင်တာဗျူးဖြေဆိုခြင်း၊ ပြည်ဝင်ခွင့် လျှောက်ထားခြင်း စသည့် လုပ်ငန်းစဉ်များ အဆင်သင့်ဖြစ်နေသော်လည်း ပတ်စ်ပို့မရသေးသဖြင့် အချိန်နှင့် ငွေ ရင်းနှီးထားရသည်တို့မှာ အလဟဿဖြစ်နေရကြောင်း ထိုအမျိုးသားက ပြောသည်။

မြဝတီရုံးတွင် လွန်ခဲ့သည့် နှစ်ကုန်ပိုင်းက ပတ်စပို့လျှောက်ထားခဲ့ပြီး မရဘဲဖြစ်နေသူများထဲတွင် အခွင့်အလမ်းကောင်းများရှိသည့် ဂျပန်၊ ကိုးရီးယားကဲ့သို့ နိုင်ငံများသို့ အလုပ်သွားလုပ်ခွင့်ရပြီးသူများ ပါဝင်သည်ဟု စုံစမ်းသိရှိရသည်။

အထက်ပါဖြစ်စဉ်များကို အသေးစိတ် အတည်မပြုနိုင်သေးသလို ရန်ကုန်မြို့ရှိ နိုင်ငံကူးလက်မှတ်ရုံးချုပ်ထံ Myanmar Now က ဖုန်းဖြင့် မေးမြန်းသော်လည်း လက်ခံဖြေဆိုခြင်းမရှိပါ။

စစ်တပ်က အာဏာသိမ်းပြီး နှစ်နှစ်အတွင်း နိုင်ငံအနှံ့ စစ်ဖြစ်နေခြင်း၊ ကုန်ဈေးနှုန်းကြီးမြင့်၍ အလုပ်အကိုင်ရှားပါးခြင်းတို့ကြောင့် ပြည်ပထွက်လိုသူများနေရာ ပတ်စပို့လျှောက်ထား၊ ထုတ်ပေးသည့် အစီအမံများပါ မကြာခဏ ကမောက်ကမဖြစ်ခဲ့သည်။

ထိုအခြေအနေတွင် နယ်စပ်မှတစ်ဆင့် မြန်မာလုပ်သားများ ထိုင်းနိုင်ငံသို့ တရားမဝင် ခိုးဝင်နေကြရာ ဖမ်းဆီးခံရခြင်း၊ ယာဉ်များအတွင်း ပုန်း လျှိုး၍ လိုက်ပါရသဖြင့် အသက်သေဆုံးခြင်းများ မကြာခဏ ဖြစ်နေသည်။ myanmar now

ထိုင်း-မြန်မာနယ်စပ်ရှိ ကရင်နီဒေသ (ကယားပြည်နယ်) တွင် စစ်ကောင်စီက စစ်ကြောင်းထိုးနေသဖြင့် ထွက်ပြေးတိမ်းရှောင်နေရသူပေါင်း နှစ်သိန်းခွဲအထိ ရှိလာပြီဖြစ်ကြောင်း ဒေသခံ လူ့အခွင့်အရေးအဖွဲ့က ဆိုသည်။

၂၀၂၁ ခုနှစ် ဖေဖော်ဝါရီမှစ၍ စစ်တပ်က အာဏာသိမ်းပြီးနောက် ထွက်ပြေးတိမ်းရှောင်နေရသူများ ဖြစ်ကာ နှစ်သိန်းခွဲအရေအတွက်မှာ ယခုလ တတိယပတ်အတွင်း ပြန်လည်ကောက်ယူထားခြင်းဖြစ်သည်ဟု သိရသည်။

လက်ရှိတွင် ပြည်နယ်မြို့တော် လွိုင်ကော်အနောက်ဘက်ရှိ ဒီးမော့ဆိုအပြင် ထိစပ်နေသော ဖရူဆိုမြို့နယ်တို့တွင် စစ်တပ်က စစ်ကြောင်းထိုးနေကာ ဒေသခံ​တော်လှန်ရေးအဖွဲ့များနှင့် တိုက်ပွဲဖြစ်နေသည်။

တောတောင်များနှင့် လွိုင်ကော်မြို့ပေါ်၌ တိမ်းရှောင်နေသူများရှိသည့်နည်းတူ နယ်မြေချင်းထိစပ်နေသော ရှမ်းပြည်နယ်နှင့် ထိုင်းနယ်စပ်ရှိ စစ်ရှောင်စခန်းများတွင် တိမ်းရှောင်နေရသူများလည်းရှိသည်ဟု ကျေးရွာအုပ်စုမှူးများနှင့် ချိတ်ဆက်ကာ စာရင်းကောက်ယူနေသည့် ကရင်နီလူ့အခွင့်အရေးအဖွဲ့က ဆိုသည်။

“စစ်ရှောင်စခန်းတွေကို ရောက်ပြီး အနည်းဆုံး တစ်လလောက်ရှိမှ ကိန်းဂဏန်းက ငြိမ်တယ်ပေါ့။ မြေပြင်မှာ စစ်တမ်းကောက်ယူဖို့က လနဲ့ချီပြီး ကြာပါတယ်” ဟု ထိုအဖွဲ့ တာဝန်ရှိသူက ပြောသည်။

ဒီးမော့ဆိုနှင့် ဖရူဆိုတွင် မြို့လုံးကျွတ် ထွက်ပြေးတိမ်းရှောင်နေရသည်ဟုလည်း ကရင်နီအမျိုးသားများကာကွယ်ရေးတပ် (KNDF) မှ သတင်းနှင့်ပြန်ကြားရေးဌာန တာဝန်ရှိသူတစ်ဦးက ပြောသည်။

“ဒီးမော့ဆိုနဲ့ ဖရူဆို မြို့လုံးကျွတ် စစ်ရှောင်နေကြရတယ်။​ တောထဲတောင်ထဲတွေမှာ စစ်ရှောင်နေကြရပြီ။ အရပ်သားတွေ လုံးဝမရှိတော့တဲ့ မြို့တွေပေါ့”

ယခုလ ၁၁ ရက်တွင် စစ်ကောင်စီ၏ လေကြောင်းတိုက်ခိုက်မှုနှင့် မြေပြင်စစ်ကြောင်းများကြောင့် ဒီးမော့ဆိုအနောက်ဘက်ခြမ်းရှိ ဒေါတမကြီး၊ ဒေါညေးခူ၊ ဒေါဆိုဖျ စသည့် ကျေးရွာပေါင်း ၇ ရွာမှ ဒေသခံ ၆၀၀၀ ကျော် ထွက်ပြေးတိမ်းရှောင်ခဲ့ရပြီး ဖရူဆိုမြို့တွင်းမှ အိုးအိမ်စွန့်ခွာခဲ့ရသူ အရေအတွက်သည်လည်း ၆၀၀၀ ခန့်ရှိသည်ဟု သိရသည်။

စစ်တပ်က လမ်းများပိတ်ဆို့ထားသဖြင့် ဆန်နှင့် ရိက္ခာ သယ်ယူရန် အခက်အခဲဖြစ်နေသည်ဟု ကရင်နီလူ့အခွင့်အရေးအဖွဲ့ တာဝန်ရှိသူက ဆိုသည်။

“အဆိုးရွားဆုံးကြုံရတာ မိခင်နဲ့ ကလေးတွေပဲ။ ရေရှည်အကျိုးသက်ရောက်မှုတွေ များလာမယ်။ ပိုဆိုးဝါးလာမယ်လို့ ကျွန်တော်တို့ ခန့်မှန်းတယ်”

စစ်ကောင်စီတပ်က ဆက်သွယ်ရေးလမ်းကြောင်းများတွင် ဆေးဝါးပစ္စည်းများနှင့် ကျောင်းသုံးပစ္စည်းများကိုပင် သယ်ယူခွင့်မပေးဘဲ ဖျက်ဆီးပစ်သည်ဟု KNDF တာဝန်ရှိသူကလည်း ပြောသည်။

အာဏာသိမ်း စစ်တပ်ကို ဆန့်ကျင်ခုခံနေသည့် ဒေသများအနက် ကရင်နီဒေသလည်း အပါအဝင်ဖြစ်ကာ တိုက်ပွဲများ အဆက်မပြတ်ဖြစ်နေ သည်မှာ ၂၀၂၁ ခုနှစ် အစောပိုင်းကတည်းက ဖြစ်သည်။ ပြီးခဲ့သည့်လတွင် ဒေသခံ လက်နက်ကိုင်တော်လှန်ရေးအဖွဲ့တို့ ပူးပေါင်းကာ နေပြည် တော်အနီး ရှမ်းပြည်နယ်တောင်ပိုင်း ပင်လောင်းမြို့နယ်ရှိ စစ်ကောင်စီစခန်းကို ဝင်ရောက်တိုက်ခိုက်ခဲ့သည်။

ထို့နောက် စစ်တပ်က ပြန်လည်ထိုးစစ်ဆင်လျက်ရှိရာ ပင်လောင်းနှင့် ဖယ်ခုံမြို့နယ်ဘက်မှ စစ်ကြောင်း ၄ ကြောင်း၊ လွိုင်ကော်ဘက်မှ စစ် ကြောင်း ၂ ကြောင်း၊ ဘောလခဲမြို့နယ်ဘက်မှ စစ်ကြောင်း ၃ ကြောင်း၊ ဒီးမော့ဆိုတွင် စစ်ကြောင်း ၂ ကြောင်းဖြင့် ထိုးစစ်ဆင်နေသည်ဟု KNDF ထံမှ သိရသည်။myanmar now

khit thit

မန္တလေးမြို့ အောင်မြေသာစံမြို့နယ် လမ်း(၈၀)၊ (၇)လမ်းနှင့်(၈)လမ်းကြားရှိ လက်ဘက်ရည်ဆိုင်တစ်ခုတွင် လက်ဘက်ရည်ထိုင်သောက်နေသည့် ရာအိမ်မှူး ၂ ဦး ယနေ့ (မတ်လ ၂၂ ရက်) တွင် သေနတ်ဖြင့် ပစ်ခတ်ခံခဲ့ရသည်ဟု မြို့ခံများက ပြောသည်။

အသက်(၅၀)ဝန်းကျင်အရွယ်များဖြစ်သော ရာအိမ်မှူးဦးစိုးနိုင်နှင့် ဦးဝင်းကိုတို့အား ဆိုင်ကယ်ဖြင့်ရောက်လာသော အမည်မသိသေနတ်သမားများက ပစ်ခတ်သွားသည်ဟု ဒေသခံအမျိုးသားကပြောသည်။

“တစ်ဦးက သေသွားပြီကြားတယ်။ သေတာက ဘယ်သူလဲတော့ အတိအကျမပြောနိုင်သေးဘူး။ နောက်တစ်ဦးကလည်း မသေမရှင်ပဲ ဒဏ်ရာအတော်ပြင်းကြတယ်လို့ ပြောတယ်။”ဟု မျက်မြင်များကို ကိုးကားပြီး ဒေသခံအမျိုးသားကပြောသည်။

၎င်းတို့နှစ်ဦးစလုံးကို ဌာနီအရှေ့လူမှုရေးအသင်းကားဖြင့် မန္တလေးပြည်သူ့ဆေးရုံကြီးသို့ သယ်ဆောင်သွားသည်၊ ဖြစ်စဉ်နေရာအနီး စစ်ကောင်စီတပ်ဖွဲ့ဝင်များရောက်ရှိလာကာ စစ်ဆေးမေးမြန်းမှုများပြုလုပ်ကာ ပိုက်စိပ်တိုက်စစ်ဆေးခဲ့သည်ဟု အထက်ပါ အမျိုးသားကဆက်ပြောသည်။

ရာအိမ်မှူးဦးစိုးနိုင်ဆိုသူသည် အမရဌာနီအရှေ့ရပ်ကွက်၊ အကွက်(၁၉)၏ ရာအိမ်မှူးဖြစ်ပြီး ရာအိမ်မှူးဦးဝင်းကိုသည် အမရဌာနီအရှေ့ရပ်ကွက် (၁၉/က)၏ ရာအိမ်မှူးဖြစ်သည်။

၎င်းတို့နှစ်ဦးစလုံးကို လမ်း၈၀အတိုင်း မောင်းနှင်လာသည့် CZIအမျိုးအစား ဆိုင်ကယ်ဖြင့် ရောက်ရှိလာသည့် လူငယ်(၃)ဦးက ပစ်ခတ်သွားခြင်းဖြစ်ပြီး ဖမ်းဆီးရမိရေး ဆောင်ရွက်နေသည်ဟု စစ်ကောင်စီ လော်ဘီ တယ်လီဂရမ်စာမျက်နှာများက ဆိုကြသည်။ အဆိုပါ ပစ်ခတ်မှုကို မည်သည့်အဖွဲ့အစည်းက လုပ်ဆောင်ကြောင်း ထုတ်ပြန်ခြင်းမရှိသေးပေ။myanmar now

မွန်ပြည်နယ်၊ သထုံမြို့နယ်၊ ပိန္နဲတောကျေးရွာရှိ အကြမ်းဖက် စစ်တပ်စခန်းကို ဒရုန်းဖြင့် ဗုံးကျဲ တိုက်ခိုက် ခဲ့ကြောင်း သထုံပြည်သူ့ကာကွယ်ရေး တော်လှန်ရေး အင်အားစု(TPDF) မှ တာဝန်ရှိသူတစ်ဦးက ရန်ကုန် ခေတ်သစ်သတင်းဌာနထံသို့ပြောကြားသည်။

ယနေ့မတ်လ ၂၂ ရက် နံနက် ၁၁ နာရီခန့်က သထုံမြို့နယ်၊ ပိန္နဲတောကျေးရွာရှိ အကြမ်းဖက် စစ်ကောင်စီလက်အောက်ခံ စကခ ၈ ရှေ့တန်းစခန်းကို KNLA၊ PDF၊ KRF နှင့် TPDF Drone ယူနစ်တို့ ပူးပေါင်းကာ ဗုံးသီး ၆ လုံးကျဲချ တိုက်ခိုက်ခဲ့ကြောင်း၊ အကြမ်းဖက် စစ်သားများ ထိခိုက် သေဆုံးမှု အခြေအနေကို စုံစမ်းနေဆဲဖြစ်​ပြီး ပြည်သူ့ ကာကွယ်ရေး တပ်ဖွဲ့ဝင်များ အထိအခိုက်မရှိပြန်လည် ဆုတ်ခွာနိုင်ခဲ့ကြောင်း သိရသည်။

“ပိန္နဲတောစခန်းကတော့ ပြန်မပစ်ဖူးဗျ၊ သူ့ဘေးမှာရှိတဲ့ လှုပ်ရှားတပ်ခွဲကတော့ လက်နက်ငယ်တွေနဲ့ ပြန် ပစ်တာရှိတယ်၊ ဒါလဲအချက်ရေနည်းနည်းလောက်ပဲ ပြန်ပစ်တာ၊ ဒရုန်းနဲ့ချတာဆိုတော့ သူတို့ရှိတဲ့နေရာ သိမှာစိုးလို့ထင်တယ်၊ ကျနော်တို့ကလည်း သူတို့ရှိတဲ့နေရာတွေ့ရင် ထပ်ချမှာပါ၊ ထိခိုက်သေဆုံးမှုတော့ မသိရသေးဘူး” ဟု သထုံပြည်သူ့ကာကွယ်ရေး တော်လှန်ရေး အင်အားစု(TPDF) မှ တာဝန်ရှိသူ တစ်ဦး က ရန်ကုန် ခေတ်သစ်သတင်းဌာနထံသို့ပြောကြားသည်။

ထို့ပြင် စစ်ကိုင်းတိုင်း၊ မုံရွာမြို့နယ်၊ လယ်ဇင်ရွာ၌ တပ်စွဲထားသော အကြမ်းဖက် စစ်တပ်ကို PDF တပ်ဖွဲ့များက ဝင်ရောက် တိုက်ခိုက်ခဲ့​ကြောင်း မုံရွာခရိုင် တပ်ရင်း ၂၂ မုံရွာနတ်ဆိုး တပ်ရင်းမှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

မတ်လ ၁၉ ရက်နေ့ ည ၁၀ နာရီ ၃၀ မိနစ်တွင် မုံရွာမြို့နယ် လယ်ဇင်ရွာ၌ တပ်စွဲထားသော အကြမ်းဖက် စစ်တပ်ကို PDF တပ်ဖွဲ့များ ဝင်ရောက် ပစ်ခတ် တိုက်ခိုက်ခဲ့ပြီး စစ်သားများ ထိခိုက်သေဆုံးမှု ရှိမရှိကို အတည်မပြုနိုင်သေးကြောင်း သိရသည်။

အဆိုပါ တိုက်ခိုက်မှုကို မုံရွာခရိုင် တပ်ရင်း၂၂ မုံရွာနတ်ဆိုး တပ်ရင်းနှင့် မုံရွာခရိုင် တပ်ရင်း၂၄ Monywa Ranger Group Truth Army တို့က ပူးပေါင်း လုပ်ဆောင်ခဲ့ကြောင်း မုံရွာခရိုင် တပ်ရင်း ၂၂ မုံရွာနတ်ဆိုး တပ်ရင်းမှ တာဝန်ရှိသူ တစ်ဦးကပြောဆိုသည်။ khit thit