Category Archives: recent information

မုံရွာ လူမှုကယ်ဆယ်ရေးအသင်း ကား ၂ စီး မိုင်းထိမှန်

စစ်ကိုင်းတိုင်း၊ မုံရွာမြို့က မုံရွာလူမှုကယ်ဆယ်ရေးအသင်း ကား ၂ စီး ဒီနေ့ ဧပြီ ၂၉ ရက်‌ မနက်အစောပိုင်းက မိုင်းထိမှန်ခဲ့တယ်လို့ မုံရွာမြို့ပေါ် လူမှုရေးအသိုင်းအဝိုင်းက ပြောပါတယ်။

မြင်းမူမြို့နယ်၊ ထီးစောင်းကျေးရွာနဲ့ ညောင်ပင်ဝန်းကျေးရွာအကြား မုံရွာ-မန္တလေး ကားလမ်းမတနေရာမှာ ထိမှန်ခဲ့တာလို့လည်း ဆိုပါတယ်။

အသင်းနဲ့နီးစပ်သူတဦးက “မိုင်းထိမှန်ရုံတင်မကဘူး၊ သေနတ်နဲ့ပါ အပစ်ခံရတယ်။ လူနာကို မန္တလေးဘက် သွားပို့တာမှာ အခုလိုဖြစ်ခဲ့တာလို့တော့ သိရတယ်” လို့ ပြောပါတယ်။

အခုဖြစ်စဉ်နဲ့ပတ်သက်လို့ မုံရွာ လူမှုကူညီရေးအသင်း ဥက္ကဋ္ဌက “အပြင်ဆေးခန်းကနေ လိုက်ပို့တာကနေ အခုလိုဖြစ်တာဗျ။ ပျက်စီးတာက တော့ ကားနှစ်စီးလုံး ရှေ့မှန်တွေ အကုန်ကွဲကုန်တယ်။ ကားကိုယ်ထည်တွေလည်း မိုင်းစထိမှန်ထားတဲ့ အပေါက်တွေ၊ သေနတ်နဲ့ပစ်ထားတဲ့ အပေါက်တွေနဲ့ ပြည့်နေတယ်။ နောက်ပြီး ကျနော့်အသင်းက ကလေးတယောက် မှန်စထိမှန်တာလည်း ရှိခဲ့တယ်။ ကျနော်တို့အသင်းအနေနဲ့ လူနာတွေကို နယ်ဝေးပို့တဲ့အခါ အဲဒီကားနှစ်စီးကိုပဲ သုံးရတာဗျ။ အခုလိုဖြစ်သွားတော့ ကူညီရေးမှာ အခက်အခဲ ကြီးကြီမားမား ဖြစ်သွားပြီ” လို့ ပြောပါတယ်။

စစ်ကိုင်းတိုင်းအတွင်းမှာ စစ်ကာဏာသိမ်းပြီးချိန်ကစလို့ လူမှုကူညီရေး အသင်းတွေကို စစ်ကောင်စီက တင်တင်းကျပ်ကျပ် ဖမ်းဆီး စစ်ဆေးနေတာတွေ ရှိနေသလို ပြည်သူ့ကာကွယ်ရေးအဖွဲ့တွေဘက်ကလည်း လမ်းပိုင်းအသုံးချမှု ထုတ်ပြန်ချက်ကို တိတိကျကျ လိုက်နာပေးကြဖို့ မေတ္တာရပ်ခံထားတာတွေလည်း ရှိနေပါတယ်။

အခုဖြစ်စဉ်နဲ့ ပတ်သက်လို့ ဘယ်အဖွဲ့အစည်းက ပြုလုပ်တယ် ဆိုတာကိုတော့ ဒီဗွီဘီအနေနဲ့ သီးခြား အတည်ပြုချက် ရယူနိုင်ဖို့ ကြိုးစားနေဆဲ ဖြစ်ပါတယ်။DVB

ဆောမြို့နယ် ပြည်သူ့ကာကွယ်ရေးတပ်ဖွဲ့ တပ် ရင်း (၂) သင်တန်းဆင်းပွဲ ကျင်းပ

စစ်ကိုင်းတိုင်း ဆောမြို့နယ် ပြည်သူ့ကာကွယ်ရေးတပ် PDF-SAW တပ်ရင်း (၂) ၏ အပတ်စဉ် (၂) သင်တန်းဆင်းပွဲကို ယနေ့ ဧပြီလ ၂၃ ရက်နေ့တွင် ကျင်းပခဲ့ရာ ဆောမြို့နယ်၊ အမှတ် (၂) တိုင်းဒေသကြီး လွှတ်တော် ကိုယ်စားလှယ်နှင့် ပြည်သူ့အုပ်ချုပ်ရေးအဖွဲ့ ဥက္ကဋ္ဌတို့ တက်ရောက် အ မှာစကား ပြောကြားခဲ့ကြောင်း သိရသည်။mizzima

ရန်ကုန်တိုင်းအစိုးရရုံး၊ ပြည်လမ်း-ပြည်သူ့ရင် ပြင်ရှေ့ ရှိ စစ်ကောင်စီ သင်္ကြန်မဏ္ဍပ်တွင် ရေ ပက်ခံကားမရှိ၍ လာသမျှ ကားအားလုံးကို သေနတ်ပြ ခြိမ်း ခြောက် ပိတ်ဆို့ပြီး မဏ္ဍပ်ရှေ့မှ ဖြတ်ခိုင်းနေ

ရန်ကုန်တိုင်းအစိုးရုံး၊ ပြည်လမ်း-ပြည်သူ့ရင်ပြင်ရှေ့ရှိ စစ်ကောင်စီ၏ ရေပက်သင်္ကြန်မဏ္ဍပ်တွင် ရေပက်ခံကားနှင့် ရေပက်ခံမည့်သူမရှိ၍ လမ်း တွင် ဖြတ် သန်းသမျှ ကားအားလုံးကို သေနတ်ပြ ခြိမ်းခြောက် ရပ်တန့်လမ်းပိတ်ဆို့ပြီး သင်္ကြန်မဏ္ဍပ်ရှေ့ ရေပက်ခံပြီးမှ ဖြတ်သန်းခိုင်းနေကြောင်း ရန်ကုန်မြို့ခံများက ပြောသည်။

“ကားတွေက ရေပက်ခံကားလည်းမဟုတ်ဘူး။ သူ့ဟာသူ လမ်းပေါ်သွားနေတာကို ကားလမ်းကို ပိတ်လိုက်တယ်။ ပြီးတော့ သူတို့ မဏ္ဍပ်အောက်ကနေ ရေပက်ခံခိုင်းတယ်။ ကားတွေ ရေပက်ခံကားလည်းမဟုတ်ဘူး။ အိမ်စီးကားတွေ။ ကားတွေအားလုံးကတော့ မှန်တွေ တင်ထားတယ်။ ဘယ်သူမှလည်း ရေပက်မခံဘူး။ ကားရေဆေးခံရသလိုဖြစ်နေတာပေါ့။ ကားက တစ်စီးချင်း ဖြတ်ခိုင်းနေတာ။ အတော်ဆိုးတယ်။ အခြားကားတွေ ရန်ကုန်-ပြည်လမ်း ပြည်သူ့ရင်ပြင်ရှေ့ကို ရှောင်မောင်းပါ” ဟု ရန်ကုန်မြို့ခံ တစ်ဦးက ပြောသည်။

“ရန်ကုန်-ပြည်လမ်း အလုံလမ်းပွိင့်မှ မြေနီကုန်းသို့ ပြည်လမ်း အတိုင်းသွားခြင်းရှောင်ပါ။လမ်းတစ်ကြောပဲဖွင့်ထားပြီး ကားအကုန် ခွေးသင်္ချိုင်းမဏ္ဍပ်ထဲ မဝင်မနေရ စနစ်လုပ်ပြီး အတင်းအကျပ် သေနတ်ပြ ဝင်ခိုင်းနေပါတယ်” ဟု ရန်ကုန်ကင်းထောက်အဖွဲ့က သတိပေးချက် လူမှုကွန် ရက်တွင် ထုတ်ပြန်ထားသည်။

ရန်ကုန်မြို့တွင် ရေပက်ခံမည့်သူ မရှိ၊ ရေပက်ကစားသူ မရှိချိန်တွင် စစ်ကောင် စီက ၎င်း၏ သင်္ကြန်မဏ္ဍပ်များတွင် စည်ကားသယောင် ဟန်ပြလုပ်နိုင်ရေး အောက်တန်းကျသော နည်းလမ်းမျိုးစုံ အသုံးပြုနေသည်ဟု တက္ကစီသမားတချို့က သုံးသပ်ပြောဆိုသည်။khit thit

ပုသိမ်မြို့၌ ၂ ပတ်အတွင်း ကိုဗစ်ကြောင့် သေ ဆုံးသူ ၁၆ ဦးရှိလာ

ဧရာဝတီတိုင်း၊ ပုသိမ်မြို့မှာ မတ် ၁ ရက်မှ  မတ် ၁၇ ရက်အထိ သီတင်း ၂ ပတ်အတွင်း ကိုဗစ်-၁၉ ရောဂါကြောင့်  သေဆုံးသူ ၁၆ ဦး ထိရှိလာပြီလို့ ဒေသခံပရဟိတအဖွဲ့တွေက ပြောပါတယ်။

ပရဟိတအဖွဲ့ဝင်တဦးက “မနေ့က ဆုံးတာ အမျိုးသား ၂ ဦး၊ အမျိုးသမီး ၁ ဦး၊ အားလုံးက ရောဂါအခံရှိလို့ ဆုံးတာပါ။ ကျန်တဲ့သူတွေလည်း အဲဒီအတိုင်းပါပဲ” လို့ ပြောပါတယ်။ 

ကိုဗစ်ကြောင့် သေဆုံးခဲ့တဲ့ လူနာ ၁၆ ဦးက ရောဂါအခံရှိတဲ့သူတွေ ဖြစ်တယ်လို့ ဆိုပါတယ်။ 

ကျန်းမာရေးဝန်ထမ်းတဦးက “ခုလှိုင်းက ရောဂါအခံရှိတဲ့သူတွေပဲ သေလို့ နောက်ဆို တော်တော်အသေများမှာ။ ခုတောင် ပုသိမ်က သေတဲ့စာရင်းမှာ‌ များတယ်လို့ပြောရမယ်။ ထိန်းချုပ်တာ အားနည်းသလို စည်းကမ်းလိုက်နာတာလည်း အားနည်းတယ်” လို့ ပြောပါတယ်။ 

ပုသိမ်မြို့မှာ စစ်တပ်အာဏာသိမ်းပြီးနောက်ပိုင်း တကျော့ပြန်ကိုဗစ်လှိုင်းကြောင့် ပြီးခဲ့တဲ့ ဖေဖော်ဝါရီလမှာ ၈ ဦး သေဆုံးခဲ့ပါတယ်။ DVB

စစ်ကောင်စီဩဇာခံ ဌာနဆိုင်ရာရုံးများကို ရှောင်ရှားကြရန် သထုံ PDF သတိပေး

မွန်ပြည်နယ်၊ သထုံခရိုင်အတွင်းမှာနေထိုင်ကြတဲ့ ပြည်သူတွေအနေနဲ့ မတ် ၁၄ ရက်နောက်ပိုင်း စစ်ကောင်စီဩဇာခံ ဌာနဆိုင်ရာရုံးတွေအနီး သွားလာတာတွေ ရှောင်ရှားပေးကြဖို့ သထုံမြို့နယ်ပြည်သူ့ကာကွယ်ရေးတပ်ဖွဲ့ PDF က မတ် ၁၂ ရက် ဒီကနေ့ သတိပေးစာ ထုတ်ပြန်ပါတယ်။

သထုံခရိုင်နဲ့ မြို့နယ် ထွေအုပ်ရုံး၊ လဝကရုံး၊ လျှပ်စစ်မီတာရုံးနဲ့ ဌာနဆိုင်ရာရုံး ဝန်ထမ်း အိမ်ရာတွေ အနီး သွားလာတာတွေ အထူးရှောင်ရှားကြဖို့ သတိပေးထားတာ ဖြစ်ပါတယ်။

ဒါ့အပြင် ဌာနဆိုင်ရာရုံးနဲ့ ဝန်ထမ်းအိမ်ရာအနီး နေထိုင်ကြတဲ့ ပြည်သူတွေအနေနဲ့လည်း ကလေးသူငယ်တွေကို နေအိမ်အပြင်ထွက် ဆော့က စားစေတာတွေ အထူးဂရုစိုက်ပေးကြဖို့နဲ့ လူစုလူဝေးနေရာကို ရှောင်ရှားပေးဖို့ သထုံ PDF က မေတ္တာရပ်ခံထားပါတယ်။

သထုံ PDF က သတိပေးစာ ထုတ်ပြန်ပြီးနောက် စစ်ကောင်စီက သထုံမြို့အတွင်း ကင်းလှည့်တာ တွေ ဆောင်ရွက်နေသလို မြို့အပြင်နေရာတွေ မှာလည်း ကင်းပုန်းချထားတယ်လို့ ဒေသခံတွေက ပြောပါတယ်။

သထုံမြို့နယ်မှာတော့ ပြည်သူ့ကာကွယ်ရေးတပ်ဖွဲ့တွေဟာ စစ်ကောင်စီရဲ့ ဌာနဆိုင်ရာရုံးတွေကို မကြာခဏဆိုသလို ဗုံးခွဲတိုက်ခိုက်နေပါတယ်။ DVB

ဆွမ်ပရာဘွမ်- ပူတာအို ကားလမ်းပြန်ဖွင့်

ကချင်ပြည်နယ်၊ ပူတာအိုခရိုင်၊ ဆွမ်ပရာဘွမ်ဂိတ်ကို ယနေ့ မတ်လ ၄ ရက် မနက် ၈ နာရီခန့်က ပြန်ဖွင့် ပေးခဲ့၍ စက်သုံးဆီ ကားများနှင့် ကုန် ကားများ ပူတာအိုမြို့သို့ သွားနိုင်ပြီ ဖြစ်ကြောင်း ဒေသခံများထံက ကနဦး စုံစမ်း သိရှိရသည်။

မြစ်ကြီးနား-ဆွမ်ပရာဘွမ်- ပူတာအို ကားလမ်းသည် စစ်ကောင်စီတပ်နှင့် KIA ဦးဆောင်သည့် ပူတာအို ပြည်သူ့ကာကွယ်ရေး တပ်ပေါင်းစုတို့ စစ်ရေး တင်းမာနေသည့် အတွက် ဖေဖော်ဝါရီ ၂၂ ရက်မှ စတင်၍ ယာယီ ပိတ်ထားခဲ့ခြင်း ဖြစ်သည်။

ယင်းလမ်းပိုင်း ပိတ်ထားစဉ် ပူတာအိုခရိုင် အတွင်း စားသောက်ကုန် ပစ္စည်းများ အပါအဝင် စက်သုံးဆီ ဈေးနှုန်းများ အဆမတန် မြင့်တက်ခဲ့ပြီး၊ ရှားပါး ပြတ်လပ်မှုနှင့် ကြုံတွေ့နေရသဖြင့် KIA တာဝန်ရှိသူများက မြစ်ကြီးနား – ဆွမ်ပရာဘွမ် – ပူတာအို လမ်းပိုင်း၌ မတ်လ ၂ ရက်နေ့ကစ၍ ဆီကားနှင့် ကုန်ကားများ ဖြတ်သန်းခွင့် ပြုခဲ့သည်။

သို့သော် မြစ်ကြီးနားမှ တက်လာသည့် ယာဉ်များကို ဆွမ်ပရာဘွမ်မြို့တွင် စစ်ကောင်စီတပ်က ဖြတ်သန်းခွင့် မပေးသည့်အတွက် ယမန်နေ့အ ထိ စက်သုံးဆီယာဉ်၊ ကုန်တင်ယာဉ်နှင့် ခရီးသည်တင်ယာဉ် စုစုပေါင်း ၁၀၀ ဝန်းကျင်နှင့် လူ ၂၀၀ ဝန်းကျင် စစ်ကောင်စီ စစ်ဆေးရေးဂိတ်တွင် စောင့်ဆိုင်းနေရကြောင်း သိရသည်။

မြစ်ကြီးနား- ဆွမ်ပရာဘွမ်- ပူတာအိုလမ်း အသုံးပြု သွားလာမည့် စက်သုံးဆီ၊ ကုန်တင်ယာဉ်များ မတ်လ ၂ ရက်နေ့မှစ၍ မနက် ၆ နာရီမှ ည နေ ၅ နာရီအတွင်း ဖြတ်သန်း သွားလာခွင့်ပြုကြောင်း ပူတာအိုခရိုင် ပြည်သူ့ကာကွယ်ရေးတပ်ဖွဲ့က ထုတ်ပြန်ထားသည်။ mizzima

သထုံမြို့နယ်၌ စစ်ကောင်စီယာဉ်တန်းတိုက် ခိုက်ခံရပြီး ၄ ဦးသေ၊ ၄ ဦး ဒဏ်ရာရ

မွန်ပြည်နယ်၊ သထုံမြို့နယ်၊ ပုတိမ်ရိုးကျေးရွာ၊ ရန်ကုန်-မော်လမြိုင်ကားလမ်းမပေါ်မှာ ဇန်နဝါရီ ၂၅ ရက် ဒီမနက် ၁ နာရီလောက်က စစ်ကောင်စီယာဉ်တန်း ကြားဖြတ်တိုက်ခိုက်ခံခဲ့ရတယ်လို့ ကေအန်ယူ တပ်မဟာ(၁) တာဝန်ရှိသူတွေက ဒီဗွီဘီကို ပြောပါတယ်။

ကား ၁၀ စီးပါ စစ်ကောင်စီယာဉ်တန်းဟာ ကျိုက်ထိုဘက်ကနေ သထုံမြို့နယ် လာရောက်စဉ် ကရင်အမျိုးသားလွတ်မြောက်ရေးတပ်မတော် KNLA တပ်မဟာ(၁) ၊ တပ်ရင်း (၂) နဲ့ ဒေသခံ PDF ပူးပေါင်းအဖွဲ့က ကြားဖြတ်တိုက်ခိုက်ခဲ့တာ ဖြစ်ပါတယ်။

ကြားဖြတ်တိုက်ခိုက်မှုကြောင့် စစ်ကောင်စီဘက်က ၄ ယောက်သေဆုံးပြီး ၄ ယောက်ဒဏ်ရာရရှိခဲ့ကာ စစ်ကားတစ်စီး ထိခိုက်ပျက်စီးခဲ့တယ်လို့ ကေအန်ယူ တပ်မဟာ(၁)အတွင်းရေးမှူး ပဒိုစောစိုးမြင့်က ပြောပါတယ်။

အဲဒီကြားဖြတ်တိုက်ခိုက်မှုအတွင်း စစ်ကောင်စီဘက်က ပြန်လည်ပစ်ခတ်ခဲ့ပေမယ့် KNLA နဲ့ ဒေသခံ PDF ပူးပေါင်းအဖွဲ့က ထိခိုက်ဒဏ်ရာရတာ မရှိဘဲ အောင်မြင်စွာ ဆုတ်ခွာနိုင်ခဲ့တယ်လို့ သထုံမြို့နယ်ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။

စစ်ကောင်စီဘက်က ရမ်းသန်းပြီး ပြန်ပစ်ခဲ့တဲ့အတွက်ကြောင့် ကားလမ်းဘေး နေအိမ်တစ်အိမ်က ကလေးငယ် တယောက် ခြေထောက် ကျဉ်ထိမှန် ဒဏ်ရာရရှိခဲ့တယ်လို့ ဆိုပါတယ်။

စစ်ကောင်စီယာဉ်တန်း ကြားဖြတ်တိုက်ခိုက်ခံရပြီးနောက် ကျိုက်ထိုမြို့နယ်နဲ့ သထုံမြို့နယ်မှာ စစ်ကောင်စီတပ်တွေ စစ်အင်အားတိုးချဲ့ပြီး စစ်ရေးလှုပ်ရှားမှု ပြုလုပ်လာတယ်လို့ ဒေသခံတွေက ပြောပါတယ်။ DVB

ရွှေပြည်သာမြို့နယ်တွင် ဒလန်ဟု နာမည်ထွက်နေသူ ပစ်ခတ်ခံရ၍ သေဆုံး

ရန်ကုန်တိုင်း၊ ရွှေပြည်သာမြို့နယ် အမှတ်(၉)ရပ်ကွက်တွင် ရဲသတင်းပေးဟု နာမည်ထွက်နေသူ ဦးဝင်းနိုင်ဆိုသူကို Wolves အဖွဲ့က ဒီဇင်ဘာလ ၁၉ ရက် နံနက် ၉ နာရီ ၄၅ မိနစ်အချိန်က ပစ်ခတ်ခဲ့ကြောင်း အဆိုပါအဖွဲ့ဝင်က ပြောသည်။

“ဆန္ဒပြတဲ့ အချိန်တွေကတည်းက ဝင်းနိုင်က ရဲတွေကိုခေါ်ပြီး ရပ်ကွက်( ၉ ) ထဲကလူတွေကို သေနတ်နဲ့ချိန်ခိုင်း၊ ဖမ်းခိုင်းတာတွေ လုပ်နေတာပါ။ အဲ့ဒီရပ်ကွက်ရုံးရဲ့ အုပ်ချုပ်ရေးမှူးနဲ့ သူနဲ့က အမြဲတတွဲတွဲပဲ ။ စစ်အုပ်စုရဲ့ဒေါက်တိုင် တစ်ခုဖြစ်လို့ ရှင်းလင်းခဲ့တာပါ။ ဒလန်လို့ နာမည်မထွက်ဘဲ ဒလန်လုပ်နေတဲ့သူတွေလည်း အများကြီးပဲ ကျွန်တော်တို့ သေသေချာချာ စုံစမ်းပြီး ဆက်လက်ရှင်းလင်းသွားဖို့ ရှိပါတယ်”ဟု အဆိုပါအဖွဲ့ဝင်က ဆိုသည်။

ဦးဝင်းနိုင်ကို Wolves အဖွဲ့ဝင်တစ်ဦးက ရွှေပြည်သာမြို့နယ် အမှတ် (၉) ရပ်ကွက် အတွင်း သေနတ်ဖြင့် ငါး ချက်ပစ်ခတ်ခဲ့ခြင်းဖြစ်ပြီး အခင်း ဖြစ်ပွားရာနေရာတွင် ပွဲချင်းပြီးသေဆုံးသွားကြောင်း Wolves အဖွဲ့ဝင်ကပြောသည်။ပစ်ခတ်မှုအပြီးတွင် စစ်ကောင်စီတပ်များနှင့် ရဲများက အ ခင်းဖြစ်ပွားရာနေရာနှင့် ( ၉ ) ရပ်ကွက် ပတ်ဝန်းကျင်အား ပိတ်ဆို့ စစ်ဆေးမှုများပြုလုပ်ခဲ့သည်ဟု Wolves အဖွဲ့ဝင်ကပြောသည်။ mizzima

« Older Entries