Category Archives: News

စစ်ကောင်စီခြေကုပ်ယူထားသည့် ရန်ကုန်တွင် သပိတ်လှုပ်ရှားမှုများ နည်းပါးလာ

စစ်ကောင်စီက ပိုမိုခြေကုပ်ယူလာသည့် ရန်ကုန်မြို့တွင် ဒီမိုကရေစီအရေး လှုပ်ရှားမှုဖြစ်သော လူထုသပိတ် ဆန္ဒပြမှုများသည် အာဏာသိမ်းမှုအပြီး နှစ်နီးပါးအကြာတွင် အနည်းငယ်သာ မြင်တွေ့ရတော့သည်။

အာဏာသိမ်း အစတုန်းကလို မြေပြင်သပိတ်ကို အင်အားအများကြီး ထွက်လို့မရတော့ဘူး။ အဲဒီအခြေအနေမှာ ပြောက်ကျားသပိတ်ကို ပြောင်းလာခဲ့ကြရတယ်” ဟု ရန်ကုန်မြေပြင် သပိတ်တာဝန်ခံ ကိုမင်းရတုထက်က သုံးသပ်သည်။

စစ်အာဏာသိမ်းပြီးနောက်ပိုင်း သန်းနှင့်ချီသည့် လူများသည် ရန်ကုန်မြို့ရှိလမ်းများပေါ်တွင် ဒီမိုကရေစီရရှိရေး၊ စစ်အာဏာရှင်စနစ်ပြုတ်ကျရေးတို့အတွက် ဆန္ဒပြတောင်းဆိုမှုများ ပြုလုပ်ခဲ့ကြသည်။

သို့‌သော် စစ်တပ်ဘက်မှ အင်အား အလွန်အကျွံအသုံးပြု လူစုခွဲ၊ ဖမ်းဆီးခြင်းအပြင် လက်နက်များဖြင့်ပါ ပစ်ခတ်၊ သတ်ဖြတ်ခြင်းကြောင့် လမ်းမ‌‌‌ပေါ်တွင် ဆန္ဒပြသူများ တဖြည်းဖြည်း နည်ပါးလာခဲ့သည်။

လက်ရှိ ရန်ကုန်မြို့ရှိနေရာအချို့တွင် လူငယ်များ၊ ကျောင်းသားသမဂ္ဂများနှင့် အခြား အင်အားစုများ စုပေါင်း၍ ပြောက်ကျားသပိတ်အနေဖြင့်သာ လှုပ်ရှားမှုများပြုလုပ်နေကြသည်။

အဆိုပါသပိတ် လှုပ်ရှားမှုများကို အများပြည်သူသုံး ဘတ်စ်ကားများ၊ လူစည်ကားရာ နေရာများ၊ ဈေးများတွင် အလျင်အမြန် ပြုလုပ်နေရခြင်းဖြစ်သည်။

“ မြို့ပေါ်က သပိတ်တွေကို ဖြိုခွင်းတဲ့ ပုံစံကို ကြည့်လိုက်ရင် အကြမ်းဖက်ပြီးတော့ ရက်စက် ရမ်းကားပြတာတွေကို သတိပြုမိတယ်။ ဒီပေါ်မှာပြတာလည်းဆိုတော့ စစ်အုပ်ချုပ်ရေးကပေးတဲ့ ဒီမိုကရေစီတို့ ရွေးကောက်ပွဲတို့ဆိုတာက လွတ်လပ်စွာဆန္ဒဖော်ထုတ်မှုကိုတောင်မှပဲ အာမခံမပေးနိုင်ဘူးဆိုတာ သူတို့ကိုယ်တိုင် လက်တွေ့ပြနေတာ “ ဟု ပြည်ထောင်စုလွှတ်တော် ကိုယ်စားပြုကော်မတီ (CRPH) ၏ ပြောရေးဆိုခွင့်ရှိသူ ဦးစည်သူမောင်က မှတ်ချက်ပြုသည်။

ပြီးခဲ့သည့် စက်တင်ဘာလအတွင်း ကြည့်မြင့်တိုင်မြို့နယ်၊ ပန်းပင်ကြီးလမ်းတွင် လူငယ် အယောက်၂၀ ကျော် ဖမ်းဆီးခံရပြီးနောက် ရန်ကုန်တွင် ယခင်ကာလကထက် သပိတ်များ ပိုမိုကျဲပါးခဲ့သည်ကို တွေ့ရသည်။

စစ်ကောင်စီတပ်မှ ပိုမိုခြေကုပ်ယူလာသည့် ရန်ကုန်သပိတ်များတွင် ပါဝင်လေ့ရှိသည့် လူငယ်အချို့သည် ဆက်လက်နေထိုင်ရန်အဆင်ပြေနိုင်မည့် လွတ်မြောက်နယ်မြေနှင့် အခြားနေရာများသို့ ပြောင်းရွှေ့ပြီး တော်လှန်ရေးတွင် ဆက်လက်ပါဝင်နေကြသည်။

ထို့ကြောင့် ရန်ကုန်တွင်ဆန္ဒပြမှုများ နည်းရသည့် အကြောင်းအရင်းမှာ လုံခြုံရေးပြဿနာများအပြင် လက်နက်ကိုင်တော်လှန်ရေးကို အဓိကထားပြုလုပ်နေခြင်းကလည်း အကြောင်းအရင်းတစ်ချက် ဖြစ်နိုင်ကြောင်း တခြားသပိတ်သမားတစ်ဦးကလည်း သုံးသပ်သည်။

“ အကြမ်းမဖက် တော်လှန်ရေးကဆက်ရှိနေတယ်။ တစ်ချိန်တည်းမှ လက်နက်ကိုင်လို့ ခုခံစစ်ကိုဆင်နွှဲနေရတဲ့ အနေထားမှာ လက်နက်ကိုင်ဆန့်ကျင်တော်လှန်ရေးကလည်း တစ်ပြိုင်တည်းမှာ အရင်ကရှိပြီးသားကို အားကောင်းအောင် ဆက်လုပ်လာကြတယ်။ တစ်ချိန်တည်းမှာပဲ အတွေးအခေါ် ပိုင်းဆိုင်ရာ တပ်ဆင်တဲ့လုပ်ငန်းတွေလည်း ဆက်ရှိနေတယ်။ အတွေးအ‌ခေါ်ပိုင်းဆိုင်ရာက အခြေပြုတဲ့ လက်နက်ကိုင် တော် လှန်ရေး၊ အတွေးအခေါ်အခြေပြုတဲ့ မြေပြင်သပိတ်တွေက အများကြီးဆက်ဖြစ်နေတယ်။ ဒီနှစ်ခုက ကျွန်းကိုင်မှီကိုင်း ကျွန်းမှီဖြစ်ပါတယ်။ ဒီနှစ်ခု မျှချေကျသွားမှသာလျှင် ကျမတို့ နိုင်ငံရေး အရွေ့က ရှေ့ရောက်မယ်။ မဟုတ်ရင် လက်နက်ကိုင်တဲ့တွေ ကြီးစိုးတဲ့ နိုင်ငံရေးပဲ ပြန်ဖြစ်မယ်” ဟု ဒီမိုကရေစီလှုပ်ရှားမှုတွင် သပိတ်များ၏အရေးပါပုံနှင့် ပတ်သက်၍ ACDD (acdvocacy coordinator ) မှ မသဥ္ဇာရွှန်းလဲ့ရည်က ပြောသည်။

အကြောင်းအမျိုးမျိုးကြောင့် စစ်ကောင်စီ ခြေကုပ်ယူထားသည့်နေရာများတွင် သပိတ်လှုပ်ရှားမှုများ နည်းပါးနေသော်လည်း ပြည်သူ့ကာ ကွယ်ရေးအဖွဲ့များနှင့် တော်လှန်ရေးအဖွဲ့များရှိနေသည့် ဒေသအချို့တွင်မှု ဆန္ဒပြလှုပ်ရှားမှူများ၊ ဟောပြောစည်းရုံးမှုများ ဆက်လက်ရှိနေသည်ကိုလည်းတွေ့ရသည်။ mizzima

စစ်ကိုင်းမြို့နယ်၊ မြိုင်လယ်ကျေးရွာကို စစ် တပ်က ပစ်ခတ်ဝင်ရောက်စီးနင်း မီးရှို့ဖျက်ဆီးမှုကြောင့် အသက် ၈၇ နှစ် ဒေါ်ဝင်းစိန် သေဆုံး၊ ပြည်သူ ၂ ဦး ဖမ်းဆီးသွား

စစ်ကိုင်းတိုင်း၊ စစ်ကိုင်းမြို့နယ်၊ မြိုင်လယ်ကျေးရွာကို စစ်တပ်က ပစ်ခတ် ဝင် ရောက်စီးနင်း မီးရှို့ဖျက်ဆီးမှုကြောင့် အသက် ၈၇ နှစ် ဒေါ်ဝင်းစိန် နှလုံးရပ် သေဆုံးသွားကြောင်း ဒေသခံများ က ရန်ကုန်ခေတ်သစ်သတင်းဌာနထံသို့ ပြောဆိုကြသည်။

နို၀င်ဘာလ ၂၈ ရက်နေ့ ညနေ ၄နာရီကျော်အချိန် တပ်မ ၃၃ မှ စစ်ကြောင်းက မြိုင်လယ်ကျေးရွာအတွင်းသို့ ဝင်ရောက် စီးနင်းကြောင်း၊ ယင်း သို့ ဝင်ရောက် စီးနင်းချိန်တွင် အသက် ၈၇ နှစ် ဒေါ်ဝင်းစိန် နှလုံးရပ်သေဆုံးသွားကြောင်း၊ ထို့ပြင် ကျေးရွာအတွင်းရှိ နေအိမ်များကို စစ်တပ်က မီးရှို့ဖျက်ဆီးသွားကြောင်း၊ ပြည်သူ ၂ ဦးကို စစ်တပ်က ဖမ်းဆီးသွားကြောင်း သိရှိရသည်။

“မီးရှို့ခံရတဲ့ နေအိမ် ၉ လုံးရှိပါတယ်။ ဖျက်ဆီးခိုးယူခံရတဲ့ အိမ် ၂ လုံး ။ စစ် တပ် က ဖမ်းဆီးခေါ်ဆောင်သွားသူ ကိုလှဝင်းရွှေ ၊ကိုအေးကိုကို ဖမ်းသွားပါ တယ်။ အခုအချိန်အထိ အဆက်အသွယ်မရသေးဘူး” ဟု ဒေသခံတစ်ဦးက ဆိုသည်။

စစ်တပ်က မီးရှို့သွားသော မြိုင်လယ်ကျေးရွာတွင် အိမ်ထောင်စု ၈၇ စုရှိပြီး လူဦးရေ ၄၃၅ ဦးရှိကာ စစ်ဘေးရှောင်နေရကြောင်း၊ အနီးအနားရှိ မောင်း ထောင်ရွာ၊ ရွာသစ်ရွာမှ အိမ်ထောင်စု ၃၇၀ စစ်ဘေးရှောင်နေရကြောင်း သိရှိရ သည်။ khit thit

ရွှေကုက္ကိုလ်ဒုစရိုက်နယ်မြေက ဥပဒေမဲ့လုပ် ငန်းများ ဒေသတွင်းထိခိုက်နိုင်

ထိုင်းနိုင်ငံမှာ ဥပဒေမဲ့လုပ်ငန်းတွေ လာရောက်လုပ်ကိုင်နေတဲ့ တရုတ်နိုင်ငံသား စီးပွားရေးသမား တွေကို ဆက်တိုက်ဖမ်းဆီးနှိမ်နင်းနေရာမှာ တာ့ခ်ခရိုင် မဲဆောက်မြို့နယ် တဖက်ကမ်း မြန်မာနိုင်ငံ မြဝတီမြို့နယ်ထဲက ရွှေကုက္ကိုလ် စီးပွားရေးဇုန်ဟာလည်း  တရုတ်လုပ်ငန်းရှင်တွေနဲ့ ဆက်စပ်နေတာကြောင့် ဒေသတွင်း ထိခိုက်လာနိုင်တယ်လို့ ထိုင်း PBSသတင်းမှာ ဖော်ပြပါတယ်။

ရွှေကုက္ကိုလ်ဒေသထဲမှာ မြန်မာနယ်ခြားစောင့်တပ် BGF ခေါင်းဆောင် ဗိုလ်စောချစ်သူနဲ့ တရုတ်နိုင်ငံသား စီးပွားရေးလုပ်ငန်းရှင် ချွေကျိကျင်တို့ ပူးပေါင်းပြီး “YATAI International Holding Group” အမည်ရှိ ကုမ္ပဏီတည်ထောင်ထားကြောင်း၊ အဆိုပါ ကုမ္ပဏီဟာ ကေတီဗွီ၊ ကာစီနိုလောင်းကစားဝိုင်း၊ ကောလ်စင်တာ၊ စတဲ့ရုံတွေလည်း ဖွင့်လှစ်ထားပြီး နေရာပေါင်း ၁၇ ခုလောက်ရှိတယ်လို့ ဆိုပါတယ်။

ထိုင်းဘက်ခြမ်း တာဝန်ရှိသူတွေဟာ ပြီးခဲ့တဲ့ စက်တင်ဘာနဲ့ အောက်တိုဘာလအတွင်း မြဝတီဘက်ကနေ မဲဆောက်ဘက်ကို တရားမဝင် ကျော်ဖြတ်လာတဲ့ ကမ္ဘောဒီးယား၊ တရုတ်၊ ဖိလစ်ပိုင် စတဲ့နိုင်ငံသား ၁၄ ဦးကို ဖမ်းဆီးရမိခဲ့ပါတယ်။

ဒါ့အပြင် လူကုန်ကူးခံရသူ ကမ္ဘောဒီးယားနဲ့ တရုတ်နိုင်ငံသား ၅ ဦးကိုပါ ကယ်တင်ခဲ့ကြောင်း၊ သူတို့ရဲ့ ဖွင့်ဟပြောဆိုချက်အရ ရွှေကုက္ကိုလ်မှာ ဥပဒေမဲ့ ရာဇဝတ်မှုလုပ်ငန်းတွေ လုပ်ဆောင်နေပြီး လူကုန်ကူးခံရသူတွေဟာ ကောလ်စင်တာမှာ အဓမ္မလုပ်အားခိုင်းစေခံရတာ၊ ရိုက်နှက်နှိပ်စက်ခံရတာတွေရှိနေတယ်လို့ ဆိုပါတယ်။

အဆိုပါ ရွှေကုက္ကိုစီပွားရေးဇုန်ဟာ လာအိုနိုင်ငံရှိ ကင်းရိုမန်ကာစီနိုရုံတွေနဲ့လည်း ဆက်စပ်မှုရှိကြောင်း၊ အဲဒီဘက်က တရုတ်နိုင်ငံသားတွေဟာ ထိုင်းနိုင်ငံကို ကြားခံမြေအဖြစ် ဖြတ်သန်းပြီး မြဝတီ ရွှေကုက္ကိုလ်ဘက်မှာ အလုပ်သွားလုပ်ကြတယ်လို့ လာအိုနိုင်ငံ လ.ဝ.က ရဲတပ်ဖွဲ့က ထိုင်းပီဘီအက်စ်ကို ပြောပါတယ်။

ချင်းရိုင်းခရိုင် ကျိန်းဆဲန်မြို့နယ် လဝကရဲတွေဟာ ပြီးခဲ့တဲ့ ၂၀၁၈ မှ ၂၀၂၂ အတွင်း မဲခေါင်မြစ်ကနေ တရားမဝင် ဝင်ရောက်လာတဲ့ တရုတ်နိုင် ငံသား စုစုပေါင်း ၁၃၀ ကျော် ဖမ်းဆီးရမိခဲ့ပြီး ၅၃ ဦးမှာ အထောက်အထား တစုံတရာမရှိကြောင်း၊ ဖမ်းဆီးခံရသူတွေ ပြောပြချက်အရ သူတို့ဟာ မြဝတီကာစီနိုရုံတွေမှာ အလုပ်သွားလုပ်ဖို့ ပွဲစားနဲ့ ဝင်ရောက်လာပြီး အထောက်အထားတွေကို ပွဲစားက သိမ်းထားတယ်လို့ ဆိုပါတယ်။

ဒါကြောင့် မြဝတီမြို့နယ်ရှိ ရွှေကုက္ကို စီးပွားရေးဇုန်ဟာ ထိုင်း၊ မြန်မာ၊ လာအို၊ တရုတ်၊ ကမ္ဘောဒီးယားစတဲ့ နိုင်ငံသားတွေကို ခြိမ်းခြောက်နေတဲ့ ဥပဒေကင်းမဲ့ဇုန် ဒုစရိုက်နယ်မြေတခု ဖြစ်တယ်လို့ သတင်းမှာ သုံးသပ်ဖော်ပြပါတယ်။

ပြီးခဲ့တဲ့ ဩဂုတ်လကတော့ ထိုင်းအမျိုးသားရဲတပ်ဖွဲ့ဟာ ချွေကျိကျင် ဆိုသူ တရုတ်စီးပွားရေးလုပ်ငန်းရှင်တဦးကို ဖမ်းဆီးရမိခဲ့ကြောင်း၊ သူဟာ ထိုင်း၊ တရုတ်၊ ဖိလစ်ပိုင် စတဲ့ နိုင်ငံသားတွေဆီကနေ ဘတ်သန်းပေါင်း ၅,၀၀၀ ကျော် လိမ်လည်ထားတဲ့ အွန်လိုင်းလောင်းကစားဝိုင်း၊ ကောလ်စင်တာဂိုဏ်းခေါင်းဆောင်ဖြစ်ပြီး တရုတ်အစိုးရက ဖမ်းဝရမ်းထုတ်ထားသလို နိုင်ငံတကာရဲတပ်ဖွဲ့ (အင်တာပို) က အလိုရှိနေသူလို့ ဆိုပါတယ်။

ချွေကျိကျင်ဟာ ရွှေကုက္ကိုလ်မှာ ဖွင့်ထားတဲ့ “YATAI International Holding Group” ကုမ္ပဏီ ရှယ်ယာပိုင်ရှင်ဖြစ်ကြောင်း၊ ထိုင်းရဲတပ်ဖွဲ့က သူ့ကို ဖမ်းဆီးလိုက်ပေမဲ့လည်း သူ့ရဲ့လက်ဝေခံ နောက်ထပ် တရုတ်စီးပွားရေးလုပ်ငန်းရှင် ၂ ဦးဟာ ဆက်လက်လှုပ်ရှားနေတာကြောင့် ဒေသတွင်း ဥပဒေမဲ့လုပ်ငန်းတွေ ပျောက်ကွယ်သွားမှာ မဟုတ်ဘူးလို့ UNODC ကမ္ဘာ့ မူးယစ်ဆေးဝါး တိုက်ဖျက်ရေးအဖွဲ့မှ မစ္စတာ ဂျယ်ရယ်မီ ဒေါက်ဂလပ်စ်က ထိုင်းပီဘီအက်စ်ကို ပြောပါတယ်။

ထိုင်းနိုင်ငံအနေနဲ့ အာဆီယံနိုင်ငံက သက်ဆိုင်ရာတွေနဲ့ တွေ့ဆုံဆွေးနွေးပြီး ဒီပြဿနာကို ဖြေရှင်းသင့်ကြောင်း မစ္စတာ ဂျယ်ရယ်မီ ဒေါက်ဂလပ်စ်က အကြံပြုထားတယ်လို့ ထိုင်း PBS သတင်းမှာ ဖော်ပြပါတယ်။DVB

ရခိုင်တွင် ကုန်းလမ်း ရေလမ်းတချို့ကို ပိတ်ထားဆဲဖြစ်၍ လမ်းပြန်ဖွင့်ပေးရန် ဒေသခံများလိုလား

ရခိုင်ပြည်နယ်အတွင်း ယာယီ အပစ်အခတ်ရပ်စဲပြီးသော်လည်း စစ်ကောင်စီဘက်မှ တချို့သော ကုန်းလမ်း၊ ရေလမ်းများကို ပိတ်ထားဆဲဖြစ်သောကြောင့် လမ်းပြန်ဖွင့်ပေးရန် ဒေသခံများက လိုလားနေကြသည်။

နိုဝင်ဘာလ ၂၆ ရက်တွင် ရက္ခိုင့်တပ်တော် (AA) နှင့် စစ်ကောင်စီတို့သည် လူသားချင်းစာနာမှုဆိုင်ရာ ယာယီအပစ်ရပ်ထားမည့်အချက်ကို အလွတ်သဘော သဘောတူညီခဲ့ကြခြင်းဖြစ်သည်။

ရခိုင်ပြည်သူများ၏ အကျိုးစီးပွားကို အဓိကထားရှေ့ရှုကာ ယာယီအပစ်ခတ်ရပ်စဲထားခြင်း ဖြစ်သည်ဟု သတင်းစာရှင်းလင်းပွဲတွင် AA ဘက်မှပြောဆိုခဲ့သည်။

ထို့နောက်တွင် စစ်ကောင်စီတပ်ဘက်မှ ပိတ်ပင်ထားသည့် မောင်တော၊ ဘူးသီးတောင်၊ ရသေ့တောင်မြို့နယ်တို့တွင် ရေလမ်းများကို ပြန်လည်ဖွင့်ပေးခဲ့သော်လည်း ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ ပေါက်တောနှင့် မြေပုံမြို့နယ်တို့၌ ကုန်းလမ်း၊ ရေလမ်းတို့ကို လက်ရှိအချိန်ထိ ပိတ်ပင်ထားဆဲဖြစ်သည်ဟု ဒေသခံများကပြောသည်။

ပုဏ္ဏားကျွန်း၊ ကျောက်တော်၊ မြောက်ဦးနှင့် မင်းပြားမြို့နယ်တို့ရှိ ပြည်သူများ စစ်တွေမြို့သို့ သွားလာရန် အဓိကအားထားနေရသည့် ကုန်းလမ်း၊ ရေလမ်းများကို ပြန်လည် ဖွင့်ပေးစေချင်သည်ဟု စစ်တွေ-မြောက်ဦး ပြေးဆွဲနေသည့် ကားသမားတစ်ဦးက ဆိုသည်။

“ ကျနော်တို့က ဒီကားလေးနဲ့ပဲ လုပ်စားနေရတာ။ ကားလမ်းကိုပိတ်ထားတော့ အကျပ်အတည်းတွေ ရှိပါတယ်။ ကျနော်တစ်ယောက်တည်းတော့ မဟုတ်ပါဘူး။ ကားသမားအကုန်လုံး အခက်အခဲဖြစ်ကြတာပါပဲ။ စစ်တွေကိုသွားနေတဲ့လမ်းကို ပြန်ဖွင့်ပေးစေချင်ပါတယ် ” ဟု ၎င်းက ဆိုသည်။

အဆိုပါ မြို့နယ်များရှိပြည်သူများသည် ကျန်းမာရေးကိစ္စရပ်များ ကြုံတွေ့လာရပါက စစ်တွေမြို့ရှိ ဆေးရုံ၊ ဆေးခန်းများကို အားထားနေရသည့်အတွက် လမ်းပြန်ဖွင့်ပေးစေချင်သည်ဟု မြောက်ဦးဒေသခံ တစ်ဦးကလည်းပြောသည်။

“ အခုတော့ အပစ်အခတ်ရပ်စဲထားတော့ တခြားမြို့က လမ်းတွေပြန်ဖွင့်ပြီလို့ တော့ သိရတယ်။ စစ်တွေကိုသွားတဲ့ ကားလမ်းကိုလည်း ပြန်ဖွင့်ပေးစေချင်ပါတယ်။ ကျနော့်အမျိုးထဲက တစ်ယောက်ဆို စစ်တွေကို နှစ်လ တစ်ကြိမ် ဆေးခန်းသွားပြရပါတယ်။ လမ်းတွေပိတ်ထားတော့ ဆေးခန်းသွားမပြရဘူး။ တခြားအခက်အခဲတွေလည်းရှိပါတယ်“ ဟု ဒေသခံတစ်ဦးက ရှင်းပြသည်။

စစ်တွေ- ပုဏ္ဏားကျွန်း-ကျောက်တော်၊ မြောက်ဦး ကားလမ်း ၊မြောက်ဦး-စစ်တွေ ရေလမ်း၊ စစ်တွေ-ပေါက်တော- မင်းပြား-မြေပုံ ရေလမ်းနှင့် မင်းပြား-မြေပုံ ကားလမ်း တို့ကို စစ်ကောင်စီမှ လက်ရှိအချိန်ထိ ပိတ်ထားဆဲဖြစ်သည်။ mizzima

ဝက်လက်တွင် စစ်ကြောင်းကို မိုင်းဆွဲတိုက် ခိုက်မှု စစ်သား ၅ ဦးသေဆုံး၊ ချင်းတွင်းမြစ်အတွင်း စစ်တပ် လေယာဥ်ဆီတင် သင်္ဘောများကို တိုက်ခိုက်မှု စစ်သား ၂ ဦးသေဆုံး

စစ်ကိုင်းတိုင်း ဝက်လက်မြို့တွင် အကြမ်းဖက် စစ်တပ် စစ်ကြောင်းကို PDF တပ်ဖွဲ့များက မိုင်းဆွဲ တိုက်ခိုက်ခဲ့ပြီး စစ်သား ၅ ဦးသေဆုံးကြောင်း BLACK WOLF- ARMY (PDF) ထံမှ သိရသည်။

ဝက်လက်မြို့ သားနားကျေးရွာမှ ထွက်လာသည့် အကြမ်းဖက်စစ်ကောင်စီ အင်အား ၇၀ ခန့်ပါ စစ်ကြောင်းသည် နိုဝင်ဘာ ၂၈ ရက်နေ့ နံနက် ၉ နာရီခွဲအချိန်တွင် ပြင်းအားမြင့် မိုင်းနှစ်လုံးဖြင့် ဖောက်ခွဲတိုက်ခိုက်ခံရပြီး စစ်ကောင်စီဝင် ၅ ဦးထက် မနည်းသေကာ အများအပြား ထိခိုက်ဒဏ် ရာရရှိခဲ့ကြောင်း BLACK WOLF- ARMY (PDF) က သတင်းထုတ်ပြန်သည်။

အဆိုပါ တိုက်ခိုက်မှုကို BLACK WOLF- ARMY (PDF) နှင့် တော်ဝင်ဖီးနစ် – PDF တို့ ပူးပေါင်းလုပ်ဆောင်ခဲ့ခြင်းဖြစ်ပြီး အထိအခိုက် အကျအ ဆုံးမရှိ ပြန်လည် ဆုတ်ခွာနိုင်ခဲ့ကြောင်း၊ ခင်ဦးမြို့နယ် မုံလှတိုက်ပွဲတွင် ကျဆုံးခဲ့ရသည့် ကိုလှိုင်ဝင်းနှင့် BLACK WOLF- ARMY (PDF) ရဲဘော်လေးဦးတို့အတွက် လက်စားချေတိုက်ခိုက်သည့် စစ်ဆင်ရေးတစ်ခုဖြစ်ကြောင်း သိရှိရသည်။

ထို့ပြင် စစ်ကိုင်းတိုင်း ချင်းတွင်းမြစ်အတွင်း ဖြတ်သန်းလာသည့် အကြမ်းဖက် စစ်အုပ်စု၏ လေယာဥ်ဆီတင် သင်္ဘောများကို ကာကွယ်ရေး တပ်ဖွဲ့များက တိုက်ခိုက်မှု စစ်သား ၂ ဦးသေဆုံးခဲ့ကြောင်း သိရသည်။

နိုဝင်ဘာလ ၂၈ ရက်နေ့တွင် ချင်းတွင်း မြစ်ကြောင်းအောက်ဘက်မှ အထက်ဆီသို့ ဆန်တက်လာသော လေယာဥ် ဆီတင် စစ်သင်္ဘော ၁၀ စီးပါ အုပ်စုကို ချင်းတွင်းမြစ်အနောက်ဘက်ကမ်း၌ ဒေသခံ ကာကွယ်ရေးတပ်ဖွဲ့များက ပူးပေါင်းပြီး ရှေ့ထွက်ပြောင်းများ၊ လက်နက်ကြီးလက်နက် ငယ်များဖြင့် ပစ်ခတ် တိုက်ခိုက်ခဲ့ပြီး စစ်သား ၂ ဦးသေဆုံးကာ ၁၀ ဦး ထိခိုက် ဒဏ်ရာရရှိခဲ့ကြောင်း သိရသည်။

” နံနက်ပိုင်းက ဒဏ်ရာရတာ ၁၀ ​ကောင် သေတာက ၂ ကောင်ရှိတယ်။ လောလောဆယ် သိရသလောက်ကတော့ မနေ့က နံနက်ပိုင်း ထိတာက ၁၂ ကောင်ပေါ့။ သေတာ ၂ ကောင်သေတယ်။ ညနေပိုင်း တိုက်ခိုက်မှုကတော့ စစ်ခွေး သေရင်း မသိရသေးဘူး” ဟု BLACK Rangers FORCE (BRF) အဖွဲ့မှ တာဝန်ရှိသူ တစ်ဦးက ပြောဆိုသည်။

အဆိုပါ တိုက်ခိုက်မှုကို Aung San Generation Monywa တပ်ရင်း(၁၃)၊ BLACK Rangers FORCE (BRF)နှင့် Tan Hkwan people’s defense force တို့မှ ပူးပေါင်းကာ တိုက်ခိုက်ခဲ့ခြင်း ဖြစ်ကြောင်း သိရသည်။ khit thit

ပေါက်မြို့နယ်တိုက်ပွဲ၌ စစ်တပ်က ၂ ဦး သေ ဆုံး၊ ရွာ ၃ ရွာက နေအိမ် ၉၀ ကျော် မီးရှို့ခံရ

မကွေးတိုင်း၊ ပေါက်မြို့နယ်မှာ နိုဝင်ဘာ ၂၈ ရက် မနက်ပိုင်းက စစ်ကောင်စီတပ်နဲ့ ဒေသကာကွယ်ရေးတပ်တို့ တိုက်ပွဲဖြစ်ခဲ့ပြီး စစ်ကောင်စီတပ်က ၂ ယောက် သေဆုံးကာ ၈ ယောက် ဒဏ်ရာရရှိပြီး ရွာ ၃ ရွာက နေအိမ် ၉၀ ကျော်ကို စစ်တပ်က မီးရှို့ဖျက်ဆီးခဲ့တယ်လို့ မြိုင် ပ.က.ဖ ကနေ သိရပါတယ်။

မနေ့မနက် ၇ နာရီ ၄၅ မိနစ်မှာ ဇီးပြားရဲစခန်းက ထွက်လာတဲ့ စစ်ကောင်စီတပ်နဲ့ လမ်းတလျှောက် တိုက်ပွဲဖြစ်ခဲ့ပြီး ညောင်ရင်းရွာအရောက်မှာ မိုင်း ၇ လုံးအပြင် လက်နက်ငယ်နဲ့ ပစ်ခတ်တိုက်ခိုက်ခဲ့တာလို့ မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ပြောပါတယ်။

တိုက်ပွဲအတွင်းမှာ အထိနာသွားတဲ့ စစ်ကောင်စီတပ်ဟာ ညောင်ရင်းကျေးရွာက နေအိမ် ၈၆ လုံး၊ ဂဲပင်အင်းရွာက နေအိမ် ၆ လုံး၊ ဂွေးပင်အင်းရွာက နေအိမ် ၄ လုံးကို မီးရှို့ဖျက်ဆီးခဲ့ပြီး ဒရုန်းနဲ့ တိုက်ခိုက်ရာမှာ ထိခိုက်ခဲ့တာကြောင့် အုပ်စုလိုက် ထွက်ပြေးသွားတယ်လို့ ဗိုလ်လက်ယာက ဆိုပါတယ်။

ဖြစ်စဉ်နဲ့ပတ်သက်လို့ သီးခြားအတည်မပြုနိုင်သလို စစ်ကောင်စီဘက်ကလည်း သတင်းမထုတ်ပြန်ပါဘူး။နိုဝင်ဘာ ၂၆ ရက်ကလည်း ပေါက်မြို့နယ် ဇီးပြားရဲစခန်းက ပျူစောထီး သင်တန်းနေရာကို ဒရုန်းနဲ့ အီနာဂါဗုံးသီးချ တိုက်ခိုက်ခဲ့ပြီးနောက် အဲဒီစခန်းက စစ်ကောင်စီတပ်နဲ့ ပျူစောထီးတွေပေါင်းပြီး နိုဝင်ဘာ ၂၇ ရက် မနက်ပိုင်းမှာ အောင်စည်ရွာက နေအိမ် ၅၆ လုံးကို မီးရှို့ခဲ့ပါတယ်။ DVB

မတူပီမြို့ စစ်ကောင်စီတပ်အနီးရှိခြံ အသွား မြေမြှုပ်မိုင်းနင်းမိပြီး အမျိုးသားသေဆုံး

ချင်းပြည်နယ်၊ မတူပီမြို့တွင် စစ်ကောင်စီတပ်စခန်းအနီးရှိ ၎င်း၏ ခြံသို့ သွားရာ မြေမြှုပ်မိုင်းနင်းမိပြီး အမျိုးသားတစ်ဦး သေဆုံးကာ ဇနီးသည်မှာ ပြင်းထန်စွာ ဒဏ်ရာရရှိသွားကြောင်း မိသားစုနှင့် နီးစပ်သူတစ်ဦးက ပြောသည်။

နိုဝင်ဘာ ၂၉ရက် ယနေ့နံနက် ၉နာရီအချိန်က သေဆုံးသွားခဲ့သူ ဦးရာပဲန်း (အသက် ၅၆နှစ်) နှင့် ဇနီးဖြစ်သူတို့ စစ်ကောင်စီတပ် ခလရ (၃၀၄) နှင့် စစ်ဆေးရေးစခန်းအနီးရှိ ၎င်းတို့ ခြံသို့သွားရောက်စဉ် မြေမြှုပ်မိုင်းနင်းမိခဲ့ခြင်းဖြစ်ကြောင်း ဆိုသည်။

“ အဲဒီတပ်နဲ့ နီးနီးလေး သူ့ခြံက အရင်တုန်းက နွားနောက်တွေလည်း မွေးတယ်၊ ဝဥ တို့ တခြား သီးနှံတွေစိုက်ထားတဲ့ သူ့ခြံကိုအသွားမှာ နင်းမိတာ၊ အဲဒါ စစ်ကောင်စီက ထောင်တာပဲနေမှာ ၊ သူ့နွားနောက်တွေလည်း အဲဒီအကောင်တွေ ဖမ်းသတ်စားလို့ ကုန်သလောက်ဖြစ်နေပြီ” ဟု အဆိုပါ မိသားစုနှင့် နီးစပ်သူမှ ပြောဆိုသည်။

မြေမြှုပ်မိုင်းနင်းမိပြီး ဒဏ်ရာ အပြင်းအထန်ရရှိသွား၍ သွေးထွက်လွန်ကာ သေဆုံးသွားခဲ့ခြင်းဖြစ်ပြီး ၎င်း၏ဇနီးမှာလည်း ဒဏ်ရာပြင်းထန်သဖြင့် မတူပီ ဆေးရုံတွင် တက်ရောက်ကုသမှုခံယူနေရကြောင်း သိရသည်။

စစ်အာဏာမသိမ်းမီက ဦးရာပဲန်းသည် နွားနောက် အကောင် ၄၀ခန့် မွေးထားခဲ့ပြီး ၎င်း၏ ခြံတွင် စားပင်သောက်ပင်နှင့် စီးပွားဖြစ် ဝဥ များလည်း စိုက်ပျိုးထားကြောင်း သိရသည်။

သို့သော် ၎င်း၏ နွားနောက်များကို စစ်ကောင်စီတပ်သားများက ဖမ်းယူ သတ်ဖြတ် စားသောက်ခဲ့ကြောင်းနှင့် ယင်းခြံအတွင်းရှိ နေအိမ်အဆောက်ဦလည်း မီးရှို့ခဲ့ကြောင်း ဆိုသည်။

သေဆုံးသွားသူသည် ဆက်သွယ်ရေးဌာနတွင် ဝန်ထမ်းတစ်ဦးဖြစ်ပြီး ယခင် ရေဇွာ မြို့တွင် တာဝန်ကျခဲ့ပြီး နောက်မတူပီမြို့တွင် ပြန်လည်ပြောင်းရွှေ့တာဝန်ထမ်း‌ဆောင် နေခြင်းဖြစ်ကြောင်း သိရသည်။

ဦးရာပဲန်းသည် မတူပီမြို့ ဗန်လောင်းရပ်ကွက်တွင် နေထိုင်ပြီး ကွယ်လွန်ချိန်တွင် သား နှစ်ယောက်နှင့် ဇနီး ကျန်ရစ်ခဲ့ကြောင်း သိရသည်။ mizzima

KNU တပ်မဟာ ၁ နယ်မြေတွင် အမှတ် ၁ မိတ်ဖက်တော်လှန်ရေး တပ်ပေါင်းစု စတင် ဖွဲ့စည်း လိုက်ပြီး စစ်ကောင်စီ တပ်များကို တိုက်ခိုက်သွားမည် ဟုကြေ ညာ

ကရင်အမျိုးသားအစည်းအရုံး ၊ KNU တပ်မဟာ ၁ နယ်မြေတွင် အမှတ် ၁ မိတ် ဖက် တော်လှန်ရေး တပ် ပေါင်း စု ကို ယခုရက်ပိုင်းအတွင်း စ တင် ဖွဲ့စည်း လိုက်ပြီး စစ်ကောင်စီတပ်များကို တိုက်ခိုက်သွားမည်ဖြစ်ကြောင်း အမှတ် ၁ မိတ် ဖက် တော်လှန်ရေးတပ်ပေါင်းစု၏ သတင်းနှင့်ပြန်ကြားရေး တာ ဝန်ခံ Saw Simon ကရန်ကုန်ခေတ်သစ် သတင်းဌာနထံသို့ ပြောဆိုသည်။

ကရင်အမျိုးသားအစည်းအရုံး KNU၊ ကော်သူးလေအုပ်ချုပ်နယ်မြေ၊ တပ်မဟာ ၁ သထုံခရိုင်အတွင်းရှိ စစ်အာဏာရှင်ကို တော်လှန်နေသော ကာကွယ်ရေးအဖွဲ့ ၂၅ ဖွဲ့ပေါင်းစည်းပြီး KNU သထုံခရိုင် တပ်မဟာ(၁) မိတ်ဖက်တော်လှန် ရေး တပ် ပေါင်းစု အဖြစ် ယခုနှစ်၊ အောက်တိုဘာ လအတွင်း ဖွဲ့စည်းခဲ့ကြောင်း၊ ယင်း နောက် သထုံခရိုင်၊ ဘားအံမြို့နယ်အတွက် အမှတ် ၁ မိတ်ဖက် တော်လှန် ရေးတပ်ပေါင်းစု ကို ဖွဲ့စည်းခြင်းဖြစ်ကြောင်း သိရှိရ သည်။

“တာဝန်ယူရတဲ့ နယ်မြေအတွင်းမှာရှိတဲ့ လက်နက်ကိုင် တော်လှန် စစ်ဆောင် ရွက်နေတဲ့ တပ်ဖွဲ့အားလုံး စုစည်း ပြီး တော်လှန်စစ်ဆင်နွဲနေတာပါ။ စုပေါင်း ဦးဆောင်မှု၊ ညီညွတ်မှုနဲ့ အာဏာရှင်ကျဆုံးရေး အစွမ်းကုန် ဆောင်ရွက် သွား မှာဖြစ်ပါတယ်” ဟု အမှတ် ၁ မိတ်ဖက်တော်လှန် ရေးတပ် ပေါင်းစု ၏ တပ်ရင်း ၁ ၊ သတင်းနှင့်ပြန်ကြားရေးတာဝန်ခံ Saw Simon က ရန်ကုန် ခေတ် သစ် သတင်းဌာနထံသို့ ပြောဆိုသည်။

မိတ်ဖက်တော်လှန်ရေး တပ်ပေါင်းစုသည် KNU တပ်မဟာ ၁ နယ်မြေအတွင်းရှိ PDF များ၊ ပကဖ များ၊ ပြောက် ကျား အဖွဲ့ များပေါင်းစည်းကာ ဖွဲ့စည်းလိုက် ခြင်း ဖြစ်ပြီး တစ်ခုတည်းသော ကွပ်ကဲမှု (စုပေါင်းဦးဆောင်မှု) ဖြင့် စစ်ကောင်စီ ကို ညီညွတ်စွာ တော်လှန် သွားမည်ဖြစ် ကြောင်း မိတ်ဖက်ရေးရာ ကြီးကြပ် ကွပ်ကဲ မှုကော်မတီ၊ KNU သထုံခရိုင် တပ် မဟာ ၁ က အောက်တိုဘာလ ၃ ရက်နေ့တွင် ထုတ်ပြန်ခဲ့သည်။

ယခုနှစ် စက်တင်ဘာလ ၂၁ ရက်မှ ၂၄ ရက်နေ့အထိ အဖွဲ့အစည်း ခေါင်းဆောင်၊ တာဝန်ခံများအားလုံးပါဝင်သည့် တတိယအကြိမ် မျက်နှာစုံညီ အစည်းအဝေး ကျင်းပခဲ့ပြီး မိတ်ဖက်တော်လှန်ရေးတပ်ပေါင်းစုအဖြစ် ဖွဲ့စည်းကာ မှတ်ပုံတင် ကတ် ပြား စိစစ်ထုတ်ဝေခြင်းနှင့် ရှေ့လုပ်ငန်း စဉ်အချို့ ချမှတ်နိုင်ခဲ့ကြောင်း သိရှိရ သည်။

များမကြာမီ မိတ်ဖက်တော်လှန်ရေးတပ်ပေါင်းစု၏ တပ်ရင်း များကို ထပ်မံ တိုးချဲ့ဖွဲ့စည်းရန် ရှိနေကြောင်း သိရှိရသည်။ khit thit

မိုးဗြဲနှင့်ဖရူဆိုတွင် လမ်းသွားလာခွင့် ယာယီပိတ်၊ ကလေး-တမူးလမ်းကြောင်း ပြန်ဖွင့်

ရှမ်း-ကယားနယ်စပ် မိုးဗြဲမြို့အတွင်း စစ်ကောင်စီတပ်က ကင်းပုန်းချပြီး စစ်ရေးလှုပ်ရှား နေတာ ကြောင့် ပြည်သူတွေအနေနဲ့ ည ၇ နာရီမှ မနက် ၅ နာရီအတွင်း မသွားကြဖို့ မိုးဗြဲ ပြည်သူ့ကာကွယ်ရေးတပ် MBPDF က ထုတ်ပြန်ပါတယ်။

မိုးဗြဲမြို့ပေါ် ရပ်ကွက်က နေအိမ်တချို့နဲ့ စက်တော်ရာတောင်ပေါ်မှာ စစ်ကောင်စီတပ်က ကင်းပုန်းချ လှုပ်ရှားနေတဲ့အပြင် ရပ်ကွက်တွင်း ခိုးဆိုးလုနှိုက်၊ မူးယစ်ရောင်းဝယ်ဖောက်ကားသူ တွေ တနေ့တခြား တိုးပွားလာတာကို တာဝန်ယူ ဖြေရှင်းပေးဖို့ အချိန်ကန့်သတ်ရတာလို့ ထုတ်ပြန်ချက်က ဆိုပါတယ်။ 

အလားတူ ကယား (ကရင်နီ) ပြည်နယ် ဖရူဆိုမြို့မှာ ပွင့်လင်းရာသီ စစ်ရေးအရှိန် တိုးမြှင့် လာနိုင်တာကြောင့် မိဘပြည်သူတွေအနေနဲ့ ဝင်ထွက်သွားလာတာကို ယာယီပိတ်ထားမယ်လို့ ကရင်နီပြည်နယ်အစိုးရက နိုဝင်ဘာ ၂၇ ရက်မှာ ထုတ်ပြန်ထားပါတယ်။

ဖရူဆိုဒေသရှိ လမ်းပိတ်ထားတဲ့ ကာလအတွင်း လုံးဝ သွားလာခွင့်ရှိမှာ မဟုတ်ဘဲ လမ်းပြန်ဖွင့်မယ့် အချိန်ကိုလည်း ထုတ်ပြန်ပေးသွားမှာဖြစ်ပြီး ထုတ်ပြန်ချက်တွေကို အ​မြဲနားစွင့် လိုက်နာဆောင်ရွက်ကြဖို့ ကရင်နီပြည်နယ်အစိုးရအဖွဲ့က တိုက်တွန်းထားပါတယ်။

ဖရူဆို လမ်းပိုင်းကို ပိတ်ထားတာနဲ့ ပတ်သက်ပြီး ကာကွယ်ရေးတပ်ဖွဲ့ဝင်တဦးက “ဒီလမ်းပိုင်းက အရင်ထဲက အသွားအလာပိတ်ထားတာပါ။ ဘာလို့လဲဆိုတော့ အဲဒီလမ်းမှာက အမြဲတမ်း စစ်မျက်နှာဆိုင်နေလို့ပါ။ ပြည်သူတွေအနေနဲ့ ဒီလမ်းကို ဖြတ်သန်းသွားလာနေရင် အန္တရာယ်များလို့ လမ်းအသုံးပြုခွင့် ပိတ်ပင်ထားတာ” လို့ ပြောပါတယ်။

စစ်ကိုင်းတိုင်း တမူးမြို့နဲ့ ကလေးမြို့ကို ဆက်သွယ်ထားတဲ့ တမူး-ကလေးအာရှလမ်းမကြီးကိုတော့ နိုဝင်ဘာ ၂၉ ရက်မှစပြီး ပုံမှန်အတိုင်း ပြန် လည်အသုံးပြုနိုင်ပြီလို့  တမူး PDF က တာဝန်ရှိသူက ပြောပါတယ်။

တမူး-ကလေး အာရှလမ်းပိုင်းမှာ စစ်ကောင်စီတပ်နဲ့ ပျူ‌စောထီးအဖွဲ့တွေ နယ်မြေလှုပ်ရှားမှု နည်းလာတာကြောင့် လမ်းပြန်ဖွင့်ပေးလိုက်တာလို့  ဆိုပါတယ်။

“ကျနော်တို့ တပ်ဖွဲ့တွေက လမ်းကြောပိတ်လိုက်တော့ တမူးကလာတဲ့ စစ်ကောင်စီတပ်တွေကို တိုက်ခိုက်လို့ရခဲ့တယ်။‌ သူတို့ဘက်က ထိခိုက် ကျဆုံးမှုတွေ ရှိခဲ့တယ်။ ကျနော်တို့ဘက်ကလည်း ထိခိုက်ဒဏ်ရာရသူတွေ အနည်းငယ်ရှိခဲ့တယ်။ သူတို့က လမ်းဘေးဝဲယာက ဒေသခံနေအိမ်တွေကို လည်း မီးရှို့ခဲ့တယ်။ အခုတော့ သူတို့ဘက်က လှုပ်ရှားမှု နည်းလာလို့ လမ်းကြောကို ပြန်ဖွင့်ပေးလိုက်တာ။”

ကလေး-ခါမ်းပတ်-တမူးလမ်းမကြီးကို နိုဝင်ဘာ ၁၂ ရက်ကစပြီး ဒေသတွင်း စစ်ရေးအခြေအနေတွေကြောင့် အသုံးမပြုကြဖို့ ဒေသခံကာကွယ် ရေးတပ်တွေ သတိပေး ထုတ်ပြန်ခဲ့တာပါ။DVB

« Older Entries