Category Archives: Breaking News

ပေါက်မြို့နယ်တွင် စစ်တပ်က ပစ်ခတ်လိုက်သော လက်နက်ကြီးကျည် ၆၀ မမ ထိမှန်၍ တံစူးကျေးရွာမှ စစ်ရှောင် ပြည်သူ ၉ ဦး ပွဲ ချင်းပြီးသေဆုံး

မကွေးတိုင်း၊ ပေါက်မြို့နယ်တွင် ဧပြီလ ၁၂ ရက်နေ့ စစ်တပ်က ပစ်ခတ်လိုက်သော လက်နက်ကြီးကျည် ၆၀ မမ ထိမှန်၍ တံစူးကျေးရွာမှ စစ်ရှောင် ပြည်သူ ၉ ဦး ပွဲချင်းပြီးသေဆုံးသွားကြောင်း ဒေသခံများထံမှ သိရှိရသည်။

မကွေးတိုင်း ၊ ပေါက်မြို့နယ်၊ တံစူးရွာသား စစ်ရှောင်ပြည်သူများဖြစ်ကြသည့် ဒေါ်သန်းစော ၊ ဒေါ်တင်မိုးလှိုင် ၊ ဒေါ်ဌေးဝ ၊ ဒေါ်စန်းခွေး ၊ မလှမျိုးနွယ် ၊ မလှမျိုးကြွယ် ၊ မခင်သန်းနု ၊ မဇင်ဇင်အောင် ၊ ဦးမြင့်ပိုတို့သည် အကြမ်းဖက် စစ်တပ်က ဧပြီလ ၁၂ ရက်နေ့ ညနေပိုင်းတွင် ပစ်ခတ်လိုက်သော ၆ဝ မမ လက်နက်ကြီးကျည်ထိမှန်၍ အစုလိုက် အပြုံလိုက် သေဆုံးခဲ့ကြောင်း ဒေသခံပြည်သူများ ထံမှ သိရသည်။

စစ်တပ်က တံစူး ကျေးရွာအတွင်းသို့ ဝင်ရောက်လာပြီးနောက် စစ်ဘေးရှောင် ပြည်သူများနေထိုင်သော တဲများကို ၆ဝ မမ လက်နက်ကြီးဖြင့် ချိန်ရွယ်ပစ်ခတ်သည့်အတွက် ထိုသို့ အစုလိုက် အပြုံလိုက် သေဆုံးခဲ့ခြင်းဖြစ်ကြောင်း သိရသည်။

ထို့ပြင် အကြမ်းဖက် စစ်တပ်က တောတောင်များအတွင်း ပြည်သူများ စုဆောင်းထာသော အဝက်အထည် ပစ္စည်းများ၊ ဆိုင်ကယ် ငါးစီး၊ ဓာတ် ဆီ ရေတင်စက်များနှင့် ဆန်စပါးတင်း ၄၀၀ခန့်ကိုပါ မီးရှို့ဖျက်ဆီးခဲ့ကြောင်း ဒေသခံပြည်သူများက ပြောဆိုသည်။

” စစ်ခွေးတွေ လက်နက်ကြီးနဲ့ ပစ်လို့ ပွဲချင်းပြီး သေတာက ၈ဦး ပြင်းထန် ဒဏ်ရာရတာ ၂ဦးရှိတယ်။ အဲဒီ ပြင်းထန် ဒဏ်ရာရတဲ့ သူတွေထဲက ၁ ဦးက သေဆုံးသွားလို့ သေဆုံးသူက စုစုပေါင်း ၉ဦး ဖြစ်သွားတာ။ ဆေးဝါးတွေ လိုအပ်ချက်တွေအများကြီးပဲ များများ ကူကြဖို့ လိုတယ်။ ဒီမှာ ဘာမှ မပြည့်စုံဘူး” ဟု ဒေသခံပြည်သူ တစ်ဦးကပြောဆိုသည်။

လက်ရှိချိန်တွင် ဒေသခံပြည်သူများသည် ၎င်းတို့ ကြိုတင်စုဆောင်းထားသော ဆေးဝါးများ၊ အစားအသောက်များနှင့် အသုံးအဆောင် ပစ္စည်းများကိုပါ စစ်တပ် က ဖျက်ဆီးသွားခြင်းကြောင့် ပြည်သူများ၏ အကူအညီများ၊ လှူတန်းမှုများကို အရေးပေါ်လိုအပ်လျက်ရှိကြောင်း သိရသည်။khit thit

ဘီးလင်း၊ ရွှေရောင်ပြကျေးရွာအနီး စစ်တပ်က အသက် ၆ နှစ်အရွယ် မောင်ကြယ်စင်မင်းနှင့်အသက် ၉ နှစ်အရွယ် မောင်မောင်ညီညီဇော် ကလေး ၂ ဦးကို ပစ်သတ်

မွန်ပြည်နယ်၊ ဘီးလင်းမြို့နယ်၊ ရွှေရောင်ပြကျေးရွာအနီးတွင် ယမန်နေ့ မတ်လ ၂၉ ရက်နေ့ စစ်တပ်က အသက် ၆ နှစ်အရွယ် မောင်ကြယ်စင်မင်းနှင့် အသက် ၉ နှစ်အရွယ် မောင်ညီညီဇော်တို့နှစ်ဦးကို ပစ်သတ်လိုက်ကြောင်း ပစ်သတ်ခံရသော ကလေးမိဘများ၏မိတ်ဆွေများနှင့်ဒေ သခံများထံမှ သိရှိရသည်။

မတ်လ ၂၉ ရက်နေ့ နေ့လယ်ပိုင်း အကြမ်းဖက်စစ်ကောင်စီတပ်များသည် အဝေးပြေးကားလမ်းအတိုင်း စစ်ကားများဖြင့် သွားလာနေစဉ် ကားပေါ်မှ ခရီးသည်တင်ကားများနှင့် အိမ်စီးကားများကို ရမ်းသမ်းပစ်ခတ်ကြောင်း၊ ထိုသို့ ပစ်ခတ်စဉ် ကလေးငယ်များအပါအဝင် လူအများစု လိုက်ပါလာသော ကားတစ်စီးကို ဘီးလင်းမြို့နယ်၊ ရွှေရောင်ပြကျေးရွာအနီး စစ်တပ်က ကားပေါ်မှ ပစ်ခတ်သွားကြောင်း၊ ယင်းသို့ ပစ်ခတ်မှုကြောင့် ကားပေါ်တွင်လိုက်ပါသော အသက် ၉ နှစ်အရွယ် မောင်ညီညီဇော်သည် ပွဲချင်းပြီး သေဆုံးခဲ့ပြီး အသက် ၆ နှစ်အရွယ် မောင်ကြယ်စင်မင်းမှာ ဆီးခုံကျည်ထိမှန်၍ ဆေးရုံရောက်ရှိပြီးနောက် သေဆုံးသွား ကြောင်း သိရှိရသည်။

“ကားပေါ်မှာ ကလေး ၅ ဦးပါတယ်။ အဲဒါ မိသားစုတွေက ဘုန်းကြီးကျောင်းသွားအပြီး ပြန်လာတာ။ ရွှေရောင်ပြဆီဆိုင်နားအရောက်မှာ စစ်ကားဖြတ်သွားတယ်။ အဲဒါ စစ်ကားပေါ်ကနေ လှမ်းပစ်တာ။ ပစ်တာက ကားခေါင်းခန်းမှာ ထိုင်နေတဲ့ အဖေကို ပစ်တာ။ အဲဒါ ရင်ခွင်ထဲရှိနေတဲ့ကလေးက ထိပြီး ပွဲချင်းပြီး ဆုံးတယ်။ နောက်ကလေးတစ်ဦးကလည်း ဆီးခုံကို ကျည်ထိတယ်။ ဆေးရုံရောက်ပြီးတော့ ဆုံးသွားတယ်။ ခွဲစိတ်ခန်းဝင်ပေမယ့် မရတော့ဘူး” ဟု ဖြစ်စဉ်ကို မျက်မြင်တွေ့ရသူက အခြေအနေကို ရှင်းပြသည်။

သထုံမြို့နယ်မှ ဒေသခံတစ်ဦးကလည်း “အကြီးကောင်က ကျည်ထိတာ အချက်ရေများလို့ သူ့အဖေလက်ထဲမှာတင် ပွဲချင်းပြီးပဲ။ အငယ်ကောင်လေးက ဆီးခုံနားမှာ ကျည်ထိတာ။ ဆေး ရုံရောက်‌တော့ဆုံးသွားတယ်”ဟု ပြောဆိုသည်။

စစ်တပ်၏ ပစ်သတ်မှုကြောင့် သေဆုံးသွားသူ မောင်ကြယ်စင်မင်းနှင့်မောင်ညီညီဇော်တို့၏ မိဘများသည် သထုံမြို့နယ် မြေနီကုန်းကျေးရွာတွင် နေထိုင်သူများဖြစ်ကြပြီး ယနေ့ မွန်းလွဲ ၂ နာရီတွင် ကလေး ၂ ဦးလုံးကို မြေနီကုန်းသုဿာန်တွင် သဂြိုလ်ကြောင်း သိရှိရသည်။ khit thit

ကလေးမြို့နယ်တွင် ဒေသခံများ ခိုလှုံနေရာသို့ လက်နက်ကြီးကျ၊ ၁၀ ဦးဒဏ်ရာရ

စစ်ကိုင်းတိုင်း၊ ကလေးမြို့တောင်ပိုင်းတွင် ယမန်နေ့ (မတ် ၈) မွန်းလွဲပိုင်းက ဒေသခံများ ပုန်းခိုနေရာသို့ စစ်တပ်က ပစ်ခတ်လိုက်သော လက် နက်ကြီးကျည် ကျရောက်ပေါက်ကွဲသဖြင့် ကလေးငယ်များအပါအဝင် အရပ်သား ၁၀ ဦး ထိခိုက်ဒဏ်ရာရရှိသည်ဟု သိရသည်။

ဒေသခံ ၁၅၀၀ ခန့် ခိုလှုံနေသည့် ကလေးမြို့နယ်တောင်ပိုင်း နတ်မြောင်းရွာရှိ ဘုန်းကြီးကျောင်းဝင်းအတွင်း ယမန်နေ့ မွန်းလွဲ ၁ နာရီခန့်က လက်နက်ကြီးကျည်လေးလုံး ကျရောက်ပေါက်ကွဲခဲ့သည်ဟု ဒေသခံနှစ်ဦးက ဆိုသည်။​

အမျိုးသမီးတစ်ဦးမှာ ဦးခေါင်းထိမှန်၍ ပြင်းထန်ဒဏ်ရာရရှိခဲ့ပြီး အခြားအမျိုးသမီးသုံးဦးနှင့် ကလေး ၆ ဦးမှာ မစိုးရိမ်ရသည့် ဒဏ်ရာများဖြစ်ကြောင်း မျက်မြင်ကြုံတွေ့သူ အသက် ၃၀ အရွယ် အမျိုးသားတစ်ဦးက Myanmar Now ကို ပြောသည်။​

“အမျိုးသမီးတစ်ဦးကတော့ ခေါင်းကို ထိသွားတဲ့အတွက် ဒဏ်ရာကို အင်္ကျီချွတ်ပြီး အုပ်ပေးနေတဲ့အချိန်မှာတောင်မှ တော်တော်စိုးရိမ်ရတဲ့ အခြေအနေမျိုးဖြစ်နေတယ်။ ဦးနှောက်တောင် မြင်နေရတဲ့ အခြေအနေမျိုး” ဟု ၎င်းက ပြောသည်။​

“နို့စို့ကလေးအရွယ်တစ်ယောက်က မျက်ခွံကို ရှပ်ထိသွားတာ မျက်ခွံရောင်နေတယ်။ မိန်းမကြီးတစ်ယောက်က တင်ပါးကို ရှပ်မှန်တယ်။ ၈ နှစ်၊ ၉ နှစ်အရွယ် ကလေးတစ်ယောက်က လက်ရယ်၊ ရင်ဘတ်ရယ်၊ ပေါင်ရယ် မှန်တယ်။ ကျန်တဲ့သူတွေက လက်မောင်းတွေမှန်တယ်” 

စစ်ကောင်စီတပ် ပစ်ခတ်လိုက်သော လက်နက်ကြီးကျည်များမှ ကျောင်းဝင်းအတွင်း သုံးလုံးကျကာ ဒေသခံများခိုလှုံနေသည့် အဆောက်အအုံပေါ်သို့ တစ်လုံး ကျရောက်ပေါက်ကွဲခဲ့ခြင်းဖြစ်ကြောင်း၊ ထိခိုက်ဒဏ်ရာရသူများကို ကလေးမြို့ဆေးရုံသို့ တင်ပို့ထားကြောင်း အထက်ပါလူက ထပ်ပြောသည်။ 

ကလေးမြို့တောင်ပိုင်းတွင် ပြီးခဲ့သည့် ဒီဇင်ဘာလကတည်းက စစ်တပ်နှင့် ဒေသခံ ပြည်သူ့ကာကွယ်ရေးတပ်ဖွဲ့ (PDF) များ တိုက်ပွဲအပြင်းအ ထန်ဖြစ်နေသည်။ ထိုတိုက်ပွဲကြောင့် ထောင်နှင့်ချီသော ဒေသခံများမှာ ဘေးလွတ်ရာဟု ယူဆရသော နေရာများတွင် အလျဉ်းသင့်သလို ထွက်ပြေးတိမ်းရှောင်နေရသည်။ 

နတ်မြောင်းရွာအနီးတွင် ယမန်နေ့က တိုက်ပွဲဖြစ်ပွားပြီးနောက် ပြန်ဆုတ်သွားချိန်တွင် စစ်တပ်က လယ်ယာလုပ်ငန်းခွင်မှ အရပ်သားတစ်ဦးကို ပစ်ခတ်ခဲ့သည်ဟု သိရသည်။​

စစ်တပ်က ပစ်သတ်ခဲ့သူမှာ အသက် ၄၀ အရွယ် ကိုဇော်မင်းနိုင်ဖြစ်ပြီး ဦးခေါင်းနှင့် ဝမ်းဗိုက်တွင် ကျည်ထိမှန်ဒဏ်ရာဖြင့် ၎င်း၏ ရုပ်အ လောင်း ကို ယမန်နေ့ညနေက သင်္ဂြိုဟ်ခဲ့ကြောင်း ဒေသခံအချို့ထံမှ သိရသည်။

ဒေသခံများမှာ စားဝတ်နေရေးအခက်အခဲများကြောင့် တိုက်ပွဲနှင့် ဝေးရာ နေရာများသို့ ထပ်ရွှေ့ပြောင်းရန် မလွယ်ကူကြောင်း၊​ အရပ်သားများကို ပစ်မှတ်ထားတိုက်ခိုက်ခဲ့သည့် စစ်တပ်၏လုပ်ရပ်မှာ စစ်ကောင်စီ၏ ပုံရိပ်ကိုသာ ကျဆင်းစေကြောင်းလည်း Myanmar Now က ဆက်သွယ်မေးမြန်းသည့် ဒေသခံများက ဆိုသည်။

“လက်လုပ်လက်စားတွေ ပါတယ်။ တစ်ရက်လုပ်မှ တစ်ရက်စားရတဲ့သူတွေလည်း ပါတယ်။ ဒီလူတွေအတွက် အဝေးကြီးရှောင်ပုန်းဖို့ရာ ငွေ ကြေးမရှိဘူး။ အဲဒီတော့ ဒီနေရာတွေကို တိုက်ခိုက်ပြီဆိုမှတော့ ကိုယ့်ကိုယ်ကိုယ် သရဏဂုံတင်ရုံပဲ ရှိတာပေါ့” ဟု ဒေသခံ အမျိုးသားတစ်ဦးက ပြောသည်။

ဘုန်းကြီးကျောင်းဝင်းအတွင်း ပလတ်စတစ်ဖြင့် မြေစိုက်တဲများ ဆောက်လုပ်ခိုလှုံနေရကြောင်း၊ ရာသီဥတုပြင်းထန်သောကြောင့် သက်ကြီးရွယ်အိုများအတွက် ဓာတ်ဆားအပါအဝင် ဆေးဝါးများ လိုအပ်နေကြောင်း၊ လေးလနီးပါးကြာ ခိုလှုံနေရသူများနှင့် ပတ်သက်၍လည်း ၎င်းက ပြောသည်။​

ကလေးမြို့တောင်ပိုင်း ကျေးရွာများအပါအဝင် စစ်ကိုင်းတိုင်းတစ်ခုလုံးနီးပါးကို မတ်လ ၃ ညပိုင်းမှစ၍ အင်တာနက်ဖြတ်တောက်ပြီးနောက် စစ်ကောင်စီက ထိုဒေသတစ်ခုလုံးကို အင်အားသုံး ထိုးစစ်ဆင်နေသည်။​

စစ်ကိုင်းတိုင်းအလယ်ပိုင်း တန့်ဆည်မြို့နယ် မြောက်အင်းရွာတွင်လည်း ယခုလ ၅ ရက်က ဒေသခံများခိုလှုံနေသော နေရာကို စစ်တပ်က လက် နက်ကြီးဖြင့် ပစ်ခတ်ပြီး လူလေးဦးကို ဖမ်းဆီးသွားသည်။

ယင်းမာပင်မြို့နယ် လက်ပံတောရွာတွင်လည်း ယခုလ ၈ ရက်၌ ဒေသခံများခိုလှုံနေသည့် ဘုန်းကြီးကျောင်းအတွင်း လက်နက်ကြီး ကျရောက် ပေါက်ကွဲသဖြင့် ကလေးငယ်နှစ်ဦးအပါအဝင် အရပ်သား ၆ ဦး သေဆုံးသည်။

ထိုသို့ အရပ်သားများ တိုက်ခိုက်ခံရခြင်းအပေါ် စစ်ကောင်စီက ဝန်ခံလေ့မရှိဘဲ မြို့ရွာများတွင် ဖြစ်ပွားနေသော တိုက်ပွဲများ၊ စစ်တပ်၏ စီးနင်းတိုက်ခိုက်ခြင်းများအတွင်း ထိခိုက်ပျက်စီးမှုများနှင့် ပတ်သက်၍ ဒေသခံ PDF များ၏ လုပ်ရပ်ဟု စွပ်စွဲပြောဆိုလေ့ရှိသည်။​

နိုင်ငံအနှံ့တွင် လက်နက်ကိုင်ခုခံတော်လှန်မှုများ လပေါင်းများစွာ ကြာလာပြီးနောက် စစ်ကောင်စီက ဒေသခံ PDF များကို လိုက်လံတိုက်ခိုက်ရာတွင် အရပ်သားများကိုပါမချန် လက်နက်ကြီးပစ်ခတ်ခြင်း၊ ဗုံးကြဲတိုက်ခိုက်ခြင်းများ ပြုလုပ်လာသည်။

ကယားပြည်နယ်တွင်လည်း ယမန်နေ့က တိုက်ပွဲဖြစ်ပွားခြင်းမရှိသော ကျေးရွာတစ်ခုကို စစ်တပ်က လက်နက်ကြီးဖြင့် ပစ်ခတ်သဖြင့် ကလေးငယ်သုံးဦး သေဆုံးခဲ့သည်။ myanmar now

ဖာပွန်တွင် စစ်တပ်က လက်နက်ကြီးနှင့်ပစ်၍ ကလေးများအပါအဝင် ၇ ဦး သေဆုံး

ကရင်ပြည်နယ်၊ ဖာပွန်ဒေသကို စစ်တပ်က လက်နက်ကြီးနှင့် ပစ်ခတ်သဖြင့် ကလေး ၃ ဦး အပါအဝင် ဒေသခံ ၇ ဦး သေဆုံးခဲ့သည်ဟု ကရင်ငြိမ်းချမ်းရေးအထောက်အကူပြုကွန်ရက် (KPSN) ၏ မတ် ၆ ရက် သတင်းထုတ်ပြန်ချက်အရ သိရသည်။ 

ကလေး ၃ ဦးမှာ ကရင်အမျိုးသားအစည်းအရုံး (KNU) နယ်မြေဖြစ်သော ဖာပွန် (မူတြော်) ခရိုင်၊ ဘူးသိုမြို့နယ်၊ ကလော်ဒေးကျေးရွာမှ ၂ နှစ်အရွယ် နော်တလု၊ ၅ နှစ်အရွယ် နော်ထူးဖော၊ ၁၄ နှစ်အရွယ် နော်တင်နီလာဝင်းတို့ ဖြစ်ကြောင်း၊ သေဆုံးသူများထဲတွင် ကိုယ်ဝန်ဆောင်တစ်ဦးလည်း ပါဝင်ကြောင်း၊ ဒဏ်ရာရသူ ၄ ဦး ရှိကြောင်း ထုတ်ပြန်ချက်တွင် ဖော်ပြထားသည်။  

၅ ရက်နေ့က ဖာပွန်-ကမမောင်းလမ်းအရှေ့ဘက်ခြမ်း အိမ်ခြေ ၅၀ ဝန်းကျင်ရှိသည့် ကလော်ဒေးရွာကို စစ်ကောင်စီတပ် ခလရ ၄၀၆၊ ၄၀၇ နှင့် နယ်ခြားစောင့်တပ် BGF-၁၀၁၃ တပ်စခန်းတို့၏ လက်နက်ကြီးကုန်းမှ ပစ်ခတ်ခြင်းဖြစ်သည်ဟု KPSN ၏ လက်ထောက်ဒါရိုက်တာ စောလေးကပေါက Myanmar Now ကို ပြောသည်။

“ညဘက်ကြီး ပစ်တဲ့အချိန်မှာ အဲဒီအချိန်မှာ ရွာသားတွေက အနားယူပြီး အိမ်မှာပြန်ရှိနေတဲ့အချိန် ဖြစ်နေတယ်” ဟု ၎င်းက ဆိုသည်။

“ဆိုင်းမဆင့် ဗုံမဆင့် ပစ်ချလိုက်တဲ့ အခြေအနေမျိုးဆိုတော့ ရွာသားတွေအနေနဲ့ သေနတ်သံမကြားဘဲ လက်နက်ကြီးနဲ့ ရွာထဲကို တန်းထုလိုက်တာဆိုတော့ ပုန်းရှောင်ဖို့ မရဘဲ ဖြစ်သွားတာပေါ့”

ထိခိုက်ဒဏ်ရာရသူများကို KNU ကျန်းမာရေးစောင့်ရှောက်မှုဌာနသို့ ပို့ဆောင်ပေးခဲ့ကြောင်း၊ နောက်တစ်ရက် (မတ် ၆ ) တွင် ကလော်ဒေးရွာ ဖာပွန်-ကမမောင်းလမ်း အနောက်ဘက်ရှိ ရွာတစ်ရွာကိုလည်း စစ်တပ်က လက်နက်ကြီးနှင့် ပစ်ခတ်ခဲ့ကြောင်း ၎င်းက ပြောသည်။

“ကျေးရွာတည့်တည့်ကို ပစ်ချတယ်ဆိုတာက တမင်သက်သက် ပြည်သူလူထုကို သတ်ဖြတ်နေတဲ့ သဘောပဲ။ ဒါကတော့ ကရင်ပြည်နယ်မှ မဟုတ်ဘူး။ မြန်မာတစ်ပြည်လုံးမှာ တွေ့မြင်နေရတာပဲ” ဟု ၎င်းက ဆက်ပြောသည်။

ကျေးရွာတည်နေရာကို သိရှိသည့် စစ်တပ်က ရွာသားများ နေအိမ်တွင်ရှိနေမည့်အချိန် ည ၇ နာရီ ၂၀ မိနစ်တွင် တမင်ရည်ရွယ် ပစ်ခတ်ခြင်းဖြစ်သည်ဟု ၎င်းက ဆိုသည်။ 

ထိုသို့ တိုက်ခိုက်မှုနှင့် ပတ်သက်၍ စစ်တပ်၏ စီးပွားရေးမိတ်ဖက်များ၏ ဘဏ္ဍာငွေအထောက်အပံ့များ၊ နိုင်ငံတကာက ရောင်းချသည့် စစ်လက်နက်များကို အသုံးပြု၍ ကရင်လူထုကို ပစ်မှတ်ထားတိုက်ခြင်း ဖြစ်သည်ဟု KPSN က ထုတ်ပြန်ထားသည်။ 

ထို့ကြောင့် မြန်မာစစ်တပ်ကို လက်နက်ထောက်ပံ့ပေးသည့် ရုရှား၊ တရုတ်၊ ပါကစ္စတန်၊ အီရန်၊ ဘီလာရုစ်နှင့် စင်ကာပူတို့ကို ဖိအားပေးရန်၊ စစ်တပ်၏ ဝင်ငွေကို ဖြတ်တောက်ရန် နိုင်ငံတကာမှ အရေးယူပိတ်ဆို့ရန် ထိုအဖွဲ့က တောင်းဆိုထားသည်။ 

ကရင်ပြည်နယ်တွင် နေရပ်စွန့်ခွာ ထွက်ပြေးတိမ်းရှောင်နေရသူ များစွာရှိသဖြင့် စစ်တပ်၏ လေကြောင်းထောက်ကူမှုကို ဖြတ်တောက်နိုင်ရေးအတွက် လေယာဉ်ဆီရောင်းချမှု ပိတ်ပင်ရန်လည်း တောင်းဆိုချက်တွင် ဖော်ပြထားသည်။ 

ယခုဖြစ်စဉ်နှင့် ပတ်သက်၍ စစ်ကောင်စီထံ ဆက်သွယ်မေးမြန်းနိုင်ခြင်း မရှိသေးသလို စစ်ကောင်စီ ထုတ်ပြန်သည့် သတင်းများတွင်လည်း တိုက်ခိုက်မှုများအကြောင်း ဖော်ပြလေ့ မရှိပေ။ 

တပ်မဟာ ၅ နယ်မြေ

KNU ၏ တပ်မဟာများအနက် တပ်မဟာ ၅ သည် စစ်ရေးလှုပ်ရှားမှု အများဆုံးနယ်မြေဖြစ်ပြီး စစ်တပ်က အာဏာသိမ်းပြီးနောက် တိုက်ပွဲများ နေ့စဉ်နီးပါး ထိတွေ့ဖြစ်ပွားနေသော နယ်မြေဖြစ်သည်။ 

တပ်မဟာ ၅ နယ်မြေအတွင်း စစ်ကောင်စီတပ်နှင့် BGF တို့ စစ်ရေးလှုပ်ရှားမှု ပိုများလာကြောင်း၊ အထူးသဖြင့် ဖာပွန် − ကမမောင်း ကားလမ်းတစ်လျှောက်တွင် တပ်ရင်း ၅ ရင်းခန့် ချထားကြောင်း KNU ဘက်က ယမန်နှစ်ကုန်ပိုင်းတွင် ပြောထားသည်။

တစ်နိုင်ငံလုံးအပစ်အခတ်ရပ်စဲရေးသဘောတူစာချုပ် (NCA) တွင် လက်မှတ်ထိုးထားသည့် KNU က အာဏာသိမ်းမှုကို ကန့်ကွက်ခဲ့ပြီး စစ်ကောင်စီ၏ရန်မှ တိမ်းရှောင်လာသူများကိုလည်း အကာအကွယ်နှင့် နေရာထိုင်ခင်း ပေးထားသည်။

အာဏာရှင်စနစ်ကို မြန်မာ့မြေပေါ်မှ အမြစ်ဖြုတ်မည်ဟု ကြွေးကြော်ထားသည့် အမျိုးသားညီညွတ်ရေးအတိုင်ပင်ခံကောင်စီ (NUCC) တွင်လည်း KNU က ကိုယ်စားလှယ်စေလွှတ်ကာ ဖက်ဒရယ်ဒီမိုကရေစီပြည်ထောင်စုထူထောင်မည့် လုပ်ငန်းစဉ်များကို ချမှတ်နေသည်။

ဖေဖော်ဝါရီလအတွင်း တပ်မဟာ ၅ နယ်မြေတွင် တိုက်ပွဲပေါင်း အကြိမ် ၃၀၀ ကျော် ဖြစ်ပွားခဲ့ပြီး စစ်တပ်ဘက်မှ ဗိုလ်ကြီး ၃ ဦးအပါအဝင် ၁၃၆ ဦး သေဆုံးကာ ၁၀၄ ဦး ဒဏ်ရာရခဲ့ကြောင်း KNU ဘက်မှ ထုတ်ပြန်ထားသည်။ 

KNU ၏ ကရင်အမျိုးသားလွတ်မြောက်ရေးတပ်မတော် (KNLA) ဘက်မှ ၁၁ ဦး သေဆုံးပြီး ၂၆ ဦး ဒဏ်ရာရရှိသည်ဟု ထုတ်ပြန်ချက်တွင် ဖော်ပြထားသည်။ အရပ်သား ၄ ဦး သေဆုံးပြီး ၂၀ ခန့် ဒဏ်ရာရသည်ဟု ဆိုသည်။

ယင်းတစ်လတာအတွင်း လက်နက်ကြီးဖြင့်ပစ်ခတ်မှု အကြိမ် ၃၀၀ ကျော် ရှိခဲ့ပြီး လေကြောင်းတိုက်ခိုက်မှု ၁၀ ကြိမ် ရှိခဲ့ကြောင်း တပ်မဟာ ၅ ၏ မူတြော်သတင်းဌာနက ထုတ်ပြန်ထားသည်။  myanmar now

ပေါက်မြို့နယ် အင်းငယ်ဒေါင့်ရွာမှ စစ်တပ် မုဒိမ်းကျင့် သတ်ဖြတ်ခဲ့သော ဒေါ်အေးအေးဝင်း၏ အသက် ၁၁နှစ် အရွယ် သမီး မသင်းသင်းမိုးကို စစ်တပ်က သတ်ဖြတ်ပြီး အ လောင်း ကို လမ်းမပေါ်ပစ်ခဲ့

မကွေးတိုင်း၊ ပေါက်မြို့နယ်၊ အင်းငယ်ဒေါင့်ကျေးရွာမှ အသက် ၄၂ နှစ်အရွယ် ဒေါ်အေးအေးဝင်းကို စစ်ကောင်စီတပ်များက မုဒိန်းကျင့် သတ် ဖြတ်လိုက်ပြီး အတူတူရှိနေသည့် အသက် ၃ နှစ်အရွယ်သမီးငယ် မရတီမိုးကိုပါဓားဖြင့် ထိုးသတ်သွားကော စစ်တပ်က ဖမ်းဆီးခေါ်ဆောင် သွားကာ သတ်ဖြတ်ခဲ့သည့် ဒေါ်အေးအေးဝင်း၏ အသက် ၁၁နှစ် အရွယ် သမီး မသင်းသင်းမိုး ရုပ်အလောင်းကို ယနေ့ မတ်လ ၈ရက်နေ့တွင် ပြန်လည်တွေ့ရှိခဲ့ကြောင်း ဒေသခံများက ရန်ကုန်ခေတ်သစ်သတင်းဌာနသို့ ပြောဆိုသည်။

မတ်လ ၅ ရက်နေ့ညပိုင်းတွင် စစ်ကောင်စီတပ်များက အင်းငယ်ဒေါင့်ကျေးရွာကို လက်နက်ကြီးများဖြင့် ရမ်းသမ်းပစ်ခတ်ပြီး ဝင်ရောက်စီးနင်းခဲ့ကာ သမီးငယ်နှင့်အတူ ထွက်ပြေးရန် ပြင်ဆင်နေသည့် ဒေါ်အေးအေးဝင်းကို စစ်ကောင်စီတပ်ဖွဲ့ဝင်များ ဖမ်းဆီးရမိခဲ့ပြီး နေအိမ်ရှေ့ ဇရပ်ပေါ်တွင် မုဒိန်းကျင့်သတ်ဖြတ်ပြီး အသက် ၃ နှစ်အရွယ်သမီးငယ် မရတီမိုးကိုပါဓားဖြင့် ထိုးသတ်သွားကာ အသက် ၁၁နှစ် အရွယ် သမီး မသင်းသင်းမိုးကို ဖမ်းဆီးခေါ်ဆောင်သွားခြင်းဖြစ်ကြောင်း သိရသည်။

အဆိုပါ အကြမ်းဖက် စစ်ကောင်စီတပ်ဖွဲ့များ မသင်းသင်းမိုးအပြင် ကျေးရွာအတွင်းရှိ ကလေးငယ် ၉ ဦး၊အမျိုးသမီး ၁၂ ဦးနှင့် အမျိုးသား ၈ ဦးတို့ကိုလည်း လူသားဒိုင်းအဖြစ် ပြုုလုပ်ကာ ဖမ်းဆီးခေါ်သွားခြင်းဖြစ်ပြီး ဖမ်းဆီးခေါ်ဆောင်သွားသူများထဲမှ မသင်းသင်းမိုး ရုပ်အလောင်းကို ဒေသခံများက ပြန်လည်တွေ့ရှိခဲ့ခြင်း ဖြစ်ပြီး ကျန်ပြည်သူ ၂၉ ဦး၏ အခြေအနေတော့ မသိရှိရသေးကြောင်း ဒေသခံပြည်သူများက ပြော ဆိုသည်။ khit thit

ကရင်နီဒေသတွင် မီးလောင်ထားသည့် အရပ် သား ၅ ဦး၏ ရုပ်အလောင်းများတွေ့

ကရင်နီပြည်နယ်ခေါ် ကယားပြည်နယ်တွင် ယခုလဆန်းပိုင်းက စစ်ကောင်စီတပ် စစ်ကြောင်းထိုးခဲ့ရာ ကျေးရွာနှစ်ခုတွင် မီးလောင်ကျွမ်းထားသည့် အရပ်သားငါးဦး၏ ရုပ်အလောင်းများ တွေ့ရှိခဲ့ရကြောင်း ကရင်နီအမျိုးသားများကာကွယ်ရေးတပ် (KNDF) ထံမှ သိရသည်။​

ဒီးမော့ဆိုမြို့နယ် နန်းမယ်ခုံမြို့ ဆင်တောင်ကျေးရွာတွင် မတ် ၂ ရက်က ရုပ်အလောင်းသုံးခု၊ ဘောလခဲမြို့နယ်၊ နန်းဖဲကျေးရွာအုပ်စုတွင် မတ် လ ၄ ရက်က ရုပ်အလောင်းနှစ်ခု တွေ့ရှိခဲ့ခြင်းဖြစ်သည်။​

ဒီးမော့ဆိုမြို့နယ် ဆင်တောင်ကျေးရွာတွင် တပ်စွဲခဲ့သော စစ်ကောင်စီတပ်က ဒေသခံသုံးဦးကို ပစ်သတ်ကာ နေအိမ်တစ်ခုအတွင်း အလောင်းများထည့်သွင်းလျက် အိမ်ကိုပါ ဖောက်ခွဲဖျက်ဆီးထားသည်ကို တွေ့ရှိရကြောင်း နယ်မြေရှင်းလင်းရေးဆောင်ရွက်သည့် KNDF တပ်ရင်း (၃) ထံမှ သိရသည်။ 

ရုပ်အလောင်းများမှာ ပြာပုံအတွင်း အရိုးများသာ ကျန်တော့ကြောင်း၊ ရွာထဲရှိ အခြားနေအိမ်တစ်လုံးကိုလည်း မီးရှို့ခဲ့ကြောင်း၊ နေအိမ်များကို မွှေနှောက်ကာ အဖိုးတန်ပစ္စည်းများ ယူဆောင်သွားကြောင်း ထိုတပ်ရင်းအဖွဲ့ဝင်တစ်ဦးက Myanmar Now ကို ယနေ့ (မတ် ၇) ပြောသည်။

ဘောလခဲမြို့နယ် နန်းဖဲကျေးရွာမှ ရုပ်အလောင်းများမှာ အမျိုးသမီးတစ်ဦးနှင့် အသက် ၄၀ ကျော်အရွယ် အမျိုးသားတစ်ဦးဖြစ်ကြောင်း၊ စစ်ကောင်စီတပ်ကပင် သတ်ဖြတ်ကာ မီးရှို့ခဲ့ခြင်းဖြစ်ကြောင်း KNDF ၏ အခြားတပ်ရင်းတစ်ရင်းဖြစ်သော တပ်ရင်း ၁၆ တပ်ဖွဲ့ဝင်တစ်ဦးက ပြောသည်။

“သူတို့က သာမန်ပြည်သူတွေပဲ။ ကျွန်တော်တို့ဘက်လည်း မပါဘူး။ ဟိုဘက်(စစ်တပ်)လည်း မပါဘူး။ စစ်ကောင်စီ စစ်ကြောင်းထိုးလာတာ ဘယ်သူမှ မသိဘူး။ ရွာသားလည်း တစ်ယောက်မှ မသိဘူး” ဟု ၎င်းက ဆိုသည်။

အမျိုးသမီး၏ မီးကျွမ်းရုပ်အလောင်းကို နေအိမ်ခြံဝင်းထဲရှိ ကျင်းတစ်ကျင်းတွင် တွေ့ရှိရပြီး ရွာထဲရှိ တောင်ကုန်းပေါ်တွင် ပြာပုံထဲ လဲကျသေ ဆုံးနေသူ အမျိုးသား၏ ရုပ်အလောင်းတွင် သေနတ်ဒဏ်ရာများ တွေ့ရကြောင်း၊ အသက်အရွယ်နှင့် မည်သူမည်ဝါဖြစ်ကြောင်း အတည်မပြုနိုင်ကြောင်းလည်း ၎င်းက ပြောသည်။ 

မတ်လ ၄ ရက် နံနက် ၁၁ နာရီခန့်က အင်အား ၅၀ နှင့် ၁၀၀ ကြားရှိ စစ်ကောင်စီတပ်ဖွဲ့ဝင်များသည် တောင်ယာလုပ်နေသည့် ရွာသားသုံးဦးကို လမ်းပြခိုင်းကာ တိတ်တဆိတ် စစ်ကြောင်းထိုးလာစဉ် တိုက်ပွဲဖြစ်ပွားပြီးနောက် ပြန်ဆုတ်သွားကြောင်း ပြောသည်။

“ကျွန်တော်တွေ့တာက ဘက်တံဆိပ်မှာ ၅၅ ပါတယ် ၆၆ ပါတယ်။ (သူတို့ကို) လေကြောင်းနဲ့ လာပို့မယ်လို့ ယူဆတယ်။ ဟိုး နှစ်ရက်နေ့က တည်းက ဘောလခဲဘက် ရဟတ်ယာဉ်တွေဆင်းသက်နေတာ ကျွန်တော်တို့တွေ့တယ်” 

စစ်တပ်က ပြန်ဆုတ်ချိန်တွင် ကွက်သစ်နှင့် သာယာကုန်းကျေးရွာတွင် နေအိမ်သုံးလုံးနှင့် ကားတစ်စီးကို မီးရှို့ခဲ့ပြီး အဆိုပါနေအိမ်များထဲမှ ပြည်သူသုံးဦး မီးလောင်ဒဏ်ရာများဖြင့် ထွက်ပြေးလွတ်မြောက်ခဲ့ကြောင်း ၎င်းက ဆက်ပြောသည်။

တိုက်ပွဲကြောင့် ဒေါခူသစ်၊ သာယာကုန်း၊ ကွက်သစ်၊ ဘူးခူ၊ စလဲလုံ စသည့်ကျေးရွာများမှ ဒေသခံ ၂၀၀၀ ခန့် ထွက်ပြေးတိမ်းရှောင်ကြရသည်။

ဖရူဆိုနှင့် ဘောလခဲမြို့နယ်တွင် စစ်ကောင်စီတပ်စခန်းများကို KA(ကရင်နီတပ်မတော်) နှင့် KNDF ပူးပေါင်းတပ်များက ပြောက်ကျားစနစ်ဖြင့် တိုက်ခိုက်နေပြီး စစ်ကောင်စီဘက်က သေဆုံးဒဏ်ရာရသူများရှိသည်။ 

ပြီးခဲ့သည့် ဖေဖော်ဝါရီလဆန်းမှစ၍ ရှမ်းပြည်နယ်၊ မိုးဗြဲဘက်မှတစ်ဆင့် ကရင်နီဒေသအတွင်း စစ်ကောင်စီက ဆက်တိုက် ထိုးစစ်ဆင်နေရာ တိုက်ပွဲများ ပြင်းထန်နေသည်မှာ တစ်လတာနီးပါး ရှိနေပြီ ဖြစ်သည်။

ရွာများ၊ အရပ်သားများကို မီးရှို့ခြင်း၊ သတ်ဖြတ်ခြင်းများကို စစ်ကောင်စီတပ်က ၎င်းတို့ကို ပြန်ခုခံသူများရှိသည့် ဒေသများအတွင်း ပြုလုပ်နေသော်လည်း ၎င်းတို့က ဝန်ခံခြင်း မရှိပေ။  myanmar now

မကွေးတိုင်း ကျအိုးကျေးရွာမှ မောင်ချမ်းအေးကို ဒီးဒုတ်ကွင်းရွာပျူစောထီးအဖွဲ့က လက်နောက်ပြန်ကြိုးတုပ် ပါးစပ်ထဲ သေနတ်ထည့် ပစ်သတ်

မကွေးတိုင်း ပေါက်မြို့နယ် အရှေ့တောင်ပိုင်း ကျအိုးကျေးရွာနေ မောင်ချမ်းအေးကို ဖေဖော်ဝါရီလ ၁၁ ရက်နေ့တွင် မကွေးတိုင်း ပေါက်မြို့နယ် ဒီးဒုတ်ကွင်းရွာမှ ပျူစောထီးအဖွဲ့က အကြောင်းမဲ့ ဖမ်းဆီး သတ်ဖြတ်ခဲ့ကြောင်း ဒေသခံများ က ပြောကြားသည်။

“လက်နောက်ပြန်ကြိုးတုပ်ပြီး ဒူးထောက်ပုံစံထား ပါးစပ်ထဲ သေနတ်ပြောင်းထည့်ပြီး ရက်စက်စွာ ပစ်သတ်ခဲ့တာပါ” ဟု ဒေသခံတစ်ဦးက ရန်ကုန်ခေတ်သစ်ကို ပြောပြသည်။

ဒီးဒုတ်ကွင်းရွာနှင့် ကျအိုးရွာတို့မှ တောင်ဘက် မြောက်ဘက် ရွာနီးချင်းများ ဖြစ်ပြီး သတ်ဖြတ်ခံရသူ မောင်ချမ်းအေးမှာ ဒီးဒုတ်ကွင်းရွာမှ သူ ငယ်ချင်းက ခေါ်၍ အလည်သွားစဉ် ဒီဒုတ်ကွင်းပျူစောထီးများက ညဘက်ကြီး ရွာသို့ ဝင်လာသည်ဟု ဆိုကာ ဖမ်းဆီး ရိုက်နှက် ကြခြင်းဖြစ် ကြောင်း ဒေသခံများထံမှ သိရှိရသည်။

“ဒီးဒုတ်ကွင်းရွာရဲ့ အနောက်ဘက် အောင်ချမ်းသာရွာ(ဝန်လဲရိုးရွာ)အနီး တော စပ်မှာ ဒူးထောက်ခိုင်းပြီး ပါးစပ်ထဲ ပြောင်းထည့်ပြီး ပစ်သတ်ခံရတာ။ ကလေးက ပြည်သူပါ။ ဘာအဖွဲ့နဲ့မှ ဆက်စပ်မှု မရှိပါဘူး” ဟု ဒေသခံတစ်ဦးက ရန်ကုန် ခေတ်သစ်သို့ ပြောဆိုသည်။

မောင်အေးချမ်းမှာ ကျအိုးကျေးရွာမှ စစ်ကောင်စီခန့် အုပ်ကြီး ဦးဆောင်ဝင်းနှင့် ပုဂ္ဂိုလ်ရေးအဆင်မပြေမှုများ ရှိသည့် အချက်တစ်ခုသာ အပြစ် ပြောစရာ ရှိကြောင်း မောင်အေးချမ်းနှင့် နီးစပ်သူများ အဆိုအရ သိရှိရသည်။ khit thit

စစ်ကောင်စီတပ် ဝင်သည့် မင်းကင်းတွင် ဒေ သခံ ၄ ဦး သတ်ဖြတ်ခံရ

စစ်ကိုင်းတိုင်း၊ မင်းကင်းမြို့နယ်၊ မုဿာနှင့် မောက်တက်ကျေးရွာကို စစ်သားများနှင့် ပျူစောထီး အဖွဲ့တို့ စီးနင်းသည့် ယမန်နေ့ (ဖေဖော်ဝါရီ ၁၀) တွင် ဒေသခံ ၄ ဦး အသတ်ခံရသည်။

သေဆုံးသူတို့မှာ မုဿာရွာမှ ကုန်စိမ်းရောင်းသူ ၂၁ နှစ်အရွယ် ကိုနိုင်စိုးလင်း၊ ငါးနန္ဒာရွာမှ ကျေးရွာကာကွယ်ရေးအဖွဲ့ ကင်းသမားများဖြစ်သော ၁၈ နှစ်အရွယ် ကိုကောင်းမင်းစံ၊ ၂၄ နှစ်အရွယ် ကိုသန်းစိုးမင်း၊ ၂၈ နှစ်အရွယ် ကိုနိုင်ဇော်တို့  ဖြစ်သည်ဟု မုဿာရွာမှ အမျိုးသားနှစ်ဦးက ပြောသည်။ 

မုဿာနှင့် မောက်တက်ရွာဘက်သို့ ဦးတည်လာနေသည့် စစ်ကောင်စီတပ် မောက္ကတော်ချောင်းရိုးကို ဖြတ်သန်းစဉ် ငါးနန္ဒာရွာအနီး ချောင်းရိုး၌ လုံခြုံရေးစောင့်ကြည့်နေသည့် ကင်းသမား လူငယ် ၃ ဦးကို သတ်ဖြတ်ခြင်း ဖြစ်သည်ဟု ဒေသခံတို့က ယူဆသည်။

ချောင်းရိုးအနီး ကောက်ရိုးစင်တွင် ကိုသန်းမင်းစိုး မီးရှို့သတ်ဖြတ်ခံရသည်၊ ကိုကောင်းမင်းစံ၊ ကိုနိုင်ဇော်တို့  မျက်လုံးကျည်ထိဒဏ်ရာ တွေ့ရသည်ဟု ဆိုသည်။ 

စစ်ကောင်စီတပ် ထိုနှစ်ရွာမှ ယင်းနေ့ (ဖေဖော်ဝါရီ ၁၀) ညနေပိုင်းတွင် ပြန်ထွက်ခွာသွားပြီးနောက် ဒေသကာကွယ်ရေးအဖွဲ့ဝင်တချို့ ရွာအတွင်း ဝင်ရောက်ကြည့်ရှုရာ ထိုသို့ ရုပ်အလောင်းများ တွေ့ရှိရခြင်းဖြစ်သည်။

ကင်းသမားတစ်ဦး၏ ညာမျက်လုံးတွင် ကျပ်ပြားဝိုင်းခန့် အပေါက်ကျန်ရစ်ခဲ့သည်ကို Myanmar Now က ကြည့်ရှုခွင့်ရသော ဓာတ်ပုံများတွင် တွေ့ရသည်။ တစ်ဦးမှာလည်း သွားများကျွတ်ထွက်၍ ညာမျက်လုံးတွင် သွေးအလိမ်းလိမ်းဖြစ်နေသည်။ ထိုနှစ်ဦး သေနတ်နှင့် အနီးကပ် ပစ်ခတ်ခံခဲ့ရဖွယ် ရှိသည်ဟု ဒေသခံတို့က ယူဆသည်။ ကျန်တစ်ဦးမှာမူ ပြာကျလုနီးပါး မီးရှို့ခံထားရသည်ကို တွေ့ရှိရသည်။ 

မီးရှို့သတ်ဖြတ်ခံရသည့် ကိုသန်းမင်းစိုးတွင် ၄ နှစ်အရွယ် သားတစ်ဦး ကျန်ရစ်သည်။ ကိုနိုင်ဇော်တွင် ၃ နှစ်သားနှင့် ၇ နှစ်သမီး ကျန်ရစ်သည်။

ကုန်စိမ်းရောင်းသူ ကိုနိုင်စိုးလင်း၏ ရုပ်အလောင်းကို မုဿာရွာရှိ ၎င်း၏နေအိမ်အနီး ရွာလမ်းမပေါ်တွင် နဖူးကျည်ထိဒဏ်ရာနှင့် တွေ့ရသည်၊ သူ၏နေအိမ်လည်း စစ်ကောင်စီတပ် မီးရှို့သဖြင့် ပြာကျသွားသည်ဟု ဒေသခံများထံမှ သိရသည်။

ကိုနိုင်စိုးလင်း၏ အသက် ၂၀ ကျော်အရွယ် ဇနီးဖြစ်သူလည်း ယနေ့ထက်ထိ ပျောက်ဆုံးနေသည်ဟု မင်းကင်းမြို့နယ်၊ ပြည်သူ့အုပ်ချုပ်ရေးအဖွဲ့ အဖွဲ့ဝင် အသက် ၃၀ အရွယ် အမျိုးသမီးတစ်ဦးက ယနေ့ (ဖေဖော်ဝါရီ ၁၁) တွင် ပြောသည်။ 

“ပျူစောထီးအဖွဲ့က ဖမ်းသွားသလား မသိရဘူး။ လွတ်ရင်တော့ အခုလောက်ဆို ပြန်တွေ့ရမှာ။ အခုထိ မတွေ့ရသေးဘူး” ဟု ထိုအမျိုးသမီးက ဆိုသည်။ 

မီးရှို့ခံရသည့် မုဿာနှင့် မောက်တက်ကျေးရွာ

ပြီးခဲ့သည့် ဖေဖော်ဝါရီ ၁၀ နံနက်အစောတွင် တောင်ဖြူနှင့် ပန်းဆက်ရွာ အခြေစိုက် စစ်သားများနှင့် ပျူစောထီး အင်အား ၂၀၀ ခန့်က မုဿာနှင့် မောက်တက်ကျေးရွာ နှစ်ရွာတို့ကို စီးနင်း၍ နေအိမ်များကို မီးရှို့ခဲ့ကြခြင်း ဖြစ်သည်။

ထိုသို့ စီးနင်းစဉ်အတောအတွင်း သေဆုံးသူ ၆ ဦးအထိ ရှိမည်ဟု ဒေသခံများက ခန့်မှန်းထားကြပြီး အနည်းဆုံး လူ ၇ ဦးခန့်လည်း ပျောက်ဆုံးနေသည်ဟု အထက်ပါ ရွာသားနှစ်ဦးက ပြောသည်။ 

“ကိုနိုင်စိုးလင်း မိန်းမကတော့ မီးထည့်လိုက်သလား၊ ဖမ်းခေါ်သွားသလား၊ မပြောနိုင်သေးဘူး” ဟု အသက် ၂၈ နှစ်အရွယ် မုဿာရွာခံအမျိုးသားက ဆိုသည်။ 

မီးရှို့မှုကြောင့် အိမ်ခြေ ၂၀၀ ကျော် ရှိ မုဿာရွာတွင် နေအိမ် ၁၅၀ ကျော်၊ အိမ်ခြေ ၁၅၀ ရှိ မောက်တက်ရွာတွင် နေအိမ် ၁၃၀ ကျော် မီးလောင်ကျွမ်းခဲ့ပြီး ရွာသူရွာသား ၁၀၀၀ ဝန်းကျင်ခန့် ထွက်ပြေးနေရဆဲ ဖြစ်သည်ဟု ဒေသခံများ ပြောဆိုချက်အရ သိရသည်။

နေရပ်မပြန်နိုင်သေးဘဲ စစ်ကောင်စီရန်ကြောင့် ရှောင်တိမ်းနေရသည့် ထိုကျေးရွာနှစ်ရွာမှ ဒေသခံများ စားနပ်ရိက္ခာများ လိုအပ်နေသည်ဟု ဆိုသည်။ 

မုဿာရွာရှိ စစ်တပ်ထောက်ခံသူတို့၏ နေအိမ်များ မီးလောင်သည့်အထဲ မပါဝင်သဖြင့် စစ်ကောင်စီတပ်က နယ်မြေကျွမ်းကျင်သူများနှင့်အတူ ဝင်ရောက်မီးရှို့ခြင်းဖြစ်သည်ဟု ပြည်သူ့အုပ်ချုပ်ရေးအဖွဲ့ အဖွဲ့ဝင် အမျိုးသမီးက ယူဆသည်။

ထိုမိသားစုများတွင် စစ်ကောင်စီတပ်ဖွဲ့ဝင် ဆွေမျိုးများ ရှိကြကြောင်း၊ မင်းကင်းမြို့ပေါ်တွင် သွားရောက်နေထိုင်ကြသည်ဟု သိရကြောင်း ၎င်းက ဆက်ပြောသည်။ 

ဖေဖော်ဝါရီ ၉ တွင် စစ်ကောင်စီတပ်နှင့် ပျူစောထီးတို့ ထိန်းချုပ်ထားရာ စနဖျင်းရွာကင်းစခန်းကို ဒေသခံ ကာကွယ်ရေးအဖွဲ့များက တိုက်ခိုက်ခြင်းကြောင့် လက်စားချေသည့်အနေဖြင့် နောက်တစ်နေ့ နံနက်တွင် မုဿာနှင့် မောက်တက် နှစ်ရွာကို စီးနင်းမီးရှို့ခြင်း ဖြစ်သည်ဟု ဒေသခံများက ယူဆနေကြသည်။ 

ထိုစဉ်က စနဖျင်းရွာ ကင်းစခန်းကို နံနက် ၁ နာရီတွင် ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃ ဦး သေဆုံးခဲ့သည်။

ထိုတိုက်ပွဲမှ MA-2 စက်ကလေးတစ်လက်၊ ကာဘိုင်တစ်လက် သိမ်းဆည်းရမိခဲ့ကြောင်းလည်း ဒေသခံအဖွဲ့များက ထုတ်ပြန်သည်။

ရွာနှစ်ရွာ မီးရှို့ပြီး ဒေသခံများကို သတ်ဖြတ်ခဲ့သည်ဟူသော ပြောဆိုချက်နှင့် ပတ်သက်ပြီး စစ်ကောင်စီ ပြန်ကြားရေးတာဝန်ရှိသူတို့ထံမှ တုံ့ပြန်ချက် မရသေးပေ။

ပျူစောထီးများ အားကောင်းသည့် မင်းကင်းမြို့နယ်တွင် အာဏာသိမ်းစစ်ကောင်စီတပ်ဖွဲ့က ဇန်နဝါရီလကုန်မှစ၍ ဘင်၊ အနောက်တော (ဘင်)၊ အုန္နဲဘုတ်ရွာတို့ကို မီးရှို့ပြီး သက်ကြီးရွယ်အို၊ နို့တိုက်မိခင်နှင့် ကလေးအများစုပါဝင်သော ဒေသခံ ၃၇ ဦးကို လူသားဒိုင်းအဖြစ် အသုံးချခဲ့ဖူး သည်။ 

ယမန်နှစ် ဇူလိုင် ၂၈ တွင် ပျူစောထီးများအကူအညီဖြင့် စစ်ကောင်စီတပ်က PDF အဖွဲ့ဝင် ၅၇ ဦးကို တစ်ခါတည်း ဖမ်းဆီးနိုင်ခဲ့သည်။myanmar now

ခင်ဦး၊ မဒေါင်းကြီးရွာတွင် တိုက်ပွဲဖြစ်ပြီး စစ် သား ၆ ဦးသေဆုံးကာ ပြည်သူ ၂ ဦးကို စစ်တပ်က ပစ်သတ်၊ ရွှေဘိုတွင် စစ်စခန်းကို ဒရုန်းဖြင့် ၅ ကြိမ် တိုက်ခိုက်

စစ်ကိုင်းတိုင်း၊ ခင်ဦးမြို့နယ်၊ မဒေါင်းကြီးကျေးရွာတွင် စစ်ကောင်စီတပ်နှင့် PDF တပ်များ တိုက်ပွဲဖြစ်ပွားပြီး စစ်သား ၆ ဦး သေဆုံးကာ အရပ်သား ပြည်သူ ၂ ဦးကို စစ်တပ်က ပစ်သတ်သွားကြောင်း ခင်ဦးမြို့နယ် သတင်းမှန်ပြန်ကြားရေး အဖွဲ့က တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

ယမန်နေ့ ဖေဖော်ဝါရီလ ၈ရက်နေ့ နေ့လယ်ပိုင်းတွင် ခင်ဦးမြိုနယ်ရှိ မဒေါင်းလှရွာတွင် တပ်စွဲထားသော စစ်ကောင်စီတပ်သားများက မဒေါင်းကြီးရွာ ရွှေကာရွာများသို ဝင်ရောက်ဖျက်ဆီးရန်ကြိုးပမ်းခဲ့ကြောင်း၊ မဒေါင်းကြီးရွာထိပ်အနီး အိမ်ထဲတွင် ရှိနေခဲ့သော အသက်၁၅နှစ်ရွယ် သားဖြစ်သူမောင်ပိုင်ဇေရဲထွန်းနှင့် ဖခင်ဖြစ်သူ ဦးလှထွန်းဦးကို စစ်တပ်က ပစ်သတ်သွားကြောင်း သိရှိရသည်။

ယင်းနောက် စစ်တပ်နှင့် ဒေသကာကွယ်ရေးတပ်များဖြစ်သည့် L.W.G.R.F Local Guerrilla Revolution Force ၊ F.F.F Fight For Freedom၊ မဟာမိတ်ညီနောင်တပ်ပေါင်းစု နှင့် အပြန်အလှန်ပစ်ခတ်မှုများရှိခဲ့ကြောင်း၊ မိုင်းခွဲတိုက်ခိုက်မှု အပြန်အလှန်ပစ်ခတ်မှုများကြောင့် စစ်ကောင်စီဘက်မှ ၆ ဦးခန့် သေဆုံးပြီး စစ်တပ်က မဒေါင်းလှရွာသို့ ပြန်လည်ဆုတ်ခွာသွားကြောင်း သိရှိရသည်။

ခင်ဦးမြိုနယ် ရွာသစ်ကုန်း။ မဒေါင်းလှ၊ ပျဥ်ထောင် ၊မကျီးတုံးရွာများတွင် စခပျူများကြီးစိုးထားပြီး အနီးပတ်ဝန်းကျင်ရှိ ရွာများအား မကြာခဏဝင်ရောက်ဒုက္ခပေးလျက်ရှိကြောင်း သိရသည်။

အလားတူ စစ်ကိုင်းတိုင်း၊ ရွှေဘိုမြို့နယ်တွင်မူ သီးလုံးကျေးရွာရှိ တပ်စွဲထား စစ်တပ်ကို C&T SHWEBO၊ Snake Eyes PDF၊ Fighter One ၊ SHWEBO PDF နှင့် ပ.က.ဖ အဖွဲ့အစည်းများက ဒရုန်းဖြင့် ငါးကြိမ်တိတိသွားရောက် တိုက်ခိုက်ခဲ့ကြောင်း၊ စစ်တပ်ဘက်မှ ဒဏ်ရာရသူများပြား၍ အထိခိုက်အကျဆုံးမသိရသေးကြောင်း Snake Eyes PDF က သတင်းထုတ်ပြန်သည်။ khit thit

လောင်းလုံးမြို့နယ် ညင်းမော်ရွာအနီးတွင်အ မျိုးသား ၃ဦး၏ ရုပ်အလောင်းတွေ့ရှိ

တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်၊ ညင်းမော်ကျေးရွာ အနီးရှိ ခြံတစ်ခြံအတွင်း မြေမြှုပ် ထားသည့် လူငယ် အမျိုးသား သုံးဦး၏ ရုပ်အ လောင်းများကို ဖေဖော်ဝါရီလ ၄ ရက်နေ့က တွေ့ရှိခဲ့ကြောင်း ယင်းကျေးရွာရှိ ဒေသခံများထံမှ သိရသည်။

ယခု တွေ့ရှိသည့် ရုပ်အလောင်း သုံးလောင်းသည် သေနတ်ထိ ဒဏ်ရာများအပြင် ဓါးဒဏ်ရာများဖြင့် မြေကျင်း တစ်ခုတည်းတွင် အတူမြှုပ်ထားခြင်း ဖြစ်ပြီး မည့်သည့် အကြောင်းအရင်းကြာင့် အသတ်ခံရပြီး သေဆုံး နေသည်ကို မသိရှိရသေးကြောင်း ဒေသခံ တစ်ဦးက ပြောသည်။

လောင်းလုံးမြို့ ဒေသခံ တစ်ဦးက”အလောင်း သုံးလောင်းက မနေ့ မနက်ပိုင်းက အနံရလို့ တွေ့ရှိရတာ ဖြစ်တယ်၊ အခု အချိန် အထိ အဲ့ဒီအ လောင်းတွေက ဘာကြောင့် သတ်ခံရတယ်၊ ဘယ်အဖွဲ့က ဆိုတာ အခု အချိန်အထိ မသိရသေးဘူး ဖြစ်တယ်”ဟု ပြော သည်။

အဆိုပါ ရုပ်အလောင်း သုံးလောင်းသည် သတ်ခံရပြီး သေဆုံးကာ မြေမြှုပ်ခံထားရသည်မှာ တစ်ပတ်နီးပါးခန့်ရှိနေပြီး ဖြစ်ကြောင်း ဒေသခံများ၏ ပြောဆိုချက် အရ သိရသည်။

” ဥယျာဉ်ခြံတစ်ခုမှာ အနံဆိုး ထွက်နေလို့ ဒေသခံတွေ ရှာဖွေရာမှ အလောင်းတွေကို တွေ့တာပါ ဘယ်သူ့ လက်ချက်ဖြစ်မလဲ မသိရဘူး၊ အ လောင်းတွေက လွန်ခဲ့တဲ့ တစ်ပတ်လောက်က မြှုပ်ထားတာ ဖြစ်နိုင်ခြေ များတယ် ဘယ်သူ ဘယ်ဝါ ဘယ်ရွာက ဆိုတာ မသိရသေးဘူး”ဟု ညင်းမော်ကျေးရွာ ဒေသခံ တစ်ဦးက ရှင်းပြသည်။

လက်ရှိ သေဆုံးသူများသည် ညင်းမော်ရွာ၏ အနီးအနားရွာများ ဖြစ်သည့် စစ်ပြဲရွာနှင့် လေးသွန်းခံရွာက ရွာသားများ ဖြစ်နိုင်ခြေ ရှိကြောင်း ဒေသခံ တချို့က ပြောဆိုထားသော်လည်း အတည်ပြုနိုင်ခြင်း မရှိသေးပေ။

လက်ရှိတွင် အဆိုပါ ရုပ်အလောင်းများကို ဖေဖော်ဝါရီလ ၅ ရက်နေ့ နံနက်ပိုင်းတွင် တူးဖော်ပြီး ကျေးရွာ နာရေး ကူညီမှုအသင်းများမှ လာရောက် သယ်ဆောင်သွားပြီး မီးသင်္ဂြိုဟ်ခဲ့ကြောင်း ဒေသခံများထံမှ သိရသည်။ mizzima

« Older Entries