Category Archives: recent information

၂ နှစ်ခန့်အတွင်း စစ်အုပ်စု ပစ်ခတ်သတ်ဖြတ်မှုကြောင့် ကျဆုံးပြည်သူ ၂,၈၉၀ ကျော်ထိ ရှိလာ

မြန်မာနိုင်ငံမှာ အာဏာသိမ်း ၂ နှစ်နီးပါးအကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၈၉၂ ယောက်နဲ့ ဖမ်းဆီးထိန်းသိမ်းခံရသူပေါင်း ၁၇,၄၈၁ ယောက်ထိ ရှိလာခဲ့ပြီဖြစ်တယ်လို့ အေအေပီပီက ထုတ်ပြန်ထားပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၃ ခုနှစ်၊ ဇန်နဝါရီ ၂၆ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါတယ်။

နွေဦးတော်လှန်ရေးကာလအတွင်း ဒီနေ့အထိ ၁၃,၆၈၀ ယောက် လက်ရှိ ချုပ်နှောင်ခံထားရဆဲ ဖြစ်ပြီး အဲဒီထဲက ၂,၁၇၃ ယောက်ကတော့ ထောင်ဒဏ် ချမှတ်ခံထားရပါတယ်။

တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူ အရေတွက်ကတော့ ၁၀၁ ယောက်ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက် အပါအဝင် ၁၂၁ ယောက်ကတော့ မျက်ကွယ်ပြစ်ဒဏ် ချမှတ်ခံထားရတာကြောင့် သေ ဒဏ်ချမှတ်ခံထားရသူ စုစုပေါင်း ၁၄၃ ယောက် ရှိလာခဲ့ပြီ ဖြစ်ပါတယ်။

လတ်တလောအချိန်ထိ အာမခံနဲ့လွတ်မြောက်သူ ၂၄ ယောက်ရှိပြီး ပြန်လည်လွတ်မြောက်လာသူ ဦးရေကတော့ ၃,၇၇၇ ယောက် ရှိခဲ့တယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၂၄ ရက်ညနေ ၃ နာရီလောက်က တနင်္သာရီတိုင်း၊ လောင်းလုံးမြို့နယ်၊ ကျောက်နီမော်ကျေးရွာက နေအိမ်မှာ နေထိုင်ခြင်းမရှိဘဲ ရှောင်တိမ်းနေတဲ့ ဦးဇော်ဦးရဲ့ နေအိမ်ကို အကြမ်းဖက်စစ်အုပ်စု တပ်နဲ့ ပျူစောထီးအဖွဲ့တွေက ဝင်ရောက်ရှာဖွေ ချိပ်ပိတ်ခဲ့ပြီး အမျိုးသမီး ၂ ယောက်ကို ဖမ်းဆီးသွားခဲ့တယ်လို့ သိရပါတယ်။ ဖမ်းဆီးခံရတဲ့ အမျိုးသမီး ၂ ယောက်ထဲက ၁ ယောက်က ဦးဇော်ဦးရဲ့ အစ်မဝမ်းကွဲဖြစ်ပြီး နောက် ၁ ယောက်ကတော့ မအိအိဖြိုး ဖြစ်တယ်လို့ ဆိုပါတယ်။

ဒါ့အပြင် ဇန်နဝါရီ ၂၃ ရက်ကလည်း စစ်ကိုင်းတိုင်း၊ တမူးမြို့နယ်၊ ကျွန်းပင်သာကျေးရွာကနေ တမူးမြို့ထဲကိုသွားနေတဲ့ လူငယ် ၃ ယောက်ကို အကြမ်းဖက်စစ်အုပ်စုတပ်က ကွန်းတောင်းတပ်စခန်းရှေ့မှာ စစ်ဆေးမေးမြန်းပြီး ပြည်သူ့ကာကွယ်ရေးတပ်ဖွဲ့ (PDF) နဲ့ ဆက်သွယ်တယ်လို့ စွပ်စွဲကာ ဖမ်းဆီးခဲ့ပြီးနောက် သတ်ဖြတ်ခဲ့တယ်လို့ အေအေပီပီက ပြောပါတယ်။ အဆိုပါလူငယ်တွေကတော့ ကျွန်းပင်သာကျေးရွာက လက်မင်ထန်၊ မြို့မ ၁၄ အပိုင်း၊ ချောင်းနက်ကြီးကျေးရွာက ရွှေမင်းထန်နဲ့ အသက် ၁၇ နှစ်အရွယ် ငမ်မင်းဟောင်တို့ ဖြစ်ကြပါတယ်။ ဒါ့အပြင် သူတို့ရဲ့ ရုပ်အလောင်းတွေကို အကြမ်းဖက်စစ်အုပ်စုက မိသားစုဆီ ပြန်လည်ပေးအပ်ခြင်း မရှိခဲ့ဘူးလို့လည်း သိရပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန် ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ fatality-data@aappb.org အီးမေးလ်နဲ့ အဖမ်းအဆီး အချက်အလက်တွေကို detention-data@aappb.org အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။ DVB

ကြီးကန်ကျေးရွာတွင် ကင်းပုန်းလာဝပ်သည့် စစ်ကောင်စီတပ်ဖွဲ့ကို ရေစကြို ပကဖ က ဒရုန်းဖြင့်တိုက်ခိုက်

မကွေးတိုင်း ၊ရေစကြိုမြို့နယ်၊ ကြီးကန်ကျေးရွာတွင် ခလရ (၂၅၆) တပ်မှ ကင်းပုန်း လာဝပ်သည့် စစ်ကောင်စီတပ်ဖွဲ့ဝင်များကို ဇန်နဝါရီလ ၁၉ ရက်နေ့က ဒရုန်းဖြင့် နှစ်ကြိမ်တိုက်ခိုက်ခဲ့ကြောင်း ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ သတင်းနှင့်ပြန်ကြားရေးတာဝန်ခံက ပြော သည်။

၎င်းက “သတင်းရတာနဲ့ နေ့လယ် နှစ်ချက်ထိုးလောက်မှာ ဒရုန်းနဲ့ အရင်ထောက်ကြည့်တာ ။ တွေ့တော့ အီနာဂါ တစ်လုံးစချတာ ဒီကောင်တွေ ထိတယ်။ ထိတော့ ဒီကောင် တွေရမ်းသန်းပစ်တယ်။ သုံးနာရီလောက်မှာ နောက်ထပ် တစ်လုံးထပ်ချတာ။ ထိခိုက် သေဆုံးမှုအခြေအနေက အတိအကျမသိရသေးဘူး ။ကျတော်တို့ ပြန်သွားပြီး ခဏနေတော့ အခင်းဖြစ်တဲ့နေရာကို နာရေးကား နှစ်စီးယောက်လာတယ်လို့တော့ သိရတယ် “ ဟု ပြောသည်။

စစ်ကောင်စီတပ်ဖွဲ့ဝင်များသည် ပခုက္ကူ-ရေစကြို ကားလမ်းတစ်လျှောက် ခလ၇ (၂၅၆)တပ် အနီးတစ်ဝိုက်ရှိ ကျေးရွာများတွင် လုံခြုံရေးအ တွက် ကင်းပုန်းဝပ်ခြင်းများ မကြာခဏ ပြုလုပ်လေ့ရှိကြောင်း ရေစကြို ပကဖမှ တာဝန်ခံက ပြောသည်။

ရေစကြိုမြို့နယ် ပြည်သူ့ကာကွယ်ရေးတပ်ဖွဲ့သည် ပြီးခဲ့သည့်ရက်ပိုင်းကလည်း စစ်ကောင်စီက ကျင်းပမည့် ရွေးကောက်ပွဲအတွက် မဲစာရင်းပြုစုပေးနေသည့် လ၀ကရုံးကို ဝင်ရောက်စီးနင်းပြီးနောက် စာရွက်စာတမ်းများကို မီးရှို့ဖျက်စီးခဲ့‌သေးသည်။

စစ်ကောင်စီတပ်များသည် ရေစကြိုမြို့နယ်အတွင်းရှိ ကျေးရွာများကို မကြာခဏ စစ်ကြောင်းထိုးဝင်ရောက်ပြီး နေအိမ်များကို မီးရှို့ဖျက်ဆီးခြင်း ၊ ပြည်သူများပိုင်ဆိုင်သည့် ပစ္စည်းများကို ယူဆောင်ခြင်းများ ပြုလုပ်လေ့ရှိသည်။mizzima

ဖားကန့် ရှဒူဇွပ်ရွှေမှော်တွင် ပြည်သူ့စစ်အဖွဲ့နှင့် KIA စစ်ရေးတင်းမာနေ

ကချင်ပြည်နယ်၊ ဖားကန့်မြို့နယ်၊ ရှဒူဇွပ်ရွာမှ ရွှေမှော်လုပ်ငန်းရှင်များ ဇန်နဝါရီ ၁၄ နောက်ဆုံးထား ထွက်ခွာရန် ကချင်လွတ်လပ်ရေးတပ် မတော် (KIA) က သတိပေးပြီးနောက် ထိုဒေသကို စိုးမိုးထိန်းချုပ်ထားသည့် စစ်ကောင်စီ၏ ဝါရာဇွပ်ပြည်သူ့စစ်အဖွဲ့ကလည်း လမ်းများပိတ်ဆို့ထားလိုက်သည်ဟု ဒေသခံအချို့ထံမှ သိရသည်။

ရွာအနီး စစ်ကောင်စီ၏ အမှတ် ၂၉၇ တပ်ရင်းလည်း အခြေစိုက်ထားကြောင်း၊ ဤအခြေအနေတွင် ရွာအနောက်ဘက် မိုးကောင်းချောင်းဝန်း ကျင်၌ လုပ်ကိုင်သည့် ရွှေလုပ်ငန်းရှင်များကို KIA က ဇန်နဝါရီလဆန်းအတွင်း စာထုတ်ပြန် သတိပေးခဲ့ခြင်းဖြစ်ကြောင်း ဒေသခံအချို့က ဆို သည်။

ကျေးရွာအနီးနှင့် ဆီဆိုင်များတွင် စက်သုံးဆီသိုလှောင်မှုကို ဇန်နဝါရီ ၁၁ နောက်ဆုံးထားပြီး ရပ်ဆိုင်းရမည်၊ သိုလှောင်ထားသည့် ဆီဆိုင်များကို အရေးယူမည်ဖြစ်ကြောင်း KIA တပ်မဟာ ၂ ၏ အမှတ် ၁၄ တပ်ရင်းက ဇန်နဝါရီ ၇ ရက်စွဲဖြင့် ထုတ်ပြန်သည်။

KIA ၏ ခြိမ်းခြောက်မှုအပြီး ရွှေမှော်များမှ လုပ်ငန်းရှင်အချို့နှင့် အလုပ်သမားများ ထိုရွာမှ ထွက်ခွာသွားကြပြီး လုပ်ငန်းဆက်လုပ်နေသူ အ နည်းအကျဉ်းသာ ကျန်တော့သည်ဟု ရှဒူဇွပ်ရွာခံ အသက် ၄၀ ခန့်ရှိ အမျိုးသားတစ်ဦးက ပြောသည်။

ပြည်သူ့စစ်အဖွဲ့ကလည်း ဇန်နဝါရီ ၇ မှစတင်ပြီး ရွှေမှော်အတွင်းရှိ လမ်းများကို ပိတ်ဆို့ထားလိုက်ပြီး လမ်းများတွင် မိုင်းထောင်ထားလိုက်သည်ဟု သတင်းရကြောင်း အဆိုပါ ဒေသခံအမျိုးသားက ဆက်ပြောသည်။

“အဓိကကတော့ သူတို့ မှော်သွားတဲ့လမ်းတွေကို စက်သုံးဆီတို့ စားနပ်ရိက္ခာတို့ဘာတို့၊ ပိတ်တာလို့ ပြောတယ်၊ အခုဆို လူလည်း အသွားအ လာလုပ်လို့ မရတော့ဘူး” ဟု ဆိုသည်။

“အခုကတော့ ထွက်နေကြပြီ အကုန်လုံးက၊ ဆိုက်(လုပ်ကွက်) အကြီးကြီးတွေပေါ့၊ ယန္တရားနဲ့ တွဲလုပ်ရတဲ့ ဟာတွေဆိုရင် ထွက်သွားကြပြီ၊ နားလိုက်ကြပြီပေါ့ဗျာ၊ တချို့က ထွက်တယ်၊ တချို့က နားပြီးတော့ ဘာလုပ်ရမှန်းမသိ ဖြစ်နေကြတယ်”

ပြည်သူ့စစ်အဖွဲ့ကလည်း ဇန်နဝါရီ ၈ တွင် ရှဒူဇွပ်ရွာအနီး လီဒိုလမ်းမကြီးပေါ်၌ ကုန်တင်ကားနှင့် ခရီးသည်တင်ကားများကို စစ်ဆေးနေသည်ဟု သိရသည်။

ရွာအနောက်ဘက် ၅ မိုင်မှ ၁၀ မိုင်ခန့် ဝေးသည့် ရွှေမှော်များတွင် ရွှေလုပ်ကွက်ပေါင်း ၅၀ ထက်မနည်း ရှိနေပြီး လုပ်ငန်းရှင်တို့က မြေတူးစက်ယန္တရားကြီးများပါ အသုံးပြုကာ လုပ်ကိုင်နေကြသည်ဟု ရွာခံတချို့က ပြောသည်။

ထိုရွာသည် မြစ်ကြီးနား-တနိုင်း လီဒိုလမ်းမကြီးပေါ်တွင် ရှိပြီး ရွှေလုပ်ကွက်အကျိုးစီးပွားများကြောင့် ရွာအနီး တိုက်ပွဲ မကြာခဏ ဖြစ်ပွားလေ့ရှိသည်။

ယနေ့အထိ ပစ်ခတ်မှု မဖြစ်သေးသော်လည်း သတိဖြင့် စောင့်ကြည့်နေရသည်ဟု ရှဒူဇွပ်ဒေသခံ အမျိုးသမီးတစ်ဦးက ပြောသည်။

“စစ်ရေးကတော့ တင်းတာပေါ့၊ ဟိုဘက်ကလည်း တင်းတယ်၊ ဒီဘက်ကလည်း တင်းတယ်၊ ဒါပေမဲ့ ပစ်ခတ်တာတော့ မရှိသေးဘူး၊ ဟိုဘက် ပိတ်လိုက် ဒီဘက် ပိတ်လိုက် လုပ်နေကြတာ” ဟု ဆိုသည်။

အထက်ပါ အခြေအနေများနှင့် ပတ်သက်ပြီး ပိုမိုသိရှိရန် KIA ပြန်ကြားရေးတာဝန်ခံ ဗိုလ်မှူးကြီးနော်ဘူကို Myanmar Now က ဖုန်းဆက်သွယ်မေးမြန်းသော်လည်း ဖုန်းလက်ခံဖြေကြားခြင်းမရှိသေးပေ။

ကမ္ဘာကျော်ကျောက်စိမ်းများ ထွက်ရှိရာ ဖားကန့်မြို့နယ်သည် စစ်ကောင်စီတပ်၊ ပြည်သူ့စစ်များနှင့် KIA တို့အကြား ပြိုင်ဆိုင်မှုပြင်းထန်သည့် ဒေသဖြစ်ပြီး တိုက်ပွဲ ရံဖန်ရံခါ ဖြစ်ပွားတတ်သည်။myanmar now

လူဦးရေစာရင်း ကောက် ရန် ပရဟိတအဖွဲ့၊ ကြက်ခြေနီနှင့် ဆရာ၊ ဆရာမ အများစု မပူးပေါင်း ၊ ပြည်သူအများစု လက်မခံ၍ အုပ် ချုပ်ရေးမှူးများက ခြိမ်း ခြောက်မှုများရှိပြီး သန်းခေါင်စာရင်းများ မှန်းဆထည့်သွင်း

ရန်ကုန်တိုင်းတွင် လူဦးရေစာရင်းကောက်ရန် ပရဟိတအဖွဲ့၊ ကြက်ခြေနီနှင့် ဆ ရာ၊ ဆရာမ အများစု မလာရောက်ကြသည့်အပြင် ပြည်သူအ များစုကလည်း မပူး ပေါင်းသောကြောင့် ရပ်ကွက် အုပ်ချုပ်ရေးမှူးနှင့်အဖွဲ့များက စာရင်းများ ကြိုတင်ပြုလုပ်မှန်းဆထည့်သွင်းကြကြောင်း သိရှိရသည်။

“ရန်ကုန်တိုင်းအတွင်း မြို့တွေ့မှာရှိတဲ့ ရပ်ကွက် ပြည်သူတွေဆီကို အိမ် ထောင် စု စာရင်း လိုက်ကောက်ကြတယ် ကြက်ခြေနီ၊ မီးသတ် ၊ ဆ ရာ/ဆရာမတွေနဲ့ ပရဟိတ သမားတွေ ကို စေတနာဝန်ထမ်းတွေဆိုပြီး အမိန့်စာထုတ်ပြီး စကစ ခန့် ရာအိမ်မှူး၊ဆယ်အိမ်ခေါင်းတွေကို ဝန်းရံခိုင်းတယ်။ ဒါပေမယ့် အများစုက လာတဲ့သူမရှိတော့ အကြမ်းဖက်စကစခန့် ရာအိမ်မှူးတွေပဲ အိမ်ထောင် စုစာ ရင်း၊ ဧည့်စာရင်းတွေ ကိုင်ပြီး သူတို့အဆင်ပြေလောက်တဲ့ အိမ်တွေ လောက်ပဲ ဝင်ပြီ ပြန်သွားကြတယ်။ သူတို့ လုပ်တာ မအောင် မြင်ဘူးဆိုတာ ပြောလို့ ရပါ တယ်။ ဘယ်သူကမှ လက်မခံကြတာ။ ရပ်ကွက်အုပ်ချုပ်ရေးတွေက အိမ်ဌား တွေဆို ဧည့်စာရင်းတောင်းပြီး စာရင်းရေးသွားကြတယ်။ ကျနော်တို့ ပရဟိတ အသင်းတွေ ဝန်ထမ်းတွေ အားလုံးနဲ့ ပြည်သူကို ရန်တိုက်ပေးတာ လက်မခံ ကြဘူး။ စာရင်းထည့်ထားတဲ့ စေတနာဝန်ထမ်းတွေ ဆရာ/ဆရာမတွေ မလာ ကြတော့ တိုင်ပတ်သွားကြတယ်။ လိုက်ကောက်တဲ့ အိမ်ထောင်စု စာရင်းတွေ က ရာအိမ်မှူးနဲ့စကစခန့် အုပ်ကြီးတွေက လုပ်လာပြီးသား။ စာရင်းဇယား တွေ က တော့ ဟန်ပြသက်သက်ပဲ” ဟု ရန်ကုန်အခြေစိုက် ပရဟိတ အသင်း ခေါင်းဆောင်တစ်ဦးက ပြောသည်။

ထို့ပြင် တော်လှန်ရေးအင်အားစုများနှင့် အမျိုးသားညီညွတ်ရေးအစိုးရက စစ်ကောင်စီ၏ အတုအယောင် ရွေးကောက်ပွဲကို လက်မခံရန်နှင့် လူ ဦးရေ သန်းခေါင်စာရင်း ကောက်ယူမှုများကို အချက်အလက်အမှားများ ပေးရန် ကြေညာထားသဖြင့် ပြည်သူများက အချက်အလက် အမှား ပေးကြကြောင်း သိရှိရသည်။

“မရမ်းကုန်းမြို့နယ် ၁ ရပ်ကွက်၊ မြို့သစ် ၁ လမ်းမှာ လမ်းလူကြီး တင်ဝင်း၊ နောက် တစ်ဦးက အေးမြင့်သောင်း၊ မြို့သစ်ကလူကြီးသက်နိုင်၊ မြင့်စိုး၊ မြို့သစ် ၂ လမ်းက မြတ်ထူးတို့ ခေါင်ဆောင်ပြီး လူဦးရေစာရင်းကောက်တယ်။ ကျနော် တို့တော့ ပေါက်ကရတွေ ပြောလိုက်တယ်။ အကို နိုင်ငံခြား သွားနေတာ ကိုလည်း သေပြီပြောထားတယ်”ဟု ဒေသပြည်သူတစ်ဦးက ဆိုသည်။

မရမ်းကုန်းမြို့နယ် ၂ ရပ်ကွက်တွင် ကျောင်းဆရာ၊ ဆရာမတချို့က စေတနာ့ ဝန်ထမ်း အဖြစ် လူဦးရေစာရင်းကောက်ယူရာတွင် ပါဝင်ကြသော် လည်း မြို့နယ် အများစုတွင် စေတနာ့ဝန်ထမ်း အဖြစ် လုပ်ကိုင်ရန် ဖိတ်ခေါ်ကြသူများ မလာရောက်သဖြင့် တစ်အိမ် တက်ဆင်း မဟုတ်တော့ဘဲ ရပ်ကွက်ထိပ်တွင် လမ်းပိတ်၍ လာရောက်စာရင်းပေးသွင်းသူကိုသာ စာရင်းမှတ်ကြကြောင်း သိရှိရသည်။

“ရပ်ကွက်လူကြီးတွေကလည်း ကြောက်တော့ လမ်းထိပ်မှာ ခုံလေးချထားတယ်။ ပေးချင်တဲ့ သူ လာပေး။ မပေးလည်း အတင်း အကျပ် မလုပ်ရဲဘူး။ လှိုင် သာယာ မှာ လူမိုက်တွေနဲ့ လူဦးရေစာရင်းကောက်တာ ဖုန်းနံပါတ် တောင်း တယ်။ မပေးရင် ရဲခေါ်မယ် စစ်တပ်ခေါ်မယ်နဲ့ ခြိမ်း ခြောက်မှု တွေ လည်း ဖြစ်သွားတယ်။ ဒါပေမယ့် အများစုသော ပြည်သူတွေ စာရင်း ကောက် တဲ့ အချိန် အိမ်တွေမှာ မရှိကြဘူး။ အလုပ်သွားကြတော့ ရပ်ကွက် အုပ်ချုပ် ရေးအဖွဲ့တွေလည်း မတတ်နိုင်ကြဘူး။ ညဘက်လည်း သူတို့ မသွားရဲတော့ စာရင်း တွေ မှန်းထည့်တာမျိုးလုပ်ကြတယ်” ဟု လှိုင်သာယာမှ ရပ်ကွက် အုပ်ချုပ် ရေးအဖွဲ့ဝင် ရာအိမ်မှူးတစ်ဦးက ဆိုသည်။

အင်းစိန်မြို့နယ် ကမ်းနားရပ်ကွက်တွင် ရပ်ကွက်အုပ်ချုပ်​ရေးမှူး စိုးမြင့်၊ ရာအိမ်မှူး ပိုကြီး၊ ရာအိမ်မှူး​ဟောင်းပွဲစားမြင့်သိန်း၊ ထောင်ထွက် လူ မိုက်​ ကျော်ဝင်းစိန်နှင့်ကျင်ဟုတ်တို့က စစ်ကောင်စီအလိုကျ လူဦးရေ စာရင်း ပေးရန် နှင့် မပေးသည့်အိမ်များကို တစ်မိသားစုလုံးသတ်ပစ်မည် ခြိမ်းခြောက် နေကြောင်း အင်းစိန်ကမ်းနားရပ်ကွက်သူရပ်ကွက်သားများက ပြောသည်။

စစ်ကောင်စီက ဇန်နဝါရီ ၉ ရက်နေ့မှ ၃၁ ရက်နေ့အထိ လူဦးရေစာရင်းများ ကောက်ယူမည်ဟု ကြေညာထားပြီး အတုအယောင် ရွေးကောက် ပွဲ ကျင်းပရန် ပြင်ဆင်လျက်ရှိကြောင်း သိရှိရသည်။ khit thit

မင်းတပ်မြို့နယ်အတွင်း စစ်ကောင်စီတပ်က စစ်ကြောင်းထိုးလာ၍ ဒေသခံများ ထွက်ပြေးနေရ

ချင်းပြည်နယ်၊ မင်းတပ်မြို့နယ်အတွင်းရှိ တိုက်နယ်အမှတ်(၁)နှင့် အမှတ်(၃)ကျေးရွာ များဘက်သို့ ဇန်နဝါရီလ ၆ ရက်နေ့မှစတင်ပြီး မင်းတပ်မြို့ပေါ်မှ တပ်ရင်း(၂၇၄)က အင်အား ၁၀၀ ဝန်း ကျင်ဖြင့် မင်းတပ်-မတူပီလမ်းအတိုင်း စစ်ကြောင်းတစ်ကြောင်းနှင့် ထီးလင်းဘက်ခြမ်း ချင်းနှင့်မကွေး နယ်စပ်မှ အင်အား ၈၀ ခန့်စစ်ကြောင်းတစ်ကြောင်း တက်လာနေသည်ဟု ဒေသခံများထံမှသိရသည်။

မကွေးနယ်စပ် ထီးလင်းဘက်ခြမ်းမှတက်လာသည့်စစ်ကြောင်းတွင် စစ်ကောင်စီတပ်သားများအပြင် ပျူစောထီးများပါဝင်သည်ဟုသိရပြီး မင်းတပ်မြို့နယ် ဝီလူးကျေးရွာသစ်၌ လတ်တလောစခန်းချနေပြီး မင်းတပ်မြို့ ပေါ်မှတက်လာသည့်စစ်ကြောင်းသည် တိုက်နယ်အမှတ်(၃) မဲင်ရွာသို့ ရောက်ရှိနေသည်ဟု သိရသည်။

“အခုရက်ပိုင်းမှာ ဆက်တိုက်ဆိုသလို ညဘက်တွေမှာ လေယာဉ်ပျံတွေလာတယ်။ လာတယ်ဆိုတဲ့ နေရာ မှာ အမြင့်ကြီးကနေမဟုတ်ဘဲ ရွာပေါ်မှာနိမ့်နိမ့်လေးပျံလာတာ။ နှစ်ရက်ဆက်တိုက်ရှိပြီဆိုတော့ ရွာထဲက လူတွေကကြောက်ပြီး ဘေးလွတ်ရာကို ရှောင်ပြေးကုန်ပြီ။ ကျွန်မတို့က ဒီရွာမှာစစ်ဘေးလာရှောင်တဲ့သူ တွေဆိုတော့ ဘယ်မှပြေးဖို့လည်း မစဉ်းစားတက်တော့ကျန်ခဲ့တယ်’’ ဟု မင်းတပ်မြို့ပေါ်မှ စစ်ဘေးရှောင် လာသူတစ်ဦးက ပြောသည်။

ယခုအခါ မင်းတပ်မြို့ပေါ်တွင် MPT ဖုန်းလိုင်းများအားလုံးကိုဖြတ်တောက်ထားပြီး စစ်ကောင်စီတပ်မှ တိုက်နယ်အမှတ်(၁)နှင့် အမှတ်(၃)ဘက်ခြမ်းကို အင်အားအများအပြားဖြင့် ထိုးစစ်ဆင်လာနေသည်ဟု မြေပြင်ရှိ သတင်းရင်းမြစ်များထံမှ သိရသည်။

“အခုထွက်လာတဲ့စစ်ကြောင်းတွေက အရင်ကလိုမဟုတ်တော့ဘူး။ လေကြောင်းကို အရမ်းအားကိုးလာ ကြတယ်။ စစ်ကြောင်းမထိုးခင်နဲ့ ထိုးနေချိန်တွေမှာ တောက်လျောက်ဆိုသလို လေယာဉ်နဲ့အပေါ်ကနေ ကင်းထောက်ပေးနေတယ်’’ ဟု မြေပြင်ရှိသတင်းရင်းမြစ်တစ်ဦးကလည်ပြောသည်။mizzima

ဒီပဲယင်းတွင် စစ်တပ်က ဒီဇင်ဘာလအတွင်း ကျေးရွာ ၂၂ ခုမှ ဘုန်းကြီးကျောင်းများ ၊ စာသင် ကျောင်းများ အပါအဝင် အိမ်ခြေ ၂၉၀၀ ကျော်ကို မီးရှို့ဖျက်ဆီးခဲ့

စစ်ကိုင်းတိုင်း၊ ဒီပဲယင်းမြို့နယ်တွင် ဒီဇင်ဘာလအတွင်း စစ်တပ်က ကျေးရွာ ၂၂ ခုမှ ဘုန်းကြီး ကျောင်းများ၊ စာသင်ကျောင်းများ အပါအဝင် နေအိမ် ၂၉၀၀ ကျော် မီးရှို့ ဖျက်ဆီးခဲ့ကြောင်း ဒီပဲယင်း မြို့နယ် ညီနောင်များ အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

ဒီဇင်ဘာလ ၁ ရက်နေ့မှ ဒီဇင်ဘာလ ၂၇ ရက်နေ့ အထိ အကြမ်းဖက် စစ်တပ်က ဒီပဲယင်း မြို့နယ် အတွင်းရှိ ကျေးရွာ ၂၂ ခုကို မီးရှို့ဖျက်ဆီးခဲ့ပြီး နေအိမ် ၂၉၀၀ ကျော်ပြာကျခဲ့ကြောင်း၊ ထို့ပြင် စစ်တပ် က ကျေးရွာ ၄ ခုမှ ဘုန်းကြီးကျောင်း ၄ ကျောင်းကိုလည်း မီးရှို့ဖျက်ဆီးခဲ့ကြောင်း သိရသည်။

ဒီပဲယင်းမြို့နယ်အတွင်း စစ်တပ်က နေအိမ်များကို မီးရှို့ဖျက်ဆီးရာတွင် ပျော်ဘွယ်ရွာမှ နေအိမ် ၂၃ လုံး၊ မဲအိုးရွာမှ နေအိမ် ၈၄ လုံး၊ ညောင်ကြီးကုန်းရွာမှ နေအိမ် ၆၅ လုံး၊ လက်ယက်ကုန်းရွာမှ နေအိမ် ၁၈၆ လုံး၊ မူးခံတွင်းရွာမှ နေအိမ် ၁၆၃ လုံး၊ ညောင်လှရွာမှ နေအိမ် ၂၀၃ လုံး၊ ကံကုန်းရွာမှ နေအိမ် ၁၄ လုံး၊ ဝဲကြီးရွာမှ နေအိမ် ၈၅ လုံး၊ သပြေသာရွာမှ နေအိမ် ၂၅ လုံး၊ ရုံးသာရွာမှ နေအိမ် ၃၁ လုံး၊ နများ ရွာမှ ၃၁၈ လုံး၊ ယဥ်ကျေးရွာမှ နေအိမ် ၁၆ လုံး၊ မူးရိုးကုန်းရွာမှ နေအိမ် ၈၈ လုံး၊ ဘန့်ဘွေးရွာမှ နေအိမ် ၂၀ လုံး၊ အင်ပင်ရွာမှ နေအိမ် ၂၅၀ လုံး၊ ကုန်းတဲရွာမှ နေအိမ် ၇၅ လုံး၊ ကုန်းကြီးရွာမှ နေအိမ် ၁၃ လုံး၊ ပေါက်ရင်းရွာမှ နေအိမ် ၁၀ လုံး၊ ချောင်းပေါက်ရွာမှ နေအိမ် ၃၂ လုံး၊ အေးသာယာ (ပျံကျ ကျေးရွာ) မှ နေအိမ် ၄၀၀ ကျော်ခန့်နှင့် ကြည်ကျေးရွာ နေအိမ် ၃၀၀ ခန့်၊ ဘုရားထွက် ကျေးရွာမှ နေအိမ် ၄၀၀ ခန့် ကို မီးရှို့ဖျက်ဆီးခဲ့ကြောင်း သိရှိရသည်။

ထို့ပြင် ဒီပဲယင်းမြို့နယ်အတွင်းရှိ ညောင်လှရွာမှ ကံဦးဘုန်းကြီးကျောင်း၊ ယဉ်ကျေးရွာမှ ယဉ်ကျေး တော ဘုန်းကြီး ကျောင်း၊ မူးရိုးကုန်းရွာမှ ရန်ကွင်းကြီး ဘုန်းကြီးကျောင်းနှင့် ညောင်ကြီးကုန်းရွာမှ ညောင်ကြီးကုန်းဘုန်းကြီးကျောင်းတို့ကိုလည်း စစ်တပ်က မီးရှို့ဖျက်ဆီးခဲ့ကြောင်း သိရသည်။khit thit

စစ်တွေတွင် စစ်ကောင်စီရေတပ်က မော်တော် ဘုတ်တစီးလျှင် ကျပ်ငွေ ၅၀,၀၀၀ ဆက်ကြေး တောင်းနေ

ရခိုင်ပြည်နယ်၊ စစ်တွေမြို့ ဆပ်ရိုးကျချောင်းအတွင်း ဝင်ရောက်လာတဲ့ မော်တော်ဘုတ်တွေကို တစီးလျှင် ကျပ် ၅၀,၀၀၀ စစ်ကောင်စီရေတပ်ကို ဆက်ကြေးပေးနေရအတွက် အခက်တွေ့နေကြတယ်လို့ စက်လှေသမားတွေက ပြောပါတယ်။

ပေါက်တောမှ မော်တော်ဘုတ်သမားတဦးက “စစ်တွေ ဆပ်ရိုးကျချောင်း အဝင်ဝမှာ ရပ်ထားတဲ့ နေဗီက မော်တော်ဘုတ်တစီးကို ငွေငါးသောင်းစီ ကောက်စားနေတာ။ ကျနော်တို့ မော်တော်ဘုတ်သမားတွေက ဆီစျေးကလည်း တက်နေတယ်၊ ခရီးသည်တွေကလည်း နည်းနေတယ်။ သူတို့ကိုလည်း ငွေငါးသောင်းစီ ပေးနေရတော့ အတော်လေး အခက်အခဲ တွေ့နေရပါတယ်” လို့ ​ပြောပါတယ်။

ပုဏ္ဏားကျွန်း၊ မြေပုံ၊ ပေါက်တော၊ ကျောက်ဖြူ၊ မင်းပြား စတဲ့မြို့နယ်တွေကနေ စစ်တွေမြို့ကို ဝင်လာတဲ့ မော်တော်ဘုတ်တွေဟာ စစ်တွေ ဆပ်ရိုးကျချောင်းအဝင်ဝမှာ ရပ်တန့်နေတဲ့ စစ်ကောင်စီရေတပ်ကို စက်လှေတစီး ငွေငါးသောင်းကျပ်စီ ပေးဆောင်နေကြရတာပါ။

စစ်တွေမြို့ ဆပ်ရိုးကျချောင်းအဝင်ဝမှာ ရပ်တန့်ထားတဲ့ စစ်ကောင်စီရေတပ်ကို အရင်က မော်တော်ဘုတ်တစီး ၁ သိန်းအထိပေးခဲ့ရပြီး အပစ်အခတ်ရပ်စဲပြီးနောက် မော်တော်ဘုတ်တစီးကို ၅၀,၀၀၀ ကျပ် ပေးနေရတာဖြစ်ပြီး စစ်တွေမှအထွက် မော်တော်ဘုတ်တွေ ကုန်စည်တွေ တင် ဆောင်လာပါက ကုန်တန်ဖိုးကို ရာခိုင်နှုန်းနဲ့ ပေးဆောင်နေကြရတယ်လို့ စစ်တွေမြို့မှ မော်တော်ဘုတ်သမားတွေက ပြောပါတယ်။

“‌ကျနော်တို့ အရင်က မော်တော်ဘုတ်တစီး စစ်တွေ ဆပ်ရိုးကျချောင်းကို ဝင်လာတာနဲ့ နေဗီကို ၁ သိန်းစီပေးရတယ်။ အခု အပစ်ရပ်တော့မှ တစီးကို ၅၀,၀၀၀ ပေးနေရတာ။ စစ်တွေက ကုန်တွေတင်ပြီး အထွက်မှာ တင်လာတဲ့ကုန်တန်ဖိုးရဲ့ ရာခိုင်နှုန်းအလိုက် ပေးနေကြရတုန်းပါ။”

အလားတူ စစ်တွေမြို့နဲ့ ပေါက်တောကြားရှိ တောင်ဖူးချောင်းအထွက်ဝမှာလည်း စစ်ကောင်စီရေတပ်က မြင်တွေ့သမျှ မော်တော်ဘုတ်တွေကို လိုက်လံငွေတောင်းခံတာတွေ ပြုလုပ်နေတယ်လို့ ဒေသခံ မော်တော်ဘုတ်သမားတွေဆီက သိရပါတယ်။ DVB

ဆားလင်းကြီးတွင် တရုတ်ဝမ်ပေါင်ကုမ္ပဏီအစောင့် စစ်တပ် တိုက်ခိုက်ခံရမှု ၂ ဦး သေဆုံး၊ ဒီးမော့ဆို၊ အရာတော်နှင့် မြင်းမူတို့တွင် စစ် ကြောင်းများကို တိုက် ခိုက် မှု စစ်သား ၈ ဦးသေဆုံး

စစ်ကိုင်းတိုင်း၊ ဆားလင်းကြီးမြို့နယ်တွင် တရုတ်ဝမ်ပေါင်ကုမ္ပဏီအစောင့် စစ်တပ် ကို PDF များ တိုက်ခိုက်ရာ ရဲ ၂ ဦးသေဆုံးကြောင်း၊ ဒီးမော့ဆို၊ အရာ တော် နှင့် မြင်းမူတို့တွင်လည်း စစ်ကြောင်းများကို တိုက်ခိုက်မှုများ ဖြစ် ပွားပြီး စစ်သား ၈ ဦးသေဆုံးကြောင်း ဒေသကာကွယ်ရေးတပ်ဖွဲ့များက ပြောသည်။

တရုတ်ဝမ်ပေါင်ကုမ္ပဏီအစောင့် တပ်ဖွဲ့ကို PDF များက လက်နက်ကြီးဖြင့် တိုက်ခိုက်မှု ရဲ ၂ ဦးသေဆုံး

===========================================

စစ်ကိုင်းတိုင်း၊ ဆားလင်းကြီးမြို့နယ်၊ ပုသိမ်-မုံရွာလမ်းဆုံရှိ မြန်မာဝမ်ပေါင် ကုမ္ပဏီခြံစောင့် အကြမ်း ဖက်စစ်သားများကို မနေ့က ဒီဇင်ဘာလ ၈ ရက်နေ့ ည ၇ နာရီခွဲခန့်အချိန် လက်နက်ကြီးဖြင့် ပစ်ခတ် တိုက် ခိုက်ခဲ့ရာ အကြမ်းဖက် စစ်တပ် လက်အောက်ခံ ရဲ (၂)ဦး သေဆုံးခဲ့ကြောင်း သိရသည်။

“နာရီဝက်လောက်အကြာပစ်ခတ်တိုက်ခိုက်ခဲ့တာ၊ ၄၀ မမနဲ့ ၄ ချက်ပစ်ခဲ့တာ၊ ကင်းတဲပေါ်ကျပြီး ရဲ နှစ် ယောက်တော့ သေနိုင်တယ်၊ ဒီမနက်လည်း သယ် သွား တယ်ကြားတယ်၊ ညကတော့ လက်နက်ငယ်တွေနဲ့ ရမ်းပစ်တယ်၊ မီးပိတ် ပြီးတော့လည်း ပတ်ဝန်းကျင်ကို လိုက်ရှာနေကြသေးတယ်၊ ကျနော်တို့ တပ်ဖွဲ့ ဝင်တွေ ဘေးကင်းစွာဆုတ်ခွာနိုင်ခဲ့ပါတယ်ဗျ” ဟု National Revolution Guards PDF တပ်ဖွဲ့မှ ဗိုလ်မော်ကွန်း က ရန်ကုန် ခေတ်သစ်သတင်းဌာနသို့ ပြောသည်။

ဝမ်ပေါင်ကုမ္ပဏီအတွင်းရှိ အကြမ်းဖက်စစ်သားများက အင်အားအလုံးအရင်း ဖြင့် ထွက်ခွာတိုက်ခိုက်ခဲ့ သည့်အတွက် ပြန်လည်ဆုတ်ခွာခဲ့ရကြောင်း၊ လက် နက် ခဲယမ်းလိုအပ်ချက်ရှိနေပါသဖြင့် မိဘပြည်သူ များအနေဖြင့် ဝိုင်းဝန်း ကူညီပေးပါရန် မေတ္တာရပ်ခံပါကြောင်း ဗိုလ်မော်ကွန်းက ပြောသည်။

ယင်းတိုက်ခိုက်မှုကို အမျိုးသားတော်လှန်ရေး ပြောက်ကျားတပ်ဖွဲ့ (National Revolution Guards PDF) နှင့် တစ်ကိုယ်တော် သုဘရာဇာ အဖွဲ့တို့ပူးပေါင်း တိုက်ခိုက်ခဲ့ခြင်းဖြစ်ကြောင်း သိရသည်။

ဒီးမော့ဆိုတွင် တိုက်ပွဲ ပြင်းထန်ပြီး စစ်တပ်ဘက်မှ ၅ ဦးသေဆုံး

===================================

ကယားပြည်နယ်၊ ဒီးမော့ဆိုမြို့နယ်၊ ကုန်းသာကျေးရွာအနီးသို့ အကြမ်းဖက် စစ်ကောင်စီတပ်မှ စစ် ကြောင်း ၃ ကြောင်းဖြင့် ဒီဇင်ဘာလ ၆ ရက် ည ၁၁ နာရီ ၄၅ မိနစ်ခန့်က ထပ်မံစစ်ကြောင်း ထိုးလာ ရာ မိုင်းမိပစ်ခတ်ခံရပြီး စစ်သား (၅) ဦးသေဆုံးခဲ့ကြောင်း KRU ထံမှ သိရသည်။

ကုန်းသာကျေးရွာနှင့် အနီးတစ်ဝိုက်ကို တပ်စွဲနေရာ ယူထားသော စစ်သားများ ကို ကယား(ကရင်နီ) တော်လှန်ရေး တပ်ပေါင်း(KRU)နှင့် ပူး ပေါင်းအဖွဲ့မှ ဒီဇင်ဘာ လ ၁ ရက်နေ့တွင် တိုက် ထုတ်ရှင်းလင်းခဲ့ပြီး နယ်မြေစိုးမိုးထိန်း ချုပ် ထားစဉ် အကြမ်းဖက်စစ်ကောင်စီတပ်မှ ထပ်မံစစ်ကြောင်း ထိုးဝင်ရောက် လာသဖြင့် ခုခံတိုက်ခိုက်ရာ ဒီဇင်ဘာလ ၆ ရက်နေ့မှ ၇ ရက်နေ့အထိ တစ်ရက် တာ တိုက် ပွဲ ပြင်းထန်ခဲ့ခြင်းဖြစ် သည်။

ယင်းတိုက်ပွဲအတွင်း အကြမ်းဖက်စစ်သား ၄ ဦးမှာ မိုင်းနင်းမိ၌ သေဆုံးခဲ့ပြီး တစ်ဦးကို အနီးကပ်ပစ်ခတ် ခဲ့ရာ သေဆုံးသွားကြောင်း၊ လက်နက်အင်အား လူအင်အားမမျှ၍ KRU ပူးပေါင်းတပ်ဖွဲ့မှ ဆုတ်ခွာပေးခဲ့ ရကြောင်း၊ ထိုသို့ ဆုတ်ခွာ စဉ် ပြည်သူ့ကာကွယ်ရေး ရဲဘော် ၅ ဦးပျောက် ဆုံးခဲ့ပြီး လိုက်လံ ရှာဖွေရာ ၄ ဦး မှာ ဒဏ်ရာဖြင့်ပြန်လည်တွေ့ရှိကာ တစ်ဦးမှာ ယနေ့ အထိ ပျောက်ဆုံးနေဆဲဖြစ်ကြောင်း သိရသည်။

အရာတော်-မုံရွာလမ်းတွင် ကင်းပုန်းဝပ်နေသော စစ်သားများကို တိုက်ခိုက်မှု စစ်သား ၃ ဦးသေဆုံး

==========================================

စစ်ကိုင်းတိုင်း၊ မုံရွာ-အရာတော်လမ်းမပေါ်ရှိ ကမ်းပြူအရှေ့ရွာအနီးတွင် ဒီဇင်ဘာ လ ၇ ရက် ညနေ ၆ နာရီခန့်က မိုင်းကွင်းပေါ်သို့ တည့်တည့် ရောက် လာသော ကင်းပုန်းဝပ်စစ်သားများကို မိုင်းဆွဲတိုက်ခိုက် ခဲ့ရာ စစ်သား ၃ ဦးသေဆုံးပြီး (၂) ဦးအပြင်းအထန်ဒဏ်ရာရရှိခဲ့ကြောင်း Danger Force LPDF ထံမှ သိရသည်။

ယင်းအကြမ်းဖက်ကင်းပုန်းဝပ်စစ်သားများကို Danger Force LPDF ၊Zero ပြောက်ကျားတပ်ဖွဲ့(မြင်းခြံ)၊ စစ်ကိုင်းနွေဦးရဲဘော်(စစ်ကိုင်းတိုင်း) ၊ ကြယ်နီ တပ်ဦး၊ မုံရွာခရိုင် တပ်ရင်း(၁၉)တို့မှ ပူးပေါင်းကာ ပဒေ သာမိုင်း (၅)လုံးဖြင့် ဖောက်ခွဲတိုက်ခိုက်ခဲ့ခြင်းဖြစ်သည်။

မိုင်းခွဲတိုက်ခိုက်ခံရမှုကြောင့် အကြမ်းဖက်စစ်ကောင်စီတပ်သားများက သေ နတ် များ ရမ်းသမ်းပစ်ခတ် သေဆုံးဒဏ်ရာရစစ်သားများကို အ ရာ‌တော် ဆေးရုံ ကြီးသို့ သယ်ဆောင်သွားကြောင်း၊ အလားတူ ဒီဇင် ဘာလ ၇ ရက် ညနေ ၆ နာရီ ခန့်၌လည်း အရာတော်-မုံရွာလမ်းမပေါ် ချမ်း သာရွာ ဘုန်းကြီးကျောင်း အနီး ကင်းပုန်းဝပ်နေသော အကြမ်းဖက်စစ်သားများကို (၁၅)မိနစ်ခန့်အကြာ ပစ်ခတ်တိုက်ခိုက်ခဲ့ ကြောင်း Danger Force LPDF ထံမှ သိရသည်။

မြင်းမူမြို့နယ်၊ မုံရွာ-မန္တလေးလမ်းပေါ်တွင် စစ်ကား ၆ စီးကို မိုင်းဆွဲတိုက်ခိုက်

===========================================

စစ်ကိုင်းတိုင်း၊ မြင်းမူမြိုနယ်၊ မုံရွာ-မန္တလေးလမ်းမပေါ်တွင် ဒီဇင်ဘာလ ၈ ရက် ည ၁၀ နာရီ ခန့်က အကြမ်းဖက်စစ်ကောင်စီကား ၆ စီးကို မိုင်းဆွဲတိုက်ခိုက်ခဲ့ရာ ကားတစ်စီးထိမှန်ပျက်စီးပြီး ထိုးရပ် သွားကြောင်း Moe Nyo Revolution Force ထံမှ သိရသည်။

စစ်ကိုင်းမြို့၊ တပ်မ (၃၃) မှ မုံရွာဘက်သို့ ထွက်ခွာလာသော စစ်ကောင်စီ တပ်သားများ လိက်ပါလာသည့် Express ကား ၆ စီးကို နဘဲကြူးဇရပ်အနီးတွင် Moe Nyo Revolution Force (M.N.R.F) နှင့် PENTAGRAMငါးထောင့်ကြယ် ညီနောင် ၂ ဖွဲ့မှ ပဒေသာမိုင်း ၁၀ လုံးဖြင့် ဖောက်ခွဲ တိုက် ခိုက်ခဲ့ရာ ကားတစ်စီး ထိမှန်ခဲ့ပြီး မိုင်းပွိုင့်ရှေ့အကျော်၌ ထိုးရပ်သွားခဲ့ကြာင်း၊ ညပိုင်းအချိန် ဖြစ်သည့် အတွက် အကြမ်းဖက်စစ်ကောင်စီတပ်သား ထိခိုက်မှု အခြေ အနေ မသိရသေး ကြောင်း Moe Nyo Revolution Force M.N.R.F က ထုတ်ပြန်ထားသည်။ khit thit

နေအိမ်များ မီးရှို့ဖျက်ဆီးခံရသည့် ဒီပဲယင်းနှင့် ကျွန်းလှမြို့နယ်က ပြည်သူများ အကူအညီလို အပ်နေ

စစ်ကိုင်းတိုင်း ဒီပဲယင်းမြို့နယ်အရှေ့ဘက်ခြမ်းက ကျေးရွာတွေကို စစ်ကောင်စီတပ်က မီးရှို့ ဖျက်ဆီးခဲ့လို့ နေရပ်စွန့်ခွာ ထွက်ပြေးတိမ်းရှောင်နေသူတွေဟာ စားနပ်ရိက္ခာ အဝတ်အထည်နဲ့ စောင်တွေ အကူအညီလိုအပ်နေတယ်လို့ သိရပါတယ်။

ဒီဇင်ဘာ ၁ ရက်နေ့မှ စတင်ကာ တပတ်အတွင်း ဒီပဲယင်း အရှေ့ခြမ်းကကျေးရွာ ၁၀ ရွာ နီးပါးကို စစ်ကောင်စီက မီးရှို့ဖျက်ဆီးခဲ့တာလို့ ဒေ သခံတွေက ပြောပါတယ်။

အင်ပင်ရွာ ဒေသခံတဦးက “ဒီဇင်ဘာ ၁ ရက်နေ့လောက်ကစပြီး ပျူစောထီးနဲ့ စစ်သားအင်အား ၁၀၀၀ ကျော်လောက် ရောက်လာပြီး ရွာထိပ်ကစ မီးရှို့တယ်။ ဒီဘက်မှာ စစ်ဖြစ်နေတာမရှိဘဲ အကြောင်းမဲ့သက်သက် ရှို့တာ။ မီးရှို့တော့လည်း  နိုင်သမျှပစ္စည်းလေးယူပြီး ဘေးလွတ်ရာ ပြေးရတာပဲ။ ကျေးရွာ ၁၀ ရွာလောက်က ပြည်သူ ၁၀၀၀၀ ကျော်လောက် ဘေးလွှတ်ရာပြေးနေရတယ်။ အဓိက လိုအပ်နေတာက စားနပ် ရိက္ခာ၊ အဝတ်အထည်၊ စောင်ရယ်၊ လိုအပ်နေတယ်” လို့  ပြောပါတယ်။

စစ်ကောင်စီတပ်က မီးရှို့ခဲ့လို့ ဒီပဲယင်းမြို့နယ် အရှေ့ဘက်ခြမ်းက ပျော်ဘွယ်၊  မစိုးရိမ်၊ ညောင်လှ၊ ကုန်းကြီး၊  နများ၊  ယဉ်ကျေး၊ မူးရိုးကုန်း၊  အင်ပင် စတဲ့ ကျေးရွာတွေက ဒေသခံပြည်သူ ၁ သောင်းကျော်ဟာ နီးစပ်ရာဘုန်းကြီးကျောင်းတွေနဲ့ တောတောင်တွေထဲမှာ စစ်ဘေးရှောင်နေကြရပါတယ်။‌

ဒီပဲယင်းမြို့မှာ စစ်ကောင်စီတပ်က နေအိမ်တွေ မီးရှို့ဖျက်ဆီးခဲ့တဲ့အပြင် မူရိုးကုန်းကျေးရွာ၊ နများကျေးရွာက ဒေသခံပြည်သူ ၇ ဦးနဲ့ မရန်ကန်ကျေးရွာက သံဃာတပါးကို လူဝတ်လည်း ဖမ်းဆီးခဲ့ပါတယ်။ ဒေသအတွင်းမှာတော့ ပြည်သူ ၂၀ ဦးထက်မနည်း စစ်ကောင်စီတပ်က မတရား ဖမ်းဆီးထားတယ်လို့ ဒေသခံတွေက ပြောပါတယ်။

စစ်ကိုင်းတိုင်း၊ ကျွန်းလှမြို့နယ် အင်တိုင်းကျေးရွာမှာလည်း စစ်ကောင်စီတပ် စစ်ကြောင်းထိုး ဝင်ရောက်မီးရှို့ခဲ့တဲ့အတွက် နေအိမ် ၁၄၃ လုံး ပျက်စီးဆုံးရှုံးခဲ့တယ်လို့ ဒေသခံတွေက ပြောပါတယ်။

ဒီဇင်ဘာ ၆ ရက် မနက်က စစ်ကောင်စီတပ်ဖွဲ့အင်အား ၂၀၀ လောက်ဟာ အင်တိုင်းကျေးရွာကို လက်နက်ကြီးတွေနဲ့ ပစ်ခတ်ဝင်ရောက်လာပြီး ညနေ ၃ နာရီခွဲခန့်မှာ ကျေးရွာနေအိမ်တွေကို မီးရှို့ဖျက်ဆီးသွားတာလို့ ဆိုပါတယ်။

“တန့်ဆည်မြို့နယ်၊ ပုတီးရွာကို မီးရှို့သွားခဲ့တဲ့ စကစစစ်ကြောင်းက ဒီဘက်ကို ရောက်လာတာပါ။ အဲဒီနေ့ မနက်ကတည်းက အင်တိုင်းရွာကို လက်နက်ကြီးတွေနဲ့ ပစ်ခတ်ပြီး ဝင်လာတာ။ ရွာက လူတွေကတော့ အကုန်ပြေးရတာပေါ့ဗျာ။ နောက်ပြီး ရွာထဲရှိတဲ့ အိမ်တွေက သူတို့လိုချင်တဲ့ ပစ္စည်းတွေကို တနေကုန် မွှေနှောက်ရှာဖွေယူပြီးမှ ညနေပိုင်းမှာ မီးရှို့သွားကြတာ။ ရွာအိမ်ခြေတဝက်ကျော်လောက် မီးထဲပါသွားပြီ ” လို့ ဒေသခံတဦးက ပြောပါတယ်။

အဲ့ဒီနေ့က အင်တိုင်းကျေးရွာကို စစ်ကြောင်းထိုးဝင်ရောက်မီးရှို့တာဟာ စစ်ကောင်စီတပ်ရဲ့ ခမရ ၃၆၁ နဲ့ ပြည်သူ့စစ်အမည်ခံ ပျူစောထီးအဖွဲ့တွေဖြစ်တယ်လို့ သိရပြီး အင်တိုင်းကျေးရွာနဲ့ ပတ်ဝန်းကျင်ကျေးရွာတွေက ဒေသခံပြည်သူထောင်နဲ့ချီ ထွက်ပြေးတိမ်းရှောင်ခဲ့ရပါတယ်။

အင်တိုင်းကျေးရွာဟာ အိမ်ခြေ ၂၇၀ ကျော်ရှိတဲ့ ကျေးရွာဖြစ်ပြီး နေအိမ်တွေ မီးရှို့ပြီးနောက် စစ်ကောင်စီတပ်နဲ့ ပျူစောထီးပူးပေါင်းအဖွဲ့ဟာ ဒီဇင်ဘာ ၇ ရက်နေ့ မနက် ၈ နာရီခွဲလောက်မှာ အင်တိုင်းကျေးရွာကနေ တပ်စွဲရာ သဖန်းဆိပ် ဆင်ဆွယ်စခန်းဘက် ပြန်လည်ထွက်ခွာသွားတယ်လို့ သိရပါတယ်။

လက်ရှိမှာ အင်တိုင်းကျေးရွာဒေသခံပြည်သူအများစုဟာ ‌စစ်ကောင်စီတပ် မိုင်းထောင်သွားမှာကို စိုးရိမ်နေကြတဲ့အတွက် ရွာအတွင်း ပြန်မဝင်ရဲကြသေးဘဲ နီးစပ်ရာတောထဲမှာပဲ ခိုလှုံနေရတယ်လို့ သိရပါတယ်။

ရရှိထားတဲ့ စာရင်းတွေအရ  ၂၀၂၂ ခုနှစ်အတွင်း ဒီဇင်ဘာ ၆ ရက်နေ့အထိ စစ်ကောင်စီတပ်နဲ့ ပျူစောထီးပူးပေါင်းအဖွဲ့တွေရဲ့ မီးရှို့မှုကြောင့် ကျွန်း လှမြို့နယ်ရှိ ကျေးရွာပေါင်း ၁၂ ရွာမှ ပြည်သူ့နေအိမ်အလုံးပေါင်း ၇၀၀ ကျော် မီးလောင်ဆုံးရှုံးခဲ့ပါတယ်။ DVB

« Older Entries