Category Archives: News

ဒေါ်အောင်ဆန်းစုကြည်၊ သမ္မတဦးဝင်းမြင့်တို့အပေါ် လုပ်ကြံ အမှုဆင်တည် ဆောက်ခဲ့ကြတဲ့ အထူးစုံစမ်းစစ်ရေးဌာန အရာရှိနဲ့ ဝန်ထမ်းတွေက ဘယ်သူတွေလဲ

နိုင်ငံတော်၏ အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်တို့ကို မင်းအောင်လှိုင်က ယမန်နှစ် ဖေဖော် ဝါရီလ ၁ ရက်နေ့တွင်ဖမ်းဆီးပြီး လုပ် ကြံ အမှုဆင် တရားစွဲရန် မင်းအောင်လှိုင်က စစ်တပ် နှင့် ပြည်ထဲရေးဝန်ကြီး ဌာန ကို ညွှန်ကြားခဲ့သည်။

ပြည်ထဲရေးဝန်ကြီး စိုးထွဋ်နှင့် စစ်တိုင်းမှူးများက နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် သမ္မတဦးဝင်းမြင့်တို့ကို အမှုဆင် လုပ်ကြံရန်အတွက် အထူးစုံစမ်းစစ်ဆေးရေး ဦးစီးဌာနတစ်ခုလုံးကို တာဝန်ပေးအပ်ခဲ့ပြီး ယင်းတာဝန်ပေးမှုတွင် ဦးဆောင်ပါဝင်သည့် အရာရှိများနှင့်ဝန်ထမ်းများ စာရင်းကို ရန်ကုန်ခေတ်သစ်က ရရှိထားရာ ယင်းစာရင်းများကို ပြည်သူများ သိရှိနိုင်ရန်အတွက် တရားဝင် ထုတ်ပြန်အပ်ပါသည်။

ရဟတ်ယာဉ်ဝယ်ယူမှုအတွက် လုပ်ကြံအမှုတည်ဆောက်ခဲ့သည့် စသုံးလုံး ညွှန်ကြားရေးမှူး မောင်မောင်မြင့်

===========================================

လူမှုဝန်ထမ်းကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ သဘာဝဘေးကူညီကယ် ဆယ် ရေးအတွက် အသုံးပြုမည့် ရဟတ်ယာဥ်တစ်စီးဝယ်ယူမှုအတွက် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတ ဦးဝင်းမြင့်တို့ ကို အဂတိမှု ၂ မှုဖြင့် အမှုဆင် လုပ် ကြံရေး ဆောင်ရွက်ခဲ့သူမှာ အထူးစုံစမ်းစစ်ဆေးရေးဦးစီးဌာန မှ ညွှန်ကြားရေးမှူး မောင်မောင်မြင့် ဖြစ် သည်။

ထိုအမှုအတွက် အဖွဲ့ခေါင်းဆောင်အဖြစ် စသုံးလုံး ညွှန်မှူး မောင်မောင်မြင့်ကို တာဝန်ပေးအပ်သူမှာ ပြည်ထဲရေးဝန်ကြီး စိုးထွဋ် ဖြစ်ပြီး ရဟတ် ယာဉ်ဝယ်ယူမှုကိစ္စ လိမ်လည် အမှုဆင်ရန် အတွက် အထူးစုံစမ်းစစ်ဆေးရေးဌာနမှ အရာရှိနှင့်ဝန်ထမ်း ၁၉ ဦးကို အသုံးပြုခဲ့သည်။

ရဟတ်ယာဉ်အမှုအတွက် လုပ်ကြံ အမှုဆင်ခဲ့သည့် အဖွဲ့တွင် ခေါင်းဆောင် စသုံးလုံး ညွှန်ကြားရေးမှူး မောင်မောင်မြင့်နှင့်အတူ ရှမ်းပြည်နယ် အထူးစုံစမ်းစစ်ဆေးရေးဦးစီးဌာနမှ အရာထမ်း ၄ ဦး၊ အမှုထမ်း ၃ ဦး၊ စစ်ကိုင်းတိုင်းစသုံးလုံးမှ အရာထမ်း ၂ ဦး၊ အမှုထမ်း ၂ ဦး၊ တနင်္သာ ရီတိုင်း စသုံးလုံး အရာထမ်း ၃ ဦး၊ အမှုထမ်း ၁ ဦး၊ မကွေးတိုင်းစသုံးလုံးမှ အရာထမ်း ၂ ဦး၊ အမှုထမ်း ၂ ဦး စုစု ပေါင်း ၁၉ ဦးပါဝင်သည်။

ဒေါ်ခင်ကြည်ဖောင်ဒေးရှင်းကို စိစစ် လိမ်လည် အမှုဆင်ခဲ့သူ စသုံးလုံး ညွှန်ကြားရေးမှူး စိုးနောင်ဦး

===========================================

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ဒေါ်ခင်ကြည်ဖောင်ဒေးရှင်းအတွက် လာဘ်ပေးလာဘ်ယူ လုပ်ခဲ့သည်ဟု လိမ် လည်အမှုဆင်တည်ဆောက်ခဲ့သည့်အဖွဲ့ကို စသုံးလုံး ညွှန်ကြားရေးမှူး စိုးနောင်ဦးက ဦးဆောင်သည်။

ထိုအမှုအတွက် စသုံးလုံး စိုးနောင်ဦးကို အဖွဲ့ခေါင်းဆောင်အဖြစ် တာဝန်ပေးအပ်သူမှာ ရန်ကုန်တိုင်း စစ်တိုင်းမှူး ညွန့်ဝင်းဆွေဖြစ်သည်။

ဒေါ်ခင်ကြည်ဖောင်ဒေးရှင်းအမှုကို လိမ်လည် အမှုတည်ဆောက်ခဲ့သည့်အဖွဲ့တွင် စသုံးလုံးညွှန်မှူး စိုးနောင်ဦးနှင့်အတူ ရန်ကုန်တိုင်းစသုံးလုံးမှ အရာရှိ ၁၅ ဦး၊ အမှုထမ်း ၁၅ ဦး၊ မွန်ပြည်နယ် စသုံးလုံးမှ အရာရှိ ၂ ဦး၊ အမှုထမ်း ၁ ဦး ၊ ပဲခူးတိုင်းစသုံးလုံးမှ အရာရှိ ၄ ဦး၊ အမှုထမ်း ၅ ဦး ၊ ဧရာ၀တီတိုင်း စသုံးလုံးမှ အရာရှိ ၁ ဦး ၊ အမှုထမ်း ၄ ဦး စုစုပေါင်း စသုံးလုံးအရာရှိနှင့်ဝန်ထမ်း ၄၇ ဦး ပါဝင်ခဲ့သည်။

ဒေါ်အောင်ဆန်းစုကြည် လာဘ်ပေးလာဘ်ယူ လုပ်သည်ဟု အမှုဆင် လိမ်လည်သူ ဒုညွှန်ချုပ် သိန်းနိုင်ထွန်း၊ ဦးစီးအရာရှိ အောင်မြတ်မိုး နှင့် ဦးစီးအရာရှိ မင်းထွေး

===========================================

ဒေါ်အောင်ဆန်းစုကြည်က လာဘ်ပေးလာဘ်ယူ လုပ်သည်ဟု အမှုဆင် လိမ်လည် အမှုတည် ဆောက် ရသူများမှာ စသုံးလုံး ဒုညွှန်ချုပ် သိန်းနိုင်ထွန်း၊ ဦးစီးအရာရှိ (စုံစမ်းရေး) အောင်မြတ်မိုး၊ ၊ ဦးစီးအရာရှိ(စုံစမ်းရေး) မင်းထွေးတို့ဖြစ်သည်။

ဒေါ်အောင်ဆန်းစုကြည်က အသင်းအဖွဲ့ဆိုင်ရာ လာဘ်ပေးလာဘ်ယူ လုပ်သည်ဟုဆိုကာ အမှုတည်ဆောက်ရန် အမိန့်ပေးသူမှာ ပြည်ထဲရေးဝန်ကြီး စိုးထွဋ်ဖြစ်ပြီး သူက ဒုညွှန်ချုပ် သိန်းနိုင်ထွန်းကို တာဝန်ပေးအပ်သည်။

အသင်းအဖွဲ့ဆိုင်ရာ လာဘ်ပေးလာဘ်ယူကိစ္စများကို အဖွဲ့ခေါင်းဆောင် ဒုညွှန်ချုပ် သိန်းနိုင်ထွန်းနှင့်အတူ စသုံးလုံး ဦးစီးဌာနချုပ်မှ အရာရှိ ၁ ဦး ၊ အမှုထမ်း ၃ ဦး ၊ စသုံးလုံး သတင်း/နည်ပညာ အရာရှိ ၁၇ ဦး ၊ အမှုထမ်း ၃၃ ဦး ၊ ကယားပြည်နယ် စသုံးလုံးမှ အရာရှိ ၂ ဦး ၊ အမှုထမ်း ၁ ဦး စုစုပေါင်း စသုံးလုံး အရာရှိနှင့်ဝန်ထမ်း ၅၉ ဦး အသုံးပြုခဲ့သည်။

ထို့ပြင် ဒေါ်အောင်ဆန်းစုကြည်နှင့်ပတ်သက်သော ငွေကြေးစီးဆင်းမှုဆိုင်ရာ အမှု လိမ်လည် တည်ဆောက်သူ အဖွဲ့ခေါင်းဆောင်မှာ ဦးစီးအရာ ရှိ (စုံစမ်းရေး) အောင်မြတ်မိုးဖြစ်ပြီး NLD ပါတီ၏ ငွေကြေးစီးဆင်းမှု ဆိုင်ရာ စိစစ် လိမ်လည် အမှုတည်ဆောင်သူ အဖွဲ့ခေါင်းဆောင်မှာ ဦးစီးအရာရှိ မင်းထွေးဖြစ်သည်။ ဦးစီးအရာရှိ အောင်မြတ်မိုးသည် ရွေးကောက်ပွဲ မဲလက်မှတ်များ ပိုရိုက်နှက်ခြင်း ရှိမရှိဆိုသော အမှုတွင်လည်း စိ စစ်ရသည့်အဖွဲ့ခေါင်းဆောင်ဖြစ်သည်။

ဦးစီးအရာရှိ အောင်မြတ်မိုးနှင့် မင်းထွေးတို့သည် စသုံးလုံး သတင်း/နည်းပညာ (ရန်ကုန်) မှအရာရှိ ၆ ဦးနှင့် အမှုထမ်း ၉ ဦး စုစုပေါင်း ၁၅ ဦးကို အသုံးပြုခဲ့ကြပြီး ၎င်းတို့နှစ်ဦးကို အမိန့်တာဝန်ပေးအပ်သူမှာ ရန်ကုန်တိုင်းစစ်တိုင်းမှူး ညွှန့်ဝင်းဆွေဖြစ်သည်။

(NLD အစိုးရ ဝန်ကြီးချုပ်များ၊ ဝန်ကြီးများအပေါ် အမှုဆင် လိမ်လည်ခဲ့ကြသည့် အထူးစုံစမ်းစစ်ဆေးရေး အရာရှိများအကြောင်း ဆက်လက်ဖော်ပြမည်ဖြစ်ပြီး စစ်တပ်၏ လက်ကိုင်တုတ် စသုံးလုံး ဌာနအကြောင်းလည်း ဆက်လက် ဖော်ပြပါမည်) khit thit

မြစ်ခြေ-ကျွန်းချောင်းလမ်းပိုင်းတွင် ရဲနှင့်ပျူစောထီးအဖွဲ့ဝင်များ စီးလာသည့်ကား မိုင်းဆွဲခံရ

မကွေးတိုင်း ပခုက္ကူမြို့နယ် မြစ်ခြေ-ကျွန်းချောင်း လမ်းပိုင်းမှာ မေ ၂၃ ရက်နေ့ မွန်းလွဲ ၁ နာရီလောက်က စစ်ကောင်စီရဲ့ ရဲတွေနဲ့ ပျူစောထီး ၁၃ ယောက်လောက်စီးလာတဲ့ လိုက်ထရပ် ကားတစီးကို မြစ်ခြေ-ကျွန်းချောင်းပြည်သူ့ကာကွယ်ရေးတပ်ဖွဲ့ MC-KC PDF က မိုင်းဆွဲတိုက်ခိုက်ခဲ့တယ်လို့ MC-KC PDF ရဲ့တာဝန်ခံ G3 က ဒီဗွီဘီကိုပြောပါတယ်။

ရဲဘော် ရှောင်လင်ရဲ့ မွေးနေ့ကို ဂုဏ်ပြုတဲ့အနေနဲ့ ကံကြီးစုရွာထိပ်မှာ ပြည်သူလူထုအား အနိုင်ကျင့်ဗိုလ်ကျ ဓားပြတိုက်နေတဲ့ ရဲနဲ့ပျူစောထီးတွေ စီးလားတဲ့ကားကို Birthday မိုင်းနဲ့ တိုက်ခိုက်ခဲ့တာလို့ ဆိုပါတယ်။

အဲဒီတိုက်ပွဲမှာ စစ်ကောင်စီဘက်က ရဲနဲ့ပျူစောထီး ၅ ယောက်သေဆုံးခဲ့ပြီး အများအပြားဒဏ်ရာရရှိခဲ့ပြီး မြစ်ခြေ-ကျွန်းချောင်းပြည်သူ့ကာ ကွယ်ရေးတပ်ဖွဲ့ဘက်က ရဲဘော်တွေ အထိအခိုက်မရှိဘူးလို့ ဆိုပါတယ်။

တန့်ကြည့်တောင်အနောက်ဘက်တနေရာကို အင်အား ၇၀ လောက်နဲ့ စစ်ကြောင်းထိုးလာတဲ့ စစ်ကောင်စီတပ်သားတွေကို မေ ၂၂ ရက်နေ့ မ နက် ၉ နာရီလောက်ကလည်း မြစ်ခြေကျွန်ချောင်းပြည်သူ့ကာကွယ်ရေးတပ်ဖွဲ့ MC-KC PDF နဲ့ ဆိပ်ဖြူမြောက်ပိုင်းပြည့်သူ့ကာကွယ်ရေးတပ်ဖွဲ့ NSP တို့ ပူးပေါင်းတိုက်ခိုက်ခဲ့ရာမှာ စစ်ကောင်စီဘက်က ၂ ယောက်သေဆုံးပြီး အယောက် ၂၀ လောက် ဒဏ်ရာရရှိခဲ့တယ်လို့ MC-KC PDFရဲ့ တာဝန်ခံက ပြောပါတယ်။

“သူတို့က ပုဂံဘက်ကနေ အင်အား ၁၅၀ လောက်နဲ့ ဆိက္ခဝဘက်ကိုကူးလာတာဗျ။ အဲဒါကြောင့် ကျနော်တို့ကလည်း စစ်ရေးပြင်ဆင်မှု ညပိုင်းကတည်းက လုပ်ထားတယ်။ ကျနော်တို့ ထင်သလိုပဲ မနက်ပိုင်းမှာ အင်အား ၇၀/၈၀ လောက်နဲ့တက်လာတယ်ဗျ။ အဲဒါကြောင့် ညကတည်းက ကြိုတင်ပြင်ဆင်ထားတဲ့ မိုင်းတွေ၊ ပြောင်းတိုက်တွေ၊ အော်တိုသမားတွေ၊ စနိုက်ပါသမားတွေ အဆင်သင့်လုပ်ထားပြီး လက်ဦးမှုရယူခဲ့တယ်။ ကျနော်တို့ဘက်က အော်တိုနဲ့ဆွဲလိုက်တဲအချိန်မှာ စစ်(…)တွေဘက်က ၂ ယောက် မှောက်ပြီးသေဆုံးသွားတာကို အသေအချာမြင်လိုက်ရတယ်။ ကျန်တဲ့ အယောက် ၂၀ လောက် ဒဏ်ရာရတယ်ဆိုတာကိုတော့ အတွင်းသတင်းအရ သိရတာပါ။ သူတို့ဘက်က အထိနာပြီး နောက် ကြောင်း ပြန်ဆုတ်သွားကြတယ်။”

နှစ်ဖက်တိုက်ပွဲအတွင်းမှာ ညီနောင်မဟာမိတ်တပ်ဖွဲ့ဘက်က ရဲဘော်တစ်ယောက်ထိခိုက်ဒဏ်ရာရရှိပြီး ဒဏ်ရာအခြေနေ မစိုးရိမ်ရဘဲ မိခင်တပ်ရင်းကို ဆုတ်ခွာနိုင်ခဲ့ကြတယ်လို့ ဆိုပါတယ်။

“စစ်(…)တွေနဲ့ ရင်ဆိုင်တိုက်ပွဲ ဆင်နွဲတဲ့အခါ အဓိက အခက်ခဲကတော့ လက်နက်ခဲယမ်းပါပဲ။ ကျနော်တို့ဆီမှာ အော်တိုသေနတ်တွေ ရှိတယ်ဆိုရင်တောင်မှ တိုက်ပွဲတပွဲမှာ သုံးရတဲ့ ကျည်ဆန်ဖိုးက မနည်းဘူးလေ။ လက်ရှိအချိန်မှာ ရှိသလောက် မောင်းပြန်သေနတ်အနည်းငယ်နဲ့ လက် လုပ်သေနတ်တွေကို အဓိကထားပြီး တိုက်ပွဲဝင်နေရလို့ အော်တိုတွေ၊ မောင်းပြန်သေနတ်တွေ ထပ်ဖြည့်ဖို့ လိုအပ်တယ်” လို့ MC-KC PDFရဲ့ တာဝန်ခံက ပြောပါတယ်။

အဲဒီတိုက်ပွဲအတွင်းမှာ စစ်ကောင်စီဘက်က သေဆုံးဒဏ်ရာရမှုအခြေအနေကို MC-KC PDF ရဲ့ တာဝန်ခံကပြောဆိုထားပေမယ့် ဒီဗွီဘီက သီး ခြားအတည်မပြုနိုင်သေးသလို စစ်ကောင်စီဘက်က လည်း သတင်းထုတ်ပြန်ထားတာ မတွေ့ရသေးပါဘူး။ DVB

စစ်ကိုင်းတိုင်း၊ မြို့နယ်တချို့တွင် ယနေ့ နံနက်ပိုင်း ပြတ်တောက်သွားသော ဖုန်းလိုင်းများ မွန်းလွဲ ၁ နာရီကျော်တွင် ပြန်လည် ရရှိ

စစ်ကိုင်းတိုင်းအတွင်းရှိ မြို့နယ်တချို့တွင် ယနေ့ နံနက်ပိုင်း စစ်တပ်၏ ဖြတ်တောက်မှုကြောင့် ဖုန်းလိုင်းများ ပြတ်တောက်သွားခဲ့ပြီး မွန်းလွဲ ၁ နာရီတွင် ဖုန်းလိုင်းများ ပြန်လည် ရရှိကြောင်း ဒေသခံများထံ သိရှိရသည်။

“မနက် ၇ နာရီလောက်ကနေ ဖုန်းလိုင်းတွေ ပြတ်သွားတာ အခု မွန်းလွဲ ၁ နာရီကျော်မှာ ဖုန်းလိုင်းတွေ ပြန်ရပါတယ်” ဟု ချောင်းဦးဒေသခံတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ရန်ကုန်ခေတ်သစ်၏ မေးမြန်းချက်အရ ရေဦး၊ ခင်ဦး၊ မုံရွာ အပါအဝင် မြို့နယ်များတွင်လည်း ဖုန်းလိုင်းများ တချို့တစ်ဝက် ပြန်လည်ရရှိပြီဖြစ်ကြောင်း သိရှိရသည်။

ယနေ့နံနက်ပိုင်း ဖုန်းလိုင်းအားလုံးများ ဖြတ်တောက်ခံခဲ့ရသည့်မြို့နယ်များမှာ ခင်ဦး၊ မင်းကင်း၊ မုံရွာ၊ရေဦး၊ကျွန်းလှ၊ ယင်းမာပင်၊ ပုလဲ၊ကနီ၊ကန့်ဘလူ၊ ကောလင်း၊ မြင်းမူ မြို့နယ်များဖြစ်သည်။ khit thit

ဒဂုံမြို့သစ်မြောက်ပိုင်း ၄၅ ရပ်ကွက် အုပ်ချုပ်ရေးမှူး ပစ်ခတ်ခံရ၍ သေဆုံး

ရန်ကုန်မြို့၊ ဒဂုံမြို့သစ်မြောက်ပိုင်းမြို့နယ်၊ ၄၅ ရပ်ကွက် အုပ်ချုပ်ရေးမှူး ဦးခင်မောင်သန်းဆိုသူကို ယနေ့ မေ ၂၄ရက် နံနက် ၁၀ နာရီ ၃၀ မိနစ်အချိန်ခန့်တွင် ၎င်းနေထိုင်ရာအိမ်အတွင်းသို့ သေနတ်ဖြင့်၀င်ရောက်ပစ်ခတ်ခံရသဖြင့်သေဆုံးခဲ့ကြောင်း မြို့ခံပြည်သူတစ်ဦးကပြောသည်။

ယင်းပစ်ခတ်မှုသည် ဓမ္မစေတီလမ်းနှင့်ကျေးရေလမ်းထောင့်တွင်ရှိသောအုပ်ချုပ်ရေးမှူး နေအိမ်အတွင်းသို့ လူတစ်စုက သေနတ်ဖြင့်ဝင်ရောက်ပစ်ခတ်ခြင်းဖြစ်ပြီး၊ နေရာတွင်ပင်သေဆုံးခဲ့ခြင်းဖြစ်သည်။

ယင်းဖြစ်စဥ်အပြီးတွင် ရပ်ကွက်အတွင်းသို့ရဲကားများနှင့် လူနာတင်ယာဥ်ရောက်ရှိလာကာ သေဆုံးသူဦးခင်မောင်သန်းအလောင်းအား သယ် ဆောင်သွားခဲ့ပြီး၊ ပတ်ဝန်းကျင်အားစစ်ဆေးမေးမြန်းမှုများပြုလုပ်ခဲ့ကြောင်းသိရသည်။

” ရပ်ကွက်ထဲရုတ်ရုတ်သဲသဲဖြစ်လို့ ထွက်ကြည့်တော့မှ အုပ်ကြီးအပစ်ခံရတာသိတယ်။အပြောအဆိုကြမ်းတယ်။ ရပ်ကွက်နဲ့သိပ်အဆင်ပြေတဲ့သူမဟုတ်ဘူး။ သမိုင်းကြောင်းမကောင်းတဲ့သူအတွက်တော့ထူးပြီး ဝမ်းနည်းမနေပါဘူး။”ဟု ဆိုသည်။

အုပ်ချုပ်ရေးမှူး ဦးခင်မောင်သန်းသည် အာဏာသိမ်းပြီးကာလတွင် စစ်ကောင်စီကတိုက်ရိုက်ခန့်သော သူတစ်ဦးလည်းဖြစ်ကြောင်း သိရသည်။

၎င်း အုပ်ချုပ်ရေးမှူးလုပ်နေစဥ်ကာလအတွင်း Covid 19ကာကွယ်ဆေးထိုးရာတွင်ငွေကြေးများကောက်ခံခြင်း၊ ၎င်းအပါအဝင် မိသားစုလိုက်ဆက်ဆံရေး မောက်မာခြင်းများအပြင် ရပ်ကွက်အတွင်းဖြစ်ပျက်နေသည့်ကိစ္စများအတွက် စစ်ကောင်စီကိုတိုက်ရိုက်သတင်းပေးနေသော ဒ လန် အကြီးစားဖြစ်ကြောင်းဒေသခံပြည်သူအချို့က ပြောသည်။

ယင်းဖြစ်စဥ်အတွက် မည်သည့်အဖွဲ့က ဝင်ရောက်ပစ်ခတ်သွားသည်ဆိုခြင်းကိုထုတ်ပြန်ခြင်းမရှိသေးကြောင်း သိရသည်။ mizzima

ဝိုင်းမော်-ကန်ပိုက်တည်လမ်းတွင် စစ်တပ်က စစ်ဆေးရေးဂိတ်တိုးချပြီး ငွေကြေးကောက်ခံနေ

ကချင်ပြည်နယ် ဝိုင်းမော်မြို့ကနေ ကန်ပိုက်တည်မြို့ သွားတဲ့လမ်းမှာ စစ်ကောင်စီတပ်နဲ့ လက်အောက်ခံ ပြည်သူ့စစ်အဖွဲ့က စစ်ဆေးရေးဂိတ်တွေ တိုးမြှင့်ချထားပြီး ငွေကြေး ကောက်ခံနေတယ်လို့ ဒေသခံတွေက ပြောပါတယ်။

စစ်ကောင်စီ အာဏာသိမ်းပြီးနောက်ပိုင်း ဝိုင်းမော်-ကန်ပိုက်တည်လမ်းမှာ စစ်ကောင်စီ လက်အောက်ခံ ပြည်သူ့စစ်တပ်ဖွဲ့ရဲ့ စစ်ဆေးရေးဂိတ် ၁၀ ခုထက်မနည်း ထပ်မံတိုးချဲ့ဖွင့်လှစ်ပြီး မော်တော်ယာဉ်တွေဆီက ငွေကြေး ကောက်ခံနေတာလို့ ကိုယ်ပိုင်ယာဉ်နဲ့ ကုန်စည်ပို့ဆောင် ယာဉ် မောင်းတွေက ပြောပါတယ်။

“စစ်ကောင်စီ အာဏာမသိမ်းခင်က ဝါးရှောင်စုပေါင်းဂိတ်နဲ့ ဆဒုံး  စုပေါင်းဂိတ် နှစ်ခုပဲ ရှိတာ။  ၂၀၂၁ နှစ်ကုန်ပိုင်းလောက်ကစပြီး ပြည်သူ့စစ်ဂိတ်တွေ ထပ်တိုးလာတယ်။ ကားကြီးတွေ တစီးကို ၅၀၀၀ လောက်ပေးရတဲ့ဂိတ်ရှိတယ်။ လက်ဖက်ရည်ဖိုး ပေးဆိုပြီး တောင်းတဲ့ဂိတ်တွေရှိတယ်။ မတောင်းတဲ့ ဂိတ်ကတော့ မရှိဘူး” လို့ ဝိုင်းမော်-ကန်ပိုက်တည်လမ်းပိုင်း ကုန်စည်ပို့ဆောင်တဲ့ ယာဉ်မောင်းတဦးက ပြောပါတယ်။ 

ခရီးသည်တင်ယာဉ်တွေနဲ့ ကိုယ်ပိုင်ယာဉ်ငယ်လေးတွေကိုလည်း စစ်ဆေးရေးဂိတ်တွေမှာ ငွေကြေးကောက်ခံတာတွေ ရှိနေပါတယ်။

“ကျနော်တို့ အရှေ့ကသွားတဲ့ ခရီးသည်တင်ကားကို စစ်ဆေးပြီး  ကားဆရာဆီက ပိုက်ဆံတောင်းသွားတာ တွေ့တယ်။ ကျနော့်ကားဆီလာတော့ မှန်ချခိုင်းပြီး ဘယ်သွားမလဲ ဘာလုပ်မလဲ စစ်ဆေးတယ်။ ရပြီ သွားတော့ လက်ဖက်ရည်ဖိုး ပေးခဲ့ဦးမလား မေးတယ်။ ကျနော်ကတော့ စစ်ဆေးပြီး သွားတော့ဆိုကတည်းက လက်ဖက်ရည်ဖိုးမပေးဘူး မောင်းထွက်ခဲ့တာပဲ” လို့ မြစ်ကြီးနားမြို့ကနေ ဆဒုံး ကျေးရာကို ကိုယ်ပိုင် ကားနဲ့ သွားခဲ့သူ အမျိုးသားတဦးက ပြောပါတယ်။

ဝိုင်းမော်မြို့နယ်ကနေ ကန်ပိုက်တည်သွားရာ လမ်းတလျှောက်က စစ်ဆေးရေးဂိတ်တွေကို ဦးရွှေမင်းရဲ့ လီဆူပြည်သူ့စစ်အဖွဲ့နဲ့ ဦးဇခုန်တိန့်ယိန်း ပြည်သူ့စစ်တပ်ဖွဲ့တွေ ဖေင့်လှစ်ထားတာဖြစ်ပြီး အချို့ ဂိတ်ကြီးတွေမှာတော့ စစ်ကောင်စီတပ်နဲ့ ပူးပေါင်းစစ်ဆေးတာတွေ ပြုလုပ်နေတာပါ။

စစ်အာဏာမသိမ်းမီကာလက ဝိုင်းမော်-ကန်ပိုက်တည် လမ်းတလျှောက်မှာ ဝါရှောင်ကျေးရွာ အထွက် စုပေါင်းဂိတ်နဲ့ ဆဒုံးဂိတ် နှစ်ခုသာရှိပြီး ၂၀၂၁ခုနှစ် အောက်တိုဘာလက စတင်ကာ  ဝိုင်းမော်နဲ့ ကန်ပိုင်တည်ကြားမှာ   ဝါးရှောင်ဂိတ်  ဘွမ်တောင်ဂိတ်၊ အင်ဝမ်တောင်ဂိတ်၊ ငေါ့ချုံးဂိတ်၊ ရွှမ်းဝေတံတားဂိတ်၊ ဆဒုံးရေတံခွန်ဂိတ်၊ ဆဒုံးအဝင်ဂိတ်၊ ဆဒုံးအထွက်ဂိတ်၊ မံဝိန်းဂိတ်၊ လော်ဆာကျေးရွာ ဂိတ်တွေ ဖွင့်လှစ်ထားပြီး အခြားကျေးရွာအဝင် အထွက်နေရာတွေမှာလည်း ပြည်သူ့စစ် စစ်ဆေးရေးဂိတ်ငယ်လေးတွေ ရှိတယ်လို့ သိရပါတယ်။ DVB

ဝမ်းတွင်းမြို့နယ်၊ ကျင်းရွာမှ ပြည်သူများရွေးချယ်ခန့်အပ်ထားသော အုပ်ချုပ်ရေးမှူး ကိုအာကာထွေးကို စစ်ကောင်စီက ဖမ်းဆီးသတ် ဖြတ်၊ အလောင်းပြန်မရ

မန္တလေးတိုင်း၊ ဝမ်းတွင်းမြို့နယ်၊ ကျင်းရွာမှ ပြည်သူများ ခန့်အပ်ထားသော အုပ်ချုပ်ရေးမှူး ကိုအာကာထွေးကို မေလ ၂၂ ရက် ညတွင် အ ကြမ်းဖက်စစ်ကောင်စီတပ်ဖွဲ့ဝင်များက လာရောက်ဖမ်းဆီးသွားပြီး ရိုက်နှက်စစ်ဆေးမှုများကြောင့် သေဆုံးသွားကြောင်း သတင်းရရှိသည်။

“၂၂ ရက် ည ၁၁ နာရီလောက်မှာ ကိုအာကာထွေးကို စစ်ခွေးတွေက ရိုက်နှက်ပြီး ခေါ်သွားတယ်။ အဲ့ညက ဝင်ဝင်ချင်း စစ်ခွေးတွေလာပြီး အုပ်ကြီးကို တန်းရိုက်တာ၊ အုပ်ကြီးက သွေးတန်းလန်းနဲ့ ကိုနန်းခိုင်အိမ်နေရာကို လိုက်ပြရတာ။ ပြီးတော့ စစ်ခွေးတွေက အိမ်ကို မီးရှို့တယ်၊ ရွာထဲမှာ ကျန်နေသေးတဲ့ တချို့အမျိုးသမီးတွေကို ခေါ်ပြီး မီးလောင်နေတဲ့အိမ်ကို ကြည့်ခိုင်းတယ်၊ အုပ်ကြီးက သေသွားပြီဆိုတာ မနေ့က တည်းက သတင်းကြားတယ်။ အခုမှ ကွန်ဖမ်းဖြစ်တာ၊ အလောင်းကို မိသားစုကို ပြန်မပေးဘူး။” ဟု ဒေသသတင်းရင်းမြစ်က ရန်ကုန်ခေတ်သစ်သတင်းဌာနသို့ ပြောဆိုသည်။

မေလ ၂၂ ရက်နေ့တွင် ကျင်းရွာအနီးသို့ ကင်းလှည့်လာသော အကြမ်းဖက်စစ်ကောင်စီလက်အောက်ခံ ရဲ ၂ ဦးကို ဒေသကာကွယ်ရေးတပ်ဖွဲ့များက ပစ်ခတ်ရှင်းလင်းလိုက်ပြီးနောက် အကြမ်းဖက်စစ်တပ်က ညတွင် ကျင်းရွာသို့ ရောက်ရှိလာပြီး PDF ဟု စွပ်စွဲခံရသူ ကိုနန်းခိုင်၏ အိမ်ကို မီးရှို့ဖျက်ဆီးသွားကာ အုပ်ချုပ်ရေးမှူး ကိုအာကာထွန်းကို ဖမ်းဆီးသတ်ဖြတ်လိုက်ခြင်းဖြစ်သည်။

“ကိုအာကာထွေးက စစ်ကောင်စီ လက်ထက်မှာ အုပ်ကြီးဖြစ်တယ်ဆိုပေမယ့် ရွာသားတွေက ခန့်ထားတာ၊ စစ်ခွေးတွေ ကျင်းရွာကို ရောက် လာတော့ သူက သွားတွေ့ရတာပေါ့၊ တချို့တွေက သွားမတွေ့ဖို့ တားတယ်၊ သူက မလုပ်လောက်ပါဘူးဆိုပြီး သွားတွေ့တာ။ အရင်ကလည်း ရွာကို စစ်ခွေးတွေ ခဏ ခဏ ဝင်စစ်ဖူးတယ်။ အခုကရဲ ၂ ယောက် ကိစ္စနဲ့ ကျင်းရွာကို စစ်ခွေးတွေက ဝင်ဖိတာ” ဟု ဒေသသတင်းရင်းမြစ်က ရှင်းပြသည်။

အကြမ်းဖက်စစ်ကောင်စီတပ်ဖွဲ့ဝင်များ မကြာခဏ ဝင်ရောက်ကာ ရိုက်နှက်စစ်ဆေးမှုများကြောင့် ကျင်းရွာတွင် သက်ကြီးရွယ်အို ဘိုးဘွားများ၊ အမျိုးသမီးများနှင့် ကလေးငယ်များသာ ကျန်ရှိကြောင်း အမျိုးသားများမှာ ရွာတွင် နေ၍မရဘဲ ထွက်ပြေးတိမ်းရှောင်နေရသည်မှာ လချီ ကြာမြင့်နေပြီဖြစ်ကြောင်း သိရှိရသည်။ khit thit

မြန်မာ့ဒီမိုကရေစီအရေးအတွက် အချက် ၅ ချက်အား Quad အဖွဲ့ထံ NUG တောင်းဆို

မြန်မာ့ဒီမိုကရေစီအရေးအတွက် အချက် ငါးချက်အား Quad အဖွဲ့ထံ NUG အစိုးရက တောင်းဆိုလိုက်သည်။

တောင်းဆိုသည့်အချက်များမှာ စစ်ကောင်စီ၏ ရက်စက်ကြမ်းကြုတ်မှုများအပေါ် သည်းမခံရန်၊ စစ်ကောင်စီ၏ လူသားမျိုးနွယ်အပေါ် ကျူး လွန်သည့် ရာဇဝတ်ဆိုင်ရာ ပြစ်မှုများနှင့် စပ်လျဉ်း၍ ကျူးလွန်သူများအား အရေးယူရန်၊ နိုင်ငံတကာအသိုက်အဝန်းအနေဖြင့် မြန်မာ နိုင်ငံ၏ ဆိုးရွားလှသည့် လူသားချင်း စာနာထောက်ထားမှု ဆိုင်ရာ ကပ်ဆိုးကြီးကို ထိထိရောက်ရောက် တုံ့ပြန်ကိုင်တွယ်ပေးနိုင်ရန်၊ စစ်ကောင်စီထံ လက်နက်ခဲယမ်းနှင့် လေယာဉ်လောင်စာများ ရောင်းချမှုကို Quad ၏ အခွင့်အာဏာကို အသုံးချ၍ ကန့်သတ်ပေးရန်၊ စစ်ကောင်စီ၏ အ ကြမ်းဖက်ဖိနှိပ်မှုမှ လွတ်ကင်းသည့် ကိုယ့်ကြမ္မာ ကိုယ်ဖန်တီးနိုင်ခွင့်အား မြန်မာပြည်သူတို့၏ လက်ဝယ်တွင်သာ တည်ရှိနိုင်ရန်တို့ဖြစ်သည်။

Quad အဖွဲ့အနေဖြင့် ၂၀၂၂ ခုနှစ်၊ ဖေဖော်ဝါရီ လ ၁၁ ရက်တွင် မြန်မာ့အရေးနှင့်စပ်လျဉ်း၍ စိုးရိမ်ပူပန်ကြောင်း ထုတ်ပြန်ခဲ့သေးသည်။

ယင်းသို့ ထုတ်ပြန်အပြီး သုံးလကြာခဲ့သော်လည်း မြန်မာ့အကြပ်အတည်းမှာ လျော့ပါးခြင်းမရှိကြောင်း၊ စစ်ကောင်စီ၏ ရက်စက်ကြမ်းကြုတ်မှုများနှင့် မတရားဖမ်းဆီးချုပ်နှောင်မှုများသည် ရပ်တန့်သွားခြင်းမရှိဟု NUG ကဆိုသည်။

အာဏာသိမ်းကာလအတွင်း အပြစ်မဲ့ပြည်သူ ဦးရေပေါင်း ၆၀၀,၀၀၀ ကျော် နေရပ်စွန့်ခွာခဲ့ရသဖြင့် မြန်မာပြည်သူများ ရင်ဆိုင်ကြုံတွေ့နေရသော ဆင်းရဲဒုက္ခများသည် ကမ္ဘာ့အရေးတစ်ခု ဖြစ်ရန် လိုအပ်သည်ဟု NUG ကထောက်ပြသည်။

စစ်ကောင်စီအနေဖြင့် နိုင်ငံတကာ၏ တောင်းဆိုချက်များ၊ လူ့အခွင့်အရေးဆိုင်ရာ ဝတ္တရားများကို မထီမဲ့မြင်ပြုကာ ကျူးလွန်မှုများ ဆက် တိုက်လုပ်ဆောင်နေသည်ဟု NUG ကဆိုသည်။

ယင်းကြောင့် မြန်မာပြည်သူများအတွက်သာမက ဒေသတွင်း လုံခြုံရေးအတွက် Formal working group တစ်ခုအား အမြန်ဆုံးအကောင် အထည်ဖော်ရန် တိုက်တွန်းကြောင်း NUG က ထုတ်ပြန်သည်။

Quad အဖွဲ့တွင် အမေရိကန်၊ သြစတြေးလျ၊ ဂျပန်နှင့် အိန္ဒိယနိုင်ငံတို့ ပါဝင်ဖွဲ့စည်းထားပြီး စစ်ရေးလေ့ကျင့်မှုများနှင့် စီးပွားရေးကိစ္စရပ်များကို ပူးတွဲလုပ်ဆောင်နေခြင်းဖြစ်သည်။ mizzima

ပြည်သူ့ခုခံတော်လှန်စစ်အတွင်း စစ်ကောင်စီတပ်သား ၁၅,၀၀၀ ခန့်သေဆုံးဟု NUG ထုတ်ပြန်

အချိန် တနှစ်နီးပါးအကြာ ပြည်သူ့ခုခံတော်လှန်စစ်အတွင်း အကြမ်းဖက်စစ်အုပ်စုဘက်က စစ်ကောင်စီတပ်သား ၁၄,၈၉၀ ယောက် သေဆုံးခဲ့ပြီး ထိခိုက်ဒဏ်ရာရရှိသူအရေအတွက်ကတော့ ၄,၈၁၄ ယောက်ထိ ရှိခဲ့တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ပါတယ်။

NUG အစိုးရ၊ ကာကွယ်ရေးဝန်ကြီးဌာနက ပြီးခဲ့တဲ့ ၂၀၂၁ ခုနှစ်၊ ဇွန် ၁ ရက်ကနေ အခုနှစ်၊ မေ ၁၇ ရက်အထိ စုဆောင်းရရှိထားသော အချက် အလက်တွေအရ ထုတ်ပြန်ထားတာဖြစ်ပြီး မြေပြင်အခြေအနေမှာတော့ စစ်ကောင်စီ တပ်ဖွဲ့ဝင်တွေ သေဆုံးဒဏ်ရာရမှုဟာ ခုအရေအတွက်ထက် ပိုများနိုင်တယ်လို့ ဆိုပါတယ်။

နိုင်ငံတဝန်းမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက် သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး မြန်မာပြည်သူတွေဟာ စစ်အာ ဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာ ဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

NUG အစိုးရ တည်ထောင်ပြီး ၁ နှစ်တာကာလအတွင်းမှာ ပြည်သူ့ကာကွယ်ရေးတပ်မတော် တပ်ရင်း၊ တပ်ဖွဲ့ပေါင်း ၂၅၇ ရင်းကို ဖွဲ့စည်းတည် ထောင်နိုင်ခဲ့ပြီးဖြစ်ကာ မြို့နယ်အခြေပြု ပြည်သူ့ကာကွယ်ရေးအဖွဲ့ (ပကဖ) တွေကိုလည်း မြို့နယ်ပေါင်း ၂၅၀ မှာ စနစ်တကျ ဖွဲ့စည်းနိုင်ခဲ့ပြီးဖြစ်တယ်လို့ ဆိုပါတယ်။

ဒါ့အပြင် ဒေသအခြေစိုက် ကာကွယ်ရေးအဖွဲ့တွေ၊ မြို့ပြပြောက်ကျားအဖွဲ့တွေ ၄၀၀ ကျော်နဲ့လည်း ဟန်ချက်ညီစွာ တိုက်ပွဲဖော်ဆောင်ဖို့ ချိတ် ဆက်နိုင်ခဲ့ပြီးဖြစ်တယ်လို့ NUG က ထုတ်ပြန်ထားပါတယ်။

မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ အကြမ်းဖက်စစ်အုပ်စုဘက်ကတော့ သတင်းထုတ်ပြန်ထားတာ မရှိပါဘူး။ DVB

မြင်းမူမြို့နယ်၌ စစ်ကောင်စီတပ်ဖွဲ့ယာဉ်တန်းကို နာရီပိုင်းအတွင်း ၃ ကြိမ်တိုင် မိုင်းဆွဲတိုက် ခိုက်

စစ်ကိုင်းတိုင်းဒေသကြီး၊ စစ်ကိုင်းမြို့နှင့် မုံရွာမြို့ကြား သွားလာနေသည့် စစ်ကောင်စီယာဉ်တန်း နှစ်ခုအား မြင်းမူမြို့နယ်ထဲတွင် Black Eagle Defence Force-MMUအဖွဲ့မှ ဦးဆောင်၍ ဒေသခံမဟာမိတ်အဖွဲ့များနှင့်အတူ မိုင်းဆွဲတိုက်ခိုက်မှုပြုလုပ်ခဲ့ကြောင်း သိရသည်။

စစ်ကိုင်းမှ မုံရွာသို့သွားသော စစ်ကောင်စီကားအကြီး ၁၆ စီးပါ ယာဥ်တန်းကို မြင်းမူမြို့နယ်၊ ဝမ်းပြည့်ကျေးရွာနှင့် အလ္လကပ္ပကျေးရွာကြား ယမန်နေ့ မေလ ၂၃ ရက် နံနက် ၁၁ နာရီ ၁၉ မိနစ်စတွင် ပဒေသာမိုင်း သုံးလုံးဖြင့် ဖောက်ခွဲတိုက်ခိုက်ရာ အဆိုပါယာဉ်တန်းမှ ရှစ်စီးမြောက်ကား ထိမှန်ခဲ့ကြောင်း အဖွဲ့က ထုတ်ပြန်ထားသည်။

“မိုင်းဆွဲတာကတော့ ကျွန်တော်တို့အတွက် ဖြစ်ရိုးဖြစ်စဉ်ပေမယ့် ဒီနောက်ပိုင်းကင်းပုန်းတွေရှိတော့ ပိုခက်ခဲလာတာပေါ့။ ကျွန်တော်တို့က တော့ မိုင်းဆွဲစရာရှိတာဆွဲပြီးရင် ပစ္စည်းတွေယူပြီး ပြန်ဆုတ်ရတာမလို့ ဘာတွေဆက်ဖြစ်လဲဆိုတာတော့ မမြင်ခဲ့ရဘူး။ သတင်းသိလောက်မယ့်သူတွေကိုပဲ ပြန်မေးပြီး စုံစမ်းရတာ။ ဘယ်သူကမှ မျက်မြင်မတွေ့ရတော့ အကုန်မပြောနိုင်ဘူး။ မိုင်းဆွဲလို့ ထိသွားတော့ ကားက ခဏရပ်သွားတယ်။ ပြီးတော့ ပြန်ပစ်တာတွေရှိတယ်”ဟု Black Eagle Defence Force-MMU အဖွဲ့တာဝန်ခံ လမ်းဗိုလ်က ပြောသည်။

ထို့အပြင် ၎င်းယာဥ်တန်းအား မြင်းမူမြို့နယ်၊ ဘိုးမင်းကြီးကင်းကျေးရွာနှင့် ဂွေးပင်တောကျေးရွာကြား ယမန်နေ့ နံနက် ၁၁ နာရီခွဲတွင် ပဒေသာမိုင်း လေးလုံးဖြင့်ထပ်မံမိုင်းဆွဲတိုက်ခိုက်ရာ ငါးစီးမြောက်ကား ထိမှန်ခဲ့ကြောင်း အဖွဲ့တာဝန်ခံက အတည်ပြုသည်။

“ဖြစ်စဉ် နှစ်မှာက ပြည်သူကားက မလွတ်တော့ ကျွန်တော်တို့ဆွဲချင်တဲ့ အဓိကကားကို လွှတ်လိုက်ပြီး တစ်ခြားကားပဲ ဆွဲလိုက်ရတယ်။ နောက် နောင်မှာ စကစ(စစ်ကောင်စီ)ယာဥ်တန်းနှင့် ပြည်သူတွေ ကပ်မလိုက်ဖို့ မေတ္တာရပ်ခံပါတယ်” ဟု ၎င်းကဆက်ပြောသည်။

ယင်းမိုင်းဆွဲမှု နှစ်နေရာပြုလုပ်ခဲ့သည့် ဝမ်းပြည့်ကျေးရွာ၊ အလ္လကပ္ပကျေးရွာ၊ ဘိုးမင်းကြီးကင်းကျေးရွာနှင့် ဂွေးပင်တောကျေးရွာများမှာ ကားလမ်းဘေးတစ်လျှောက် တည်ရှိနေသည့် ရွာစဉ်များဖြစ်သည်။

ထို့အပြင် မုံရွာမြို့မှ စစ်ကိုင်းမြို့သို့ သွားသည့် နောက်ထပ် စစ်ကောင်စီကား ၁၇ စီးပါ ယာဥ်တန်းကိုလည်း ဝမ်းပြည့်ကျေးရွာနှင့် မြင်းမူမြို့ ကြား နံနက် ၁၂ နာရီ ၅ မိနစ်ခန့်တွင် ပဒေသာမိုင်း သုံးလုံး၊ တစ်ဖက်ပွင့်ပြောင်း နှစ်လုံးတို့ ဖြင့် တိုက်ခိုက်ရာ ၁၃ စီးမြောက်ကားမှာ ထိမှန်သွားကြောင်း သိရသည်။

ယင်းမိုင်းဆွဲမှုဖြစ်စဉ်များတွင် စစ်ကောင်စီဘက်မှ အထိအခိုက် အကျအဆုံးအရေအတွက်များကိုမူ အဖွဲ့ဘက်မှ စုံစမ်းနေဆဲဖြစ်သည်။

ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းလည်း ထုတ်ပြန်ထားသည်။

၎င်းမိုင်းဆွဲတိုက်ခိုက်မှု သုံးခုကို Black Eagle Defence Force-MMU (မြင်းမူလင်းယုန်နက် ကာကွယ်ရေးအဖွဲ့) မှ ဦးဆောင်၍ People’s Defence Force Myinmu-MMU PDF၊ မြင်းမူလျှပ်စီး ပြောက်ကျားတပ်ဖွဲ့၊ Myinmu Civil Revolution Force-CRF(Myinmu)၊ မြောင်မြို့နယ် ပြည်သူ့ကာကွယ်ရေးနှင့် လုံခြုံရေးအဖွဲ့-CDSOM စသည့် မဟာမိတ်လေးဖွဲ့နှင့်အတူ ပြုလုပ်ခဲ့ခြင်းဖြစ်သည်။ mizzima

လက်နက်ဝယ်ရန် ကျပ်သိန်း ၂၀၀ လိမ်လည်ခဲ့ခြင်းမဟုတ်ဟု စိုင်းထက်အောင် ပြော

လက်နက်ဝယ်ဖို့ ကျပ်သိန်း ၂၀၀ ကို လိမ်လည်ခဲ့တာမဟုတ်ဘဲ တဆင့်ဝယ်ပေးမယ့်သူတွေ ဖမ်းဆီးခံရတာ၊ သူတို့ဆီက လက်နက်မရတာကြောင့်ဖြစ်တယ်လို့ ပင်လုံနည်းပညာတက္ကသိုလ်ရဲ့ အမည်ပျက်စာရင်း ကြေညာခံခဲ့ရတဲ့ ကျောင်းသား စိုင်းထက်အောင်က ပြောပါတယ်။

အာဏာရှင်တော်လှန်ရေးပြည်သူ့တပ်မတော် (DRPA) က လက်နက်ဝယ်ဖို့ ကျပ်သိန်း ၁၄၀၊ MGF ဆီက ကျပ်သိန်း ၆၀ ကို စိုင်းထက်အောင်(ခ) လင်းထင်ကို ပေးခဲ့ပေမယ့် သတ်မှတ်ရက်မှာ လက်နက်မပေးတာ၊ ဖြေရှင်းဖို့ ဆက်သွယ်ခဲ့ပေမယ့်မရခဲ့ဘူးလို့ DRPA က ဆိုပါတယ်။

ဒါကြောင့် သက်ဆိုင်ရာ ကျောင်းသားသမဂ္ဂကို ဆက်သွယ်အကူအညီတောင်းခဲ့ပြီး သမဂ္ဂကလည်း စာထုတ်ဆင့်ခေါ်ပေမယ့် မရခဲ့သလို ပင်လုံနည်းပညာတက္ကသိုလ်ရဲ့ ယာယီတက္ကသိုလ်ကောင်စီကလည်း ဆင့်ခေါ်ပေမယ့်မရလို့ အမည်ပျက်စာရင်းသွင်း၊ ကျောင်းကနေ ထုတ်ပစ်ခဲ့တာပါ။

ဒီအပေါ်မှာ စိုင်းထက်အောင်က “ကျနော်က နောက်လူ ၂ ယောက်ဆီက တဆင့်ဝယ်ပေးတာ။ ငွေတွေကို သူတို့ကို ပေးခဲ့ရတာ။ အရင်ကလည်း သူတို့ဆီက ၄၊ ၅ ကြိမ်ဝယ်ခဲ့ဖူးတယ်။ ၂ ပတ်ပဲကြာတယ်။ အခုတကြိမ်မှာတော့ ငွေချေပြီးနောက်ပိုင်း ဆက်သွယ်လို့မရတော့ဘူး။ ၂ ပတ်နောက်ပိုင်းမှာလည်း ဆက်သွယ်လို့မရတော့ဘူး။ ဒါနဲ့ ကျနော်လည်း နယ်စပ်မှာ အလုပ်လုပ်ဖို့ ထွက်သွားတယ်။ အဲဒီမှာက အင်တာနက်မရတော့ အဖွဲ့နဲ့ ကျောင်းက စာထုတ်တာတွေကို ကျနော်မသိဘူး။ အဖွဲ့က အခုလို ကြေညာတော့ ကျနော့်အဖေက ဆက်သွယ်ပြီး ဖြေရှင်းပေးမယ်ဆိုတဲ့အကြောင်း ပြောထားတယ်။ ဒီကြားထဲမှာလည်း ကျနော်ငွေချေထားတဲ့ သူတယောက်နဲ့ ဆက်သွယ်လို့ရပြီး သူ့ဆီက ငွေသိန်း ၄၀ ပြန်ပေးမယ်လို့ ပြောတယ်။ သူ့ကိုသွားရှာတဲ့အချိန်မှာ DRPA ရဲ့ ဘဏ္ဍာရေးမှူးလည်းပါပါတယ်။ ကျနော်ငွေချေထားတဲ့သူ နောက်တယောက်ကတော့ ဖမ်းခံထားရတယ်ဆိုတာ သိပ်မကြာခင်ကမှ သိရတယ်။ ကျနော်တာဝန်ခံထားတာဖြစ်တဲ့အပေါ် ကျနော်ငွေတွေ ပြန်စိုက်လျော်မယ်လို့လည်း အဖွဲ့ကို ပြောထားပါတယ်” လို့ ပြောပါတယ်။

DRPA ရဲ့တာဝန်ရှိသူတယောက်ကတော့ “(လက်နက်ဝယ်ပေးမယ့် တဆင့်ခံလူကို) သွားရှာတဲ့ အထဲမှာတော့မပါဘူးဗျ။ ကျနော်တို့ ဗဟိုကော် မတီဝင်တွေနဲ့ သူ တယောက်မှ တွေ့ပေးတာမျိုးမရှိဘူး။ သူ့ပြောစကားအတိုင်း Run ပေးခဲ့ရတာပဲရှိတယ်” လို့ပြောပါတယ်။

ဆင့်ခေါ်စာတွေထုတ်ပေမယ့် စိုင်းထက်အောင်ဘက်က ဆက်သွယ်လာတာမရှိခဲ့ဘဲ ကျောင်းက ထုတ်ပယ်တယ်ဆိုတဲ့နောက်မှာမှ စိုင်းထက်အောင်ရဲ့ အဖေဖြစ်သူက ဆက်သွယ်လာပြီး မေလ ပထမပတ်ထဲမှာ ဖြေရှင်းပေးမယ်လို့ ပြောခဲ့တယ်လို့လည်း ဆိုပါတယ်။ အဲဒီနောက်မှာ ထပ်ဆက်သွယ်လာပြီး မေလ ၁၀ ရက်နေ့အထိ စောင့်ပေးဖို့ပြောခဲ့ပြီး နောက်ပိုင်းမှာ ဆက်သွယ်လို့ မရတော့ဘူးလို့လည်း ပြောပါတယ်။

စိုင်းထက်အောင်က “ကျနော့်ဘက်မှာ အဲဒီအချိန်က ပြောစရာမရှိတဲ့အတွက် ပြန်မဆက်သွယ်ဘဲ လက်နက်မှာတဲ့သူကိုပဲ ဆက်သွယ်ပြီး ကိစ္စတွေရှင်းပြဖို့ စာပို့ထားခဲ့ပါတယ်။ ဘာကြောင့်လဲဆိုတော့ အစောပိုင်းကာလတွေမှာ လိမ်ပါတယ်လို့ပြောရင် တပ်ဖွဲ့က ကျနော် အလွဲသုံးစားပြုလုပ်တယ်လို့ သံသယဖြစ်မှာကို စိုးရိမ်တာပါ။ အခု ဖြစ်တဲ့ကိစ္စတွေကလည်း အချိန်ကာလကွာဟမှုတခုနဲ့ နားလည်မှုလွဲသွားတဲ့အချိန်မှာ ဖြစ်ပျက်သွားတာတွေပါပဲ။ အခုလည်း တချို့တဝက်ကို ကျနော့်ဘက်ကနေ စိုက်ပြီး ရန်ပုံငွေ ပြန်ထည့်ဖို့ ကြိုးစားထားတာတွေရှိပါတယ်။ ကျနော့်မှာရှိတာတွေရောင်းပြီးထည့်ပေးမှာပါ” လို့ပြောပါတယ်။

DRPA တာဝန်ရှိသူတယောက်ကတော့ “ကျန်တာက သူ့အပိုင်း သူတာဝန်ယူမှု သူတာဝန်ခံမှုပေါ့ဗျာ။ ကျနော်တို့လက်နက်ဝယ်တာ သူ့ဆီက” လို့ ပြောပါတယ်။ DVB

« Older Entries