Category Archives: News

ဟားခါး – ထန်တလန်အကြား တိုက်ပွဲတွင် စစ်ကောင်စီတပ်မှ အရာရှိအပါအဝင် ၁၅ယောက်သေဆုံး

ချင်းပြည်နယ် ဟားခါးမြို့နှင့် ထန်တလန်မြို့အကြား သီးမြစ်ချောင်း အောက်ပိုင်းတွင် တိုက်ပွဲများဆက်လက်ဖြစ်ပွားနေပြီး ယမန်နေ့တိုက်ပွဲတွင် စစ်ကောင်စီတပ်မှ အရာရှိ တစ်ဦးအပါအဝင် ၁၅ဦးသေဆုံးသွားကြောင်း ချင်းအမျိုးသားတပ်မတော်( CNA )ထံမှ သိရှိရသည်။

“သူတို့ နေရာယူထားတဲ့ဆီကို သွားတိုက်ခဲ့တာပါ၊ သူတို့ဘက်က အကျအဆုံးများပြီး လက်နက်နဲ့ ကျည်ဆံတစ်ချို့ သိမ်းဆည်းရမိပါတယ်၊ ကျနော်တို့ဘက်ကလည်း ဒဏ်ရာရသူအနည်းငယ်ရှိပါတယ်” ဟု ချင်းအမျိုးသားတပ်မတော် (CNA) ပြောရေးဆိုခွင့်ရှိသူ ဆလိုင်းထက်နီ က မဇ္စျိမ ကို ပြောသည်။

ဩဂုတ်လ ၁၅ရက် နံနက် ၁၁နာရီခန့်တွင် သီးမြစ်ချောင်း အောက်ဖက်ရှိ စစ်ကြောင်းရှိရာသို့ သွားရောက်တိုက််ခိုက်ခဲ့ခြင်းဖြစ်ပြီး စစ်ကောင်စီတပ်မှ သေဆုံးမှုများအပြင် စက်သေနတ်တစ်လက် ၊ MA သေနတ်တစ်လက် ၊ မော်တာဗုံးသီး နှစ်လုံးနှင့် ကျည်ဆံအချို့ သိမ်းဆည်းရမိကြောင်း ဆိုသည်။

ယင်းတိုက်ပွဲကို CNA အပါအဝင် CDF – Zophei , CDF – Hakha , CDF – Thantlang , CDF – Lautu နှင့် CJDC မှ ရဲဘော်များ ပူးပေါင်းတိုက်ခဲ့ခြင်းဖြစ်ကြောင်းသိရသည်။

ယင်းနေ့တွင်လည်း ဟားခါးမြို့သို့ စစ်ကောင်စီတပ်မှ ရဟတ်ယာဉ်ဖြင့် လက်နက်ခဲယမ်း သုံးကြိမ် လာရောက်ပို့ဆောင်ခဲ့ကြောင်းသိရသည်။

ဩဂုတ်လ ၁၄ရက် ည ၁၀နာရီခန့်တွင်လည်း တိုက်ပွဲဖြစ်ပွား နေသည့် နေရာအား ဂျက်တိုက်လေယာဉ် ဝဲကြည့်သွားသေးကြောင်း ဆိုသည်။

စစ်ကောင်စီတပ်များသည် ဟားခါး – ထန်တလန်အကြားရှိ သီးမြစ်ချောင်း တံတားအား ပြင်ဆင်ရန်ကြိုးစားနေပြီး ယင်းတံတားပြင်ဆင်နိုင်ပါက ထန်တလန်မြို့သို့ စစ်ကူနှင့် ထောက်ပို့လုပ်ငန်းများ အလျင်အပြန်လုပ်ဆောင်နိုင်မည့်အပြင် ထန်တလန်မြို့ နှင့် အနီးတစ်ဝိုက်ထိန်းချုပ်နိုင်ပြီး ချင်းကာကွယ်ရေးတပ်ဖွဲ့များ၏ လှုပ်ရှားမှုအား ချေမှုန်းနိုင်ရန် ပြင်ဆင်နေခြင်းဖြစ်ကြောင်း သိရသည်။

ယခုတိုက်ပွဲဖြစ်ပွားနေသည့် နေရာသည် ပျက်စီးနေသော သီးမြစ်တံတား ၏ အောက်ပိုင်းတွင် ဖြစ်ပွားနေခြင်းဖြစ်ပြီး စစ်ကောင်စီတပ်များ သည် ၎င်းအောက်ဖက်မှ တစ်ဆင့် ဇိုဖေး နယ်သို့ဝင်ရောက်ကာ ထန်တလန်မြို့နယ်သို့ စိုးမိုးရန်ကြိုးစားနေခြင်း ဖြစ်ကြောင်း ဆလိုင်းထက်နီ က သုံးသပ်ပြောဆိုသည်။

သို့သော် ရာသီဥတုဆိုးရွားမှုနှင့် ချင်းကာကွယ်ရေးတပ်ဖွဲ့များမှ အပြင်းအထန် တိုက်ခိုက်နေမှုကြောင့် ရှေ့ဆက်မတိုးနိုင်ဘဲရှိနေပြီး ကျည် ၊ ရိက္ခာ ထပ်မံ ဖြည့်တင်းကာ ရှေ့သို့တက်ရန် ပြင်ဆင်လျက်ရှိကြောင်း သိရသည်။ mizzima

စစ်အာဏာသိမ်းပြီးချိန်မှစ ကရင်နီပြည်တွင် တိုက်ပွဲအကြိမ် ၄၂၀ ဖြစ်ပွား၊ စစ်ကောင်စီဘက်က ၁၃၀၀ နီးပါးသေဆုံး

ပြီးခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက်ကစတင်ကာ စစ်အာဏာသိမ်းပြီးချိန်ကတည်းက အခုနှစ် ဩဂုတ် ၁၅ ရက်အထိ ကရင်နီပြည်နယ်မှာ တိုက်ပွဲအကြိမ်ရေ ၄၂၀ ဖြစ်ပွားခဲ့ပြီး အဆိုပါတိုက်ပွဲတွေအတွင်း အကြမ်းဖက်စစ်ကောင်စီဘက်က အယောက် ၁၃၀၀ နီးပါး သေဆုံးခဲ့တယ်လို့ သိရပါတယ်။

တိုးတက်သော ကရင်နီပြည်သူ့အင်အားစု Progressive Karenni People Force – PKPF က စာရင်းပြုစုထုတ်ပြန်ထားတာဖြစ်ပြီး အခုနှစ် ၂၀၂၂ ခုနှစ်အတွင်းမှာတော့ တိုက်ပွဲအကြိမ်ရေ ၂၈၈ ကြိမ်ဖြစ်ပွားခဲ့တာလို့ ဆိုပါတယ်။

တိုက်ပွဲတွေအတွင်း စစ်ကောင်စီယာဉ်တန်းပျက်စီးမှုအရေအတွက်မှာတော့ ၂၀၂၁ ခုနှစ်အတွင်းမှာတော့ ၁၉ စီးပျက်စီးခဲ့ပြီး အခုနှစ်ထဲမှာ ၃၅ စီးပျက်စီးခဲ့တာပါ။

ဒါ့အပြင် တိုက်ပွဲတွေမှာ ကျဆုံးခဲ့တဲ့ ပြည်သူ့ကာကွယ်ရေးတပ်ဖွဲ့ဝင်အရေအတွက် ၁၅၀ နီးပါးရှိနေခဲ့ပြီး အဲဒီထဲက ၁၀၈ ယောက်ကတော့ အခုနှစ်ထဲမှာ ကျဆုံးခဲ့ကြတာ ဖြစ်ပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ ဒေသခံပြည်သူ့ကာကွယ်ရေးတပ်ဖွဲ့တွေ၊ တိုင်းရင်းသားလက်နက်ကိုင်တပ်ဖွဲ့တွေနဲ့ အကြမ်းဖက် စစ်ကောင်စီတပ်တွေကြား တိုက်ပွဲတွေလည်း ပြင်းထန်နေပါတယ်။

အမျိုးသားညီညွတ်ရေးအစိုးရ (NUG) က ထုတ်ပြန်ချက်မှာတော့ မြန်မာနိုင်ငံတဝန်း ပြည်သူ့ခုခံတော်လှန်စစ် အရှိန်မြှင့်နေပြီး ဇူလိုင် ၇ ရက်ကနေ ဩဂုတ် ၆ ရက်အထိ  တလတာကာလအတွင်း အကြမ်းဖက် စစ်ကောင်စီဘက်က ၂,၁၅၁ ယောက် သေဆုံးခဲ့တယ်လို့ ဆိုပါတယ်။

နိုင်ငံတဝန်း တိုက်ပွဲဖြစ်ပွားမှုအနေနဲ့ ကရင်ပြည်နယ်မှာ ၂၁၉ ကြိမ်၊ စစ်ကိုင်းတိုင်းမှာ ၂၀၂ ကြိမ်နဲ့ အများဆုံးဖြစ်ပွားခဲ့ပြီး ရန်ကုန်တိုင်းကတော့ ဗုံးပေါက်ကွဲမှု ၇၄ ကြိမ်နဲ့ အများဆုံးဖြစ်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

မြန်မာနိုင်ငံတဝန်းမှာတော့ ပဋိပက္ခနဲ့ တိုက်ပွဲတွေကြောင့် အမျိုးသမီးနဲ့ ကလေးငယ်တွေ အပါအဝင် နေရပ်စွန့်ခွာ ထွက်ပြေးတိမ်းရှောင်ရသူ ဦးရေဟာ ၁ ဒသမ ၂ သန်းကျော် ရှိလာခဲ့ပြီဖြစ်ကာ ပြီးခဲ့တဲ့ ဇူလိုင်လအတွင်းမှာတော့ ပြည်တွင်းနေရပ်စွန့်ခွာသူဦးရေ အများဆုံး စံချိန်တင်ခဲ့တယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ထားပါတယ်။

အဲဒီထဲမှာတော့ ပြီးခဲ့တဲ့ ၂၀၂၁ ခုနှစ် အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့ မလုံခြုံမှုတွေကြောင့် ပြည်တွင်းနေရပ်စွန့်ခွာသူ ၈၆၆, ၀၀၀ ယောက်နဲ့ အဲဒီမတိုင်မီ ပဋိပက္ခတွေကြောင့် ပြည်တွင်းနေရပ် စွန့်ခွာသူ ၃၄၆,၀၀၀ ယောက်ပါဝင်တယ်လို့ ဆိုပါတယ်။ DVB

စစ်ကောင်စီတွင် ဒေါ်လာမရှိတော့၍ စီးပွား ရေးသမားများထံမှ ဒေါ်လာ ခြိမ်း ခြောက်တောင်း၊ မပေးလျှင် အရေးယူမည်ဟု မင်းအောင်လှိုင် အမိန့်ထုတ် ညွှန်ကြား

မင်းအောင်လှိုင်၏ အမိန့်အရ ပြည်တွင်းရှိ ပို့ကုန်လုပ်ငန်းရှင်များအနေဖြင့် စစ်ကောင်စီကို ဒေါ်လာများ ပေးကြရန်နှင့် အလုပ်ပြန်လုပ်ကြရန်၊ ပူးပေါင်းဆောင် ရွက်မှုမရှိလျှင် ဖမ်းဆီးအရေးယူမည်ဖြစ်ကြောင်း စစ်ကောင်စီခန့် စီးပွား ရေးနှင့်ကူးသန်းရောင်းဝယ်ရေး ဒုတိယဝန်ကြီး ညွန့်အောင်က လုပ်ငန်းရှင်များကို တရား ဝင် ခေါ်ယူ ပြောဆို ခြိမ်းခြောက်သည်။

ဩဂုတ်လ ၁၅ ရက်နေ့ ရန်ကုန်မြို့ရှိ UMFCCI အဆောက်အအုံတွင် စီးပွား/ကူး သန်းဒုဝန်ကြီး ညွန့်အောင်က စီးပွားရေး လုပ်ငန်းရှင်အားလုံးကို ခေါ်ယူခြိမ်း ခြောက် ခြင်း ဖြစ်ပြီး အဆိုပါ ခေါ်ယူ သတိပေးပြောဆိုပွဲတွင် ဗဟိုဘဏ်နှင့် စစ်ကောင်စီမှ ဗိုလ်ချုပ်များပါတက်ရောက်ခဲ့ကြသည်။

လက်ရှိစစ်ကောင်စီတွင် ပို့ကုန်ရငွေ ဒေါ်လာ အဝင်မရှိကြောင်း၊ လုပ်ငန်းရှင်များ အသင်းအဖွဲ့များအနေဖြင့် ပို့ကုန်ရငွေ ဒေါ်လာကို ပြည်တွင်းသို့ ယူလာရန် လိုအပ်ကြောင်း၊ လက်ရှိတွင်ဒေါ်လာ အဝင်မရှိ၍ လုပ်ငန်းများ အလွန် ခက်ခဲနေ ကြောင်း၊ ပို့ကုန် ရငွေ ဒေါ်လာ ရရှိရေး အလွန်အရေးကြီးနေပြီး အကြိမ် ကြိမ် သတိပေးထားပြီးဖြစ်၍ စစ်ကောင်စီနှင့်မပူးပေါင်းလျှင် အရေးယူ မည်ဖြစ်ကြောင်း ၎င်းက ခြိမ်းခြောက်သည်။

“ကျနော်တို့အနေနဲ့ လမ်းညွှန်ချက်အရ ပို့ကုန်ရငွေက မဝင်လို့မရပါဘူး။ ပြန်ဝင်ရမှာဖြစ်ပါတယ်။ နိုင်ငံတော်ပိုင်းအနေနဲ့ လုပ်ပေးသင့် လုပ်ပေးထိုက်တာတွေ အကုန်လုံး လုပ်ပေးပြီးဖြစ်ပါတယ်။ လုပ်ပေးထိုက် လုပ်ပေးသင့်တာတွေ လုပ်ပေးတဲ့အပြင်မှာကို ကျနော်တို့ ခုနက ပြောသလိုအတ္တ ကိုယ်ကျိုးစီးပွားကို ရှေ့တန်းတင်မယ်ဆိုရင် ပြဿနာတွေက နောက်ပိုင်းတော်တော်ရှင်းရခက်ပါတယ်။ အဲဒီတော့ ပို့ကုန်ရငွေ မဝင်ဘဲနဲ့ ကျနော်တို့အနေနဲ့ အလုပ်တွေ ဆက်လုပ်ဖို့က အခက်အခဲရှိပါတယ်။ ပို့ကုန်ရငွေ ရနေမယ်။ ပုံမှန်လည်း တင်ပို့မယ်၊ ပုံမှန်လည်း တင်သွင်းနေမယ်။ ဒီလို One Circle လည်သွားဖို့လည်း ကျနော်တို့အနေနဲ့ အားလုံး ပူးပေါင်းဆောင်ရွက်ရမှာဖြစ်ပါတယ်။ ဒါကြောင့်မို့လို့ အစည်း အဝေးတွေ အကြိမ်ကြိမ်ခေါ်တယ်။ သတင်းစာထဲမှာ အကြိမ်ကြိမ်ကြေညာတယ်။ ပြီးရင် Warning တွေ ပို့ကုန်သွင်းကုန် တွေ ပိတ်တယ်။ ပို့ကုန်ရငွေနဲ့ပတ်သက်ပြီးတော့ ပို့ကုန်ရငွေ ဝင်ဖို့ ကျန်နေတဲ့ ကုမ္ပဏီတွေ၊ သက် ဆိုင်ရာ အသင်းအဖွဲ့တွေအနေနဲ့ အမြန် ဆော်ဩပေးပါ။ တချို့ဟာတွေက ကာလသတ် မှတ်ချက်ကျော်နေပါပြီ။ မလာဘူးဆိုရင်တော့ ကျနော်တို့အနေနဲ့ စိတ်မကောင်းစွာနဲ့ပဲ အရေယူးဆောင်ရွက်သွားမှာဖြစ်ပါတယ်” ဟု စီးပွားရေးနှင့်ကူးသန်းရောင်းဝယ်ရေး ဒုဝန်ကြီး ညွန့်အောင်က ဆိုသည်။

စစ်ကောင်စီအနေဖြင့် စက်သုံးဆီ လုပ်ငန်းရှင်များကို ဒေါ်လာ ရာခိုင်နှုန်းဖြင့်သာ ရောင်းပေးနိုင်၍ ပြင်ပစျေးကွက်မှ ဒေါ်လာ သန်း ၅၀ စက်သုံးဆီလုပ်ငန်းရှင်များ ကိုယ့်အစီအစဉ်ဖြင့် ကိုယ် ဝယ်ယူရသည်ကို ဝန်ခံပါကြောင်း ၎င်းက ဆိုသည်။

“စက်သုံးဆီ မှာလည်း ဘာဖြစ်သွားလဲဆိုတော့ ကျနော်တို့က ရာခိုင်နှုန်းနဲ့ ရောင်း ပေးလိုက်ချိန်မှာ သူ့ဟာသူ Importer က ရှာရမယ့် ဒေါ်လာ သန်း ၅၀ လောက်ဖြစ်သွားတယ်။ အဲဒီအဟကို မူတည်ပြီးတော့ မှ ကျနော်တို့ အဝေးသမားနဲ့ ပေါင်းပြီး (ဒေါ်လာစျေး) ဆွဲတင်သွားတယ်လို့ ကျနော်တို့ သတင်းရထားပါတယ်” ဟု ဒုဝန်ကြီးက ဆိုသည်။

အမေရိကန်တစ်ဒေါ်လာ ၃၀၀၀ ကျော် တက်သွားခြင်းမှာလည်း မဖြစ်သင့်ဟု ပြော ဆိုပြီး အရေးယူမည်ဟုလည်း ၎င်းက ခြိမ်းခြောက်သည်။

စစ်တပ်ကို ဒေါ်လာမပေးလျှင် ဖမ်းဆီးမည်ဟု ဒုဝန်ကြီး ညွန့်အောင်၏ ခြိမ်းခြောက်မှု အပြည့်အစုံ

===========================================

“ဒီအစည်းအဝေးမှာ အားလုံးတက်တက်ကြွကြွနဲ့ စိတ်ပါဝင်စားစွာ ဆွေးနွေးပေးကြတဲ့အတွက် အထူးပဲ ကျေးဇူးတင်ရှိပါတယ်။ကျနော်တို့အနေနဲ့ လမ်းညွှန်ချက်အရ ပို့ကုန်ရငွေက မဝင်လို့မရပါဘူး။ ပြန်ဝင်ရမှာဖြစ်ပါတယ်။ နိုင်ငံတော်ပိုင်းအနေနဲ့ လုပ်ပေးသင့် လုပ်ပေးထိုက်တာတွေ အကုန်လုံး လုပ်ပေးပြီးဖြစ်ပါတယ်။

လုပ်ပေးထိုက် လုပ်ပေးသင့်တာတွေ လုပ်ပေးတဲ့အပြင်မှာကို ကျနော်တို့ ခုနက ပြောသလိုအတ္တ ကိုယ်ကျိုးစီးပွားကို ရှေ့တန်းတင်မယ်ဆိုရင် ပြဿနာတွေက နောက်ပိုင်းတော်တော်ရှင်းရခက်ပါတယ်။ ဒါကြောင့် ရှေ့ပိုင်းမှာ သက် ဆိုင်ရာ ဗဟိုဘဏ် ဒုတိယဥက္ကဋ္ဌကြီးရော ဗိုလ်ချုပ်ရန်နောင်စိုးတို့ရော ဆွေးနွေးသွားပါတယ်။ ဒါတွေက ကျနော်တို့ အပြင်မှာ ပေါ်လစီအရ တစ်ယောက်တစ်ပေါက် ၀ိုင်းပြောနေကြတာ။ ဟိုလိုလုပ်ပါလား။ ဒီလိုလုပ်ပါလားပေါ့။

ဒါပေမယ့် နိုင်ငံတော်ပိုင်းအနေနဲ့ အားလုံးချင့်ချိန်ပြီးတော့ စဉ်းစားပြီး ဆောင်ရွက်ရတာဖြစ်ပါတယ်။ အဲဒီတော့ ပို့ကုန်ရငွေ မဝင်ဘဲနဲ့ ကျနော်တို့အနေနဲ့ အလုပ်တွေ ဆက်လုပ်ဖို့က အခက်အခဲရှိပါတယ်။ ပို့ကုန်ရငွေ ရနေမယ်။ ပုံမှန်လည်း တင်ပို့မယ်၊ ပုံမှန်လည်း တင်သွင်းနေမယ်။ ဒီလို One Circle လည်သွားဖို့လည်း ကျနော်တို့အနေနဲ့ အားလုံး ပူးပေါင်းဆောင်ရွက်ရမှာဖြစ်ပါတယ်။ ဒီကြားထဲမှာ စုန်းပြူးရှိနေမှာဖြစ်ပါတယ်။ စုန်းပြူးတွေနဲ့ပတ်သက်ပြီးတော့ တိတိကျကျနဲ့ လက်ရှိ ပူးပေါင်းပါဝင်ဆောင်ရွက်နေတဲ့ လုပ်ငန်းရှင်တွေရော အသင်းအဖွဲ့တွေရော။

အဓိက အသင်းအဖွဲ့ရဲ့ အားက တော်တော်လေး အရေးကြီးပါတယ်။ အသင်းအဖွဲ့တွေရဲ့ တာဝန်ရှိတဲ့ပုဂ္ဂိုလ်တွေ ကိုယ်တိုင်က Operation မှာ ဝင်ကပြီးတော့ ကျနော်တို့ရဲ့ အဟပေါ့ ပေါ်လစီ အားနည်းချက်တွေ ပေါ်လစီ အဟတွေပေါ်မှာ မူတည်ပြီး ဒီလိုမျိုးဆောင်ရွက်မယ်ဆိုရင် မသင့် တော်ပါဘူး။ ခံယူချက် အတွေးအခေါ်ကမှစပြီး ပြောင်းလဲပြီးတော့ ကျနော်တို့နဲ့ ပူးပေါင်းပေးပါ။ ပူး‌ပေါင်းပြီးတော့မှ ပို့ကုန်ရငွေတွေ မဖြစ်မနေ ဝင်ရောက်ပေးဖို့ အထူးမေတ္တာ ရပ်ခံလိုပါတယ်။ အဲဒီတော့ ဒီဟာတော့ By law အရဆိုရင်တော့ ကျနော်တို့ရှေ့မှာ ဆွေးနွေးသွားသလိုပဲ ဥပဒေအရ အရေးယူလို့ရတယ်။

အချင်းချင်းတွေ ပို့ကုန်ဝင်ငွေ တိုးမြှင့်ရေးအတွက် တိုင်းပြည် ဝင်ငွေရဖို့ကော အခွန် ပြည့်ပြည့်၀၀ ရရှိရေးအတွက် တစ်လှေတည်းစီးပြီး တစ်ခရီးတည်းသွားနေတဲ့အဖွဲ့တွေဖြစ်တဲ့အတွက် လုပ်လည်းမလုပ်လိုပါဘူး။ လုပ်ဖို့လည်း မသင့်တော်ဘူးလို့ ကျနော်မြင်ပါတယ်။ ဒါကြောင့်မို့လို့ အစည်းအဝေးတွေ အကြိမ်ကြိမ်ခေါ်တယ်။

သတင်းစာထဲမှာ အကြိမ်ကြိမ်ကြေညာတယ်။ ပြီးရင် Warning တွေ ပလကတွေ ပိတ်တယ်။ သို့သော်လည်း ခုနက ပြောသလို နာမည်ခံ ပြီးလုပ်သွားတဲ့အဖွဲ့ကတော့ ချက်ချင်း ပို့ကုန်ရငွေ ရအောင် မစွမ်းဆောင်နိုင်ဘဲနဲ့ သူက နဂိုမူလကတည်းက ကုမ္ပဏီကို လွယ်လွယ်ကူကူ ဆောင် ရွက်ပြီးတော့ နာမည်ခံပြီးတော့ ဆောင်ရွက်ပေးခဲ့တာ ဖြစ်တဲ့အတွက် ကြောင့် နာမည်ခံက ရပြီးသွားပြီ။ ဒီအတွက်ကြောင့် ပို့ကုန်ရငွေ ဝင်ခြင်း မဝင်ခြင်း စိတ်မဝင်စားဘူး။ အဲဒီလိုလူမျိုးကျတော့လည်း စိတ်မကောင်းစွာနဲ့ အရေးယူဆောင်ရွက်သွားရမှာဖြစ်ကြောင်း ပြောလိုပါတယ်။

နောက်တစ်ချက်ကတော့ ခုနက ၀ိုင်းဝန်းဆွေးနွေးတဲ့အထဲမှာ ငွေစာရင်း ကိစ္စနဲပတ်သက်ပြီးတော့ ငွေစျေးကတော့ ဗဟိုဘဏ် ဒုတိယဥက္ကဋ္ဌ ပြောတဲ့ Speculate လုပ်တာကြီးက ပေါ်လွင်ပါတယ်။ အဲဒီတော့ ကျန်တဲ့ရက်လုပ်ရင်တောင် မပြောလိုပါဘူး။ မနေ့က စနေ၊ တနင်္ဂနွေမှာကို ဒေါ်လာကို ၃၀၀၀ ကျော်ကြီး ဆွဲတင်သွားတာကတော့ လူကြားလို့လည်း မကောင်းပါဘူး။

ဒါတွေက ဖော်ထုတ်ပြီးတော့ ပြင်းပြင်းထန်ထန် အရေးယူရမှာပါ။ အဲဒီတော့ ဘယ်လောက်အရောင်းအဝယ် ဖြစ်လို့ ဖြစ်မှန်းလဲမသိ။ အချင်း ချင်း လေနဲ့ပေါ့နော်။ ပြီးတော့ အွန်လိုင်းမှာ တင်လိုက်တယ်။ ဒီနေ့ ဘယ်လောက်ဖြစ်ပါပြီပေါ့။ အမှန်တော့ တစ်ဒေါ်လာ အရောင်းအဝယ်ဖြစ်တာလား၊ ဒေါ်လာ ၁၀၀ အရောင်းအဝယ်ဖြစ်တာလား။ ဒေါ်လာ တစ်သောင်း အရောင်းအဝယ်ဖြစ်တာလား ဘာမှ မရှိပါဘူး အချင်းချင်းကိုပဲ။

သို့သော်လည်း ကျနော်တို့ရဲ့ Sector ကြီးတစ်ခုလုံးက Speculate လုပ်လိုက်တဲ့ ပါးစပ်က ထွက်တဲ့ လေပတ်ကားကို လိုက်နာ ဆောင်ရွက်သွားတာကိုတော့ ကျနော်တို့ အံ့ဩဖွယ်ရာတွေ့ရပါတယ်။ အဲဒါကြောင့် မဖြစ်သင့် မဖြစ်တာ ဖြစ်တဲ့ လေပတ်ကားကိုတော့ ဖော်ထုတ်ပြီးတော့ အ ရေးယူဆောင်ရွက်သွားမှာဖြစ်ပါတယ်။

ဘဏ်တွေကိုလည်း စောင့်ကြည့်ပြီးတော့ သွားမှာဖြစ်ပါတယ်။ ဘာဖြစ်လို့လဲဆိုတော့ ယခင် ရှေ့မှာ ကျနော်တို့ သာဓက တွေမှာ တချို့အရောင်း အဝယ်တွေမှာ ဘဏ်တွေကိုယ်တိုင်ပါနေတာလည်း တွေ့ရှိရပါတယ်။ ကျနော်တို့ဆီကို သတင်းတွေပေးတာရှိပါတယ်။ ဘဏ်တွေက ဘဏ်ကာ ပိုင်ရှင်တွေအနေနဲ့ မသိပေမယ့် ဘဏ်မန်နေဂျာတွေနဲ့ သူရဲ့ အကောင့်ထဲမှာရှိတဲ့ Exporter အကောင့်နဲ့ Importer ရဲ့ လိုအပ်ချက်တွေကို ညှိနှိုင်းပြီးတော့ အပြင်မှာ Appointment Banking လုပ်ပြီး ဆောင်ရွက်သွားတာလေးတွေ တင်ပြတာလည်းရှိပါတယ်။

ဒါမျိုးတွေဆိုရင် တော့ မတက်သင့်ဘဲ တက်သွားတာတွေရှိပါတယ်။ ပြီးခဲ့တဲ့ စက်သုံးဆီ မှာလည်း ဘာဖြစ်သွားလဲဆိုတော့ ကျနော်တို့က ရာ ခိုင်နှုန်းနဲ့ ရောင်းပေးလိုက်ချိန်မှာ သူ့ဟာသူ Importer က ရှာရမယ့် ဒေါ်လာ သန်း ၅၀ လောက်ဖြစ်သွားတယ်။ အဲဒီအဟကို မူတည်ပြီးတော့ မှ ကျနော်တို့ အဝေးသမားနဲ့ ပေါင်းပြီး ဆွဲတင်သွားတယ်လို့ ကျနော်တို့ သတင်းရထားပါတယ်။ ဒီအတွက်ကြောင့် ဘဏ်တွေရော အိတ်စပို့တာရော အင်ပို့တာလည်း ဘယ်သူ့ဆီက ဝယ်လဲဆိုတာ စစ်လိုက်ရင် ပေါ်ပါတယ်။ ဘယ်သူရောင်းတယ်ဆိုတာလည်းပေါ်ပါတယ်။ ဘယ်သူမရောင်း ဘူးဆိုတာလည်း ပေါ်ပါတယ်။ ရောင်းစယ်တာကတော့ စစ်ရင် ပေါ်ပါတယ်။

အခုဟာက စီးပွားရေး လောကကြီးကို ကမောက်က ဖြစ်အောင် လုပ်တာ။ ထုတ်လိုက်တဲ့ ပေါ်လစီကို ပြောင်းပြန်ဖြစ်အောင်လုပ်တဲ့ ညှိနှိုင်းပြီးတော့ လုပ်တာဖြစ်လို့ ဒါကို လက်မခံပါဘူး။ ဒီဟာနဲ့ပတ်သက်ပြီးတော့ ဆက်လက်ပြီးတော့ ရွှေနဲ့ငွေစျေး ကြီးကြပ်မှုကော်မတီ စောင့်ကြပ်ရေး ကော်မတီရှိပါတယ်။ ဒီအပေါ်မှာ ဆွေးနွေးပြီးတော့ ဘယ်လိုအရေးယူမလဲဆိုတာကို ဆက်လက် ဖော်ထုတ်သွားပါ့မယ်။

ပို့ကုန်ရငွေနဲ့ပတ်သက်ပြီးတော့ ပို့ကုန်ရငွေ ဝင်ဖို့ ကျန်နေတဲ့ ကုမ္ပဏီတွေ၊ သက်ဆိုင်ရာ အသင်းအဖွဲ့တွေအနေနဲ့ ကျနော် အမြန် ဆော်ဩပေးပါ။ တချို့ဟာတွေက ကာလသတ်မှတ်ချက်ကျော်နေပါပြီ။ မလာဘူးဆိုရင်တော့ ကျနော်တို့အနေနဲ့ စိတ်မကောင်းစွာနဲ့ပဲ အရေးယူဆောင်ရွက်သွားမှာဖြစ်ပါတယ်။” khit thit

ပုလဲမြို့နယ်တွင် စစ်ကောင်စီတပ်နှင့် PDF တိုက်ပွဲဖြစ်၊ ရွာသားများ ထွက်ပြေး

စစ်ကိုင်းတိုင်း ယင်းမာပင်မြို့နယ်၊ မင်းတိုင်ပင်ရွာကနေ ပုလဲမြို့နယ်ဘက်ကို စစ်ကြောင်းထိုးလာတဲ့ စစ်ကောင်စီတပ်တွေနဲ့ ဒေသခံ PDF အဖွဲ့ပေါင်းစုံတို့  ဩဂုတ် ၁၅ ရက် မနက် ၁၁ နာရီလောက်က  ကမ္ဘားရပ်ကျေးရွာမှာ တိုက်ပွဲဖြစ်ပွားခဲ့ပါတယ်။ 

စစ်ကောင်စီတပ်က အင်အား ၂၀၀ နီးပါးလောက်နဲ့  ပုလဲမြို့နယ်အတွင်းကို စစ်ကြောင်းထိုးလာလို့ ရွာသားတွေ ဘေးလွတ်ရာ ထွက်ပြေးနေကြရတယ်လို့ ဒေသခံတွေက ပြောပါတယ်။

ပုလဲဒေသခံရွာသားတစ်ဦးက “ကျနော်တို့ ကမ္ဘားရပ်ရွာက ဒေသခံတွေကတော့ သူတို့ မင်းတိုင်ပင်ရွာကနေ ထွက်လာပြီ သတင်းကြားက တည်း က ကျနော်တို့ရွာနဲ့ တခြား ထိန္နဲး၊ ပုထိုးသာရွာ၊ ရွာသစ်၊ ဇီးဖြူကုန်း၊ အေးကုန်း၊ နုံးတန်းစတဲ့ အနီးပတ်ဝန်းကျင် ၁၀ ရွာကျော်က ဒေသခံတွေ အကုန်ထွက်ပြေးနေရတယ်”လို့ ‌ ပြောပါတယ်။

ကမ္ဘားရပ်ရွာဟာ ‌မင်းတိုင်ပင်ရွာနဲ့ ကတ္တရာလမ်းအတိုင်းသွားမယ်ဆိုရင်  လေးမိုင်လောက်သာဝေးပြီး  တောလမ်းအတိုင်းဆိုရင် လေး မိုင်မရှိဘူးလို့ ဒေသခံတွေက ပြောပါတယ်။

“သူတို့ မင်းတိုင်ပင်ရွာကို ဩဂုတ်လ ၁၁ ရက်နေ့က လေယာဉ်ခြောက်စီးနဲ့ လာချတယ်။ အဲဒီနေ့ တိုက်ပွဲတစ်ကြိမ်ဖြစ်တယ်။ နောက် ၁၂ ရက်နေ့ တစ်ကြိမ်ဖြစ်တယ်။ နောက် ၁၄ ရက်နေ့မှာ မင်းတိုင်ပင်ကနေ ကမ္ဘားရပ်ရွာဘက်ကို စခတွေ ထွက်လာတယ်။ အဲလိုထွက်လာတဲ့အခါ ကျနော်တို့ ပုလဲ၊ ယင်းမာပင်က ပြည်သူ့ကာကွယ်ရေးအဖွဲ့ပေါင်းစုံနဲ့ ကိုနဂါးအဖွဲ့၊ PRAအဖွဲ့တွေနဲ့  စခတပ်တွေနဲ့ ထိပ်တိုက်တိုက်ပွဲ နှစ်ကြိမ်ဖြစ်တယ်။ စခတွေအဲနေမှာ အကျဆုံးများတယ်။ သူတို့အကျဆုံးများလို့ ကမ္ဘားရပ်ရွာကို မီးရှို့တယ်။”

ဩဂုတ် ၁၅ ရက်မှာလည်း ကမ္ဘားရပ်ရွာအနီးမှာ တိုက်ပွဲထပ်ဖြစ်ပွားပြီး မွန်းလွဲ ၂ နာရီလောက်မှာတော့ ပျူစောထီးနဲ့ စစ်ကောင်စီတပ်တွေ တပ်ချထားတဲ့ အင်မထီးကျေးရွာကို  ပစ်ခတ်တိုက်ခိုက်ခဲ့တယ်လို့  PDF တပ်ပေါင်းစုမဟာမိတ်အဖွဲ့တွေထံက သိရပါတယ်။

စစ်ကောင်စီတပ်ကို ယင်းမာပင်မြို့နယ် ပြည်သူကာကွယ်ရေး အဖွဲတပ်ရင်းပေါင်စုံ၊ ပုလဲပြည်သူကာကွယ်ရေးတပ်ရင်းပေါင်းစုံနဲ့ PRAအဖွဲ့၊ ဗိုလ်နဂါးဦးဆောင်တဲ့ မြန်မာတော်ဝင်နဂါးတပ်ဖွဲ့တို့ ပူးပေါင်းတိုက်ခိုက်နေတာဖြစ်ပါတယ်။

မဟာမိတ်တပ်ပေါင်းစု ခေါင်းဆောင်ဆရာပေက “ပစ်တာကတော့ ကျနော်တို့မြိုင်၊ ယင်းမာပင် ၊ ပုလဲ ၊ဆားလင်းကြီး လေးမြို့နယ်မဟာမိတ် တပ်ပေါင်းစုအဖွဲ့ သွားရောက်ပစ်ခတ်ခဲ့တာဗျ။ အထိအခိုက်ကတော့ ကျနော်တို့ ဘက်ကမရှိခဲ့ဘူး။ ရွာအပြင်ကနေ ပစ်ရတာဆိုတော့ သူတို့ဘက်အ ကျဆုံးအတိကျတော့ မပြောနိုင်သေးဘူး”လို့ ‌ပြောပါတယ်။

ဩဂုတ် ၁၁ ရက်မှ ၁၅ ရက်အထိတိုက်ပွဲတွေအတွင်း စစ်ကောင်စီတပ်သား ၃၀ ကျော်သေပြီး ထိခိုက်ဒဏ်ရာရ သူတွေလည်းရှိခဲ့သလို PDF တွေဘက်ကလည်း တယောက်ကျဆုံး နှစ်ယောက် ဒဏ်ရာရထားတယ်လို့ ပုလဲမြို့နယ်တပ်ရင်း ၂ ရဲဘော်တယောက်က ပြောပါတယ်။

ပုလဲမြို့နယ်အတွင်း တိုက်ပွဲတွေမှာ နှစ်ဖက်တပ်ဖွဲ့ဝင်တွေ ကျဆုံးအထိအခိုက်စာရင်း အတိအကျကိုတော့ သီးခြားအတည်ပြုနိုင်ခြင်း မရှိသေးပါဘူး။

စစ်ကောင်စီပြန်ကြားရေးကတော့ စစ်ကောင်စီတပ်ဖွဲ့ဝင်တွေ သေဆုံးဒဏ်ရာရတဲ့ အခြေအနေအပါအဝင် စစ်ရေးသတင်းတွေကို  အများပြည်သူသိအောင် ထုတ်ပြန်လေ့မရှိဘဲ သတင်း အမှောင်ချထားပါတယ်။ DVB

ဒေါ်အောင်ဆန်းစုကြည်ကို ထောင်ဒဏ်များ ထပ်မံ ချမှတ်မှု အာဆီယံဘုံသဘော တူညီချက် ၅ ရပ်ကို စစ်ကောင် စီက ဂရုမစိုက်ကြောင်း ထပ်မံပြသ၊ NUG ၊ NUCC နှင့် ဆက်ဆံကြရန် မလေးရှားနိုင်ငံခြားရေးဝန်ကြီး ထပ်မံ တိုက် တွန်း

အကြမ်းဖက်စစ်ကောင်စီက ဒေါ်အောင်ဆန်းစုကြည်ကို ယမန်နေ့တွင် ထောင် ဒဏ်များ ထပ်မံ ချမှတ်ခြင်းသည် အာဆီယံဘုံသဘောတူညီချက် ၅ ရပ်ကို စစ်ကောင်စီက ဂရုမစိုက်ကြောင်း ထပ်မံပြသလိုက်ခြင်းဖြစ်ပြီး NUG ၊ NUCC နှင့် ထိတွေ့ ဆက်ဆံကြရန် မလေးရှားနိုင်ငံ ခြားရေးဝန်ကြီး Saifuddin Abdullah ထပ်မံ တိုက်တွန်းပြောဆိုသည်။

ဒေါ်အောင်ဆန်းစုကြည်အား ထပ်လောင်းစီရင်ချက်ချခြင်းနှင့် ဒီမိုကရေစီအရေး တက်ကြွလှုပ်ရှားသူလေးဦးအား မကြာသေးမီက ကွပ်မျက်လိုက်ခြင်းသည် မြန် မာနိုင်ငံတွင် အမျိုးသားပြန်လည်သင့်မြတ်ရေး အတွက် ခိုင်မာပြီး အားလုံးပါဝင်နိုင်သော တွေ့ဆုံဆွေးနွေးပွဲများ ပြုလုပ်ရန်နှင့် အာဆီယံငါးရပ် သဘောတူညီချက်ကို ဖြည့်ဆည်းပေးရန် အာဆီယံခေါင်းဆောင်များ၏ တောင်းဆိုမှုကို စစ်အစိုးရက အကြိမ်ကြိမ် လျစ်လျူရှုမှုအဖြစ် သက်သေ ပြနေကြောင်း မလေးရှားနိုင်ငံခြားရေးဝန်ကြီး က ဆိုသည်။

မလေးရှားနိုင်ငံသည် မြန်မာပြည်သူများနှင့်အတူ ရပ်တည်နေပြီး ဒေါ်အောင်ဆန်းစုကြည်အား အမြန်ဆုံး လွှတ်ပေးရန် တိုင်းရင်းသား စည်းလုံးညီညွတ်ရေး အစိုးရ (NUG) နှင့် တိုင်းရင်းသား စည်းလုံးညီညွတ်ရေး အတိုင်ပင်ခံကောင်စီ (NUCC) အပါအဝင် သက်ဆိုင်သူအားလုံးနှင့် ငြိမ်း ချမ်းစွာ ပါဝင်ဆွေးနွေးရေး လုပ်ငန်းစဉ် စတင်ရန် တောင်းဆိုကြောင်း ၎င်းက တရားဝင် သတင်းထုတ်ပြန်ထားသည်။khit thit

အင်းတော်မြို့၌ စက်သုံးဆီရှားပါးပြတ်လပ် ဈေးတက်

စစ်ကိုင်းတိုင်း၊ အင်းတော်မြို့မှာ စက်သုံးလောင်စာဆီ ပြတ်လပ်နေပြီး ဝယ်ရခက်ခဲနေကာ ဈေးနှုန်းတွေလည်း မြင့်တက်နေတယ်လို့  မြို့ခံတွေထံက သိရပါတယ်။

ပန့်နဲ့ ရောင်းတဲ့ DENKO ဆီဆိုင်အပါအဝင် စက်သုံးဆီ ရောင်းတဲ့ဆိုင်တွေက လောင်စာဆီရောင်းချပေးတာမရှိတော့လို့ အပြင်ဆိုင်ကသာရောင်းချပေးနေတာဖြစ်ပြီး ဓာတ်ဆီ တစ်ဂါလန်ကို ကျပ်  ၁၇,၀၀၀ ပေးပြီး ဝယ်ယူရတယ်လို့ ‌ဒေသခံတဦးက ပြောပါတယ်။

“ကျနော် Denko အပါအဝင် ပန့်ဆိုင်ကြီးသုံးဆိုင်မေးတာ တဆိုင်မှ ဆီမရခဲ့ဘူး”လို့ အင်းတော်မြို့ခံတစ်ဦးက ပြောပါတယ်။

တချို့ဆိုင်တွေကတော့ ပုံးနဲ့ ဂါလန်ချင့်ရောင်းချတာ မရှိတော့ဘဲ ကား/ဆိုင်ကယ်ထဲကိုသာ ဆီထည့်ရောင်းချပေးတော့တယ်လို့လည်း မြို့ခံတစ်ဦးကပြောပါတယ်။

အင်းတော်မြို့ခံအမျိုးသားတစ်ဦးက “ကျနော် သွားရင်းလာရင်း ဆီပြတ်ခါနီးမို့ ဆီသွားထည့်တာ ပန့်ဆိုင်ကြီး သုံးဆိုင်လုံးက ဆီတွေပြတ်နေလို့ ပုံးနဲ့ရောင်းတဲ့ဆိုင်ကပဲ ထည့်ခဲ့ရတယ် တချို့ရတဲ့ ဆိုင်တွေကျ ပုံးတွေ ဂါလန်တွေနဲ့မရောင်းတော့ဘူးဗျ ” လို့ ပြောပါတယ်။

လောင်စာဆီဈေးနှုန်းမြင့်တက် ပြတ်လပ်နေတာကြောင့် အခြေခံစားသောက်ကုန်တွေလည်း သယ်ယူစားရိတ်တန်ဆာခ တက်လာလို့ ကုန် ဈေး နှုန်း ကြီးမြင့်လာတယ်လို့ အင်းတော်မြို့ခံ ‌ဈေးသည်တွေထံက သိရပါတယ်။

ရန်ကုန်နဲ့ မန္တလေးအပါအဝင် မြန်မာနိုင်ငံအနှံ့ တခြားမြို့တွေမှာလည်း လောင်စာဆီ ရှားပါးပြတ်လပ် ဈေးနှုန်းကြီးမြင့်မှုနဲ့ ပြည်သူတွေ ကြုံတွေ့ ရင်ဆိုင်နေကြရပါတယ်။ DVB

တလအတွင်း စစ်ကောင်စီတပ်ဖွဲ့ဝင် ၂၁၅၀ ကျော်သေ၊ ထိခိုက်ဒဏ်ရာရသူ ၆၈၃ ဦးရှိဟု NUG ပြော

မြန်မာနိုင်ငံတဝန်း ပြည်သူ့ခုခံတော်လှန်စစ် အရှိန်မြှင့်နေပြီး ဇူလိုင် ၇ ရက်ကနေ ဩဂုတ် ၆ ရက်အထိ  တစ်လတာကာလအတွင်း အကြမ်း ဖက်စစ်ကောင်စီဘက်က ၂,၁၅၁ ယောက် သေဆုံးခဲ့ တယ်လို့ အမျိုးသား ညီညွတ်ရေး အစိုးရ (NUG) က ထုတ်ပြန်ပါတယ်။

ခုထုတ်ပြန်ထားတဲ့ အချက်အလက်ဟာ မြေပြင်အခြေအနေမှာ ပိုများနိုင်ပြီး ထိခိုက်ဒဏ်ရာရရှိတဲ့သူ အရေအတွက်ကတော့ ၆၈၃ ယောက်ထိ ရှိခဲ့တယ်လို့ ဆိုပါတယ်။

နိုင်ငံတဝန်း တိုက်ပွဲဖြစ်ပွားမှုအနေနဲ့ ကရင်ပြည်နယ်မှာ ၂၁၉ ကြိမ်၊ စစ်ကိုင်းတိုင်းမှာ ၂၀၂ ကြိမ်နဲ့ အများဆုံးဖြစ်ပွားခဲ့ပြီး ရန်ကုန်တိုင်းကတော့ ဗုံးပေါက်ကွဲမှု ၇၄ ကြိမ်နဲ့ အများဆုံးဖြစ်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို မြန်မာပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ် ပိုင်ခွင့်အရ ပြည်သူ့ခုခံစစ်ကို မလွှဲသာမရှောင်သာ ဆင်နွှဲနေကြတာပါ။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည် ဆောက်ရေးအတွက် ငြိမ်းချမ်းစွာ ဆန္ဒပြတဲ့ လူထုသပိတ်တိုက်ပွဲတွေလည်း တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

ဒါ့အပြင် NUG အစိုးရက ပြည်သူ့ရင်ခွင် ခိုလှုံရေးအစီအစဉ်ကို ကြိုးပမ်းဆောင်ရွက်နေပြီး အရေးပေါ်ကြေညာချက်ထုတ်ပြန်ပြီးနောက်ပိုင်း ပြည်သူဘက် ရဲရဲဝံ့ဝံ့ ရပ်တည်လာကြတဲ့ စစ်သား CDM နဲ့ ရဲ CDM တွေ လည်း နေ့စဉ်များပြားလာနေတယ်လို့ ဆိုပါတယ်။

မြန်မာပြည်အနှံ့ တိုက်ပွဲတွေမှာ အကြမ်းဖက်တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ဒါ့အပြင် NUG အစိုးရ တည်ထောင်ပြီး ၁ နှစ်တာကာလအတွင်းမှာ ပြည်သူ့ကာကွယ်ရေးတပ်မတော် တပ်ရင်း၊ တပ်ဖွဲ့ပေါင်း ၂၅၇ ရင်းကို ဖွဲ့ စည်းတည်ထောင်နိုင်ခဲ့ပြီးဖြစ်ကာ မြို့နယ်အခြေပြု ပြည်သူ့ကာ ကွယ် ရေးအဖွဲ့ (ပကဖ) တွေကို လည်း မြို့နယ်ပေါင်း ၂၅၀ မှာ စနစ်တကျ ဖွဲ့ စည်းနိုင်ခဲ့ပြီးဖြစ်တယ်လို့ ဆိုပါတယ်။

ဒါ့အပြင် ဒေသအခြေစိုက် ကာကွယ်ရေးအဖွဲ့တွေ၊ မြို့ပြပြောက်ကျားအဖွဲ့တွေ ၄၀၀ ကျော်နဲ့လည်း ဟန်ချက်ညီစွာ တိုက်ပွဲဖော်ဆောင်ဖို့ ချိတ် ဆက်နိုင်ခဲ့ပြီးဖြစ်တယ်လို့ NUG က ထုတ်ပြန်ထားပါတယ်။ DVB

ကုလအထူးကိုယ်စားလှယ် နိုလင်းဟေဇာ မြန် မာနိုင်ငံရောက်မည်

မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ်ဖြစ်သူ နိုလင်းဟေဇာ (Noeleen Heyzer) သည် မြန်မာနိုင်ငံသို့ ဒီနေ့ (ဩဂုတ် ၁၆) ရောက်ရှိမည်ဖြစ်ကြောင်း သိရသည်။

အကြမ်းဖက်မှုအားလုံး ချက်ချင်းရပ်တန့်ရန်နှင့် လူသားချင်းစာနာ ထောက်ထားမှု အကူအညီများ ခွင့်ပြုရန် ကုလအထူးလုံခြုံရေးကောင်စီက နောက်ဆုံးတောင်းဆိုပြီးနောက် နိုလင်းဟေဇာခရီးစဉ် ပေါ်ပေါက်လာခြင်းဖြစ်သည်ဟု CNA သတင်းဌာနက ရေးသားသည်။

“ဆုတ်ယုတ်လာနေတဲ့ အခြေအနေနဲ့ သူ့ရဲ့လုပ်ပိုင်ခွင့်အရ အခြားကိစ္စတွေလည်း ဆွေးနွေးပါလိမ့်မယ်” ဟု ကုလပြောရေးဆိုခွင့်ရှိသူ Stephane Dujarric က ပြောသည်။

သို့သော် ကုလအထူးကိုယ်စားလှယ်အနေဖြင့် စစ်ခေါင်းဆောင်များ အပါအဝင် ဖမ်းဆီးထောင်ချခံထား ရသည့် ဒေါ်အောင်ဆန်းစုကြည်နှင့် တွေ့ဆုံမှု ရှိမရှိ အသေးစိတ်ထုတ်ဖော်ပြောဆိုခြင်း မရှိပေ။ အမျိုး သားဒီမိုကရေစီအဖွဲ့ချုပ် (NLD) ပါတီ ဥက္ကဋ္ဌကို စစ်ကောင်စီက ယမန်နေ့တွင် ထောင်ဒဏ် ၆ နှစ်ထပ်ချ ခဲ့သည်။

စင်ကာပူနိုင်ငံသူ နိုလင်းဟေဇာသည် ကုလသမဂ္ဂ၏ အာရှပစိဖိတ်ဒေသဆိုင်ရာ စီးပွားရေးနှင့် လူမှုရေး ကော်မရှင် (UNESCAP) တာဝန်ထမ်းဆောင်စဉ် အာဏာရှင်ဟောင်း ဦးသန်းရွှေလက်ထက်တွင် နေပြည် တော်သို့ လာရောက်ဖူးသည်။ ၎င်းသည် ပြီးခဲ့သည့်နှစ် အောက်တိုဘာလတွင် မြန်မာနိုင်ငံဆိုင်ရာ ကုလ အထူးကိုယ်စားလှယ်အဖြစ် ခန့်အပ်ခံရသည်။ myanmar now

စက်သုံးဆီ စျေးနှုန်းများ ထပ်မံမြင့်တက်သွားပြီး မန္တလေး အပါအဝင် နယ်မြို့ကြီးများတွင် ဆီလိုသလောက်မရဘဲ ပြည်သူများ ကြိတ် ကြိတ်တိုး တန်းစီနေရ၊ တချို့ဆီဆိုင်များ လုံး၀ မဖွင့်တော့ဘဲ ပိတ်ထား

စက်သုံးဆီစျေးနှုန်းများ ယနေ့ ဩဂုတ်လ ၁၆ ရက်နေ့တွင် ထပ်မံမြင့်တက်သွားပြီး မန္တလေး အပါအဝင် နယ်မြို့ကြီးများတွင် စက်သုံးဆီ လိုသလောက်မရဘဲ ပြည်သူများ တန်းစီနေရဆဲဖြစ်ကြောင်း၊ တချို့ဆီဆိုင်များ လုံး၀ ဖွင့်လှစ် ခြင်း မရှိတော့ဘဲ ပိတ်ထားကြောင်း ပြည်သူများက ရန်ကုန်ခေတ်သစ်သတင်းဌာနသို့ ပြောဆိုသည်။

စက်သုံးဆီ စျေးနှုန်းများသည် ယမန်နေ့ ထက် ပို၍ မြင့်တက်သွားပြီး ဓာတ်ဆီ 92 တစ်လီတာလျှင် ၂၃၆၅ မှ ၂၉၇၅ ကျပ်အထိ နေရာဒေသကို လိုက်စျေးနှုန်းများ တိုးမြှင့်သွားခြင်းဖြစ်သည်။ ဓာတ်ဆီ 95 တစ်လီတာလျှင် ၂၄၄၅ မှ ၃၀၄၅ ကျပ်အထိ စျေးနှုန်းများ မြင့်တက်လျက်ရှိကြောင်း သိရှိရသည်။

ယမန်နေ့ စက်သုံးဆီစျေးနှုန်းသည် ဓာတ်ဆီ 92 တစ်လီတာ ၂၃၂၀ မှ ၂၈၅၅ အထိလည်းကောင်း၊ ဓာတ်ဆီ 95 တစ်လီတာ ၂၃၉၀ မှ ၂၉၂၅ အထိလည်း ကောင်း စျေးနှုန်းသတ်မှတ်ခဲ့ပြီး ယနေ့တွင် ဓာတ်ဆီနှင့် ဒီဇယ် စက်သုံးဆီစျေးများကို ထပ်မံ မြင့်တက်သွားခြင်းဖြစ်သည်။

လက်ရှိ မန္တလေးတွင် BOC ဆီဆိုင်နှင့် 360 ဆီဆိုင်တို့တွင် စက်သုံးဆီရောင်းချခြင်းမရှိဘဲ ပိတ်ထားကြောင်း၊ အခြားသော DENKO ဆီဆိုင်တွင် ပြည်သူများ ကြိတ်ကြိတ်တိုး တန်းစီနေရကြောင်း၊ နယ်မြို့ကြီးအများစုတွင် ဆီလုံလောက်စွာ မရရှိဘဲ ကြိတ်ကြိတ်တိုးနေရဆဲဖြစ် ကြောင်း သိရှိရသည်။

မြန်မာနိုင်ငံစက်သုံးဆီတင်သွင်းရောင်းချ ဖြန့်ဖြူးသူများအသင်းက စစ်ကောင်စီက ယခုရက်ပိုင်းအတွင် စက်သုံးဆီ တင်သွင်းရန် ဒေါ်လာ လိုသလောက်မရောင်း ဘဲ လုပ်ငန်းရှင်များ မိမိအစီအစဉ်ဖြင့် တင်သွင်းခိုင်းကြောင်း၊ ထို့ကြောင့် စက်သုံးဆီ တင်သွင်းသူ လုပ်ငန်းရှင်များက ဒေါ် လာ သန်း ၅၀ ပြင်ပစျေးကွက်မှ ဝယ်ယူ တင်သွင်းရကြောင်း၊ စစ်ကောင်စီတွင် ဒေါ်လာမရှိတော့၍ ပြည်သူများအားလုံး မကြာမီ စက်သုံးဆီ ပြတ်လပ်မှုကို အကြီးအကျယ် ကြုံတွေ့ရမည်ဖြစ်ကြောင်း သတိပေးပြောဆိုသည်။

ထို့ပြင် အကြမ်းဖက် ဇော်မင်းထွန်းက စက်သုံးဆီ တန်ချိန် ၁ သိန်း တင်သွင်းလာသည်ဟု ပြောဆိုခြင်းမှာလည်း ၁၀ ရက်ဝန်းကျင်ခန့်သာ သုံးနိုင်မည်ဖြစ်ပြီး ဆီများအတွက် ငွေအကျေပေးချေနိုင်ခြင်းမရှိကြောင်း၊ ပြည်သူများအားလုံး ကြိုတင်ပြင်ဆင်ကြရန် မြန်မာနိုင်ငံ စက်သုံးဆီ တင်သွင်း ရောင်းချ ဖြန့်ဖြူးသူများအသင်းက ဆိုသည်။

ဓာတ်ပုံ- ယမန်နေ့ ပြည်သူများ ကြိတ်ကြိတ်တိုး တန်းစီနေရပြီးယနေ့တွင်လည်း ဆက်လက် စက်သုံးဆီရရှိရေး ကြိတ်ကြိတ်တိုးနေရဆဲဖြစ် သည်။ khit thit

« Older Entries